මහනුවර දිස්ත්රික්කයේ උඩදුම්බර ප්රදේශයේ දේවහන්දිය ගම්මානයට අද (08) පස්වරු 5.05ට පමණ සුළු භූ චලනයක් සිදුව තිබේ.
එය රික්ටර් මාපකයේ ඒකක 2.2ක් ලෙස වාර්තා වී ඇති බව සඳහන් වේ.
මඬුල්ල, කලවල, මහවල, උඩපිටවල, තේමණ්ඩිය, පපුකන්ද යන ප්රදේශවල ජනතාවට මෙම කම්පනය දැනී ඇති බවද වාර්තා වේ.
කෙසේවෙතත් භූ විද්යා සමීක්ෂණ හා පතල් කාර්යාංශය පැවසුවේ එය සුළු කම්පනයක් බැවින් ජනතාව අනිසි බියක් ඇති කර ගත යුතු නොමැති බවය.
ආරක්ෂක කටයුතු පිළිබඳ අමාත්යාංශයීය උපදේශක කාරක සභාවේ රැස්වීමක් ජනාධිපති, ආරක්ෂක අමාත්ය අනුර කුමාර දිසානායක මහතාගේ ප්රධානත්වයෙන් පාර්ලිමේන්තු පරිශ්රයේදී පැවැත්විණි.
මෙහිදී පෙර පැවති කාරක සභා රැස්වීම්වලදී එළැඹි තීරණ ක්රියාත්මක වීමේ ප්රගතිය විමසා බැලීම මෙන්ම උතුරු නැගෙනහිර ප්රදේශවල ඉඩම් නිදහස් කිරීම, මාර්ග විවෘත කිරීම සහ පාසල් පවත්වා ගෙන යාම ආදිය පිළිබඳව පාර්ලිමේන්තු මන්ත්රීවරයන් විසින් බොහෝ ගැටලු ඉදිරිපත් කර තිබේ.
ඒ අනුව ඒවාට සාධනීය විසඳුම් ලබා දීමට ජනාධිපතිවරයා නිලධාරීන්ට අවශ්ය උපදෙස් ලබා දීම සිදු වූ අතර මෙම කටයුතු සිදු කරගෙන යාමේදී තවදුරටත් පවතින බාධා සහ ඊට ගත යුතු පියවර පිළිබඳව ද සාකච්ඡා විය.
එසේම ආරක්ෂක අංශ සාමාජිකයන්ගේ සුබසාධන කටයුතු, එක්සත් ජාතීන්ගේ සාමසාධක හමුදා සඳහා වැඩිපුර පිරිස් යොමු කිරීම ආදී කරුණු පිළිබඳව ද මෙහිදී සාකච්ඡා කර ඇත.
ශ්රී ලංකාවට ගිනිකොන දෙසින් බෙංගාල බොක්කෙහි පවතින ගැඹුරු පීඩන තත්ත්වය නිරිත දිග බෙංගාල බොක්ක හරහා බටහිරට බරව වයඹ දෙසට ගමන් කර හෙට (9) පස්වරු 5.30 සිට රාත්රී 11.30 දක්වා කාලය තුළ හම්බන්තොට සහ කල්මුණේ අතරින් ශ්රී ලංකා වෙරළ තීරය හරහා රට තුලට ඇතුළුවේයැයි කාලගුණ විද්යා දෙපාර්තමේන්තුව පුරෝකථනය කරයි.
ඒ අනුව කාලගුණ විද්යා දෙපාර්තමේන්තුව මඟින් නිකුත් කර ඇති පුරෝකථන අනුව මධ්යම කඳුකරයේ නැගෙනහිර බෑවුමේ පහත සඳහන් කර ඇති ප්රාදේශීය ලේකම් කොට්ඨාශවලට මෙම වර්ෂාවෙන් බලපෑම් ඇතිවිය හැකියි.
ඒ අනුව, පවතින වර්ෂාව සහ මෑතකදී ඇති වු නායයෑම් හා භූ අස්ථාවර තත්ත්වයන් සැලකිල්ලට ගනිමින්, එම ප්රදේශවල ජාතික ගොඩනැගිලි පර්යේෂණ සංවිධානය විසින් පරීක්ෂා කර, නායයෑම් අවදානමට ලක්විය හැකියැයි හඳුනාගත් ස්ථාන, දැනටමත් නායයෑම් පූර්ව ලක්ෂණ පෙන්වන ස්ථාන, බෑවුම්, නිම්න හා මිනිසා විසින් සකස් කළ කණ්ඩි ආශ්රිතව ජීවත්වන ජනතාව ඇති විය හැකි නායයෑම් තත්ත්වයන් සලකා, හෙට (9) පස්වරු කාලයට පෙර පහත ස්ථානයන්ගෙන් ඉවත් වී සුරක්ෂිත ස්ථාන කරා යොමු වන ලෙස දන්වා ඇත.
මහනුවර දිස්ත්රික්කය- මිනිපේ, මැදදුම්බර, පන්විල, දොළුව, දෙල්තොට සහ උඩුදුම්බර ප්රාදේශීය ලේකම් කොට්ඨාශ.
බදුල්ල දිස්ත්රික්කය- කන්දකැටිය, පස්සර, බදුල්ල, ලුණුගල, හපුතලේ, ඇල්ල, බණ්ඩාරවෙල, හාලි ඇල, වැලිමඩ, මීගහ කිවුල සහ ඌව
පරණගම
මාතලේ දිස්ත්රික්කය- විල්ගමුව, අඹන්ගඟ කෝරළේ, රත්කොට, නාඋල, උකුවෙල සහ ලග්ගල පල්ලේගම
නුවරඑළිය දිස්ත්රික්කයේ- වලපනේ, නිලදණ්ඩාහින්න, මතුරට, හඟුරන්කෙත සහ නුවරඑළිය
පුරෝකථනය කොට ඇති පරිදි වර්ෂාමය තත්ත්වයක් ඇති වී නායයෑම් ආපදා තත්ත්වයක් ඇති වුවහොත්, එම ස්ථාන ජාතික ගොඩනැගිලි පර්යේෂණ සංවිධානයේ නිලධාරීන් පැමිණ පරීක්ෂා කොට අවශ්ය උපදෙස් ලබාදෙන තෙක් ආරක්ෂිත ස්ථානයන්හිම රැදී සිටින මෙන් ද දැනුම් දී ඇත.
ආපදා තත්ත්වයකදී භාවිතා කිරීම සඳහා අමෙරිකාව විසින් ශ්රී ලංකාවට හෙලිකොප්ටර් යානා 10ක් ප්රධානය කිරීමට තීරණය කර තිබේ.
ශ්රී ලංකාවේ අමෙරිකානු තානාපති ජූලි චන්ග් මහත්මිය සිය ‘X’ ගිණුමේ සටහනක් තබමින් මේ බව තහවුරු කර ඇත.
‘දිට්වා’ සුළි කුණාටුව වැනි ස්වාභාවික ආපදාවලදී පුද්ගල සෙවීම් සහ ගලවාගැනීමේ මෙහෙයුම් සඳහා මෙම හෙලිකොප්ටර් යානා භාවිතා කළ හැකි බව ඇය පවසයි.
ඒ අනුව මෙම යානා වසරේ මුල් භාගයේදී ශ්රී ලංකාවට ලැබෙනු ඇති බවත්, ඒවා ශ්රී ලංකා ගුවන් හමුදාවට ලබාදීමට නියමිත බවත් සිය ‘X’ ගිණුමේ දක්වා ඇත.
ශ්රේණිවල මොඩියුල සඳහා වෙබ් අඩවි ඇතුළත් නොකරන්නැයි උපදෙස් ලබා දී තිබියදී එවැන්නක් සිදුවීම ගැන විමර්ශනයක් සිදුකරන බව අධ්යාපන අමාත්ය අග්රාමාත්ය ආචාර්ය හරිනි අමරසූරිය මෙනවිය පවසයි.
එමෙන්ම එහිදී අග්රාමාත්යවරිය සඳහන් කළේ ඉදිරියේ දී පෙළපොත් මුද්රණය කිරීමේ වගකීම අධ්යාපන ප්රකාශන දෙපාර්තමේන්තුවට ලබා දෙන බවය.
6 ශ්රේණිය ඉංග්රීසි මොඩියුලයේ මතුවු ගැටලුකාරී තත්වය පිළිබද කරුණු පැහැදිලි කිරීම සදහා අස්ගිරි පාර්ශ්වයේ මහානායක අතිපූජ්ය වරකාගොඩ ශ්රී ඥාණරතන මහා නාහිමි ඇතුලු මහා සංඝරත්නය බැහැදුටු අවස්ථාවේ අග්රාමාත්යවරිය මේ බව කියා සිටියාය.
එහිදී වැඩිදුරටත් අදහස් දැක්වූ අග්රාමාත්ය ආචාර්ය හරිනි අමරසූරිය මෙනවිය
”පැහැදිලියි හාමුදුරුවනේ වැරැද්දක් වෙලා. ඒක අපිට නැහැ කියන්න බැහැ කිසිසේත්ම. දැන් ඔව් ක්රියාවලියේ දුර්වලතාවයක් තියෙනවා. එහෙම නැත්නම් මෙතන වෙන විදිහකට මේක ඇතුල් වුණාද කියන එක හොයාගෙන තමා අපි CID එකට ඒ පැමිණිල්ල කරලා තියෙන්නේ. ඒක එකසිය හයක් තියෙනවා. ඒ එකසිය හයම අපි අමාත්යංශයට ගෙනල්ලා එකින් එක බලනවා හාමුදුරුවනේ. ආයිත්. ඒක සාමාන්යයෙන් කළ යුතු දෙයකුත් නෙමෙයි. අමාත්යංශයෙන් එහෙම පොත් බලන් නැහැ. ඒක ජාතික අධ්යාපන ආයතනයෙන් තමා බලන්නේ. නමුත් මේ අවස්ථාවේ මේ ප්රශ්නේ නිසා එකින් එක අපි බලනවා. ඒවයි තුලත් අපිට යම් යම් වැරදි හම්බවෙලා තියෙනවා..”
කටුනායක ගුවන් තොටුපොළෙන් කුවේට් රාජ්යයේ කුවේට් සිටි ජාත්යන්තර ගුවන් තොටුපොළ බලා පිටත්ව ගිය ශ්රී ලන්කන් ගුවන් සේවයේ යූ.එල්.- 229 දරන ගුවන් යානය, කාර්මික දෝශයකට ලක් වීම නිසා පැය 02යි විනාඩි 21කට පසුව යළිත් කටුනායක ගුවන් තොටුපොළ වෙත ගෙන්වා ගෙන තිබේ.
ශ්රී ලන්කන් ගුවන් සේවයේ යූ.එල්.- 229 දරන මෙම ගුවන් යානය අද (08) සවස 06.44ට කටුනායක ගුවන් තොටුපොළෙන් කුවේට් රාජ්යයේ කුවේට් සිටි ජාත්යන්තර ගුවන් තොටුපොළ බලා පිටත්ව ගොස් තිබුණි.
එහෙත් මෙම ගුවන් යානයෙහි හයිඩ්රොලික් පද්ධතියෙහි හටගත් කාර්මික දෝශයක් නිසා, එහි ගුවන් නියමුවා කටුනායක ගුවන් තොටුපොළ පාළක මෙහෙයුම් මැදිරිය මේ පිළිබද දැනුවත් කිරීමෙන් පසුව ගුවන් යානය ආපසු හරවා ගෙන පැමිණෙන ලෙස දැනුම් දී තිබේ.
ඒ අනුව ක්රියාත්මක වූ ගුවන් නියමුවා රාත්රී 09.05ට තම ගුවන් යානය නිරුපද්රිතව, ආරක්ෂාකාරීව කටුනායක ගුවන් තොටුපොළ වෙත ගොඩබැස්සවීමට පියවර ගෙන තිබුණි.
මෙම ගුවන් යානයෙහි ගුවන් මගීන් 179 දෙනෙකු සහ ගුවන් යානා කාර්යය මණ්ඩලය 08 දෙනෙකු සිට ඇති බවද සඳහන්.
කෙසේවෙතත් මේ පිළිබඳව අදහස් දක්වමින් ශ්රී ලන්කන් ගුවන් සේවයේ ආයතනික සන්නිවේදන අංශයේ ප්රධානී දීපාල් පෙරේරා මහතා පැවසුවේ මෙම ගුවන් යානයෙහි වූ ගුවන් මගීන් වෙනත් විකල්ප ගුවන් යානා මගින් කුවේට් රාජ්යය වෙත යොමු කිරීමට පියවර ගත් බවය.
සේවක අර්ථසාධක අරමුදල සහ සේවක භාරකාර අරමුදල වෙනුවට විශ්රාම වැටුපක් ගෙවීමට රජය සූදානම් බවට පළවන වාර්තා අසත්ය බව කම්කරු අමාත්ය ආචාර්ය අනිල් ජයන්ත මහතා පවසයි.
අද (09) මාධ්ය වෙත ප්රකාශයක් නිකුත් කරමින් ඔහු පැවසුවේ ආණ්ඩුව එවැනි තීන්දුවක් ගෙන නොමැති බවය.
මෙම මුදල් මහජනතාවගේ මුදල්වන බවත්, ඔවුන්ට විශ්රාම ගිය පසු කිසිදු බාධාවකින් තොරව එම මුදල් ලබා ගත හැකි බවත් ඒ මහතා වැඩිදුරටත් පැවසීය.
එමෙන්ම මෙම මුදලින් 30%ක පමණ ප්රමාණයක් හදිසි අවශ්යතාවයන් සඳහා ලබා ගැනීමේ හැකියාව පවතින බවද මෙහිදී අදහස් දක්වමින් අමාත්යවරයා කියා සිටියේය.
එහිදී ඔහු සඳහන් කළේ සිය ආණ්ඩුව කිසිදු පුද්ගලයෙකුගේ ප්රතිලාභයක් කප්පාදු කිරීමට ක්රියා නොකරන බවත්, තව තවත් ප්රතිලාභ ලබා දීම උදෙසා පමණක් කටයුතු කරන බවය.
වැඩිදුරටත් අදහස් දැක්වූ කම්කරු අමාත්ය ආචාර්ය අනිල් ජයන්ත ප්රනාන්දු මහතා,
“මහජනතාවගේ ලේ දහඩියෙන් ඉතිරි වෙච්ච මුදල ඔවුන්ගේ අවශ්යතාවලට තමා පාවිච්චි වෙන්නේ. ඒ වගේම අදහස් මතු වෙනවා සමාජයෙන් විශ්රාම වැටුපක් ලබා ගන්න පුලුවන්ද කියන කාරණාව.
විශ්රාම වැටුපක් අපිට ලබා ගන්න පුලුවන් නම් හොඳයි. මේ ගැන සමාජයේ කතාවක් නිර්මාණය වෙලා තියෙනවා. නමුත් ආණ්ඩුවෙන් කිසිදු තීරණයක් අරගෙන නෑ මේ EPF එකේ තියන මුදල් විශ්රාම වැටුපකට හරවලා ඒ තනි දීමනාව වෙනුවට විශ්රාම වැටුප් ගෙවනවා කියලා” යැයි ඔහු පැවසීය.
සංචාරක පාකිස්තාන කණ්ඩායමට එරෙහි පළමු විස්සයි20 ක්රිකට් තරගාවලියෙන් කඩුලු 6ක පරාජයක් භාරගැනීමට සත්කාරක ශ්රී ලංකා කණ්ඩායමට අද (7) සිදුවිය.
ඒ අනුව තරග 3කින් යුත් තරගාවලිය තරග 1-0ක් ලෙස පාකිස්තානය තරගාවලියේ පෙරමුණ ගත්තේය.
මෙහිදී ශ්රී ලංකා කණ්ඩායම ලබාදුන් ලකුණු 129ක පහසු ඉලක්කය කඩුලු 4ක් දැවී තිබියදී තරගයේ 17( 16.4)වන පන්දුවාරයේදී පසුකර යෑමට පාකිස්තානය සමත් විය.
විශිෂ්ට පිතිහරඹයක නිරත වූ සහිබ්සදා ෆර්හාන් පන්දු 36කට මුහුණදෙමින් ලකුණු 51ක් රැස්කර පාකිස්තානු ජය පහසු කළේය.
ශ්රී ලංකාව වෙනුවෙන් මහීෂ් තීක්ෂණ, දුෂ්මන්ත චමීර, වනිඳු හසරංග හා ධනංජය ද සිල්වා එක් කඩුල්ල බැගින් දවාගත්හ.
ඉදිරියේදී පැවැත්වීමට නියමිත ඉන්දීය ප්රිමියර් ලීග් (IPL) තරගාවලිය බංග්ලාදේශය තුළ විකාශනය කිරීම තහනම් කිරීමට එරට රජය පියවර ගෙන තිබේ.
බංග්ලාදේශ ක්රිකට් කණ්ඩායමේ ප්රධාන වේගපන්දු ක්රීඩකයෙකු වන මුස්තාෆිසුර් රහ්මාන් IPL තරගාවලියෙන් ඉවත් කිරීමට ඉන්දියානු ක්රිකට් පාලක මණ්ඩලය ගත් තීරණයට ප්රතිචාර ලෙස මෙම පියවර ගෙන ඇති බව වාර්තා වෙයි.
BCCI ගත් මෙම තීරණය බංග්ලාදේශ ජනතාව අතර දැඩි කනස්සල්ලක් ඇති කර ඇති අතර, මුස්තාෆිසුර් රහ්මාන් IPL තරගාවලියෙන් ඉවත් කිරීමට හේතුවක් මේ දක්වා නිල වශයෙන් ප්රකාශ කර නොමැති බවද සඳහන් වේ.
මෙම සිදුවීම බංග්ලාදේශය සහ ඉන්දියාව අතර ක්රීඩා සබඳතා තුළ නව උණුසුම් තත්ත්වයක් උද්ගත කළ හැකි බව විශ්ලේෂකයන් පෙන්වා දෙති.
මේ අතර, එළැඹෙන විස්සයි20 ලෝක කුසලාන ක්රිකට් තරගාවලියේ ඉන්දියාවේ පැවැත්වීමට නියමිත තරග සඳහා බංග්ලාදේශ කණ්ඩායම ඉන්දියාවට යාම ප්රතික්ෂේප කර ඇති බව ‘Cricinfo’ වෙබ් අඩවිය වාර්තා කරයි.
දෙරට අතර පවතින දේශපාලනික නොසන්සුන්කාරී වාතාවරණය හමුවේ, බංග්ලාදේශ ක්රීඩකයින්ගේ ආරක්ෂාව සහ යහපැවැත්ම සැලකිල්ලට ගනිමින් මෙම තීරණය ගත් බවද සඳහන් වේ.
ඒ අනුව, එම තරගාවලියේදී ඉන්දියාවේ පැවැත්වීමට නියමිත බංග්ලාදේශ තරග ශ්රී ලංකාවේදී පැවැත්වීමට ඉල්ලීමක් කර ඇති බවද වාර්තා වේ.
ශ්රී ලංකාව සහ ඉන්දියාව සම සත්කාරකත්වය යටතේ ලබන මාසයේ ආරම්භ වීමට නියමිත විස්සයි20 ලෝක කුසලාන තරගාවලියේදී, බංග්ලාදේශ කණ්ඩායම කොල්කටාහිදී තරග තුනක් ක්රීඩා කිරීමට නියමිතව තිබුණි.
එම අතර, ඉදිරියේදී පැවැත්වෙන IPL තරගාවලියේදී කොල්කටා කණ්ඩායම වෙනුවෙන් ක්රීඩා කිරීමට නියමිතව සිටි මුස්තාෆිසුර් රහ්මාන් හදිසියේම කණ්ඩායමෙන් නිදහස් කිරීම මෙම නොසන්සුන්තාවට ප්රධාන වශයෙන් බලපා ඇති බව සඳහන්ය.
බංග්ලාදේශයේ වෙසෙන සුළු ජාතීන්ට සිදුවන බවට වාර්තා වන හිරිහැරවලට විරෝධය පළ කිරීමක් ලෙස මුස්තාෆිසුර් රහ්මාන් එලෙස ඉවත් කර ඇති බවටද වාර්තා පළවෙයි.
බංග්ලාදේශ කණ්ඩායමේ විස්සයි20 ලෝක කුසලාන තරග පැවැත්වෙන ස්ථාන සම්බන්ධයෙන් මේ වනවිට කිසිදු වෙනසක් සිදුකර නොමැති බව ජාත්යන්තර ක්රිකට් කවුන්සිලය පවසයි.
ජාත්යන්තර ක්රිකට් කවුන්සිලය සඳහන් කළේ, අදාළ තරග පැවැත්වීමට ආරක්ෂක අවදානමක් මෙතෙක් හඳුනාගෙන නොමැති බවය.
කෙසේ වෙතත්, මෙම කරුණ සම්බන්ධයෙන් අවසන් තීරණය ජනවාරි 10 වැනිදාට පෙර ගනු ලබන බවද ICC වැඩිදුරටත් සඳහන් කර ඇත.
