Author: Shashi Maduranga

2025 වර්ෂයේ දැකගත හැකි විශාලතම උල්කාපාත වර්ෂාව අද (16) මධ්‍යම රාත්‍රියේදී සහ හෙට උදෑසන දැකබලා ගත හැකි බව අභ්‍යවකාශ විද්‍යාඥ සහ ඉංජිනේරු කථිකාචාර්ය ගිහාන් වීරසේකර මහතා පවසයි.

ඒ මහතා පැවසුවේ සිංහ තරුකාරාශිය ආශ්‍රිතව මෙම උල්කාපාත වර්ෂාව සිදුවන බැවින් එය ලියෝනිඩ්ස් වශයෙන් නම්කර ඇති බවය.

එමෙන්ම මෙම උල්කාපාත වර්ෂාව හෙට පෙරවරු 4.00 – 5.00 දක්වා කාලයේ දී ඉතා හොඳින් නිරීක්ෂණ විය හැකි බවද ඔහු වැඩිදුරටත් පැවසීය.

එහිදී අදහස් දැක්වූ විද්‍යාඥ සහ ඉංජිනේරු කථිකාචාර්ය ගිහාන් වීරසේකර මහතා,

”අද රාත්‍රී කාලයේදී සහ හෙට අලුයම් කාලයේදී අපිට වසරේ ප්‍රධානතම උල්කාපාත වර්ෂාවක් නිරීක්ෂණය කරන්න පුළුවන් වෙනවා. මේ උල්කාපාත වර්ෂාව තමයි අපි ලියෝනිඩ්ස් උල්කාපාත වර්ෂාව කියලා නම් කරන්නේ. මේක කියලා නම් කරන්න හේතු වෙලා තියෙන්නේ මේක අපිට සාමාන්‍යයෙන් නිරීක්ෂණය කරන්න පුළුවන් වෙන්නේ ලියෝ එහෙම නැත්නම් සිංහ කියන තාරුකාරාශිය ආශ්‍රිතව වීම නිසයි. වල්ගා තරුව ගමන් කරපු මාර්ගය හරහා පෘථිවිය ගමන් කරද්දී ඒ වල්ගා තරුවෙන් ඉවත් වෙලා ගිය කුඩා දූවිලි කොටස් වගේ දේවල්, පෘථිවි වායුගෝලය සමඟ අන්තර් ක්‍රියා කිරීමෙන් තමයි මේ උල්කාපාත වර්ෂාව ඇති වෙන්නේ. ඒ වගේම මේ සම්බන්ධ විශේෂ කරුණක් තමයි, මේ උල්කාපාත වර්ෂාව ඇතිවන ඒ දූවිලි කොටස්වල වේගය ටිකක් වැඩියි. ඒක හින්දා මේ උල්කාපාත වර්ෂාවේදී එම කොටස් පෘථිවි වායුගෝලය සමඟ වැඩි වේගයකින් ඝට්ටනය වෙන හින්දා, අපිට මේ උල්කාපාත වැඩි දීප්තියකින් යුතුව බලන්න පුළුවන් වෙනවා. නැගෙනහිර දිශාවෙන් මේක මතුවෙලා රාත්‍රි කාලයේ ඒ කියන්නේ අලුයම් කාලය වෙද්දි මේක අහසේ දුරට ගමන් කරනවා. ඒක හින්දා මේ උල්කාපාත වර්ෂාව බලන්න සුදුසුම වෙලාව වෙන්නේ සාමාන්‍යයෙන් උදේ 4.00 සහ 5.00 වගේ කාලය. මේ කාලය ඇතුළත අපිට මේ උල්කාපාත වර්ෂාව නිරීක්ෂණය කරනවා නම්, සාමාන්‍යයෙන් පැයකට උල්කාපාත 15ක් 20ක් වගේ අතර ප්‍රමාණයක් නිරීක්ෂණය කරන්න පුළුවන් වෙනවා.”

මුද්‍රණ කාඩ්පත් නොමැති වීම හේතුවෙන් නවතා තිබූ රියදුරු බලපත්‍ර මුද්‍රණය කිරීමේ කටයුතු යළි ආරම්භ කර තිබේ.

පසුගිය සතියේ සිට එම කටයුතු ආරම්භ කර ඇති බව මෝටර් රථ ප්‍රවාහන දෙපාර්තමේන්තුව සඳහන් කළේය.

ඒ අනුව දෛණිකව රියදුරු බලපත්‍ර 6,000ක් පමණ මුද්‍රණය කිරීමට සැළසුම් කර ඇත.

රියදුරු බලපත්‍ර මුද්‍රණය කිරීම සඳහා අවශ්‍ය කාඩ්පත් නොමැති වීම හේතුවෙන් පසුගිය කාලයේ 350,000කට ආසන්න රියදුරු බලපත්‍ර සංඛ්‍යාවක් මුද්‍රණය කිරීමට ගොඩගැසී ඇති බව වාර්තා වේ.

එම මුද්‍රණ කාඩ්පත් සපයා ගැනීමත් සමඟ අදාළ රියදුරු බලපත්‍ර මුද්‍රණය කිරීමේ කටයුතු ආරම්භ කර ඇති අතර කඩිනමින් ගොඩගැසී ඇති රියදුරු බලපත්‍ර මුද්‍රණය කර අවසන් කිරීමට සැළසුම් කර ඇති බව ද මෝටර් රථ ප්‍රවාහන දෙපාර්තමේන්තුව පැවසීය.

මේ අතර ඉදිරියේදී රියදුරු බලපත්‍රයක් ලබා ගැනීම සඳහා ඉල්ලුම් කර දින 14ක් ඇතුළත එය නිකුත් කිරීමට මෝටර් රථ ප්‍රවාහන දෙපාර්තමේන්තුව සැළසුම් කර තිබේ.

ඒ සඳහා සියලුම දිස්ත්‍රික්ක මාර්ග ගත ක්‍රමය ඔස්සේ සම්බන්ධ කිරීමට සැළසුම් කර ඇති අතර මේ වන විටත් දිස්ත්‍රික්ක කිහිපයක් මාර්ග ගත ක්‍රමය ඔස්සේ සම්බන්ධ වී ඇති බව මෝටර් රථ ප්‍රවාහන දෙපාර්තමේන්තුව සදහන් කළේය.

වේරහැර ප්‍රධාන කාර්යාලයට අමතරව හම්බන්තොට, අනුරාධපුර යන දිස්ත්‍රික්ක කාර්යාලවලද රියදුරු බලපත්‍ර කාඩ්පත් මුද්‍රණය කිරීමේ කටයුතු සිදුවන අතර ඉදිරියේදී කුරුණෑගල දිස්ත්‍රික්කයේ ද රියදුරු බලපත්‍ර මුද්‍රණය කිරීමේ කටයුතු ආරම්භ කිරීමට සැළසුම් කර තිබේ.

තද වැසි පිළිබඳ අවවාදාත්මක නිවේදනයක් කාලගුණ විද්‍යා දෙපාර්තමේන්තුව විසින් නිකුත් කර තිබේ.

අද (16) පස්වරු 12.30ට නික්තුකරන ලද එම නිවේදනය ඉදිරි පැය 24 දක්වා වලංගු වන බව එම දෙපාර්තමේන්තුව පවසයි.

දිවයිනට ආසන්නව පවතින අඩු පීඩන කලාපය හේතුවෙන් උතුරු සහ නැගෙනහිර පළාත්වල දැනට පවතින වැසි තත්ත්වය තවදුරටත් අපේක්ෂා කෙරේ.

උතුරු සහ නැගෙනහිර පළාත්වල විටින් විට වැසි හෝ ගිගුරුම් සහිත වැසි ඇති වේ.

එම ප්‍රදේශ වල ඇතැම් ස්ථානවලට මි.මී. 100ට වැඩි තද වැසි ඇතිවිය හැකි බව කාලගුණ විද්‍යා දෙපාර්තමේන්තුව නිවේනදය කරයි.

තද වැසි, තද සුළං සහ ප්‍රබල අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස කාලගුණ විද්‍යා දෙපාර්තමේන්තුව ජනතාවට දැනුම් දෙයි.