Category: news_sub

පොලිස් නිලධාරීන් දෙදෙනකුට පහරදී නිලඇඳුම ඉරා දැමූ බව කියන ලොරි රථ රියදුරෙකු අත්අඩංගුවට ගත් බව කළුතර දකුණ මූලස්ථාන පොලිසිය පවසයි.

අනතුරුදායක ලෙස ලොරි රථය පැදවූ රියදුරා අත්අඩංගුවට ගැනීමට ගිය අවස්ථාවේදී මෙම ප්‍රහාරය එල්ලවී තිබේ.

මෙසේ අත්අඩංගුවට ගෙන ඇත්තේ පයාගල ප්‍රදේශයේ පදිංචි 31 හැවිරිදි පුද්ගලයෙකි.

සැකකරු පළාතොට පාර දෙස සිට කටුකුරුන්ද දෙසට ලොරි රථය  ධාවනය කර ඇති අතර, නාගොඩ හන්දියේ මාර්ග බාධකයේදී නවතා පරීක්ෂා කිරීමේදී ඇතිවූ කතාබහකින් පසුව පහරදීම සිදුකර ඇති බව පොලිසිය සඳහන් කරයි.

පහර කෑමට ලක්වූ පොලිස් නිලධාරීන් දෙදෙනා නාගොඩ ශික්ෂණ රෝහලට ඇතුළත් කර ඇති අතර, සැකකරු විසින් එල්ල කරන ලද පිහිතල ප්‍රහාරයකින් එක් නිලධාරියකුගේ වම් අතෙහි කැපුම් තුවාලයක් සිදුවී ඇති බවද පොලිසිය පවසයි.

සිද්ධිය සම්බන්ධයෙන් අත්අඩංගුවට ගත් සැකකරු කළුතර මහේස්ත්‍රාත් අධිකරණයට ඉදිරිපත් කිරීමට නියමිතය.

කළුතර – සම්පත් කුලරත්න

මාකොළ ප්‍රදේශයේ ව්‍යාපාරිකයෙකු කාය වර්ධන මධ්‍යස්ථානයකදී වෙඩිතබා ඝාතනය කිරීමට කණ්ඩායමක් සූදානම් වන බවට තොරතුරක් බස්නාහිර උතුර අපරාධ කොට්ඨාසයේ ස්ථානාධිපති ප්‍රධාන පොලිස් පරීක්ෂක ලින්ටන් සිල්වා මහතාට ලැබී තිබේ.

ඒ අනුව මාකොළ අවට පොලිස් ආරක්ෂාව දැඩි කිරීමට පියවර ගෙන ඇත.

එවන් පසුබිමක එම ප්‍රදේශයේ මූල්‍ය ආයතනයකට තරුණියන් දෙදෙනෙකු පැමිණ එහි කළමනාකරුද මුණගැසී, ඔහුගේ විසිටින් කාඩ් පතක්ද ලබාගෙන එම ස්ථානය ඇතුළත සහ පිටත ඔවුන්ගේ ජංගම දුරකථන මගින් රූගතකර තිබේ.

එය දුටු කාන්තාවක විසින් කළ දැනුම්දීමක් මත එහි පැමිණි පොලීසිය අදාළ තරුණියන් දෙදෙනාගේ ජංගම දුරකථනය පරීක්ෂාකර ඇති අතර, එහිදී අනාවරණ වී ඇත්තේ  අදාළ මූල්‍ය ආයතනයේ වීඩියෝ දර්ශන ඩුබායිහි සැඟව සිටින සංජු නම් අපරාධකරුට යොමුකර ඇති බවය.

සංජු නැමැත්තා එම ජංගම දුරකථනයට කෙටි පණිවුඩයක් එවා තිබූ අතර එහි දැක්වුණේ “පෑලියගොඩ යුනිට් එකෙන් ඉන්නවා. ඉක්මනට පලයල්ලා” යනුවෙනි.

එමෙන්ම අදාළ මූල්‍ය ආයතනයේ කළමනාකරුගේ ඡායාරූපයක්ද සංජු විසින් තරුණියන්ට එවා තිබු බව පොලීසිය පවසයි.

ඒ අනුව තරුණියන්ගෙන් සිදුකළ වැඩිදුර ප්‍රශ්නකිරීම් වලදී ඔවුන් අනාවරණ කර ඇත්තේ අපරාධකරුවන් වන කරන්දෙණිය සුද්දාගේ මස්සිනා ඝාතනය කිරීමේ සැලසුමක් පැවති අතර ඒ වෙනුවෙන් ඔත්තු බැලීම සඳහා තමන් එහි පැමිණි බවය.

පසුගියදා අකුරේගොඩදී ලොකුපැටීගේ නීතිඥවරයා කරන්දෙණිය සුද්දාගේ පාර්ශ්වය විසින් ඝාතනය කිරීමේ සිද්ධියට පළිගැනීමක් ලෙස, සුද්දාගේ මස්සිනා ඝාතනය කිරීමට ලොකුපැටී සැලසුම්කර ඇති බව විමර්ශන වලදී අනාවරණ වී තිබුණි.

කංජිපානි ඉම්රාන් විසින් ඒ සඳහා වෙඩික්කරුවකු සූදානම් කර තිබූ බවද තම්මිට අවිශ්ක නමැති අපරාධකරුවා විසින් යතුරුපැදිකරු සූදානම්කර තිබූ බවද විමර්ශන වලදී හෙළිවී ඇත.

කෙසේවෙතත්, ඔවුන් ඝාතනය කිරීමට සැලසුම් කළ මූල්‍ය ආයතන කළමනාකරු කරන්දෙණිය සුද්දාගේ මස්සිනා නොවන බවත්, ඔවුන් වැරදීමකින් අදාළ පුද්ගලයා ඉලක්ක කර ඇති බවත් පොලීසිය පවසසයි.

පොලීසියේ ආරක්ෂක වැඩපිළිවෙළ හේතුවෙන් අපරාධකරුවන්ගේ උත්සාහය එලෙස ව්‍යර්ථ වී තිබුණි.

සිද්ධිය පිළිබඳවද වැඩිදුර විමර්ශන ක්‍රියාත්මක වේ.

සංවිධානාත්මක අපරාධකරුවෙකු විසින් මත්ද්‍රව්‍ය ජාවාරමෙන් උපයාගත් මුදල් භාවිත කරමින් මිලදී ගෙන ඇතැයි සැලකෙන රුපියල් කෝටි 3ක් පමණ වටිනා දේපොළක් ක්‍රියා විරහිත කිරීමට නීතිවිරෝධී වත්කම් විමර්ශන කොට්ඨාසය පියවර ගෙන තිබේ.

විදෙස්ගතව සිටියදී පසුගියදා මෙරටට රැගෙන එන ලද සංවිධානාත්මක අපරාධකරුවෙකු විසින් මත්ද්‍රව්‍ය ජාවාරමෙන් උපයාගත් මුදල් භාවිත කරමින් ඔහුගේ දියණියගේ නමින් දේපොළක් මිලදී ගෙන ඇති බවට ලැබුණු පැමිණිල්ලක් මත එම කොට්ඨාසය විසින් විමර්ශන ආරම්භ කර තිබුණි.

ඒ අනුව සිදුකළ විමර්ශනවලදී එම පුද්ගලයා විසින් මත්ද්‍රව්‍ය ජාවාරමෙන් උපයාගත් මුදල් භාවිත කරමින් මිලදී ගෙන ඇති බවට සැක කෙරෙන පන්නිපිටිය ප්‍රදේශයේ පිහිටි දෙමහල් නිවසක් සහිත රුපියල් කෝටි 3ක් පමණ වටිනා ඉඩමක් හඳුනාගෙන තිබේ.

මුදල් විශුද්ධිකරණය වැළැක්වීමේ පනත යටතේ 2026 මාර්තු 05 වන දින සිට දින 07ක කාලයක් සඳහා එම දේපොළ ක්‍රියා විරහිත කිරීමට නියෝග නිකුත් කර ඇති බව පොලීසිය සඳහන් කළේය.

මෙම සිද්ධිය සම්බන්ධයෙන් නීතිවිරෝධී වත්කම් විමර්ශන කොට්ඨාසය විසින් වැඩිදුර විමර්ශන සිදු කරමින් පවති.

රාජ්‍ය බුද්ධි සේවයේ හිටපු ප්‍රධානී විශ්‍රාමික මේජර් ජෙනරාල් සුරේෂ් සලේ මහතා ත්‍රස්තවාදය වැළැක්වීමේ පනත යටතේ අත්අඩංගුවට ගෙන රඳවා ගැනීම අභියෝගයට ලක් කරමින් ශ්‍රේෂ්ඨාධිකරණයට මූලික අයිතිවාසිකම් පෙත්සමක් ඉදිරිපත් කර තිබේ.

ශ්‍රී ලංකා ගුවන් හමුදාවේ විශ්‍රාමික නිලධාරියෙකු වන ශාන්ත ජයතිලක මහතා විසින් මෙම පෙත්සම ඉදිරිපත් කර ඇත.

එහි වගඋත්තරකරුවන් ලෙස ආරක්ෂක අමාත්‍යවරයා, ආරක්ෂක අමාත්‍යාංශයේ ලේකම්වරයා, මහජන ආරක්ෂක අමාත්‍යාංශයේ ලේකම්වරයා, පොලිස්පතිවරයා සහ අපරාධ පරීක්ෂණ දෙපාර්තමේන්තුව නම් කර තිබේ.

පෙත්සම්කරු කියා සිටින්නේ ත්‍රස්තවාදය වැළැක්වීමේ පනත යොදාගත හැක්කේ රටේ ඒකීයභාවය සහ භෞමික අඛණ්ඩතාවය බිඳහෙළීමේ ක්‍රියාවල නිරත වන පාර්ශවයන්ට සහ නීත්‍යානුකූලව පත් වූ ආණ්ඩු පෙරළා දැමීමට ඍජුව හෝ වක්‍රව දායකත්වය දැක්වූ පුද්ගලයින්ට එරෙහිව පමණක් බවය.

නමුත් සුරේෂ් සලේ මහතාට එවැනි වැරදි ක්‍රියා සම්බන්ධයෙන් චෝදනා එල්ල වී නොමැති බව පෙත්සම්කරු පෙන්වා දේ.

රටේ භෞමික අඛණ්ඩතාව බිඳහෙළමින් නීත්‍යානුකූලව තේරී පත් වූ රජය පෙරළා දැමීමට ක්‍රියාකළ එල්.ටී.ටී.ඊ සංවිධානයේ ක්‍රියාකාරකම්වලට එරෙහිව එම පනත භාවිතා කිරීමට හැකියාව ඇති අතර, 2022 වසරේ සිදුවූ අරගලයට එරෙහිව ද මෙම පනත භාවිතා කිරීමට හැකියාව තිබූ බව පෙත්සම්කරු සඳහන් කරයි.

නමුත් පාස්කු ප්‍රහාරය තුළ එවැනි තත්ත්වයක් දක්නට නොලැබෙන බව පෙන්වා දෙන පෙත්සම්කරු, එය හුදෙක් ආගමික දෘෂ්ටිවාදයක් පදනම් කරගෙන සිදුවී ඇති බවට කරුණු ඉදිරිපත් වී තිබෙන බවත් සඳහන් කළේය.

එසේම සුරේෂ් සලේ මහතාට එරෙහිව ත්‍රස්තවාදය වැළැක්වීමේ පනත යටතේ එල්ල වී ඇති චෝදනා සහ සාක්ෂි කිසිවක් අපරාධ පරීක්ෂණ දෙපාර්තමේන්තුව මේ දක්වා අධිකරණයට ඉදිරිපත් කර නැති බවත් ඔහු කියා සිටියේය.

මහජන සුබසාධන නඩුකරයක් සේ සලකා තමන් මෙම පෙත්සම ශ්‍රේෂ්ඨාධිකරණයට ඉදිරිපත් කර ඇති බවත්, මේ තුළින් මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබා දෙන ලෙසත් පෙත්සම්කරු අධිකරණයෙන් ඉල්ලා සිටී.

එසේම ත්‍රස්තවාදය වැළැක්වීමේ පනත යටතේ සුරේෂ් සලේ මහතාට එරෙහිව ඉදිරිපත් වී තිබෙන චෝදනා අධිකරණයට ඉදිරිපත් කරන ලෙස අපරාධ පරීක්ෂණ දෙපාර්තමේන්තුවට නියෝගයක් නිකුත් කරන ලෙසත්, ඔහුට එරෙහිව ප්‍රමාණවත් චෝදනා නොමැති නම් අධිකරණයට සුදුසු නියෝගයක් නිකුත් කරන ලෙසත් පෙත්සම්කරු වැඩිදුරටත් අධිකරණයෙන් ඉල්ලා තිබේ.

ශ්‍රී ලංකාවට අයත් මුහුදු සීමාවෙන් ඔබ්බට ගොස් ධීවර කටයුතුවල නිරත නොවන ලෙස ධීවර අමාත්‍ය රාමලිංගම් චන්ද්‍රසේකර් මහතා මෙරට සියලුම ධීවර ප්‍රජාවගෙන් ඉල්ලීමක් සිදුකරයි.

අමාත්‍යවරයා පෙන්වා දෙන්නේ ජාත්‍යන්තර මුහුදු සීමාවන් තුළ පවතින අවදානම් සහගත තත්ත්වයන් සැලකිල්ලට ගෙන මෙම තීරණය ගෙන ඇති බවය.

අමෙරිකානු ප්‍රහාර හමුවේ මුහුදුබත් වූ ඉරාන යුද නෞකාව සහ ශ්‍රී ලංකා මුහුදු සීමාවේ මේ වන විට ස්ථානගත කර ඇති අනෙක් ඉරාන නෞකාව සම්බන්යෙන් පාර්ලිමේන්තුවේ දී අදහස් දක්වමින් අමාත්‍යවරයා මේ බව පැවසීය.

ඊයේ ශ්‍රී ලංකා මුහුදු සීමාවට ඔබ්බෙන් පිහිටි මුහුදේ දී අමෙරිකාව විසින් සබ්මැරීනයක් ආධාරයෙන් පහර දී ඉරාන යුද නෞකාවක් මුහුදුබත් කළේය.

ඒ අනුව එම මුහුදු සීමාවේ මේ වන විට සොදිසි මෙහෙයුම් ක්‍රියාත්මක පවතී.