කොළඹ සිවිල් අභියාචන මහාධිකරණයේ කාර්යක්ෂමතාව වැඩි දියුණු කිරීම සඳහා නව අතිරේක සිවිල් අභියාචන මහාධිකරණයක් ස්ථාපිත කර තිබේ.
අගවිනිසුරු ප්රිති පද්මන් සුරසේන මහතාගේ උපදෙස් පරිදි නව අතිරේක සිවිල් අභියාචන මහාධිකරණය ස්ථාපිත කර ඇති බව අධිකරණ හා ජාතික ඒකාබද්ධතා අමාත්යංශය සඳහන් කළේය.
එහි කටයුතු අද සිට ක්රියාත්මක වන අතර එහි මහාධිකරණ විනිසුරුවරුන් ලෙස අගවිනිසුරුවරයා විසින් මහාධිකරණ විනිසුරු හසිත සමන් පොන්නම්පෙරුම සහ මහාධිකරණ විනිසුරු චින්තක ශ්රීනාත් ගුණසේකර යන මහත්වරුන් පත් කර තිබේ.
ශ්රී ලංකාවේ කාන්තාවන් සහ ගැහැණු ළමුන්ගේ අයිතිවාසිකම් සහ යහපැවැත්ම වැඩි දියුණු කිරීමට මෙන්ම ඔවුන්ගේ ගෞරවය සහ සමානාත්මතාව සඳහා වන අයිතිවාසිකම් ආරක්ෂා කිරීමටත්, පවතින මූලධර්ම ප්රායෝගික ක්රියාමාර්ග බවට පරිවර්තනය කිරීමටත් කැපවී සිටින බව අග්රාමාත්ය ආචාර්ය හරිනි අමරසූරිය පවසයි.
මහජන චීන සමූහාණ්ඩු රජයේ ආරාධනයෙන් අද (13) බීජිං නුවර චීන ජාතික සම්මේලන මධ්යස්ථානයේ (CNCC) පැවති 2025 කාන්තාවන් පිළිබඳ ගෝලීය නායකයින්ගේ සමුළුවේ සමාරම්භක උත්සවයට සහභාගී වෙමින් අග්රාමාත්යවරිය මෙම අදහස් පළ කළා ය.
චීන ජාතික සම්මේලන මධ්යස්ථානයේ වෙත පැමිණි අග්රාමාත්යවරිය ජනාධිපති Xi Jinping සහ ජනාධිපති ආර්යාව Peng Liyuan මහත්මිය විසින් පිළිගනු ලැබුණු අතර චීන ජනාධිපති Xi Jinping ගේ පිළිගැනීමේ කතාවෙන් පසුව, අග්රාමාත්ය ආචාර්ය හරිනි අමරසූරිය ඇතුළු රාජ්ය කායකයෝ සිය අදහස් ඉදිරිපත් කළහ.
සමුළුව ඇමතූ අග්රාමාත්ය ආචාර්ය හරිනි අමරසූරිය,
“1995 බීජිංහි පැවති කාන්තාවන් පිළිබඳ ලෝක සමුළුවෙන් වසර තිහකට පසුව වුවත් අපි තවමත් ස්ත්රී පුරුෂ සමානාත්මතාවය ළඟා කර ගන්න එම පුළුල් රාමුව තවමත් යොදා ගන්නවා. අපි මේ වන විට සැබෑ ප්රගතියක් ලබා කරගෙන තියෙනවා. කාන්තා සාක්ෂරතාවයසැලකිය යුතු ලෙස ඉහළ ගිහින් තියෙනවා, මාතෘ මරණ සංඛ්යාව අඩකින් පමණ වෙලා වගේම ගෝලීය ආයු අපේක්ෂාව 1995 දී අවුරුදු 69 ලෙස පැවති එයි 2023 දී අවුරුදු 76 දක්වා වැඩි වෙලා තියෙනවා.
එහෙත් තවමත් අවධානය යොමු නොවූ අංශ ගණනාවක් තියෙනවා. ශ්රම බලකායේ කාන්තා සහභාගීත්වය සලකා බැලීමේදී පිරිමි සහභාගීත්වය 73% වන විට ඊට සාපේක්ෂව කාන්තා සහභාගීත්වය 48.7% ක් පමණයි, විද්යා හා තාක්ෂණ ක්ෂේත්රවල අඩු කාන්තා නියෝජනය ඇති අතර කාන්තා ප්රතිශතය උපාධිධාරීන්ගෙන් 35% ක් පමණයි, කාන්තාවන්ට බලපා ඇති ආහාර අනාරක්ෂිතභාවය සැලකීමේදී පිරිමින්ට වඩා කාන්තාවන් මිලියන 47.8 ක් මධ්යස්ථ හෝ වැඩි ආහාර අනාරක්ෂිතභාවයකට මුහුණ දී සිටිනවා.ඒ වගේම දේශපාලන සමානාත්මතාවය අත් කරගැනීමේ දී පවතිනේ ඉතාමත් මන්දගාමී ගමනක්. ඒ නිසා කාන්තාවන්ගේ සංවර්ධනය කියන්නේ අධ්යාපනය, සෞඛ්යය, ආර්ථිකය, දේශපාලනය, සමාජය සහ සංස්කෘතිය හරහා සිදුවිය යුතු සාකල්ය ක්රියාවලියක්.”
සෑම මට්ටමකදීම කාන්තා නියෝජනය සහතික කිරීම සඳහා නායකත්ව කටයුතු සහ තීරණ ගැනීමේදී කාන්තා සහභාගීත්වය වැඩි කිරීම සඳහා මෙන්ම ස්ත්රී පුරුෂ සමානාත්මතාවය සහ කාන්තා සවිබල ගැන්වීම පිළිබඳ ජාතික ප්රතිපත්තිය සහ කාන්තාවන්, සාමය සහ ආරක්ෂාව පිළිබඳ ජාතික ක්රියාකාරී සැලැස්ම (2023–2027) ක්රියාත්මක කිරීම සඳහා ජාතික වශයෙන් ක්රියාත්මක වන කැපවීම අග්රාමාත්යවරිය තවදුරටත් මෙහිදී අවධාරණය කළා ය.
කම්කරු පන්තියේ සහ ආන්තිකකරණයට ලක් වූ ප්රජාවන්ගෙන් පැමිණෙන කාන්තාවන් ඇතුළු විවිධ සමාජ පසුබිම්වල සිටින කාන්තාවන්ගේ නියෝජනය තහවුරු කිරීමට පවතින ගැටලු සඳහා විසදුම් සෙවීමට ශ්රී ලංකා රජයේ කැපවීම අග්රාමාත්යවරිය තහවුරු කළ බව සඳහන් වේ.
සමාරම්භක උත්සවයෙන් පසු, චීන ජාතික සම්මේලන මධ්යස්ථානයේ දී ජනාධිපති Xi Jinping සහ ජනාධිපති ආර්යාව Peng Liyuan මහත්මිය විසින් පවත්වන ලද නිල භෝජන සංග්රහයට අග්රාමාත්යවරිය සහභාගී වී තිබේ.
මන්නාරම දූපතේ නීති විරෝධී ආකාරයට ඛනිජ කැණීම් සිදු කිරීම වැළැක්වීමේ නියෝගයක් නිකුත් කරන ලෙස ඉල්ලා ගොනු කෙරුණු මූලික අයිතිවාසිකම් පෙත්සමක් සලකා බැලීම සඳහා පෙබරවාරි මස 10 වනදා කැඳවන ලෙස ශ්රේෂ්ඨාධිකරණය නියම කළේය.
පරිසර යුක්ති කේන්ද්රය, මන්නාරම පුරවැසි කමිටුවේ සභාපති සන්තියාගෝ මාකස් පියතුමා ඇතුළු පිරිසක් විසින් මෙම පෙත්සම ඉදිරිපත් කර තිබුණි.
මෙම පෙත්සම අද (13) අගවිනිසුරු ප්රීති පද්මන් සූරසේන සහ සම්පත් අබේකෝන් යන මහත්වරුන්ගෙන් සමන්විත ශ්රේෂ්ඨාධිකරණ විනිසුරු මඩුල්ලක් ඉදිරියේ කැඳවනු ලැබීය.
එහිදී විනිසුරු මඩුල්ල නියෝග කළේ අදාල පෙත්සම කරුණු තහවුරු කිරීම සඳහා පෙබරවාරි මස 10 වනදා කැදවන ලෙසය.
අදාළ පෙත්සමේ වග උත්තරකරුවන් ලෙස භූ විද්යා හා පතල් කාර්යාංශය, එහි අධ්යක්ෂ ජෙනරාල්වරයා, වෙරල සංරක්ෂණ දෙපාර්තමේන්තුව, මන්නාරම ප්රාදේශීය ලේකම්, මධ්යම පරිසර අධිකාරිය සහ නීතිපතිවරයා නම් කර ඇත.
පෙත්සම්කරුවන් කියා සිටින්නේ මන්නාරම දූපත ආශ්රිතව ඛණිජ කැණීම් කටයුතු සඳහා බලපත්ර ලබාදී තිබෙන බවට තොරතුරු ලැබී ඇති බවය.
අදාල ප්රදේශයේ ශ්රී ලංකාවට ආවේණික අධික වටිනාකමකින් යුත් ඛනිජ නිධි පවතින බව පෙන්වා දෙන පෙත්සම්කරුවන් නිසි ටෙන්ඩර් කැදවීමකින් තොරව එම ඛනිජ කැණීම් සිදුකිරීම සඳහා බලපත්ර නිකුත් කිරීම නීතියට පටහැනි බවත් පැවසීය.
මේ හරහා විදේශීය සමාගම් සිය දේශීය නියෝජිතයින් ලවා ඛනිජ කැණීම් සිදුකොට නිසි අගය එකතු කිරීමකින් තොරව අදාළ ඛනිජ වර්ග අපනයනය කිරීමට ඉඩකඩ ඇති බවත් ඒ තුළින් රටට විශාල ආර්ථික පාඩුවක් සිදුවන බවත් පෙත්සම්කරුවන් පෙන්වා දී තිබේ.
මේ තුළින් ජනතාවගේ මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබා දෙන ලෙසත් සම්මත නීතිමය පටිපාටිය අනුගමනය නොකොට මෙම ඛනිජ කැණීම් සඳහා බලපත්ර ලබා දී තිබේ නම් ඒවා බල රහිත කිරීමේ නියෝගයක් නිකුත් කරන ලෙසත් පෙත්සම්කරුවන් අධිකරණයෙන් ඉල්ලා ඇත.
එම කැණීම් සිදු කිරීමට පෙර අදාළ ප්රදේශයේ පාරිසරික ඇගැයීම් සිදුකරන ලෙස මධ්යම පරිසර අධිකාරියට නියෝගයක් නිකුත් කරන ලෙසත් අදාළ කැණීම් සිදුකිරීම සඳහා අලුතින් බලපත්ර නිකුත් කිරීම වළක්වන නියෝගයක් භූ විද්යා හා පතල් කාර්යාංශය වෙතට නිකුත් කළ ලෙසත් පෙත්සමෙන් වැඩිදුරත් ඉල්ලා තිබේ.
ගල්කිස්ස මූලස්ථාන පොලිස් පරීක්ෂක එච්.ටී.එම්.තුෂාර මහතා වහාම ක්රියාත්මක වන පරිදි ස්ථාන මාරුකර තිබේ.
ඒ අනුව ඒ මහතා වෛද්ය සේවා කොට්ඨාසයේ සාමාන්ය රාජකාරි සඳහා මෙම ස්ථාන මාරු කිරීම සිදුකර ඇත.
පසුගියදා ගල්කිස්ස උසාවි සංකීර්ණය අසලදී නීතිඥවරයෙකු සහ පොලිස් නිලධාරියෙකු අතර සිදුවූ සිදුවීමේදී පොලිස් නිලධාරියා අත්අඩංගුවට ගැනීම සම්බන්ධව සිදු කෙරෙන විශේෂ විමර්ෂනයකට අදාළව මෙම ස්ථාන මාරු කිරීම සිදුකර ඇතැයි පොලීසිය පැවසීය.
ඒ අනුව සිදු කෙරෙන මූලික විමර්ශනවලට අදාළව මෙම ස්ථාන මාරු කිරීම සිදුකළ බව පොලීසිය සඳහන් කළේය.
කුරුණෑගල කුඩා ගල්ගමුව ප්රදේශයේ දී පුද්ගලයෙකුට තියුණු ආයුධයකින් පහරදී ඝාතනය කර තිබේ.
පහර කෑමෙන් බරපතළ තුවාල ලැබූ එම පුද්ගලයා කුරුණෑගල රෝහලට ඇතුළත් කිරීමේදී මිය ගොස් ඇති බව වාර්තා වේ.
මෙලෙස මිය ගොස් ඇත්තේ වයස අවුරුදු 34ක් වූ පැපොලේවෙල, කුඩා ගල්ගමුව ප්රදේශයේ පදිංචිකරුවෙකි.
අදාළ පුද්ගලයා තම සහෝදරයාගේ නිවසේ තවත් පිරිසක් සමඟ මත්පැන් පානය කරමින් සිටින අතරතුර සහෝදරයා සමඟ ඇති වූ ආරවුලක් දුරදිග යාම හේතුවෙන් සහෝදරයා විසින් කඩුවකින් පහරදී මෙම ඝාතනය සිදු කර ඇති බවට දැනට සිදුකළ විමර්ශනවලදී අනාවරණය වී ඇත.
සැකකරු අත්අඩංගුවට ගෙන ඇති අතර කුරුණෑගල පොලීසිය වැඩිදුර විමර්ශන සිදු කරයි.
කුරුණෑගල – බිමල්
2025 / 26 වර්ෂ සඳහා
කොළඹ ජනමාධ්යවේදීන්ගේ සංගමයේ නව නිලධාරී මණ්ඩලය. තෝරා පත් කර ගැනීමේ මහා සභා රැස්වීම ඊයේ කොළඹදී පැවැත්වුණා.
ඒහිදී පත්වුන නව නිළධාරී මණ්ඩලය මෙසේය…
1. සභාපති : ඩී. එච්. වික්රමපාල , ස්වර්ණවාහිනීය.
2.ලේකම් : දිනේෂ් එස්. පෙරේරා , ස්වාධීන රූපවාහිනීය
3. භාණ්ඩාගාරික : බුද්ධි මාධව , හිරු
4. ප්රධාන සංවිධායක : චන්දිම ජයලාල්
5. උප සභාපති : අසංක සංජය , සිරස
6. උප ලේකම් : බුද්ධික කුමාරසිරි , දෙරණ
7. උප භාණ්ඩාගාරික : දමිත් වානගුරු , රූපවාහිනී
විධායක කමිටු සාමාජිකයන්
8. අවංක කුමාර , සිරස
9. සුනෙත් හේවාවිතාරණ ,
ස්වාධීන රූපවාහිනි
10.ලංකා ඩී. ජයවර්ධන , DAN TV
11. සුසන්ත රත්නායක , හිරු
12. බිල් ක්ලින්ටන් , දෙරණ
13. සුමේධ සංජීව , ස්වර්ණවාහිනී
14. ධම්මික සේනාරත්න , රූපවාහිනී
15. සචින් චතුරංග , ස්වර්ණවාහිනී
ලෝක සෞඛ්ය සංවිධානයේ අධ්යක්ෂ ජනරාල් වෛද්ය Tedros Adhanom Ghebreyesus මහතා අද (12) දිවයිනට පැමිණ තිබේ.
ඒ ශ්රී ලංකාවේ පැවැත්වෙන 78 වන අග්නිදිග ආසියානු කලාපීය ජාත්යන්තර සෞඛ්ය සමුළුවට ප්රධාන ආරාධිත අමුත්තා ලෙස සහභාගී වීම සඳහායි.
ලෝක සෞඛ්ය සංවිධානය විසින් සංවිධානය කරන මෙම සමුළුව හෙට (13) දින සිට 15 වැනිදා දක්වා කොළඹ දී පැවැත්වීමට නියමිතය.
මෙම සමුළුවට අග්නිදිග ආසියානු කලාපයේ රටවල් නියෝජනය කරමින් එම රටවල සෞඛ්ය අමාත්යවරුන් ද ශ්රී ලංකාවට පැමිණීමට නියමිත බව වාර්තා වේ.
ලෝක සෞඛ්ය සංවිධානයේ අධ්යක්ෂ ජනරාල්වරයා පෙරවරු 09.40ට දෝහා සිට කටාර් ගුවන් සේවයේ QR 660 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබූ අතර ඔහු පිළිගැනීම සදහා සෞඛ්ය සහ ජනමාධ්ය අමාත්යාංශයේ ලේකම් වෛද්ය අනිල් ජාසිංහ මහතා ගුවන් තොටුපොළ විශේෂ අමුත්තන්ගේ මැදිරිය වෙත පැමිණ සිටියේය.
මෙරට මුහුදු සීමාව උල්ලංඝනය කරමින් නීතිවිරෝධී ලෙස ධීවර කටයුතුවල නිරතවීමේ චෝදනාව මත අත්අඩංගුවට ගෙන රක්ෂිත බන්ධනාගාරගත කළ ඉන්දීය ධීවරයින් නිදහස් කරන ලෙස ඉල්ලා ඉන්දියාවේ රාමේෂ්වරන් හී විරෝධතාවක් පවත්වා තිබේ.
ඊයේ (11) පැවැති මෙම විරෝධතාව සඳහා ධීවරයින් මෙන්ම අත්අඩංගුවට ගත් ධීවරයින්ගේ පවුල්වල සාමාජිකයින් ඇතුළු විශාල පිරිසක් එක්ව ඇති බව ඉන්දීය මාධ්ය වාර්තා කර ඇත.
පසුගිය 08 වන දින ඩෙල්ෆ් මුහුදු තීරයේදී ශ්රී ලංකා මුහුදු සීමාවට නීති විරෝධීව ඇතුළුව ධීවර කටයුතු කිරීමේ චෝදනාව මත අත්අඩංගුවට ගත් ධීවරයින් 30 දෙනෙකු මන්නාරම මහේස්ත්රාත් අධිකරණයට ඉදිරිපත් කිරීමෙන් පසු එළැඹෙන 23 වැනිදා දක්වා රක්ෂිත බන්ධනාගාර ගත කිරීමට අධිකරණය නියෝග කළේය.
මෙම සිද්ධිය පාදක කරගනිමින් මෙම විරෝධතාව පවත්වා ඇති අතර විරෝධතාවය අතරතුර අදහස් දක්වමින් තමිල්නාඩු මෝටර් බෝට්ටු සංගමයේ දිස්ත්රික් සම්බන්ධීකාරක යේසුරාජා පවසා ඇත්තේ මෙරට නාවික හමුදාව විසින් ඉන්දීය ධීවරයින් අත්අඩංගුවට ගැනීම් ඉහළ යාමක් පෙන්නුම් කරන බවය.
ඒ අනුව මෙරට බන්ධනාගාරගතව ඇති ඉන්දීය ධීවරයින් සහ ඔවුන්ගේ බෝට්ටු නිදහස් කරන ලෙසත් ඉන්දීය ධීවරයින්ට නිදහසේ ධීවර කටයුතු කිරීමේ අවස්ථාව සලසා දෙන ලෙසත් මෙරට නාවික හමුදාවට බල කරමින් දැවැන්ත විරෝධතාවක් පැවැත්වීමටද ඔවුන් කටයුතු කරන බවත් එහිදී ඔහු පවසා ඇත.
ඒ සඳහා රාමේශ්වරම් හී සියලුම ධීවර පවුල් ධීවර යාත්රා මගින් කච්චතිව්හී නවාතැන් ගෙන විරෝධතාවක් පැවැත්වීමට නියමිත බවත් ඒ සඳහා වූ දිනය ඉක්මනින් ප්රකාශයට පත් කරන බවත් විරෝධතාවයට එක්වෙමින් ඔහු පැවසීය.
තවද ධීවර ගැටලුවට ස්ථීර විසඳුමක් සෙවීම සඳහා මධ්යම රජය ශ්රී ලංකා රජය සමග සාකච්ඡා කළ යුතු බවත් අගමැතිවරයාට අවශ්ය නම් ධීවර ගැටලුවට ස්ථීර විසඳුමක් සොයා ගත හැකි වනු ඇති බැවින් මේ සඳහා ඉන්දීය රජය වහාම මැදිහත් විය යුතු බවත් ඔහු විරෝධතාවට එක්වෙමින් වැඩිදුරටත් පැවසීය.
කොළඹ මහ නගර සභා බල ප්රදේශය තුළ හිඟ වරිපනම් බදු ලෙස රුපියල් බිලියන 4කට අධික ප්රමාණයක් තවමත් පවතින බව රජයේ ගිණුම් පිළිබඳ කාරක සභාව හෙවත් කෝපා කමිටුවේ දී අනාවරණය වී තිබේ.
ඒ පසුගියදා කොළඹ මහ නගර සභාව පසුගියදා කෝපා කමිටුව හමුවට කැඳවූ අවස්ථාවේ දීය.
එහිදී කෝපා කමිටුවේ සභාපති කබීර් හෂීම් මන්ත්රිවරයා මහනගර සභාවේ නිලධාරීන්ගෙන් ඒ සම්බන්ධයෙන් ප්රශ්න යොමුකරමින් අසා සිටියේ, “ගියපාර පෙබරවාරි මාසයේදී දුන් නිර්දේශවලින් එකක් තමයි මිලියන 610ක හිඟ වරිපනම් එකතු කිරීමක් තිබුණා කොටුව කොට්ඨාසයෙන් පමණක්. එතනදි තීරණය කරලා මහ නගර සභාවම එකඟ වුණා එදා ඒ කොට්ඨාසවල තිබෙන හිඟ මුදල් එකතුකිරීමේ ප්රවනතාවය වැඩි කරනවා කියලා. හැබැයි මිලියන 53ක ගාණක් ජුනි මාසය වන විට එකතුවෙලා තිබුණේ. දැන් වෙනකොට වැඩි වුණාද දන්නේ නැහැ. එකක් තමයි ඒ එකතුකිරීමේ ප්රවණතාවයේ ප්රශ්නය. දෙක සමස්ත හිඟ මුදල මිලියන හාරදහස් ගාණනක්. ඒ කියන්නේ බිලියන හතරක ගණනක් තියෙනවා කොට්ඨාස 47න්ම. මේවා විදිමත් කරන්න කියලා අපි ඉල්ලුවා. ඒකේ කොයි කොට්ඨාසවලින්ද? කොච්චර පරණ ඒවද ? ළඟදි තියෙන ඒවා මොනවද ? ගන්න පුළුවන් ඒවා මොකක්ද ? බැරි ඒවා මොකක්ද ? ඒ ගැන තමයි අපි අහන්නේ.” යනුවෙනි.
ඊට පිළිතුරු දෙමින් කොළඹ මහ නගර සභාවේ නියෝජ්ය නාගරික භාණ්ඩාගාරික නන්දන රාජපක්ෂ මහතා පවසා සිටියේ, “කොටුවේ හිඟ වරිපනම් අපිට මිලියන 610ක් තිබුණා. මේ හිඟය අය කරගන්න තිබෙන්නේ අපේ නගර සභා පනත යටතේ. බදු ගෙවන්නන්ගේ දේපොළ තහනම් කිරීමට තිබෙන ක්රමවේදය බලාත්මක කිරිමෙන් තමයි. කොටුවේ තිබුණ හිඟ දේපොළ 3747ක්. ඒ 3747න් ඩිමාන්ඩ් නොටිස් එක යවනකොට දේපොළ නැහැ කියලා හඳුනා ගත්තා දේපොළ 94ක් තිබුණා. ඊට පස්සේ දේපොළ 2914කට අපි සීස් නෝටිස් යැව්වා. ලක්ෂයට වැඩි දේපොළ 840 තිබුණා පිටිකොටුවේ. එකේ අපි වොරන්ට් කොස්ට් එක මිලියන 533ක්. එකෙන් මිලියන 108ක් අපි එකතුකරල තියෙනවා. ඊළඟට ලක්ෂයට අඩු දේපොළ තියෙනවා 2907ක්. ඒකෙදි මිලියන 39ක් අයකරලා තියෙනයා. ඒකේ මුළු වටිනාකම කොටුවේ මිලියන 148 එකතුකරලා තියෙනවා.” යනුවෙනි.
ඉන් අනතුරුව අදහස් දැක්වූ කොළඹ නගරාධිපති ව්රරායි කැලී බල්තසාර් මහත්මිය පැවසුවේ කොළඹ නගර සභාවේ සිදුවන කටයුතු කඩිනමින් නිවැරදි කර ගැනීමට කටයුතු කරන බවය.
රජයේ පළමු කැබිනට් සංශෝධනය අනුව සංශෝධනය වූ අමාත්යධුර සහ නියෝජ්ය අමාත්යධුර සම්බන්ධව ගැසට් නිවේදනය මේ වන විට නිකුත් වී තිබේ.
ජනාධිපති ලේකම් ආචාර්ය එන්.එස්. කුමනායක මහතා විසින් අදාළ ගැසට් නිවේදනය ඊයේ (11) දිනයේදී නිකුත් කර ඇත.
පසුගිය 10 වැනිදා පෙරවරුවේ ජනාධිපති කාර්යාලයේදී පැවැති කැබිනට් සංශෝධනය අනුව නව අමාත්යවරු තිදෙනෙකු සහ නියෝජ්ය අමාත්යවරු 10 දෙනෙකු ජනාධිපතිවරයා ඉදිරියේ දිවුරුම් දුන්නේය.
ඒ අනුව ප්රවාහන, මහාමාර්ග, වරාය සහ සිවිල් ගුවන් සේවා අමාත්ය ලෙස කටයුතු කළ බිමල් රත්නායක මහතාගෙන් වරාය හා සිවිල් ගුවන්සේවා ඉවත් කර ඇති අතර, ඒ වෙනුවට නාගරික සංවර්ධන අමාත්යාංශය එක් කර තිබුණු අතර ඒ අනුව ඔහු එම අමාත්ය ධුරයේ එදින දිවුරුම් දුනි.
බිමල් රත්නායක මහතාගෙන් ඉවත්කළ වරාය සහ සිවිල් ගුවන්සේවා අමාත්යාංශය අනුර කරුණාතිලක මහතාට ලබා දී ඇති අතර මීට පෙර නාගරික සංවර්ධන, ඉදිකිරීම් සහ නිවාස අමාත්ය ලෙස කටයුතු කළ ඒ මහතා වරාය සහ සිවිල් ගුවන්සේවා අමාත්ය ලෙස දිවුරුම් දුන්නේය.
එමෙන්ම අනුර කරුණාතිලක මහතාගෙන් ඉවත්කළ ඉදිකිරීම් සහ නිවාස අමාත්ය ධුරය, නියෝජ්ය අමාත්ය ලෙස කටයුතු කළ වෛද්ය එච්.එම්. සුසිල් රණසිංහ මහතාට ලබා දී ඇත.
ඒ අනුව ඉඩම් සහ වාරිමාර්ග නියෝජ්ය අමාත්යවරයාව සිටි සුසිල් රණසිංහ මහතා නිවාස, ඉදිකිරීම් සහ ජලසම්පාදන අමාත්ය ලෙසද ජනාධිපතිවරයා ඉදිරියේ දිවුරුම් දුන්නේය.
මීට පෙර කිසිදු අමාත්ය ධුරයක් නොදැරූ ආචාර්ය කෞෂල්යා ආරියරත්න, දිනිඳු සමන් කුමාර, නිශාන්ත ජයවීර සහ එම්. එම්. අයි. අර්කම් යන අය නියෝජ්ය අමාත්යවරුන් ලෙස දිවුරුම් දී දුන් අතර ඔවුන්ගේ අමාත්යධුර සම්බන්ධව ගැසට් නිවේදනය ඒ අනුව මෙලෙස නිකුත් වී ඇත
