සීගිරිය, පිදුරංගල මාර්ගයේදී වනඅලියෙකු පහරදීම හේතුවෙන් විදේශීය ජාතිකයෙකු ජීවිතක්ෂයට පත්ව තිබේ.
මෙලෙස මියගොස් ඇත්තේ වයස අවුරුදු 68ක්වූ හංගේරියානු ජාතිකයෙකි.
අදාළ පුද්ගලයා සහ ඔහුගේ බිරිඳ පා ගමනින් සීගිරිය පිදුරංගල මාර්ගයේ ගමන් කරමින් සිටින අවස්ථාවේ මෙලෙස වන අලි ප්රහාරයකට ලක්ව ඇති බව සිදු කරන ලද මූලික විමර්ශනවලදී අනාවරණය වී ඇත.
සීගිරිය පොලිස් ස්ථානය විසින් සිද්ධිය සම්බන්ධයෙන් වැඩිදුර විමර්ශන සිදු කරයි.
නීතිවිරෝධී ලෙස මෙරටට රැගෙන එන ලද විදේශීය දුම්වැටි තොගයක් සමග පුද්ගලයෙකු, කටුනායක ගුවන්තොටුපළේ දී අත්අඩංගුවට ගෙන තිබේ.
ගුවන්තොටුපළ පොලිස් මත්ද්රව්ය කාර්යංශයේ නිලධාරීන්ට ලද තොරතුරක් මත ගුවන් තොටුපළ පැමිණීමේ පර්යන්තයේ සිදුකළ වැටලීමකදී සැකකරු අද (17) අලුයම අත්අඩංගුවට ගෙන ඇති බව පොලීසිය පැවසීය.
සැකකරු සතුව තිබී විදෙස් දුම්වැටි 12,000ක ප්රමාණයක් සොයාගෙන ඇති අතර ඔහු 58 හැවිරිදි ගම්පොල ප්රදේශයේ පදිංචිකරුවෙකු බව සඳහන් වේ.
සිද්ධිය සම්බන්ධයෙන් පොලිස් මත්ද්රව්ය කාර්යංශ ගුවන් තොටුපොල ඒකකය විසින් වැඩිදුර විමර්ශන සිදු කරයි.
බලශක්ති අමාත්ය කුමාර ජයකොඩි හා වරාය හා සිවිල් ගුවන් සේවා අමාත්ය අනුර කරුණාතිලක යන මහත්වරුන්ගේ ඡායාරූප භාවිත කරමින් ව්යාජ වට්ස්ඇප් ගිණුම් සකසා කූඨ ලෙස මුදල් එකතු කළ චීවරධාරියෙකු මධ්යම අපරාධ විමර්ශන කාර්යංශයේ මූල්ය හා වාණිජ අපරාධ විමර්ශන ඒකකය විසින් අද (17) අත්අඩංගුවට ගෙන තිබේ.
21 හැවිරිදි මෙම චීවරධාරියා අත්අඩංගුවට ගෙන ඇත්තේ ඔහු වැඩවාසය කළ මුරුතලාව ප්රදේශයේ පිහිටි විහාරස්ථානයකදීය.
දිට්වා සුළි කුණාටුවෙන් පීඩාවට පත් වූ පාසල් දරුදැරියන්ට අවශ්ය පාසල් උපකරණ මිලදී ගැනීමට බව පවසමින් කූඨ ලෙස සැකසූ ලිපි කිහිපයක් ද එම චීවරධාරියා සතුව තිබී විමර්ශන නිලධාරීන් සොයාගෙන තිබේ.
එම ලිපි අදාළ අමාත්යාංශ දෙකෙහි ලේකම්වරුන්ගේ අත්සනින් යුතු ඒවා බව වාර්තා වේ.
අදාළ ලිපි පෞද්ගලික ආයතන වෙත යොමුකරමින් සැකකාර චීවරධාරියා මුදල් ලබාගැනීමට කටයුතු කර ඇති බව විමර්ශන නිලධාරීන් සඳහන් කරයි.
සිද්ධිය සම්බන්ධ වැඩිදුර පොලිස් විමර්ශන මධ්යම අපරාධ විමර්ශන කාර්යංශයේ අධ්යක්ෂ ජ්යේෂඨ පොලිස් අධිකාරී කමල් ආරියවංශ මහතාගේ උපදෙස්මත ක්රියාත්මක බව සඳහන් වේ.
පසුගියදා ජින්තුපිටිය ප්රදේශයේදී සිදු වූ වෙඩි තැබීමේ සිද්ධිය වළක්වා ගැනීමට කටයුතු නොකිරීම සම්බන්ධයෙන් සැකපිට අධිකරණයට ඉදිරිපත් කළ පොලිස් සැරයන්වරයෙකු හා කොස්තාපල්වරයෙකු ඇප මත මුදා හරින ලෙස කොළඹ මහේස්ත්රාත් අධිකරණය නියම කළේය.
පොලිස් දෙපාර්තමේන්තුවේ කීර්ති නාමය ආරක්ෂා කිරීම සඳහාත් සෙසු නිලධාරීන්ට ආදර්ශයක් දීම සඳහාත් මෙම සැකකරුවන් රක්ෂිත බන්ධනාගාර ගත කරන ලෙස පොලිසිය සිය බී වාර්තාවෙන් අධිකරණයෙන් ඉල්ලා සිටියත් එවැනි නියෝග නිකුත් කිරීමට ඇප පනත යටතේ ප්රතිපාදන නොමැති බව ඇප නියෝගය ප්රකාශයට පත් කරමින් කොළඹ අතිරේක මහේෂ්ත්රාත් ඕෂද මිගාර මහරච්චි මහතා ප්රකාශ කළේය.
ඒ අනුව අදාළ සැකකාර පොලිස් කොස්තාපල්වරයා සහ සැරයන්වරයා රුපියල් ලක්ෂ තුන බැගින් වූ ශරීර ඇපයක් මත මුදා හැරීමට මහේස්ත්රාත්වරයා නියම කළේය.
සැකකරුවන් අධිකරණයට ඉදිරිපත් කරමින් පැවසුවේ කොළඹ උතුර අපරාධ විමර්ශන කොට්ඨාශයේ නිලධාරීන් අධිකරණය හමුවේ කරුණු දක්වමින් පසුගියදා ජින්තුපිටිය ප්රදේශයේ සිදුවූ වෙඩි තැබීම වළක්වා ගැනීමට කටයුතු නොකිරීම සම්බන්ධයෙන් මෙම පොලිස් සැරයන්වරයා හා කොස්තාපල්වරයා අත්අඩංගුවට ගෙන අධිකරණය ඉදිරිපත් කළ බවය.
සිද්ධිය වූ අවස්ථාවේදී මොවුන් ජංගම මුර සේවාවේ නිරතව සිටි බවත් පොලිසිය පැවසුවේය.
එහිදී අදාළ පොලිස් නිලධාරීන් දෙදෙනා වෙඩිතැබීම සිදුවන අවස්ථාවේදී සිදුවීම සිදු වූ ස්ථානයට මීටර 10ක පමණ දුරින් සිට ඇති බවද පොලීසිය මෙහිදී පැවසුවේය.
වෙඩික්කරුවන් ඔවුන් අසළින්ම පැමිණ ප්රහාරයෙන් පසුවත් ඔවුන් අසළින්ම පලාගොස් ඇති බවද විමර්ශනවලදී අනාවරණ වී ඇති බවත් පොලිස් සැරයන්වරයාගේ අතෙහි ටී-56 ගිනිඅවියක් හා කොස්තාපල්වරයාගේ අතෙහි රිවෝල්වරයක් තිබුණද ඔවුන් ඒවා භාවිත නොකිරීම නිසා වෙඩික්කරුවන් එම ස්ථානයෙන් පහසුවෙන් පලාගොස් ඇති බවද පොලිසිය සඳහන් කළේය.
ඔවුන් දෙදෙනා සමග තවත් පොලිස් නිලධාරීන් දෙදෙනෙකු සිටියද ඔවුන් සතුව ගිනිඅවි තිබී නොමැති අතර ඒ අනුව ඔවුන් අත්අඩංගුවට ගෙන නොමැත.
මොවුන් අදාල අපරාධයට ආධාර අනුබල දී තිබේ දැයි වැඩිදුර විමර්ශන සිදු කරන බවත් පොලීසිය සඳහන් කළේය.
ඒ අනුව මොවුන්ට ඇප නියම කිරීම සම්බන්ධයෙන් විරුද්ධ වන බවත් පැවසීය.
සැකකරුවන්ගේ දුරකථන ඇමතුම් විස්තර වාර්තා ලබා ගැනීමට අවශ්යව තිබෙන බවත් ඒ සඳහා අවශ්ය නියෝග නිකුත් කරන ලෙසත් පොලිසිය අධිකරණයෙන් ඉල්ලා සිටියේය.
මෙහිදී සැකකරුවන් වෙනුවෙන් පෙනී සිටි නීතිඥවරු අධිකරණය හමුවේ කරුණු දක්වමින් තම සේවාදායකයින්ට පොලිසිය විසින් එල්ල කරන චෝදනා පැහැදිලි නොමැති බව සඳහන් කළේය.
මොවුන් අදාල අපරාධයට ආධාර අනුබල දීමක් සිදු කර නොමැති බවත් එවැනි චෝදනාවක් එල්ල කිරීමට නම් ඔවුන්ට ඒ සම්බන්ධයෙන් දැනුමක් තිබිය යුතු බවත් නීතිඥවරු පෙන්වා දුන්නේය.
එහෙත් එවැනි දැනුමක් තිබූ බව පොලිසිය විසින් ඔප්පු කර නොමැති බව පෙන්වා දුන් නීතිඥවරු සිය සේවාදායකයින්ට ඇප නියම කරන ලෙසත් ඉල්ලා සිටියේය.
පසුගියදා අලුත්කඩේ අධිකරණ සංකීර්ණය තුළ වෙඩි තැබීම සිදු වූ අවස්ථාවේදී පොලිස් නිලධාරීන් දහසකට අධික පිරිසක් මෙන්ම පොලිස් විශේෂ කාර්ය බලකායේ නිලධාරීන්ද සිටි බව පෙන්වා දුන් එම නීතිඥවරු මේ ආකාරයෙන් කටයුතු කරන්නේ නම් ඒ සියලු දෙනා අත්අඩංගුවට ගෙන අධිකරණයට ඉදිරිපත් කළ යුතු බවත් පෙන්වා දුන්නේය.
ඉදිරිපත් වූ කරුණු සලකා බැලූ මහේස්ත්රාත්වරයා මෙම සැකකරුවන් රිමාන්ඩ් භාරයට පත් කිරීමට තරම් කරුණු ඉදිරිපත් වී නොමැති බැවින් ඔවුන් ඇප මත මුදා හරින ලෙස නියෝග මහේස්ත්රාත්වරයා ඉන් අනතුරුව මෙම පැමිණිල්ල අප්රේල් මස 27 වනදා යළි කැඳවන ලෙසද නියෝග කළේය.
දියණියගේ උප්පැන්න සහතිකය ලියාපදිංචි කර ගැනීමට පැමිණි අවස්ථාවේදී ඒ සඳහා රුපියල් 1,000ක අල්ලස් මුදලක් ඉල්ලා ඉන් රුපියල් 500ක් ලබා ගත් ආලයවඩිවෙම්බු ප්රාදේශීය ලේකම් කාර්යාලයේ වැඩබලන උප්පැන්න හා මරණ රෙජිස්ට්රාර්වරියක අල්ලස් කොමිසම විසින් අත්අඩංගුවට ගෙන තිබේ.
මරදමුණේ ප්රදේශයේ පදිංචි ව්යාපාරිකයෙකු විසින් සිදුකරන ලද පැමිණිල්ලකට අදාළව අල්ලස් කොමිසම විසින් සැකකාරිය අත්අඩංගුවට ගෙන ඇත.
සැකකාරිය විසින් ඊයේ දින (16) ලියාපදිංචි උප්පැන්න සහතිකය ලබා ගැනීමට පැමිණෙන ලෙසත් එදිනට ඉතිරි රුපියල් 500 රැගෙන එන ලෙස දැන්වීමෙන් පසුව පැමිණිලිකරු විසින් සැකකාරිය හමු වූ අවස්ථාවේදී උප්පැන්න සහතිකය ලබා දී ඉතිරි රුපියල් 500ක මුදල අල්ලස් ලෙස ලබා ගැනීමේදී සැකකාරිය අත්අඩංගුවට ගෙන තිබේ.
අත්අඩංගුවට ගත් සැකකාරිය අක්කරෛපත්තුව මහේස්ත්රාත් අධිකරණය වෙත ඉදිරිපත් කිරීමට නියමිතය.
සුරාබදු ගෙවීම් පැහැර හරිනු ලැබු මත්පැන් නිශ්පාදනය සමාගම්වල හිඟ බදු මුදල් අයකර ගැනීම සඳහා සියලු පියවර ගෙන තිබෙන බව නීතිපතිවරයා අද (13) ශ්රේෂ්ඨාධිකරණයට දැනුම් දුන්නේය.
මත්පැන් නිශ්පාදන සමාගම් විසින් පැහැර හැර තිබෙන සුරාබදු අයකර ගැනීමේ නියෝගයක් නිකුත් කරන ලෙස ඉල්ලා සමාජ ක්රියාකාරීකයෙකු වන සංජය මහවත්ත මහතා විසින් ඉදිරිපත් කර තිබෙන මුලික අයිතිවාසිකම් පෙත්සමක් අද කැඳවනු ලැබූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් නෙරින් පුල්ලේ මහතා මෙම දැනුම් දීම සිදු කළේය.
අගවිනිසුරු ප්රීති පද්මන් සූරසේන, කුමුදුනී වික්රමසිංහ සහ සම්පත් විජේරත්න යන මහත්වරුන්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල විසින් මෙම නියෝගය නිකුත් කරනු ලැබීය.
පෙත්සම්කරු වෙනුවෙන් පෙනී සිටි ජනාධිපති නීතිඥ සාලිය පීරිස් මහතා අධිකරණය හමුවේ කරුණු දක්වමින් මෙම නඩුකරය ගොනු කිරීමෙන් පසුව ඇතැම් සමාගම් වල හිග බදු මුදල්වල ප්රමාණය වැඩි වී තිබෙන බව සඳහන් කළේය.
2020 වසරේ ඩබ්ලිව්. එම්. මෙන්ඩිස් සමාගමේ රුපියල් බිලියන 1.29 ක්ව පැවති හිග බදු මුදල 2024 වසරේ හිග බදු මුදල රුපියල් බිලියන 1.6 ක් ක් දක්වා වැඩි වී තිබෙන බවද මෙහිදී සඳහන් කළේය.
මෙම සමාගම්වලට සද්භාවයෙන්ම බදු ගෙවීමේ බදු ගෙවීමේ අරමුණක් තිබුණේ නම් මෙවැනි තත්වයක් උද්ගත විය නොහැකි බවත් ජනාධිපති නීතිඥවරයා පැවසුවේය.
එම අවස්ථාවේදී වගඋත්තරකාර ඩබ්ලිව්. එම්. මෙන්ඩිස් සමාගම වෙනුවෙන් පෙනී සිටි ජනාධිපති නීතිඥ රසික් සරුක් මහතා අධිකරණය හමුවේ කරුණු දක්වමින් තම සේවාදායකයින්ගේ මත්පැන් නිශ්පාදන බලපත්රය මේ වන විට අත්හිටුවා තිබෙන බව සඳහන් කළේය.
එසේම සියලු බැංකු ගිණුම් හා දේපළ තහනමට ගෙන තිබෙන බවත් ජනාධිපති නීතිඥවරයා පෙන්වා දුන්නේය.
ඉන් අනතුරුව නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් නෙරින් පුල්ලේ මහතා අධිකරණය හමුවේ කරුණු දක්වමින් මත්පැන් නිෂ්පාදන සමාගම්වල හිඟ බදු අය කර ගැනීම සඳහා ගත හැකි සියලු ක්රියාමාර්ග ගෙන තිබෙන බව සඳහන් කළේය.
හිග මත්පැන් බදු අය කර ගැනීම සඳහා ගෙන ඇති සියලු ක්රියාමාර්ගය ඇතුළත් දිවුරුම් ප්රකාශයක් අධිකරණයට ඉදිරිපත් කර තිබෙන බවත් ඔහු මෙහිදී පැවසුවේය.
ඇතැම් සමාගම්වල මත්පැන් නිෂ්පාදන බලපත්ර අත්හිටුවා තිබෙන බවත් එම සමාගම්වල හිඟ බදු අය කර ගැනීම සඳහා ගත හැකි වැඩිදුර ක්රියා මාර්ග ගනිමින් පවතින බවත් අතිරේක සොලිසිටර් ජෙනරාල්වරයා පැවසුවේය.
ඉදිරිපත් වූ කරුණු සලකා බැලූ අගවිනිසුරුවරයා ප්රමුඛ ත්රිපුද්ගල විනිසුරු මඩුල්ල මෙම පෙත්සම යළි මාර්තු මස 05 වන දා කැඳවීමට නියම කළ අතර එදින මෙම කටයුතුවල ප්රගතිය දැනුම් දෙන ලෙසත් පාර්ශවකරුවන්ට නියම කළේය.
වස්කඩුව මනුෂ්ය ඝාතන නඩුවේ තිදෙනෙකුට කළුතර මහාධිකරණ විනිසුරු තාමර තෙන්නකෝන් මහතා විසින් අද (13) මරණ දඬුවම නියම කර තිබේ.
කුඩා වස්කඩුව ලිටිල්ටන්වත්ත ප්රදේශයේ පදිංචිව සිටි චමින්ද කුමාර නමැත්තා 2008 ඔක්තෝබර් මස 23 හෝ ඊට ආසන්න දිනක, වස්කඩුව ප්රදේශයේ පැවති අවමඟුල් නිවසකදී පිහියකින් ඇන ඝාතනය කිරීම සම්බන්ධයෙන් මෙම පුද්ගලයින් කළුතර උතුර පොලීසිය විසින් අත්අඩංගුවට ගෙන අධිකරණයට ඉදිරිපත් කර තිබුණි.
ඒ අනුව කළුතර මහේස්ත්රාත් අධිකරණයේ මූලික සාක්ෂි විභාග කිරීමෙන් පසු නීතිපතිවරයා විසින් මහාධිකරණය හමුවේ නඩු පැවරීය.
පසුගිය නඩු වාරයේදී පැමිණිල්ලේ සහ විත්තියේ දේශන ඉදිරිපත් කර තිබූ අතර, තීන්දුව ප්රකාශයට පත්කිරීම අද (13) සිදු කරන ලදී.
තීන්දුව ප්රකාශයට පත්කිරීමට පෙර මහාධිකරණ විනිසුරු විසින් මහාධිකරණ ශාලාවේ දොර ජනෙල් වසාදමා විදුලි පහන් නිවා අධිකරණ ශාලාව තුළ රැදී සිටී සියලු දෙනා අසුන්වලින් නැගිටවීමෙන් පසු මෙම තීන්දුව ප්රකාශයට පත්කර තිබුණි.
කළුතර – සම්පත්
ඔස්ට්රේලියාවේ රැකියා ලබාදෙන බව පවසමින් මුදල් වංචා කළ තරුණයින් දෙදෙනෙකු ශ්රී ලංකා විදේශ සේවා නියුක්ති කාර්යංශයේ විශේෂ විමර්ශන අංශයේ නිලධාරීන් විසින් අත්අඩංගුවට ගෙන තිබේ.
මහනුවර නගරයේ වීසා උපදේශන මධ්යස්ථානයක් පවත්වාගෙන යන මුවාවෙන් ඕස්ට්රේලියාවේ රැකියා ලබාදෙන බව පවසමින් ඔවුන් මෙම මුදල් වංචා කර ඇති බව එම කාර්යංශය සඳහන් කළේය.
සැකකරුවන් විසින් ගම්පහ ප්රදේශයේ පදිංචි පුද්ගලයෙකුගෙන් රුපියල් ලක්ෂ 35ක මුදලක් ලබාගෙන ඔහුට පොරොන්දු වූ පරිදි එම රැකියා ලබා නොදුන් බවට කාර්යංශයට පැමිණිල්ලක් ලැබී තිබුණි.
ඒ අනුව විමර්ශන ආරම්භ කළ විදේශ සේවා නියුක්ති කාර්යාංශයේ විමර්ශන නිලධාරීන් විසින් අදාළ ආයතනයේ වැටලීමක් සිදුකර තිබු අතර එහිදි එම ආයතනය කාර්යාංශයේ වලංගු බලපත්රයකින් තොරව, වීසා උපදේශන මධ්යස්ථානයක් මුවාවෙන් පවත්වාගෙන ගොස් ඇති බවට අනාවරණය වී ඇත.
මෙම වංචනික ආයතනය පවත්වාගෙන ගිය ගම්පොල හා තලාතුඔය ප්රදේශයේ පදිංචි 23 හැවිරිදි තරුණයින් දෙදෙනෙකු එහිදී විමර්ශන නිලධාරීන් විසින් අත්අඩංගුවට ගෙන ඇති ඇති බව විදේශ සේවා නියුක්ති කාර්යංශය වැඩිදුරටත් පැවසීය.
අදාළ ස්ථානයේ තිබී විදේශ රැකියා ගිවිසුම් 7ක්, විදේශ ගමන් බලපත්ර 5ක්, මුදල් කුවිතාන්සි පොත් ද නිලධාරීන් භාරයට ගෙන තිබේ.
අත්අඩංගුවට ගත් සැකකරුවන් දෙදෙනා අද (13) මහනුවර මහේස්ත්රාත් අධිකරණය වෙත ඉදිරිපත් කිරීමට නියමිත බව ද විදේශ සේවා නියුක්ති කාර්යංශය සඳහන් කළේය.
මත්ද්රව්ය භාවිත කර පෞද්ගලික මගී බස් රථවල සේවයේ යෙදෙමින් සිටි රියදුරන් සහ කොන්දොස්තරවරුන් හත්දෙනකු අත්අඩංගුවට ගෙන තිබේ.
පිළියන්දල ප්රධාන බස් නැවතුම්පොළින් ගමන් ආරම්භ වන සහ පිළියන්දල නගරය හරහා ධාවනය වන පෞද්ගලික බස් රථවල රියදුරන් සහ කොන්දොස්තරවරුන් මත්ද්රවය පානය කර ඇතිදැයි පරික්ෂා කිරීමෙන් අනතුරුව එම අත්අඩංගුවට ගැනීම සිදුකර ඇත.
එම පරික්ෂා කිරීම් පිළියන්දල ප්රධාන බස් නැවතුම්පොළෙ දී ජාතික ප්රවාහන වෛද්ය ආයතනයේ විශේෂ බස් රථයක් තුළ සිදුකර තිබේ.
බස් රථ රියදුරන් සහ කොන්දොස්තරවරුන් 170 එලෙස පරීක්ෂාවට ලක් කර ඇත.
නුගේගොඩ ජාතික ප්රවාහන වෛද්ය ආයතනය සහ පිළියන්දල පොලීසිය ඒකාබද්ධව පුරා පැය පහකට ආසන්න කාලයක් එම පරික්ෂා කිරීම සිදුකර තිබේ.
මාර්ග අංක 120 ( කැස්බෑව – පිටකොටුව) , මාර්ග අංක 255 ( ගල්කිස්ස – කොට්ටාව), මාර්ග අංක 162 ( පිළියන්දල බණ්ඩාරගම), මාර්ග අංක 341 ( පිළියන්දල – මහරගම), මාර්ග අංක 341/2 ( කරදියාන හරහා – මහරගම), මාර්ග අංක 342 ( පිළියන්දල -කොට්ටාව), මාර්ග අංක 157 ( කහපොල – පිලියන්දල ) හා මාර්ග අංක 157/1 පිලියන්දල – මාකන්දන) යන මාර්ගයන්හි රියදුරන් සහ කොන්දොස්තරවරුන් එලෙස පරීක්ෂාවට ලක් කර ඇත.
අත්අඩංගුවට ගත් සැකකරුවන් කැස්බෑව මහෙස්ත්රාත් අධිකරණය වෙත ඉදිරිපත් කිරීමට නියමිතය.
පිලියන්දල පොලීසිය ඉදිරි පරීක්ෂණ පවත්වයි.
අපරාධ පරීක්ෂණ දෙපාර්තමේන්තුවේ අධ්යක්ෂගේ නම සඳහන් කරමින් ව්යාජ ලෙස සකස් කළ විද්යුත් තැපැල් පණිවිඩයක් පුද්ගලයෙකු හෝ කණ්ඩායමක් විසින් මේ දිනවල මහජනතාව වෙත යොමු කරන බවට නිරීක්ෂණය වී ඇති බව පොලීසිය දැනුම් දී තිබේ.
ඒ සම්බන්ධයෙන් අපරාධ පරීක්ෂණ දෙපාර්තමේන්තුව විසින් මේ වන විට පරීක්ෂණයක් ආරම්භ කර ඇත.
අධ්යක්ෂ අපරාධ පරීක්ෂණ දෙපාර්තමේන්තුව ශානි අබේසේකර (Shani Abesekara. Director of the Criminal Investigation Department (CID), Colombo 07, Sri Lanka, NationWide Could, Protection 24/7) යනුවෙන් ව්යාජව සකස් කළ email පණිවිඩයක් පුද්ගලයෙකු හෝ කණ්ඩායමක් විසින් මෙලෙස මහජනතාව වෙත යොමු කරන බව පොලීසිය පවසයි.
මෙම email පණිවිඩය කිසිසේත්ම අපරාධ පරීක්ෂණ දෙපාර්තමේන්තුව මඟින් යොමු කරනු ලැබූ විද්යුත් තැපැල් පණිවිඩයක් නොවන බව අපරාධ පරීක්ෂණ දෙපාර්තමේන්තුව විසින් දැනුම් දී තිබේ.
noucinatacha20@gmail.com, police.cid.lk@gmail.com යන විද්යුත් ලිපිනයන් මඟින් යොමු කර ඇති ඉහත ව්යාජ විද්යත් පණිවිඩ මහජනතාව රැවටීම, මුදල් වංචා කිරීම හෝ පුද්ගලික තොරතුරු ලබාගැනීම යන වංචනික ක්රියාවන් සිදුකිරීමේ අරමුණින් යොමු කර ඇති බවට පොලීසිය සැකපල කරයි.
එමෙන්ම ඉහත පණිවිඩය යොමු කරනු ලැබූ පුද්ගලයන් හෝ කණ්ඩායම් පිළිබඳ තොරතුරු අනාවරණය කර ගැනීම හා ඒ හා සම්බන්ධව නීතිමය පියවර ගැනීම සඳහා අපරාධ පරීක්ෂණ දෙපාර්තමේන්තුව මගින් විමර්ශන ආරම්භ කර ඇත.
ඒ අනුව, ඉහත විද්යුත් තැපැල් ලිපිනයන් මගින් යොමු වන පණිවිඩයේ ඇතුලත් අන්තර්ගතයට අදාළ ඔබගේ පුද්ගලික තොරතුරු ලබා දීමෙන් වළකින ලෙසට පොලීසිය මහජනතාව වෙත දැනුම් දී තිබේ.
