Business
ශ්රී ලංකාවේ නිල විදෙස් සංචිත වත්කම් 2026 පෙබරවාරි මාසයේ පැවති අමෙරිකානු ඩොලර් මිලියන 7,270 සිට 2026 මාර්තු මාසයේදී අමෙරිකානු ඩොලර් මිලියන 7,019 දක්වා 3.5% කින් අඩුවී ඇති බව ශ්රී ලංකා මහ බැංකුව පවසයි.
මෙය සඳහා චීන මහජන බැංකුව යටතේ හුවමාරු ගිවිසුමෙන් ලැබුණු මුදල් ද ඇතුළත් වෙයි.
NDB බැංකුවේ අභ්යන්තර මුදල් වංචා සිද්ධිය සම්බන්ධයෙන් එම බැංකුවේ කළමනාකරුවෙකු ඇතුළු පුද්ගලයින් කිහිප දෙනෙකු පොලීසිය විසින් අත්අඩංගුවට ගෙන තිබේ.
පොලිස් මාධ්ය කොට්ඨාසය සඳහන් කළේ, අත්අඩංගුවට ගත් සැකකරුවන් වැඩිදුර විමර්ශන සඳහා අපරාධ පරීක්ෂණ දෙපාර්තමේන්තුව වෙත භාරදී ඇති බවය.
NDB බැංකුව නිවේදනයක් නිකුත් කරමින් අවධාරණය කරන්නේ, මෙම සිද්ධිය හේතුවෙන් කිසිදු ගනුදෙනුකරුවෙකුගේ ගිණුම් හෝ තැන්පතුවලට බලපෑමක් සිදුවී නොමැති බවය.
සියලුම සේවාවන් සාමාන්ය පරිදි බාධාවකින් තොරව පවත්වාගෙන යන බවද බැංකුව පවසයි.
මෙම වංචාව බැංකුවේ නිශ්චිත මෙහෙයුම් අංශයකට සීමා වූ අතර, එයට සේවකයින් කිහිප දෙනෙකුගේ සම්බන්ධතාවයක් හඳුනාගෙන ඇත. සිද්ධිය අනාවරණය වූ වහාම අදාළ සේවකයින් තාවකාලිකව සේවයෙන් ඉවත් කර ඇති අතර, සාක්ෂි සහ වාර්තා ආරක්ෂිතව රඳවාගෙන ඇති බවද සඳහන් වේ.
තවද, අදාළ අංශය දැඩි අධීක්ෂණයට යටත් කර ඇති අතර, අභ්යන්තර පාලන, වාර්තාකරණ හා ආරක්ෂණ පද්ධති තවදුරටත් ශක්තිමත් කරමින් පවතින බව බැංකුව පවසයි.
බැංකුව අනාවරණය කරන්නේ, අතිශය නරකම තත්ත්වයකදී වුවද, මෙම සිද්ධියෙන් සිදුවිය හැකි අලාභය 2026 මාර්තු 31 අවසන් වන කාර්තුව සඳහා රුපියල් බිලියන 4.0ක් පමණ බවයි.
කෙසේ වෙතත්, බැංකුවේ මූල්ය ශක්තිය තවදුරටත් ස්ථාවර බව අවධාරණය කරයි.
2025 වසර සඳහා බැංකුව රුපියල් බිලියන 11ක ශුද්ධ ලාභයක් වාර්තා කර ඇති අතර, 2026 මාර්තු 31 වන විට සමස්ත වත්කම් පදනම රුපියල් බිලියන 990ක් පමණ වන බවද සඳහන් වේ.
ශ්රී ලංකා මහ බැංකුව මෙම සිද්ධිය සම්බන්ධයෙන් දැනුවත් කර ඇති අතර, අවශ්ය නියාමන අධීක්ෂණ සහ සහාය ලබාදී ඇත. නියාමන උපදෙස් අනුව, 2026 අප්රේල් 6 දින ගෙවීමට නියමිත මුදල් ලාභාංශය තාවකාලිකව අත්හිටුවා ඇති අතර, Scrip Dividend යෝජනාව සැලසුම් කළ පරිදි ක්රියාත්මක වේ.
මෙම සිද්ධිය පිළිබඳ ස්වාධීන වෝහාරික විගණනයක් සිදු කිරීම සඳහා ස්වාධීන විමර්ශන විශේෂඥයෙකු පත් කිරීමට අධ්යක්ෂ මණ්ඩලය තීරණය කර ඇත.
NDB බැංකුව අවසානයේ සඳහන් කරන්නේ, විනිවිදභාවය, වගකීම සහ මහජන විශ්වාසය ආරක්ෂා කිරීම සඳහා තම කැපවීම අඛණ්ඩව පවත්වාගෙන යන බවය.
මහජනතාවගෙන් ඉල්ලා සිටින්නේ, තහවුරු නොකළ තොරතුරු, කටකතා හෝ අනුමාන ප්රචාරය කිරීමෙන් වළකින ලෙසය.
ආචාර්ය සුලක්ෂණ ජයවර්ධන මහතා ශ්රී ලංකා ආයෝජන මණ්ඩලයේ (BOI) වැඩබලන සභාපති ලෙස පත් කර තිබේ.
ජනාධිපති අනුර කුමාර දිසානායක මහතා විසින් එම පත් කිරීම සිදුකර ඇත.
ශ්රී ලංකා පරිපාලන සේවයේ (SLAS) වසර 23කට අධික විශිෂ්ඨ සේවා පළපුරුද්දක් ඇති විශේෂ ශ්රේණියේ නිළධාරියෙකු වන ආචාර්ය ජයවර්ධන මහතා, රාජ්ය පරිපාලනය, ප්රතිපත්ති සම්පාදනය සහ මහා පරිමාණ ව්යාපෘති කළමනාකරණය පිළිබඳ හසල අත්දැකීමක් ඇති ජ්යෙෂ්ඨ රජයේ නිළධාරියෙකි.
ආචාර්ය සුලක්ෂණ ජයවර්ධන මහතා වැඩ ආරම්භ කිරීම කොළඹ 01 ලෝක වෙළඳ මධ්යස්ථානයේ පිහිටි ශ්රී ලංකා ආයෝජන මණ්ඩලයේදී අද (08) සිදු කෙරිණි.
මෙම අවස්ථාවට ශ්රී ලංකා ආයෝජන මණ්ඩලයේ අධ්යක්ෂ ජනරාල් රේණුකා එම් වීරකෝන් මහත්මිය ඇතුළු ඉහල නිළධාරීන් සහභාගි වූහ.
මැදපෙරදිග යුධමය වාතාවරණය හේතුවෙන් මෙහෙයුම් නවතා තිබූ ‘කුවේට් එයාවේස්’ ගුවන්සේවය යළි කොළඹ දක්වා ගුවන්ගමන් ආරම්භ කරන බව සිවිල් ගුවන්සේවා අමාත්යාංශය අද (8) පස්වරුවේ නිවේදනය කළේය.
ඒ අනුව මේ වනවිට ඇති වී තිබෙන යුධමය වාතාවරණය සලකාබලමින් අප්රේල් 15 සිට ගුවන්ගමන් නිල වශයෙන් ආරම්භ කිරීමට එම සමාගම තීරණය කර ඇත.
යුධමය වාතාවරණය හේතුවෙන් ඉකුත් පෙබරවාරි 28 වනදා සිට ‘කුවේට් එයාවේස්’ සිය මෙහෙයුම් කටයුතු තාවකාලිකව නතර තිබුණි.
ඉන් අනතුරුව මාර්තු 2වනදා සිට ගුවන්ගමන් නැවත ආරම්භ කිරීමට තීරණය කළද, ඒ වනවිටද තිබූ අනාරක්ෂිත තත්ත්වය හේතුවෙන් ගුවන්ගමන් යළි අත්හිටුවීය.
කෙසේ නමුත් එම තත්ත්වය යටතේ මාර්තු 31වනදා මඟීන් 241ක් රැගත් විශේෂ ගුවන් යානයක් කුවේට් සිට කටුනායක වෙත පැමිණියේය.
දේශීය කර්මාන්තකරුවන් ශක්තිමත් කිරීම රජයේ ප්රමුඛ අරමුණක් බවත්, රජයට අවශ්ය සැපයුම් සිදු කිරීමේදීද ඉදිරියේදි දේශීය ව්යාපාරිකයන්ට ලබා දෙන අවස්ථා පුළුල් කිරීමට අපේක්ෂා කරන බවත් ජනාධිපති අනුර කුමාර දිසානායක මහතා පවසයි.
ජනාධිපතිවරයා මේ බව පැවසුවේ ලංකා එක්සත් ව්යාපාරිකයන්ගේ සන්ධානය සමඟ අද (08) පෙරවරුවේ ජනාධිපති කාර්යාලයේදී පැවති සාකච්ඡාවේදීය.
මැදපෙරදිග යුද තත්ත්වය හේතුවෙන් දේශීය කර්මාන්තවලට එල්ල වී ඇති අභියෝග සහ කර්මාන්තකරුවන් මුහුණ දී සිටින ගැටලු මෙන්ම ඒ වෙනුවෙන් ලබා දිය හැකි සාධනීය විසඳුම් පිළිබඳවද මෙහිදී දීර්ඝ ලෙස සාකච්ඡා කර තිබුණි.
සෙස් බද්ද, දේශීය කර්මාන්ත ක්ෂේත්රයෙහි පවතින මානව සම්පත් හිඟය මෙන්ම අනීතික ලෙස මෙරටට පැමිණෙන භාණ්ඩ පිළිබඳවද මෙහිදී සාකච්ඡාවට ලක් ව තිබේ.
ගුණාත්මකභාවයෙන් අඩු භාණ්ඩ දේශීය වෙළෙඳපොළට පැමිණීම සහ ඒ ආශ්රිතව මතුව ඇති ගැටලු විසඳා ගැනීමට අදාළ ආයතන සමඟ ඒකාබද්ධව ගත යුතු ක්රියාමාර්ග පිළිබඳව ද මෙහිදී වැඩිදුරටත් සාකච්ඡා කර ඇත.
බහාලුම් නිදහස් කර ගැනීම සහ එහිදී ඇති වන අකාර්යක්ෂමතාව මඟහරවා ගැනීමට ගත යුතු පියවර පිළිබඳව ද අවධානය යොමු කෙරුණු අතර, අදාළ අංශ සමඟ ඒ පිළිබඳ සාකච්ඡාවක් පැවැත්වීමටද තීරණය කළ බව ජනාධිපති මාධ්ය අංශය නිකුත් කළ නිවේදනයේ සඳහන් වේ.
2026 දෙවන කාර්තුව සඳහා 15%කට ආසන්න ප්රතිශතයකින් යළිත් විදුලි ගාස්තු ඉහළ දැමීමට ජාතික පද්ධති පාලක (National System Operator) පෞද්ගලික සමාගම මහජන උපයෝගීතා කොමිසමෙන් ( PUCSL) ඉල්ලීමක් කර තිබේ.
ඒ, අප්රේල් – ජුනි (දෙවන කාර්තුව) කාලසීමාවට අදාළව පසුගියදා ප්රකාශයට පත්කළ 10%ක විදුලි ගාස්තු සංශෝධනයට අතිරේකවය.
ජාතික පද්ධති පාලක පෞද්ගලික සමාගම මෙලෙස දෙවන කාර්තුවේදී 15%ක අතිරේක ඉහළ දැමීමක් ඉල්ලා ඇත්තේ, විදුලි ජනයේදී අතිරේකව සිදුවන රුපියල් බිලියන 16ක පිරිවැයක් පියවාගැනීමට බව සඳහන්ය.
පවතින වියළි කාලගුණ තත්ත්වය හේතුවෙන් විදුලි ජනනය සඳහා අතිරේක ඩීසල් ප්රමාණයක් භාවිත කිරීමට සිදුවීම, මැදපෙරදිග යුද්ධය හෙතුවෙන් ඇතිව තිබෙන දැවිතෙල් හිඟය නිසා ඩීසල් බලාගාරවලින් විදුලි උත්පාදනය කිරීමට සිදුවීම මීට බලපා ඇත.
එමෙන්ම ගල්අඟුරුවලින් අපේක්ෂිත ධාරිතායට විදුලිය ජනනය නොවීම වැනි හේතු මත ඩීසල් බලාගාරවලින් විදුලි ඉල්ලුම පියවා ගැනීමේදී සිදුවන අතිරේක ජනන වියදම් පියවා ගැනීමද මෙම යෝජිත නව සංශෝධනයේ අරමුණ වී තිබේ.
අප්රේල් මාසයේ මුල් දින 5 තුළදී ශ්රී ලංකාවට සංචාරකයින් 26,800ක් පැමිණ ඇති බව ශ්රී ලංකා සංචාරක සංවර්ධන අධිකාරිය පවසයි.
නිකුත් කළ නවතම දත්ත අනුව, එම කාලය තුළ ඉන්දියාවෙන් සංචාරකයින් 7,562ක් පැමිණ ඇති අතර, එය සමස්තයේ 28%ක් වේ.
එමෙන්ම, රුසියාවෙන් 1,623ක්, ජර්මනියෙන් 1,090ක්, එක්සත් රාජධානියෙන් 2,854ක්, චීනයෙන් 1,537ක් සහ ඔස්ට්රේලියාවෙන් 2,794 ක් ද මෙම කාලය තුළ ශ්රී ලංකාවට පැමිණ ඇත.
තවද, 2026 ජනවාරි 01 සිට අප්රේල් 05 දක්වා සමස්ත සංචාරක පැමිණීම් සංඛ්යාව 767,434ක් ලෙස වාර්තා වී තිබේ.
ඒ අතරින් ඉන්දියාවෙන් 154,835ක්, රුසියාවෙන් 67,541ක් සහ එක්සත් රාජධානියෙන් 81,274ක් සංචාරකයින් පැමිණ ඇති බවද එම අධිකාරිය සඳහන් කළේය.
අද (06) මධ්යම රාත්රියේ සිට ෆ්රයිඩ් රයිස්, කොත්තු සහ රයිස් ඇන්ඩ් කරි කෑම මිල රු 20කින් ඉහළ දමා ඇති බව ආපනශාලා හිමියන්ගේ සංගමය පවසයි.
එම සංගමයේ සභාපති, හර්ෂණ රුක්ෂාන් මහතා පවසා සිටියේ, පොල්තෙල් මිල අඩුවීම හේතුවෙන් කෙටි කෑම මිල රුපියල් 10කින් පහත දැමීමට තීරණය කළ බවය.
ඊයේ (05) මධ්යම රාත්රියේ සිට බලපැවැත්වෙන පරිදි ගෑස් මිල විශාල ප්රමාණයකින් ඉහළ යෑම හේතුවෙන් මෙලෙස කෑම මිල ගණන් ඉහළ නංවා ඇති බවද ඒ මහතා වැඩිදුරටත් පැවසීය.
එළැඹෙන උත්සව සමය වෙනුවෙන් පාරිභෝගික ජනතාවගේ ආරක්ෂාව උදෙසා විශේෂ වැඩපිළිවෙළක් මේ වන විට ආරම්භ කර ඇතැයි පාරිභෝගික කටයුතු පිළිබඳ අධිකාරිය පවසයි.
එම අධිකාරියේ සභාපති හේමන්ත සමරකෝන් මහතා පැවසුවේ ඒ අනුව පසුගිය 20 වැනිදා සිට මේ දක්වා වැටලීම් 1,000කට අධික ප්රමාණයක් සිදුකර අවශ්ය නීතිමය පියවර ගෙන ඇති බවය.
පසුගිය කාලය තුළ සහල් සඟවා තබා ගැනීම, වැඩි මිලට අලෙවි කිරීම යන චෝදනා සම්බන්ධයෙන් ව්යාපාරිකයින් 170කට අධික ප්රමාණයකට නීතිමය පියවර ගෙන ඔවුන්ට ලබා දිය යුතු නීතිමය දඬුවම් ලබා දුන් බවද ඒ මහතා මෙහිදී පැවසුවේය.
මෙම වසරේ මේ දක්වා පමණක් වැටලීම් 5,000කට ආසන්න ප්රමාණයක් සිදුකර අවශ්ය පියවර ගෙන ඇති බවද ඒ මහතා මෙහිදී සඳහන් කළේය.
එමෙන්ම මැදපෙරදිග මතුව ඇති යුද ගැටුම් හමුවේ මේ වන විට යම් භාණ්ඩවල මිල ඉහළ යෑමක් පෙන්නුම් කරන බවත් කෙසේ වෙතත් භාණ්ඩවල හිඟයක් ඇති නොවීමට ආනයනකරුවන්, දේශීය නිෂ්පාදකයින් සහ භාණ්ඩ සපයන්නන් අතර නිතරම සාකච්ඡා පවත්වන බවත් පැවසූ ඒ මහතා ඒ සඳහා අවශ්ය පියවරයන් ගන්නා බවද පැවසුවේය.
තවද මේ වන විට මෙරට පෞද්ගලික අංශය විසින් නිකුත් කරන ගෑස්වල යම් ගෑස් හිඟයක් පවතින නමුත් එම සමාගමට මේ වන විටත් ගෑස් නෞකාවක් රට තුළට පැමිණ ඇතැයි ද එම ගෑස් වෙළෙඳපොළට නිකුත් කිරීම සඳහා වූ නිෂ්පාදන කටයුතු ඔවුන් මේ වන විට සිදුකරමින් පවතින බවත් සභාපතිවරයා මෙහිදී සඳහන් කළේය.
මෙම කටයුතු පිළිබඳව අවධානය යොමු කරමින් ගෑස් සඟවා තබා ගැනීමට කටයුතු නොකරන ලෙස තමන් වෙළෙඳ ව්යාපාරිකයින්ගෙන් ඉල්ලා සිටින බවත් පැවසූ ඒ මහතා මෙහිදී වැඩිදුරටත් අදහස් දක්වමින් පැවසුවේ එසේ කළ හොත් නීතිමය පියවර ගැනීමටද අධිකාරිය කටයුතු කරන බවය.
එළැඹෙන උත්සව සමය වෙනුවෙන් මෙට්රික් ටොන් 7,000ක LPG ගෑස් නෞකාවක් දිවයිනට පැමිණ ඇති බව ලාෆ්ස් ගෑස් සමාගම පවසයි.
ලාෆ්ස් ගෑස් සමාගම පැවසුවේ ගෑස් තොගය රැගත් රැගත් ‘ඇන්ඩෝවර්’ (ANDOVER) නෞකාව හම්බන්තොට ලාෆ්ස් පර්යන්තය වෙත සාර්ථකව සේන්දු වී ඇති බවය.
ඒ අනුව ගෑස් සිලින්ඩර් පිරවීම සහ බෙදාහැරීමේ කටයුතු කඩිනම් කිරීමට අවශ්ය පියවර දැනටමත් ගෙන ඇති අතර, දිවයිනේ සෑම ප්රදේශයකටම කාර්යක්ෂමව ගෑස් ලබා දීමට කටයුතු සූදානම් කර ඇති බව සඳහන් වේ.
මෙම ගෑස් තොගය ලොව පිළිගත් සහ විශ්වාසදායක බලශක්ති සැපයුම්කරුවෙකු වන නෙදර්ලන්තයේ ‘SHV Energy’ සමාගමෙන් ලබාගෙන තිබේ.
