ශ්රී ලංකා යුද හමුදාවේ අණ දෙන නිලධාරීන්ගේ නම් ගම් විවිධ තානාපති කාර්යාලයන්හි ලැයිස්තුගත කරනු ලැබ ඇති අතර ඔවුන්ට එම රටවල සංචාර සඳහා වීසා ලබාගැනීමේදී දුෂ්කරතා මතුවී ඇති බව ජනරාල් ජගත් ජයසූරිය පවසයි.
බ්රසීලයේ තානාපති පදවිහි සිය දෑවුරුදු නිල කාලය අවසානයේ ශ්රී ලංකාවට පැමිණ සිටින ජනරාල් ජයසූරිය එම ප්රකාශය කළේ, යුද අපරාධ චෝදනා යටතේ බ්රසීලයේ අධිකරණයක ඔහුට එරෙහිව නඩු පවරනු ලැබීම සම්බන්ධයෙන් බීබීසී සිංහල සේවය විසින් කරන ලද විමසීමකදීය.
“අපේ නම්ගම් පුවත්පත්වල පළ වෙනවා. බොහෝ තානාපති කාර්යාල වල යුද අණදෙන නිලධාරීන්ගේ නම් ලැයිස්තුගත කරලා තියෙනවා. ඒ නිලධාරීන් පිටරටකට වීසා ලබා ගන්න ගියාම කියනවා ඔවුන් නීතිය කඩ කරපු බවක්. උදාහරණයක් හැටියට මගේ පෞද්ගලික උවමනාවකට ඇමෙරිකාවට යන්න වීසා ඉල්ලුවත් මට වීසා දුන්නේ නැහැ. ඒක නිල ප්රතික්ෂේප කිරීමක් නොවෙයි. නමුත් ඔවුන් වීසා නොදීමට හේතු පැහැදිලි කරන්නේ නැහැ. මම දන්නවා ඒ ගොල්ලන් ළඟ අපේ නම් ගම් තොරතුරු තියෙන බව. ආණ්ඩුව මේ ප්රශ්නය විසඳන්න ඕන” ජනරාල් ජයසූරිය කියා සිටී.
බීබීසී කොළඹ වාර්තාකරු දුරකතනය මගින් කරන ලද එම සාකච්ඡාවේ දී වැඩිදුරටත් කරුණු දැක්වූ ජනරාල් ජගත් ජයසූරිය “යුද්ධයේ දී තමාට ඉදිරි පෙළේ මෙහෙයුම් කාර්යභාරයක් නොපැවරුණ” බව සඳහන් කළේය.
කොටි සංවිධානයට එරෙහිව ගෙන ගිය සටනට අණදෙන ලද්දේ ෆීල්ඩ් මාර්ෂල් සරත් ෆොන්සේකා වන අතර එම මෙහෙයුම් සඳහා සියලු අණදීම් කරන ලද්දේ තමා බව ෆීල්ඩ් මාර්ෂල්වරයා විසින් ඍජු ලෙසම භාර ගනු ලැබ ඇති බව ජනරාල් ජගත් ජයසූරිය පවසයි.
“අපි කවුරුත් දන්නවා-යුද මෙහෙයුමට අණ දුන්නේ එවක හමුදාපති පදවියේ සිටි, දැන් ෆීල්ඩ් මාර්ෂල් සරත් ෆොන්සේකා බව. එතුමා කෙළින්ම කියල තියෙනවා- යුද මෙහෙයුම් වලට අණ දුන්නේ තමා බව. මට පැවරුණේ යුද හමුදාවට අවශ්ය සැපයුම්වලට (logistical support) අදාළ කාර්යයි. මම එහි නිරත වෙමින් සිටියා ” ජනරාල් ජයසූරිය පවසයි.
බ්රසීලයේ සහ කොලොම්බියාහි පවරා ඇති නඩුකර පිළිබඳව බීබීසි විමසීමක් කළ විට ඊට පිළිතුරු දුන් ජනරාල් ජයසූරිය, වධ හිංසා සිදු කිරීම් පිළිබඳව තමාට එරෙහිව නැගෙන චෝදනා පිළිබඳව අන්තර්ජාල වෙබ් අඩවි මගින් කියවන්නට ලැබුණ බව සඳහන් කළේය.
ශ්රී ලංකා ක්රිකට් තේරීම් කමිටුවේ සභාපති පදවියෙන් ඉල්ලා අස්වන්නේ සිය හදවතේ තෙරපෙන දැඩි වේදනාවක් ද සහිතව බව පදවියෙන් ඉවත්ව යන සනත් ජයසූරිය පවසයි.
සියලුම අංශවලින් ශ්රී ලංකාව නියෝජනය කළ ක්රීඩකයෙකු, කණ්ඩායමේ හිටපු නායකයෙකු සහ වර්තමානයේ තේරීම් කමිටු සභාපතිවරයා ද වන තමාට සහෝදර කමිටු සාමාජිකයන් ද සමග සාකච්ඡා කිරීමෙන් අනතුරුව එම තීරණයට එළඹීමට ආසන්නතම හේතුව වූයේ පසුගිය ඉරිදා පල්ලෙකැලේ ක්රීඩාංගනයේ ක්රීඩාලෝලීන්ගේ හැසිරීම බව ද සනත් ජයසූරිය සඳහන් කරයි.
ඒ අනුව ලබන සැප්තැම්බර් 07 වෙනි දින සිට තමන් ඇතුළු කමිටුව ඉල්ලා අස්වන බව ක්රීඩා අමාත්ය දයාසිරි ජයසේකර වෙත ලිපියක් යවමින් ක්රිකට් තේරීම් කමිටුවේ සභාපතිවරයා සඳහන් කරයි.
“ක්රිකට් යනු සෑම කල්හිම මගේ ජීවිතය වන බැවින්, අපේ ක්රීඩාලෝලීන් අපේ ක්රීඩකයන්ට පහර දෙනු දකින්නට ලැබීම අතිශය වේදනාකාරීය,” යනුවෙන් ද එම ලිපියේ සඳහන් වේ.
පසුගිය වසර ක්රිකට් ක්රීඩාව සම්බන්ධයෙන් අපේක්ෂා බිඳ වැටුණු කාලයක් බව පිළිගන්නා සනත් ජයසූරිය,කෙසේ නමුත් එයට පෙරාතුව ශ්රී ලංකා කණ්ඩායම ප්රබල ඕස්ට්රේලියානු කණ්ඩායම 3-0 ක් වශයෙන් පරාජය කළ බවත් සිහිපත් කරයි.
මේ මොහොතේ බිඳවැටීමක් තිබෙන නමුත් ඉතා දක්ෂ ක්රීඩකයන් සිටින ශ්රී ලංකාව නුදුරු අනාගතයේදීම යළිත් වරක් සුපුරුදු දක්ෂතා අතරට එනු ඇතැයි බලාපොරොත්තු පළ කරන තේරීම් කමිටු සභාපතිවරයා, අවශ්ය වුවහොත් ක්රීඩාවේ ප්රගතිය වෙනුවෙන් අනාගතයේදී ද සිය සේවය සූදානම් බවත් වැඩිදුරටත් සඳහන් කරයි.
“කඳුළු අතරින් වුවත් අපේ හිස කෙලින් තබාගෙන සමුගන්නා,” බව පවසන සනත් ජයසූරිය, ශ්රී ලංකා ක්රීඩකයන් කෙරෙහි දිගටම විශ්වාසය තබන මෙන් ක්රීඩාලෝලීන්ගර්න් විශේෂ ඉල්ලීමක් ද කරයි.
ක්රිකට් පාලක මණ්ඩලයේ සභාපති තිලංග සුමතිපාල මහතා සිය පදවියෙන් ඉල්ලා අස්වීම ප්රතික්ෂේප කර ඇත.
ශ්රී ලංකා ක්රිකට් කණ්ඩායම ඇද වැටී ඇති අගාධයේ වගකීම බාර ගනිමින් තිලංග සුමතිපාල මහතා ඉල්ලා අස්විය යුතු බවට ශ්රී ලංකා ක්රිකට් කණ්ඩායම ලෝක ශූරතාව දිනා ගැනීමට මෙහෙයවූ අර්ජුන රණතුංග මහතා කළ ප්රකාශයට සුමතිපාල මහතා මෙම ප්රතිචාරය දක්වා ඇත.
” ඉල්ලා අස්වෙන්න කිසිම හේතුවක් නෑ. ක්රීඩකයන්ගේ දුර්වල ක්රීඩා විලාසයයට කිසිසේත්ම පරිපාලනය වග කිවයුතු නෑ”. සුමතිපාල මහතා පැවසුවේය.
වත්මන් රජයේ කණිජතෙල් අමාත්යවරයා වන අර්ජුව රණතුංග මහතා 28 වැනදා මාධ්ය හමුවක් අමතමින් ප්රකාශ කළේ ක්රිකට් ක්රීඩාවේ අර්බුදය සම්බන්ධයෙන් වහාම පියවර ගන්නා මෙන් ඉල්ලා සිටිමින් ජනාධිපති මෛත්රීපාල සිරිසේන වෙත තමන් ලිපියක් යොමු කළ අතර, එහි පිටපතක් අගමැති රනිල් වික්රමසිංහ වෙත භාරදුන් බවයි.
සුමතිපාල පරිපාලනය විසුරුවා හැර ක්රිකට් අතුරු කමිටුව පත් කර ශ්රී ලංකා ක්රිකට් පරිපාලනය මෙහෙයවීමට ඊට පවරන ලෙසද රණතුංග මහතා ඉල්ලා ඇත.
සංචාරක ඉන්දීය පිල සමග පැවැති ටෙස්ට් තරගාවලිය 3-0 ලෙස පරාජයට පත් වූ ශ්රී ලංකා කණ්ඩායම තරග පහකින් සමන් විත එක් දින තරගාවලියද මේ වන විට 3-0 ලෙස පරාජයට පත වී ඇත. යම් හෙයකින් ඉදිරි තරග දෙකද ඔවුන් පරාජය වුව හොත් 2019 දී එලෙඹෙන ලෝක කුසලානයට තරග කිරීමට නම් එංගලන්තයේදී පැවැත්වෙන සුදුසුකම් ලැබීමේ තරග වටයට මූණ දීමට සිදු වනු ඇත.
වත්මන් පාර්ලිමේන්තුවේ නියේජ්ය කතානායක වරයා වන තිලංග සුමතිපාල මහතා 2016 වසරේදී ක්රිකට් පාලක මණ්ඩලයේ සභාපති ධුරයට පත් විය.
රටේ ක්රිකට් ක්රීඩාව යළි ගොඩනැගීමට තම පරිපාලනය දිර්ඝ කාලීන වැඩ පිළිවෙලක් ක්රියාත්මක කර ඇති නමුත් එහි ප්රතිපල ලැබීමට වසර 3-4ක් ගත විය හැකි බව සුමති පාල මහතා මෙහිදී වැඩි දුරටත් පැවසීය.
දෙමළ දේශපාලන සිරකරුවන් නිදහස් නොකළහොත් ඉදිරියේදී දැඩි තීරණ ගැනීමට උතුරු පළාත් සභා ප්රධාන අමාත්ය සී.වී.විග්නේශ්වරන් මහතා ඇතුළු පළාත් සභා දෙමළ ජාතික සන්ධාන මන්ත්රීවරුන් කටයුතු කරන බව උතුරු පළාත් සභා මන්ත්රී එම්.කේ.ශිවාජිලිංගම් මහතා පවසයි.
යාපනය ප්රදේශයේ පැවති මාධ්ය සාකච්ජාවකදී ශිවාජිලිංගම් මහතා එලෙස පැවසුවේය.
ශිවාජිලිංගම් මහතා එහිදී පැවසූවේ දෙමළ දේශාපාලන සිරකරුවන් නිදහස් කරන ලෙසට රජයේ ප්රධානීන් හමුවී සාකච්ජා පැවැත්වුවද, ලිපි මඟින් ඉල්ලීම් කළද, උපවාස පැවැත්වුවද අදාළ ගැටළු වෙනුවෙන් නිසි විසඳුමක් ලැබී නොමැති බවයි.
දෙමළ දේශපාලන සිරකරුවන් නිදහස් කරන ලෙසට ඉල්ලා උතුරු නැගෙනහිර පළාත් තුළ දින 200 ට ආසන්න කාලයක් උපවාස පැවැත්වීමට අතුරුදහන්වූවන්ගේ ඥාතීන් කටයුතු කළද අදාළ ඉල්ලීම් වෙනුවෙන් ආණ්ඩුව අවධානයක් යොමු නොකරන බවද හෙතෙම පැවසුවේය.
එබැවින් දැඩි දේශපාලන තීන්දු හා ක්රියාමාර්ග තුළින් දේශපාලන සිරකරුවන්ගේ ගැටළුව වෙනුවෙන් පිළිතුරු ලබා ගැනීමට දෙමළ දේශපාලන නියෝජිතයින් එක්විය යුතු බව ශිවාජිලිංගම් මහතා සඳහන් කළේය.
ජාතික ආණ්ඩුව නිර්මාණය කළේ ජනාධිපති මෛත්රීපාල සිරිසේන මහතාගේ වුවමනාවකට හෝ තමාගේ වුවමනාවකට නොවන බවත්, අගමැති රනිල් වික්රමසිංහ මහතාගේ වුවමනාවකට බවත් සම කැබිනට් මාධ්ය ප්රකාශක, සෞඛ්ය පෝෂණ හා දේශීය වෛද්ය අමාත්ය රාජිත සේනාරත්න මහතා පවසයි.
ඒ මහතා මේ බව කියා සිටියේ (23) දිනයේ රජයේ ප්රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්යහමුවට එක්වෙමිනි.
පසුගිය දින 100 වැඩපිළිවෙළ සහ ජාතික ආණ්ඩුව දේශපාලන වාසි වෙනුවෙන් ක්රියාත්මක වූ වැඩපිළිවෙළක් නොවන බවද අමාත්යවරයා පැවසීය.
එය රටේ දැවෙන ප්රශ්න විසඳීමේ අරමුණින් අමාරුවෙන් සකස් කළ වැඩපිළිවෙළක් බවද ඒ මහතා කියා සිටියේය.
එය දකුණු ආසියාවේ ප්රථම අත්හදා බැලීමේ වැඩක් බවත් සම කැබිනට් මාධ්ය ප්රකාශක, සෞඛ්ය පෝෂණ හා දේශීය වෛද්ය අමාත්ය රාජිත සේනාරත්න මහතා මෙහිදී පැවසීය.
පක්ෂයක් හදවාට වඩා රටත් හදන එක අසීරු බව පෙන්වා දුන් අමාත්යවරයා ජනාධිපතිවරයා සහ අගමැතිවරයා එක් ස්ථාවරයක සිටින බව ද අමාත්යවරයා සඳහන් කළේය.
මේ අතර අනාගතේ දේශපාලනය පවා නවීන තාක්ෂණය සමඟ ඉදිරියට යන බවත්, අග්රමාත්ය රනිල් වික්රමසිංහ මහතා දේශපාලන රාජ්ය තාන්ත්රිකයෙකු ලෙස කටයුතු කරන බවත් සම කැබිනට් මාධ්ය ප්රකාශක, ඉඩම් හා පාර්ලිමේන්තු ප්රතිසංස්කරණ අමාත්ය ගයන්ත කරුණාතිලක මහතා පැවසීය.
මේ අතර ආණ්ඩුව යම් යම් පොදු කරුණු පිළිබඳ සාකච්ඡා කරනු ලබන අතර සමූහික තීණ්දු පොදු ක්රමවේදයක් අනුව තීරණය කරනු ලබන බව සම කැබිනට් මාධ්ය ප්රකාශක, ක්රීඩා අමාත්ය ගයන්ත කරුණාතිලක මහතා පැවසීය.
මාධ්ය හමුවේදී මාධ්යවේදීන් යොමු කළ ප්රශ්නවලට පිළිතුරු දෙමින් සම කැබිනට් ප්රකාශක අමාත්ය රාජිත සේනාරත්න මහතා සඳහන් කළේ ඇවන්ගාඩ් නඩු තීන්දුව පිළිබඳව යළි සලකා බැලීමක් සිදුකරන ලෙස නව අධිකරණ අමාත්යවරයාගෙන් ඉල්ලීමක් කරන බවයි.
පණ්ඩිත් ඩබ්ලිව්.ඩී. අමරදේව සූරීන් විසින් ශ්රී ලාංකේය සංගීතයට සිදු කරන ලද අනුපමේය දායකත්වය සැලකිල්ලට ගනිමින්, එතුමන්ගේ සංගීත නිර්මාණ හා සංගීත සම්ප්රදාය සංරක්ෂණය කර අනාගත පරපුර වෙත දායාද කිරීම සඳහා ‘අමරදේව අසපුව’ ස්ථාපනය කිරීමට යෝජනා වී තිබේ. ඒ අනුව, එම අසපුව ස්ථාපනය කිරීමට සුදුසු බවට හඳුනාගනු ලැබ ඇති, බත්තරමුල්ල, ‘අපේ ගම’ පරිශ්රය තුළ පිහිටි පර්චස් 100ක ඉඩම් කොටසක් මුදල් හා ජනමාධ්ය අමාත්යාංශය වෙත පැවරීම පිණිස මහානගර හා බස්නාහිර සංවර්ධන අමාත්ය පාඨලී චම්පික රණවක මහතා ඉදිරිපත් කළ යෝජනාව අමාත්ය මණ්ඩලය විසින් අනුමත කරන ලදී.
