ක්ෂණිකව ධනවතුන් වූ විශාල පිරිසක් පසුපස යුක්තිය මෙහෙයුම දියත් කරමින් තිබෙන බව වැඩබලන පොලිස්පති දේශබන්දු තෙන්නකෝන් පවසනවා.
ඒ අනුව එවැනි පුද්ගලයින් 50,000ක් පමණ ඇති බවයි සීතාවක පොලිස් කොට්ඨාසයේ ප්රජා පොලිස් කමිටු සාමාජිකයින් දැනුවත්කිරීම සඳහා විශේෂ වැඩසටහනට එක්වෙමින් ඔහු සඳහන් කළේ.
ඔවුන් ඉවර කරනතෙක් යුක්තිය මෙහෙයුම ක්රියාත්මක කරන බවත් අපරාධවලට සම්බන්ධවූ කිසිවෙකුට එළියේ සිටීමට ඉඩ නොදෙන බවයි ඔහු වැඩිදුරටත් සඳහන් කළේ.
හින්දු බැතිමතුන්ගේ සුවිශේෂී උත්සවයක් ලෙස සැලකෙන තෛපොංගල් උත්සවය ලොව වැසි සියලූම හින්දු ජනයා විසින් අද (15) සමරනු ලබනවා.
පොංගල් යන දමිළ වචනයේ අදහස වන්නේ “උතුරා යාම නැතිනම් පිටාර ගැලීමයි”. මැටි කළයක කිරි උතුරා යාමට සැලැස්වීම අනාගත සෞභාග්යයේ සළකුණක් ලෙස හින්දු ජනතාව සලකන අතර හින්දු භක්තිකයන් තම පළමු අස්වැන්න සූර්යයාට පුජා කිරීම මෙම සුර්ය මංගල දිනයේ දී සිදු කරනවා
මෙම උත්සවය සෞභාග්යය සහ ස්තුති කිරීම හා බැඳී පවතින අතර තම අස්වැන්න සරු විමට උපකාර කළ වර්ෂාව, සූර්යයා හා ගොවි සතුන්ට ස්තූති කිරීම සඳහා මෙම උත්සවය පවත්වනු ලබන බවයි සඳහන් වන්නේ.
මෙවර උසස් පෙළ විභාගයේ කෘෂි විද්යාව ප්රශ්න පත්රයේ ගැටලු කිහිපයක් සමාජ මාධ්ය ඔස්සේ සංසරණය වීමේ සිද්ධිය සම්බන්ධයෙන් කෘෂිකර්මය විෂය ඉගැන්වීමේ නිරත රජයේ පාසලක ගුරුවරයෙකු අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබෙනවා.
සැකකාර ගුරුවරයා අම්පාර මහෙස්ත්රාත් අධිකරණයට ඉදිරිපත් කිරීමෙන් අනතුරුව එළඹෙන 26 වනදා දක්වා රිමාන්ඩ් බන්ධනාගාරගතකර ඇති බවයි සඳහන් වන්නේ.
අම්පාර ප්රදේශයේ ප්රසිද්ධ රජයේ පාසලක 52 හැවිරිදි වියේ පසුවන උසස් පෙළ කෘෂිකර්ම ගුරුවරයෙකු මෙලෙස අත්අඩංගුවට ගෙන ඇති අතර ගුරුවරයාගේ නිවසේ තිබී ඔහුගේ අත් අකුරින්ම ලියන ලද උසස්පෙළ කෘෂි විද්යාව ප්රශ්න පත්රයද විමර්ශනවල නිරත අපරාධ පරීක්ෂණ දෙපාර්තමේන්තු නිලධාරීන් විසින් සොයාගෙන තිබෙනවා.
සැකකරු විසින් මෙවර උසස් පෙළ විභාගයේ කෘෂි විද්යාව ප්රශ්න පත්රයේ 1 කොටස ජනවාරි මස 08 වනදා නිකුත් කර ඇති බවත් එහි දෙවන කොටස ජනවාරි මස 10 වනදා නිකුත් කර ඇති බවත් පොලීසිය වැඩිදුරටත් සඳහන් කළේ.
2024.01.14 දින පැය 0030 සිට 2024.01.15 වන දින පැය 0030 දක්වා කාලය තුල සිදුකරන ලද විශේෂ මෙහෙයුමේදී පහත මත්ද්රව්ය ප්රමාණයන් අත්අඩංගුවට ගෙන ඇත.
හෙරොයින් 276 g
අයිස් 2 kg 980 g
කොකේන් 3 g 50 mg
ගංජා 2 kg 817 g
ගංජා පැල 235212 ක්
ඈෂ් 4 g 130 mg
කුෂ් 1 g 250 mg
මාවා 165 g
තුල් 4 g 893 mg
මදන මෝදක 139 g
මත්පෙති 4310 ක්
මෙහෙයුමේදී මුලු සැකකරුවන් 952 දෙනෙකු අත්අඩංගුවට ගෙන ඇති අතර, ඉන් සැකකරුවන් 11 ක් සම්බන්ධව රැදවුම් නියෝග මත වැඩිදුර විමර්ශන සිදුකරනු ලබයි.
මත්ද්රව්ය වලට ඇබ්බැහිවු පුද්ගලයින් 10 දෙනෙකු පුනරුත්තාපන මධ්යස්ථාන වෙත යොමු කර ඇත.
එසේම, පොලිස් මත්ද්රව්ය නාශක කාර්යංශය සහ විශේෂ කාර්යංශය ලේඛනගත සැකකරුවන්ගේ ලැයිස්තුවේ සිටි සැකකරුවන් 29 දෙනෙකු මෙදින මෙහෙයුමේදී අත්අඩංගුවට ගෙන ඇත.
ශ්රී ලංකාවේ සහ ලොව පුරා මෙම උතුම් උත්සවය සමරන සියලුම ගොවීන්ට සහ පුද්ගලයින්ට ප්රීතිමත් තෛපොංගල් දිනයක් වේවායැයි මා එක සිතින් ප්රාර්ථනා කරමි.
අප මානව ශිෂ්ටාචාරය හා හැඩගැසී ඇති කෘෂිකර්මාන්තය වෙනුවෙන් ඇති ප්රධාන කාර්යභාරය අවබෝධ කරගනිමින් ඒතුළින් වර්ථමානයේ ශ්රී ලාංකික කෘෂිකර්මාන්තයට එල්ල වන අභියෝග ජයගෙන අනාගතය පරපුර වෙනුවෙන් කටයුතු කරන අතරතුරදී, එහි බැඳී ඇති අපගේ කෘෂිකාර්මික සම්ප්රදායන්, සංස්කෘතියන්, සදාචාරයන්, මනුෂ්යත්වය සහ අපගේ සමාජය තුළ සහජීවනයේ බැඳීම් සුරැකීමට සහ සැමරීමට මෙන්ම, තෛපොංගල් උත්සවයේ වැදගත්කමට ගෞරව කිරීමට මෙය හොදම අවස්ථාවක් වන බවද මා විශ්වාස කරමි.
අද ශ්රී ලාංකීය ගොවීන්, මිනිසුන් ජීවත් කරවීමට අවශ්ය පෝෂණය සැපයීමේදී මුහුණ දෙන අරගලයන් කෘෂිකර්මාන්තයේ වැදගත්කම අවධාරණය කරයි. තෛපොංගල් උත්සවය භූමිය සමඟ අපගේ ගැඹුරු සම්බන්ධතාවය සහ ප්රජාවන් පෝෂණය කිරීමේදී ගොවීන් ඉටු කරන මූලික කාර්යභාරය පිළිබඳ සංවේදී මතක් කිරීමක් කල යුතුයි. තෛපොංගල් උත්සවය සැමරීමට අපි එක්වන විට, සියලු ජීවීන් කෙරෙහි දයාව, කෘතවේදීත්වය සහ ගෞරවය යන සාරධර්ම කෙරෙහි අපගේ කැපවීම යළිත් තහවුරු කිරීමේ අවස්ථාවක් කර ගමු. මෙම උත්සවය අපගේ කෘෂිකාර්මික සංස්කෘතියේ මූලයන් අගය කිරීමටත්, සාමකාමී සහ තිරසාර අනාගතයක් සඳහා අඛණ්ඩව කටයුතු කිරීමටත් පමණක් නොව, සතුන් කෙරෙහි සහජ කරුණාව, සමගිය පිළිබඳ හැඟීමක් පෝෂණය කිරීම සහ ඒ සඳහා වූ අපගේ සමාජය තුළ හවුල් වගකීම ද අවධාරණය කරයි.
හින්දු ආගම අදහන දෙමළ ජනයා සඳහා තෛපොංගල් සමය නව වසරක උදාව සනිටුහන් කරනවා මෙන්ම, නව අවස්ථා සහ ආරම්භය සංකේතවත් කරයි. මෙම උත්සවය සමරන ශ්රී ලාංකිකයන් සහ දේශසීමාවෙන් එතෙර සියලු දෙනාගේ ජීවිතවලට සෞභාග්යය, ප්රීතිය ගෙනදේවා යැයි මා ප්රාර්ථනා කරමි. සැමට අර්ථවත් හා සමෘද්ධිමත් තෛපොංගල් මංගල්යයක් ප්රාර්ථනා කරමි.
මෛත්රීපාල සිරිසේන
පාර්ලිමේන්තු මන්ත්රී
06 වන විධායක ජනාධිපති
හින්දු සංස්කෘතියේ විශිෂ්ටත්වය විදහා දක්වන ජාතික උත්සවයක් බවට පත් ‘තෛයිපොංගල්’ කෘෂිකාර්මික අර්ථ රටාවකට උරුමකම් කියමින් සාමය, එකමුතුව, දයාව මූලික වූ සාරධර්මයන් මූර්තිමත් කරයි.
ස්වභාවධර්මය සමඟ බැඳි සම්ප්රදායික ජීවන රටාව කෙරෙහි විශ්වාසයෙන් දමිළ ගොවි ජනතාව සරු අස්වැන්නක් ලබා ගැනීම උදෙසා සූර්යයාට කෘතඥතාව පුදන මෙම අස්වැන්නේ මංගල්යය දැයේ ජීවනාලියේ පිළිබිඹුවක් වනු ඇත.
එය වත්මන් තත්ත්වයන් හමුවේ ආහාර සුරක්ෂිතතාවය සහ ග්රාමීය පුනර්ජීවනය සඳහා වන සක්රීය සංකල්පයට උත්තේජනයක් වනු ඇත.
අපේක්ෂාවන් ඉටුවන ඵලබර නව වසරක උදාව සනිටුහන් කරමින් තෛපොංගල් උත්සවය සමරන ලොව පුරා වෙසෙන ජනතාවට සුභ පැතුම් එක් කරමි.
දිනේෂ් ගුණවර්ධන
අග්රාමාත්ය
ශ්රී ලංකා ප්රජාතාන්ත්රික සමාජවාදි ජනරජය
2024 ජනවාරි මස 14
ප්රදේශවාසීන් විසින් අත් අඩංගුවට ගෙන භාරදුන් සැකකරුවකු පානදුර දකුණ පොලිසිය තුළදී ගොස් ඇත
ඊයේ දින 8.30 ට පමණ පානදුර දකුණ පොලිස් වසමේ පිංවල දී සොරකම් කිරීම සම්බන්ධව සැකපිට ප්රදේශවාසින් විසින් අත් අඩංගුවට ගෙන පහරදි පානදුර දකුණ පොලිස් ස්ථානයට භාරදී ඇති පහත නම් සඳහන් පුද්ගලයා තුවාල හේතුවෙන් පොලිසිය විසින් රොහල් ගතකිරීමට කටයුතු කර ඇති අතර එහිදි ඔහු මියගොස් ඇත.
නම – බුද්ධික දිනේෂ් පෙරේරා
ලිපිනය – අංක 51. සිල්වා පාර. පිංවල. පානදුර
වයස – අවුරුදු 39 යි.
මියගිය පුද්ගලයා මත්ද්රව්ය භාවිතයට අබ්බැහිවූවකු බවට තොරතුරු අනාවරණය වි ඇත.
සිද්ධිය සම්බන්ධයෙන් පානදුර දකුණ පොලිස් ස්ථානය විසින් පරික්ෂණ සිදුකරනු ලබයි .
බුදු දහමට අපහාස වන අයුරින් කටයුතු කරන බවට චෝදනා එල්ලවී ඇති අවලෝකිතේශ්වර බෝධිසත්වයන ලෙස තමන්ව හඳුන්වා ගන්නා මහින්ද කොඩිතුවක්කු නමැති පුද්ගලයාව අපරාධ පරීක්ෂණ දෙපාර්තමේන්තුව අත්අඩංගුවට ගෙන තිබේ.
පන්නිපිටිය ප්රදේශයේදී මෙම අත්අඩංගුවට ගැනීම සිදුව ඇත.
මෙම පුද්ගලයා විසින් සිදුකරනු ලබන ක්රියාවන් විවේචනය කරමින් ත්රෛයිනිකායික මහා නාහිමිවරුන් ඊයේ ජනාධිපතිවරයා වෙත ලිපියක්ද යොමුකර තිබිණි.
නුවරඑළියට නගර සීමාවට හිම වරුසාවක් .
පසුගිය වසර වල දෙසැම්බර් මුල සිට ආරම්භ වී ජනවාරි අග දක්වා නුවරඑළිය නගර සීමාවට මල් තුහින පතිත වන නමුත් මෙවර ඇතිවූ කාලගුණ විපර්යාසයත් සමගින් ජනවාරි මස මැද අද (15) උදෑසන නුවරඑළිය නගර සීමාවට මල් තුහින පතිත වී තිබීමක් දක්නට ලැබිණ ,
උදෑසන 5.30 පමණ වන විට මල් තුහින වැටීමට ආරම්භ වී ඇති අතර උදෑසන හයයි තිහ දක්වා මල් පුහුණ වැටීමක් දක්නට ලැබුනු බව ප්රදේශවාසීන් සඳහන් කරයි ,
උදෑසන අට දක්වා පරිසරයේ සියලුම ස්ථාන සුදු වර්ණයෙන් මනස්කාන්ත ලෙස දක්නට ලැබුණු බවද ප්රදේශවාසීන් කීය .
ආර්.එෆ්.එම්.සුහෙල් – නුවරඑළිය
සංචාරක සිම්බාබ්වේ කණ්ඩායම හා ශ්රී ලංකා කණ්ඩායම අතර පැවැත්වෙන පළමු විස්සයි විස්ස තරගය අද (14) පැවැත්වෙනවා.
ඒ අනුව තරගය අද රාත්රී 7.00 ට කොළඹ ආර් ප්රේමදාස ක්රීඩාංගණයේදී ආරම්භවීමට නියමිත බවයි සඳහන් වන්නේ.
අද දිනයේ නව විස්සයි විස්ස නායක වනිඳු හසරංගගේ නායකත්වය යටතේ කණ්ඩායම තරගවැදීමට නියමිතයි.
