Author: Supun

විදුලි ගාස්තුව සංශෝධනය ගැන විදුලි බල මණ්ඩලය විසින් ඉදිරිපත් කරන ලද යෝජනාව අධ්‍යනයට පියවර ගන්නා බව ශ්‍රී ලංකා මහජන උපයෝගිතා කොමිසම (PUCSL) පවසනවා.

එයින් පසුව එය මහජන අදහස් ලබා ගැනීම සඳහා යොමු කිරීමට පියවර ගන්නා බවත්, ඉන් අනතුරුව කොමිෂන් සභාවේ නිර්දේශ ඉදිරිපත් කිරීමට කටයුතු කරන බවයි එම කොමිසමේ සභාපති මහාචාර්ය කේ.පී.එල්. චන්ද්‍රලාල් සඳහන් කළේ.

ජනවාරි මාසයේදී පමණ මෙම කටයුතු  සිදු කිරීමට අපේක්ෂා කරන බවද සභාපතිවරයා වැඩිදුරටත් ප්‍රකාශ කර සිටියා.

ලබන වසරේ මුල් මාස 06දී පවතින විදුලිය ගාස්තු එලෙසම පවත්වා ගෙන යෑමට යෝජනා කරන බවට විදුලිබල මණ්ඩලය විසින් සිය යෝජනාව ඉදිරිපත් කරමින් මහජන උපයෝගිතා කොමිසමට ඊයේ දැනුම් දී තිබුණා.

ඇප මත මුදා හැර සිටි හිටපු රාජ්‍ය අමාත්‍ය ලොහාන් රත්වත්තේ ඊයේ (06) පස්වරුවේ යළිත් අත්අඩංගුවට ගනු ලැබුවා.

බීමතින් රිය පැදවීම හේතුවෙන් කොල්ලුපිටිය ප්‍රදේශයේදී  සිදු වූ රිය අනතුරක් සම්බන්ධයෙන් ඔහු යළිත් අත්අඩංගුවට ගෙන ඇති බවයි පොලීසිය පවසන්නේ.

ලොහාන් රත්වත්තේ ගමන් ගත් ඩිෆෙන්ඩර් රථය තවත් මෝටර් රථයක ගැටී මෙම අනතුර සිදුව ඇති බවත්, අනතුරින් කිසිවෙකුටත් තුවාල සිදුවී නැනි බවයි වැඩිදුරටත් වාර්තා වන්නේ.

අත්අඩංගුවට ගත් හිටපු රාජ්‍ය අමාත්‍යවරයා අද (07) කොටුව මහේස්ත්‍රාත් අධිකරණයට ඉදිරිපත් කිරීමට නියමිත බව පොලීසිය පවසනවා.

නීති විරෝධීව එකලස් කළ වාහන සිද්ධියක් සම්බන්ධයෙන් රක්ෂිත බන්ධනාගාර ගතකර සිටි ලොහාන් රත්වත්තේ පසුගිය (05)  වැනි දින ඇප මත මුදා හැරීමට අධිකරණය නියෝග කර තිබුණා.

වර්ෂාව හේතුවෙන් ගංවතුර පැවති ප්‍රදේශවල මී උණ ව්‍යාප්ත වීමේ අවදානමක් මතුවී ඇති බවට වසංගත රෝග විද්‍යා ඒකකය අනතුරු අඟවනවා.

ඒ අනුව වැඩිම අවදානම් සහිත ප්‍රදේශ ලෙස රත්නපුර, ගාල්ල, කළුතර, කුරුණෑගල, කෑගල්ල සහ මාතර යන දිස්ත්‍රික්ක හඳුනා ගෙන ඇති බවයි ඔවුන් සඳහන් කරන්නේ.

ඇස් රතුවීම, උණ, මුත්‍රා පිටවන ප්‍රමාණය අඩුවීම, අධික හිසරදය හා මස්පිඩු වේදනාව, මී උණ රෝගයේ ලක්ෂණ වන බවත්, එම රෝග ලක්ෂණ පවතින්නේ නම් කඩිනමින් රෝහල්ගත වන ලෙසත් සෞඛ්‍ය අමාත්‍යාංශය ජනතාවට දැනුම් දෙනවා.

ඉකුත් රජය සමයේ මත්පැන් අලෙවි බලපත්‍ර සඳහා වන වාර්ෂික ගාස්තු වැඩි කරමින් නිකුත් කළ ගැසට් නිවේදනයක් ක්‍රියාත්මක කිරීම වළක්වාලමින් ශ්‍රේෂ්ඨාධිකරණය අද (06) අතුරු තහනම් නියෝගයක් නිකුත් කර තිබෙනවා.

ශ්‍රී ලංකා මත්පැන් අලෙවි බලපත්‍ර හිමියන්ගේ සංගමය විසින් ගොනු කර තිබූ මූලික අයිතිවාසිකම් පෙත්සමක් විභාගයට ගැනීමට අවසර දෙමින් ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් විසින් මෙම නියෝගය නිකුත් කර ඇති බවයි සඳහන් වෙන්නේ.

මෙම පෙත්සමෙහි වගඋත්තරකරුවන් වශයෙන් මුදල් අමාත්‍යාංශයේ ලේකම්වරයා ඇතුළු පිරිසක් නම් කර තිබුණා.