Author: Shashi Maduranga

අවලංගු වූ ශ්‍රීලංකන් ගුවන් ගමන් ගැන දැනුම්දීමක්….

මැදපෙරදිග කලාපයේ පවතින ගුවන් සීමාවන් අඛණ්ඩව වසා තැබීම හේතුවෙන් සියලු අද (01) දිනට අදාළ ගුවන් ගමන් අවලංගු කළ බව ශ්‍රීලංකන් ගුවන් සමාගම පවසයි.

ඒ අනුව UL231 කොළඹ – ඩුබායි, UL232 ඩුබායි – කොළඹ, UL225 කොළඹ – ඩුබායි, UL226 ඩුබායි – කොළඹ, UL217 කොළඹ – දෝහා, UL218 දෝහා – කොළඹ, UL253 කොළඹ – දම්මාම්, UL254 දම්මාම් – කොළඹ, UL265 කොළඹ – රියාද්, UL266 රියාද් – කොළඹ, UL229 කොළඹ – කුවේට් සහ UL230 කුවේට් – කොළඹ යන ගුවන් ගමන් අවලංගු කර තිබේ.

මේ අතර මැදපෙරදිග පවතින යුදමය තත්ත්වය හමුවේ මෙරටින් පිටත් වන සහ මෙරටට පැමිණෙන ගුවන් ගමන් 54 අවලංගු කර තිබේ.

ඒ අනුව මෙරටට පැමිණීමට නියමිතව තිබූ ගුවන් ගමන් 28ක් අවලංගු කර ඇත.

මෙරටින් පිටත්ව යාමට සැලැසුම් කර තිබූ ගමන් වාර 26ක් අවලංගු කිරීමට කටයුතු කළ බව ගුවන් සේවා අධිකාරිය සඳහන් කරයි.

ඉරාන ප්‍රහාරවලින් ඊශ්‍රායලයේ සිටින කිසිදු ශ්‍රී ලාංකිකයෙකුට අනතුරක් සිදුව නැහැ – එරට ශ්‍රී ලංකා තානාපති….

මැදපෙරදිග පවතින ගැටුම්කාරී තත්ත්වයෙන් ඊශ්‍රායලයේ වෙසෙන කිසිදු ශ්‍රී ලාංකිකයෙකුට අනතුරක් සිදුව නොමැති බව එරට ශ්‍රී ලංකා තානාපති නිමල් බණ්ඩාර මහතා පවසයි.

මාර්තු මස දෙවෙනිදා දක්වා ඊශ්‍රායලය තුළ හදිසි තත්ත්වයක් ප්‍රකාශයට පත් කර ඇති බව ඔහු ප්‍රකාශ කළේය.

“ඊයේ උදෑසන තමයි ඉරානයේ තෝරගත්ත ස්ථාන කිහිපයක් ඉලක්ක කරගෙන ඊශ්‍රායලය ප්‍රහාර එල්ල කළේ. ඒ අනුව උදෑසන 8.30ට වික්ටෝරියන් ගුවන්තොටුපළ වසා දැමුවා. ආගමන හා විගමන කටයුතු සඳහා. සියලුම මගීන් ගුවන්තොටුපළෙන් ඉවත් වුණා. ශ්‍රී ලංකාව බලා පිටත්වීමට නියමිත සිටි බොහෝ දෙනෙකුට නැවත ඊශ්‍රායලයේ තමන්ගේ වාසස්ථාන වෙත පැමිණීමට සිදුවුණා. ඒ වගේම කොළඹ සිට ඊශ්‍රායලය වෙත පැමිණීමට බලාපොරොත්තු වෙන බොහෝ දෙනෙක් සිටිනවා.  ගුවන් ගමන් නැවත ආරම්භ කරන තෙක් ඔවුන්ට ශ්‍රී ලංකාවේ රැඳිසිටීමට සිදුවෙනවා. 

ඊශ්‍රායලයේ දින තුනක හදිසි තත්ත්වයක් ප්‍රකාශයට පත් කරලා තියෙනවා. මාර්තු මාසේ දෙවැනිදා හවස වෙනකම්. ඒ කාලය තුළ පාසල් ඇතුළු පොදු ස්ථාන විවෘත කිරීමක් සිදු කරන්නේ නැහැ. සාමාන්‍ය අත්‍යවශ්‍ය සේවා ක්‍රියාත්මක වෙනවා. ඊශ්‍රායලයේ සිටින ශ්‍රී ලාංකිකයන්ට කිසිදු අනතුරක් සිදුව නැහැ. මේ තත්ත්වය තවත් දිනක් හෝ දෙකක් පවතින්න පුළුවන්. අද උදෑසන මේ කලාපයට අවසන් මිසයිල ප්‍රහාරය එල්ල වුණේ. ඉරානයේ පවතින තත්ත්වයත් එක්ක මිසයිල ප්‍රහාර අඩු වෙන්න ඉඩ තියෙනවා.”

අඛණ්ඩව ඉන්ධන බෙදාහරින බව ලංකා ඛනිජ තෙල් නීතිගත සංස්ථාව කියයි…..

අඛණ්ඩව ඉන්ධන නිකුත් කිරීමට කටයුතු කරන බව ලංකා ඛනිජ තෙල් නීතිගත සංස්ථාවේ සභාපති ඩී.ජේ රාජකරුණා මහතා පවසයි.

ඔහු ප්‍රකාශ කළේ, හෙට (02) දිනයේදීත් සුපුරුදු පරිදි ඉන්ධන බෙදාහැරීම සිදු කරන බවය.

අද (01) නිවාඩු දිනයක් වූවත් සේවකයින්ගේ ශ්‍රම දායකත්වයෙන් ඉන්ධන බෙදාහැරීමට කටයුතු කළ බව ද සභාපතිවරයා කීය.

ඒ අනුව අද පස්වරු 5.00 වනවිට ඩීසල් ලීටර් 1,332,311ක් ද ඔක්ටේන් 92 වර්ගයේ පෙට්‍රල් ලීටර් 2,019,600ක් ද බෙදා හැර ඇති බව ඩී.ජේ රාජකරුණා මහතා ප්‍රකාශ කළේය.

එමෙන්ම නිවාසවල ඉන්ධන තොග රැස්කර තබාගැනීම නීතිවිරෝධී ක්‍රියාවක් බව හෙතෙම පෙන්වා දෙයි.

ඒ හේතුවෙන් ඔවුන්ට එරෙහිව නීතිය ක්‍රියාත්මක කරන ලෙසට පොලීසියෙන් ඉල්ලා ඇති බව සභාපතිවරයා වැඩිදුරටත් සඳහන් කළේය.

මැදපෙරදිග අර්බුදය හමුවේ සංචාරකයන් සහ විදේශගත ශ්‍රමිකයන් වෙනුවෙන් රජයෙන් විශේෂ වැඩපිළිවෙළක්….

මැදපෙරදිග සහ ගල්ෆ් කලාපයේ උද්ගතව ඇති නොසන්සුන්කාරී තත්ත්වය හමුවේ, මෙරට රැඳී සිටින විදේශීය සංචාරකයන්ගේ ආරක්ෂාව සහ සුභසාධන කටයුතු සොයාබැලීමට සහ විදේශයන්හි සිටින ශ්‍රී ලාංකික ශ්‍රමිකයන්ගේ ආරක්ෂාව මෙන්ම සුභසාධනය වෙනුවෙන් ද රජය විශේෂ මෙහෙයුම් මාලාවක් දියත් කර තිබේ.

අද දින(01) සවස ජනාධිපති කාර්යාලයේදී සංචාරක නියෝජ්‍ය අමාත්‍ය රුවන් රණසිංහ සහ ජනාධිපති ලේකම් ආචර්ය නන්දික සනත් කුමානායක මහතාගේ ප්‍රධානත්වයෙන් පැවැති විශේෂ සාකච්ඡාවකදී මෙම තීරණ ගනු ලැබීය.

සංචාරකයන් සඳහා වීසා සහන සහ පහසුකම්

දැනට දිවයින තුළ රැඳී සිටින සංචාරකයන් මුහුණ දෙන ප්‍රායෝගික ගැටලු සලකා බැලූ රජය, ඔවුන්ගේ වීසා වලංගු කාලය සති දෙකකින් (දින 14) ගාස්තුවකින් තොරව දීර්ඝ කිරීමට තීරණය කර ඇත. තවද අවශ්‍යය වේ නම් තවදුරටත් දීර්ඝ කිරීමට සලකාබලනු ඇත. මෙරට රැඳී සිටින සංචාරකයන්ට අවශ්‍ය පහසුකම් සැලසීමටත්, ඔවුන්ගේ ආරක්ෂාව සහ සුභ සාධන කටයුතු සොයා බැලීමටත් විදේශ අමාත්‍යාංශය හරහා අදාළ තානාපති කාර්යාල සමඟ සාකච්ඡා කර ඒ සම්බන්ධ කඩිනම් වැඩපිලිවෙලක් සැකසීමටත් මෙහිදී තීරණය විය.

මීට අමතරව මැදපෙරදිග රටවල් කිහියක ගුවන් අවකාශ වසාදැමීම නිසා ඇතිවී තිබෙන අවහිරතා සැලකිල්ලට ගනිමින්, විදේශ අමාත්‍යාංශය සහ ගුවන් සමාගම් ඒකාබද්ධව, විකල්ප ගුවන් ගමන් මාර්ග ඔස්සේ සංචාරකයන්ට සිය රටවල් බලා යාමට ඇති හැකියාව සලකා බැලීමටද තීරණය විය.

එසේම මෙරටට පැමිණීමට අපේක්ෂා කරන සංචාරකයන්ට බාධාවකින් තොරව පැමිණීමට විකල්ප ගමනාන්ත පිළිබදව අදාල පාර්ශව සමග සාකච්ඡා කිරීමටද සහ ඊට අවශ්‍ය පහසුකම් සැලසීමට ද තීරණය විය.

සක්‍රීය මෙහෙයුම් මැදිරි සංචාරකයන්ගේ සහ ශ්‍රමිකයන්ගේ සහාය සඳහා රජ්‍යය ආයතන කිහිපයක් හරහා පැය 24 පුරා ක්‍රියාත්මක සේවාවන් ස්ථාපිත කර ඇත.

සංචාරක සංවර්ධන අධිකාරිය – මෙරට රැඳී සිටින සංචාරකයන් සඳහා විශේෂ ඒකකයක් පිහිටුවා ඇති අතර, 1912 ක්ෂණික ඇමතුම් අංකය ඔස්සේ ඕනෑම ගැටලුවක් දැනුම් දිය හැකිය.

විදේශ සේවා නියුක්ති කාර්යාංශය – විදේශයන්හි සිටින ශ්‍රී ලාංකික ශ්‍රමිකයන්ගේ තොරතුරු සහ සහාය ලබා දීමට 1989 ක්ෂණික ඇමතුම් අංකය ඔස්සේ විශේෂ මෙහෙයුම් මැදිරියක් ක්‍රියාත්මක වේ.

මීට අමතරව විදේශ අමාත්‍යාංශය මැදිහත් වී මැදපෙරදිග සහ ගල්ෆ් කලාපයේ පිහිටි සියලුම ශ්‍රී ලංකා තානාපති කාර්යාල සමඟ එක්ව ඒකාබද්ධ යාන්ත්‍රණයක් සකස් කර ඇත.

හදිසි අවස්ථාවකදී කඩිනම් ප්‍රතිචාර දැක්වීමටත්, ශ්‍රී ලාංකික ශ්‍රමිකයන්ගේ ආරක්ෂාව තහවුරු කිරීමටත් සියලුම තානාපති කාර්යාල සහ විදේශ සේවා නියුක්ති කාර්යාංශය සූදානම්ව  සිටියි.

තවද සංචාරකයන්ගේ අභ්‍යන්තර ප්‍රවාහන කටයුතු බාධාවකින් තොරව සිදුකීරීමටත්, පවතින තත්ත්වය මත පදනම්ව කඩිනම් තීරණ ගැනීමටත් රජය සියලු කටයුතු සූදානම් කර ඇති බව මෙම සාකච්ඡාවේදී වැඩිදුරටත් අවධාරණය කෙරිණි.

ලෝක තෙල් මිල 10% කින් ඉහළට – බැරලයක මිල ඩොලර් 100 දක්වා ඉහළ යාමේ අවදානමක්….

අමෙරිකාව සහ ඊශ්‍රායලය එක්ව ඉරානයට එල්ල කළ ප්‍රහාර හේතුවෙන් මැදපෙරදිග කලාපය පුරා යුදමය තත්ත්වයක් නිර්මාණය වීමත් සමඟ ලෝක වෙළඳපොළේ බොරතෙල් මිල දැවැන්ත ලෙස ඉහළ ගොස් තිබේ.

විදේශ මාධ්‍ය වාර්තා කරන පරිදි, බ්‍රෙන්ට් (Brent) වර්ගයේ බොරතෙල් මිල 10% කින් පමණ ඉහළ ගොස් ඇති අතර, මේ වන විට එහි බැරලයක මිල අමෙරිකානු ඩොලර් 80 සීමාවට පැමිණ ඇත.

පවතින ගැටුම්කාරී තත්ත්වය තවදුරටත් වර්ධනය වුවහොත්, බොරතෙල් බැරලයක මිල නොබෝ දිනකින්ම අමෙරිකානු ඩොලර් 100 දක්වා ඉහළ යා හැකි බව පැවසේ.

විශේෂයෙන්ම හෝමූස් සමුද්‍ර සන්ධිය හරහා සිදුවන තෙල් ප්‍රවාහනයට බාධා එල්ල වීම මෙම මිල ඉහළ යාමට ප්‍රධානතම හේතුව වී ඇති බව සඳහන් වේ.

“නවෝත්පාදනයන් තුළින් මුල්‍ය අන්තර්ගතභාවය කරා” යන තේමාව යටතේ ලංකාපේ ටෙක්නොවේෂන් 2026 සම්මාන උළෙල….

ලංකාවේ ජාතික ගෙවීම් ජාලයෙහි ක්‍රියාකරු වන ලංකාපේ ආයතනය – ශ්‍රී ලංකාවේ ප්‍රථම සහ එකම ගෙවීම් තාක්ෂණ නවෝත්පාදන සම්මාන උළෙල වන ලංකාපේ ටෙක්නොවේෂන් සම්මාන උළෙල (LankaPay Technnovation Awards) අට වන වතාවටත් සංවිධානය කරන බව 2026 පෙබරවාරි මස 25 වෙනි දින කොළඹ ජයික් හිල්ටන් හෝටලයේ පැවති මාධ්‍ය සමුළුවකදී නිවේදනය කළේය.

මුල්‍ය ක්ෂේත්‍රයේ විශේෂ අවදානයක් දිනාගෙන ඇති මෙම සම්මාන උළෙල මෙවරත් ආරම්භ වූයේ ‘වසරේ ජනප්‍රියතම ඩිජිටල් ගෙවීම් විසඳුම ් සඳහා වන ඔන්ලයින් මත විමසුමත් සමඟිනි. අවසාන සම්මාන රාත්‍රිය 2026 මාර්තු මස 24 වන දින කොළඹ සිනමන් ලයිෆ් හෝටලයේදී පැවැත්වීමට නියමිතය.

අවසන් මහා සම්මාන උළෙල, ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ මහතාගේ ප්‍රධානත්වයෙන් පැවැත්වීමට නියමිත අතර එහි අනෙකුත් ගරු ආරාධිත අමුත්තන් ලෙස ඩිජිටල් ආර්ථිකය පිළිබඳ නියෝජ්‍ය අමාත්‍ය ඉංජිනේරු චිරංග වීරරත්න මහතා සහ ඩිජිටල් ආර්ථිකය පිළිබඳ ජනාධිපතිවරයාගේ ප්‍රධාන උපදේශක ආචාර්ය හාන්ස් විජයසූරිය මහතා සහභාගිවීමට නියමිතයි.

අඛණ්ඩව දෙවන වසරටත් හවුල්කාරීත්වය සනිටුහන් කරන Mastercard සහ ගිය වසරේ ප්ලැටිනම් අනුග්‍රාහකයෙකු වූ BPC ආයතනය මෙවර සම්මාන උළෙලේ උපායමාර්ගික හවුල්කරුවන් ලෙස සම්බන්ධ වේ. ප්ලැටිනම් අනුග්‍රාහකයින් ලෙස UnionPay ඉන්ටර්නැෂනල් ආයතනය සහ NOVUS Technologies ආයතනය කටයුතු කරන අතර, මෙය UnionPay ඉන්ටර්නැෂනල් ආයතනය මෙම සම්මාන උළෙල සදහා අනුග්‍රාහකත්වය ලබා දෙන සිව්වන අවස්ථාව වේ.

ස්වර්ණ අනුග්‍රාහකයා ලෙස Alipay+, අඛණ්ඩව තුන්වන වසරටත් හවුල්කාරීත්වය සනිටුහන් කරයි. රජත අනුග්‍රාහකත්වය JCB ඉන්ටර්නැෂනල් ආයතනය සහ සිංගප්පූරුවේ NETS සමාගම විසින් සලසනු ලැබේ. JCB ඉන්ටර්නැෂනල් ආයතනය ආරම්භයේ සිටම අනුග්‍රාහකයෙකු ලෙස මෙම සම්මාන උළෙල හා හවුල් වී සිටින අතර NETS සිංගප්පූරු සමාගම මෙලෙස අනුග්‍රාහකත්වය දක්වන පස්වන අවස්ථාව මෙයවේ. Rolling & Action ආයතනය නිල නිර්මාණාත්මක සහකරු සහ Daily Mirror, Daily FT, Sunday Times, ADA Derana BIZ, FM có ໖໑ TV có 50 මාධ්‍ය අනුග්‍රහය දක්වයි.

2017 දී ආරම්භ කරන ලද ලංකාපේ ටෙක්නොවේෂන් සම්මාන උළෙල යනු ශ්‍රී ලංකාවේ මුල්‍ය සේවා අංශයේ තාක්ෂණික නවෝත්පාදනවල පුරෝගාමීන් ඇගයීමේ අරමුණ ඇතිව සංවිධානය කරනු ලබන ශ්‍රී ලංකාවේ ප්‍රථම සහ එකම ගෙවීම් තාක්ෂණ නවෝත්පාදන සම්මාන උළෙලයි. ඩිජිටල් ගෙවීම් ප්‍රවර්ධනය කිරීමේ අරමුණින් රට තුල ඩිජිටල් ගෙවිම් ක්‍රම ප්‍රචලිත කිරීම උදෙසා නොසැලෙන දායකත්වයක් ලබාදෙන සහ ඒ හරහා පාරිභෝගික පහසුව ඉහළ නැංවීමට මූලිකත්වය ගත් බැංකු, මුල්‍ය ආයතන, FinTech ආයතන සහ රාජ්‍ය ආයතන ඇගයීමට ලක් කිරීම මෙම සම්මාන උළෙලේ ප්‍රධානතම අරමුණයි.

2026 සඳහා වන සම්මාන නිර්ණායකය ලෙස 2025 ජනවාරි 1 සිට 2025 දෙසැම්බර් 31 දක්වා කාලය තුළ අන්තර් බැංකු ගනුදෙනු සලකා බලයි. බැංකු, බැංකු නොවන මූල්‍ය ආයතන, FinTech සේවා සපයන්නන් සහ රාජ්‍ය ආයතන සම්මාන කාණ්ඩ 12ක් යටතේ තරඟ වදිනු ඇත. මෙම කාණ්ඩ අතරට 2025 වසරේ ඩිජිටල් ගෙවීම්වල විශිෂ්ටත්වය සඳහා සමස්ත සම්මානය, පාරිභෝගික පහසුව අතින් විශිෂ්ටතම මුල්‍ය ආයතනය, මූල්‍ය ඇතුළත්භාවය සඳහා හොඳම මූල්‍ය ආයතනය, නව්‍යකරණයන් අතින් විශිෂ්ටතම මූල්‍ය ආයතනය, වඩාත් ජනප්‍රිය ඩිජිටල් ගෙවීම් විසඳුම, සිල්ලර ගෙවීම් සඳහා හොඳම ඩිජිටල් ගෙවීම් යෙදුම, දේශසීමා ගනුදෙනු සඳහා හොඳම සක්‍රීය කරන්නා, හොඳම රාජ්‍ය ආයතන වෙත ඩිජිටල් ගෙවීම් සක්‍රීය කරන්නා, GovPay සඳහා හොඳම රජයේ ආයතනය, හොඳම LankaPay කාඩ්පත් සක්‍රීය කරන්නා, LankaSign ඩිජිටල් අත්සන් සඳහා හොඳම සක්‍රීය කරන්නා සහ හොඳම ඩිජිටල් ගෙවීම් උපාය මාර්ගය සඳහා සම්මානය ඇතුළත් වේ.

මෙවර LankaPay ටෙක්නොවේෂන් 2026 සම්මාන උළෙල සඳහා විනිශ්චය මණ්ඩලයේ සභාපතිවරයා වන්නේ කොළඹ කොටස් හුවමාරුවේ ප්‍රධාන විධායක නිලධාරී සහ ශ්‍රී ලංකා දත්ත ආරක්ෂණ අධිකාරියේ සභාපති රජීව බණ්ඩාරනායක මහතායි. බණ්ඩාරනායක මහතා ලෝක කොටස් හුවමාරු සම්මේලනයේ (WFE) නාමයෝජනා සහ පාලන කමිටුවේ සාමාජිකයෙකු ලෙසද කටයුතු කරයි. දකුණු ආසියානු ගණකාධිකාරී සම්මේලනයේ (SAFA) ව්‍යවස්ථාපිත ගිණුම්කරණ ප්‍රමිති කමිටුවේ සහ ගිණුම්කරණ ප්‍රමිති කමිටුවේ සභාපති, ශ්‍රී ලංකාව සහ මාලදිවයින සඳහා Ernst & Young සමාගමේ හිටපු දේශීය කළමනාකාර හවුල්කරු මනිල් ජයසිංහ මහතා; BDO Partners විගණන සමාගමෙහි කළමනාකාර හවුල්කරු සහ ව්‍යවස්ථාපිත විගණන ප්‍රමිති කමිටුවේ හිටපු සභාපති සුජීව රාජපක්ෂ මහතා; B R ද සිල්වා සහ සමාගමේ හවුල්කරු සහ ශ්‍රී ලංකා වරලත් ගණකාධිකාරී ආයතනයේ හිටපු සභාපති ලසන්ත වික්‍රමසිංහ මහතා; හේමාස් C O E (පුද්ගලික) සමාගමේ සාමාන්‍යාධිකාරී – හවුල් සේවා සහ CA ශ්‍රී ලංකා විසින් සංවිධානය කරනු ලබන TAGS සම්මාන උළෙලේ 2025/26 වසර සඳහා සභාපති චමිලා කුරේ මෙනවිය; සහ ශ්‍රී ලංකාවේ විශාලතම විද්‍යුත් වාණිජ්‍ය ව්‍යවසාය වන කප්රුක PLC හි නිර්මාතෘ සහ සභාපති දුලිත් හේරත් මහතා විනිශ්චය මණ්ඩලයේ අනෙකුත් සාමාජිකයන් ලෙස කටයුතු කරයි

ඉන්දියාව – ශ්‍රී ලංකාව යා කරන ශ්‍රීලංකන් මෙහෙවර තවදුරටත් පුළුල් වෙයි…..

ශ්‍රීලංකන් ගුවන් සේවය පසුගියදා ඉන්දියාවේ දිල්ලි නුවරදී විශේෂ මාධ්‍ය සාකච්ඡාවක් පැවැත්වීය. එහිදී අනාවරණය කරන ලද්දේ දකුණු ඉන්දියාවේ ප්‍රමුඛතම සංචාරක සේවා ප්‍රදර්ශනයක් වන SATTE 2026 ප්‍රදර්ශනයට සමගාමීව දෙරට අතර ගුවන් ගමන් සම්බන්ධතා තවදුරටත් ශක්තිමත් කිරීමට ශ්‍රීලංකන් ගුවන් සේවය පියවර ගෙන ඇති බවයි. මීට අමතරව මෙම මාධ්‍ය සාකච්ඡාවේදී ශ්‍රී ලංකන් ගුවන් සේවයේ නව ගමනාන්ත පිළිබඳ තොරතුරු රැසක්ද අනාවරණය කරන ලද අතර, ඉන්දියානු ජනමාධ්‍ය සමඟ ගනුදෙනු කිරීම සඳහා විශේෂ පදනමක්ද හඳුන්වා දෙන ලදී. ඉන්දියාව යනු ශ්‍රීලංකන් ගුවන් සේවයට අතිශය වැදගත් වෙළඳපොළක් වන අතර, මේ සියල්ල ශ්‍රීලංකන් ගුවන් සේවය සහ එහි සේවාවන් සම්බන්ධයෙන් එරට ජනතාව වැඩි වැඩියෙන් දැනුවත් කිරීම සඳහා මහෝපකාරී වනු ඇත.

ඉන්දියාව සහ ශ්‍රී ලංකාව අතර මෙන්ම ඉන්දියාව සහ ලෝකය අතර ගුවන් ගමන් සම්බන්ධතා ශක්තිමත් කිරීම සඳහා ශ්‍රීලංකන් ගුවන් සේවය දීර්ඝ කාලයක පටන් සුවිශාල කාර්යභාරයක් ඉටු කර තිබේ. මේ වන විට ඉන්දියාවත් ශ්‍රී ලංකාවත් අතර සතියකට ගුවන් ගමන් වාර 90 ක් පමණ ක්‍රියාත්මක වන අතර, ඉදිරියේදී එය තවත් ඉහළ යාමට නියමිතය. ශ්‍රීලංකන් ගුවන් සේවයේ විශාලතම වෙළඳපොළ ඉන්දියාව වන අතර, එය ශ්‍රීලංකන් ගුවන් සේවයේ සමස්ත මගී ගමනාගමනයෙන් 30% කට ආසන්න ප්‍රමාණයක් සහ දිවයිනට පැමිණෙන සමස්ත සංචාරකයින්ගෙන් 23% ක් පමණ වේ.

ශ්‍රීලංකන් ගුවන් සේවය දැනට ඉන්දියාවේ චෙන්නායි, මුම්බායි, දිල්ලි, හයිද්‍රාබාද්, බැංගලෝර්, කොචි, ත්‍රිවේන්ද්‍රම්, මදුරෙයි සහ තිරුචිරප්පලි යන නගර වෙත පියාසර කරන අතර, 2026 වසර ආරම්භයේ සිට සතිපතා ඉන්දියාව වෙත සිදුකරන ගුවන් ගමන් වාර සංඛ්‍යාව වැඩි කිරීමට පියවර ගෙන ඇත. ශ්‍රීලංකන් ගුවන් සේවයේ 10 වන ඉන්දියානු ගමනාන්තය වන අහමදාබාද් ඉක්මනින්ම මෙම ජාලයට එක්වීමට නියමිතය. මේ ආකාරයට සාමාන්‍යයෙන් නිතර ගුවන් ගමන් සිදු වන ප්‍රධාන නගර මෙන්ම, සාපේක්ෂව අඩු ගුවන් සම්බන්ධතා සහිත, නැගී එන වෙළඳපොළවල් ලෙස සැලකෙන නගර වෙතද පියාසර කිරීමට ශ්‍රීලංකන් ගුවන් සේවය අවධානය යොමු කර තිබේ.

අහමදාබාද් වෙත ගුවන් සේවා ආරම්භ වීමත් සමඟ ශ්‍රීලංකන් ගුවන් සේවය ඉන්දියාවේ ප්‍රධාන නගර අටෙන් හයක්ම ආවරණය කරනු ඇත. මෙය වසර පුරා පවතින ඉල්ලුම සහ දෙරට අතර ශක්තිමත් සංස්කෘතික සබඳතා උපයෝගී කර ගනිමින්, ආර්ථික වශයෙන් ලාභදායී වෙළඳපොළක් වෙත සපයන සේවා තවදුරටත් ශක්තිමත් කිරීමකි. මෙම සැලසුම් හේතුවෙන් මෙම වසරේදී ඉන්දියානු ගුවන් මගීන් ශ්‍රීලංකන් ගුවන් සේවය භාවිතා කිරීම 12% කින් පමණ වැඩි වනු ඇතැයි අපේක්ෂා කෙරේ.

විවේකය ගතකිරීම, ව්‍යාපාර කටයුතු සහ ඥාති හිතමිත්‍රාදීන් බැලීමට යාම මෙන්ම විවාහ මංගල්‍යයන් සහ වෙනත් උත්සවවලට සහභාගී වීම දක්වා විවිධාකාර වූ අවශ්‍යතා වෙනුවෙන් ඉන්දියානු මගීහු ශ්‍රීලංකන් ගුවන් සේවය භාවිතා කරති.  ශ්‍රී ලංකාව හැර වෙනත් රටවල් වෙත ගමන් කරන විටද ඉන්දියානු මගීන්ගෙන් 30% ක් පමණ කොළඹ හරහා ගමන් කරන අතර, මෙම මගීන් වෙනුවෙන් ශ්‍රීලංකන් ගුවන් සේවය තම ගුවන් යානා හෝ හවුල්කාර ගුවන් සේවාවන්ට අයත් ගුවන් යානා භාවිතයෙන් (Codeshare ක්‍රමයට) මැදපෙරදිග, මාලදිවයින, ඈත පෙරදිග, යුරෝපය සහ ඕස්ට්‍රේලියාව යනාදී රටවල් හා කලාප රැසක් වෙත ගුවන් ගමන් පහසුකම් සපයයි.

ශ්‍රී ලංකාවේ සංචාරක ඉලක්ක සපුරා ගැනීමට අත්වැලක් වීම සඳහා ශ්‍රීලංකන් ගුවන් සේවය ශ්‍රී ලංකා සංචාරක ප්‍රවර්ධන කාර්යාංශය, සංචාරක සංවර්ධන අධිකාරිය සහ වෙනත් හවුල්කරුවන් සමඟ එක්ව කටයුතු කරමින් සිටී. ශ්‍රී ලංකාවේ උත්සව, ආහාරපාන, සුවතා සේවා, සුන්දර වෙරළ තීරයන්, වනජීවීන්, ඉතිහාසය සහ ආගමික කටයුතු ආදිය පිළිබඳ තොරතුරු ලෝකය වෙත රැගෙන යමින්, ශ්‍රී ලංකාව යනු ආකර්ෂණීය ගමනාන්තයක් බව ඉන්දියානු සංචාරකයන්ට පෙන්වා දීම සඳහා ශ්‍රී ලංකන් ගුවන් සේවය දැවැන්ත කාර්යභාරයක් ඉටු කර තිබේ. ඉතා මෑතකදී ඉන්දියානු සංචාරකයන්ට ඓතිහාසික රාමායණයේ ඇසින් ශ්‍රී ලංකාව දකිමින් එහි ඓතිහාසික අපූර්වත්වය වර්තමාන ලෝකය තුළ අත්විඳීමට අවස්ථාව උදා කර දීම සඳහා ශ්‍රීලංකන් ගුවන් සේවය විසින් සම්මානලාභී ‘Ramayana Trail’ ප්‍රවර්ධන වැඩසටහන ක්‍රියාවට නංවන ලදි.

ඉන්දියානු මගීන්ගේ ගුවන් ටිකට්පත් මිලදීගැනීම් අතරින් 60% ක් පමණ සංචාරක නියෝජිතයන් සහ සංචාරක වෙබ් අඩවි ආදිය හරහා සිදු වන අතර, ඉතිරි 40% සෘජුවම ශ්‍රීලංකන් ගුවන් සේවයේ නිල වෙබ් අඩවිය හරහා සිදු වේ. තම ඩිජිටල් හැකියාවන් වැඩිදියුණු කරන අතරම හවුල්කාර සම්බන්ධතා තවදුරටත් ශක්තිමත් කරමින්, ඉහත සඳහන් කාණ්ඩ දෙකටම අයත් මගීන්ට වඩාත් විශිෂ්ට සේවාවක් ලබාදීම ශ්‍රී ලංකන් ගුවන් සේවයේ ඉලක්කය වී ඇත.

වැඩිදුර තොරතුරු සහ වෙන්කරවාගැනීම් සඳහා www.srilankan.com වෙත පිවිසෙන්න.

කොටස් වෙළෙඳපොළ සක්‍රීය වෙයි. අද රු. බිලියන 5ට ආසන්න පිරිවැටුමක්….

පසුගිය දිනවලට සාපෙක්ෂව කොළඹ කොටස් වෙළෙඳපොළ ගනුදෙනු ක්‍රියාකාරීත්වයේ සක්‍රීය බවක් අද (26) දින දැකගන්නය ලැබුණි. ඒ අනුව ප්‍රධාන මිල දර්ශකවල වර්ධනයක් ද දිනය තුළ දැක ගත හැකි විය.

එහිදී සියලු කොටස් මිල දර්ශකය ඒකක 78.13කින් ඉහළ ගොස් ඒකක 23,781.23ක් ලෙසින් සටහන් වූ අතර S&P SL20 මිල දර්ශකය ඒකක 24.90කින් ඉහළ ගොස් ඒකක 6,710.17ක් ලෙසින් සටහන් විය.

අද දින ගනුදෙනු පිරිවැටුම දැක්වුනේ රු. බිලියන 4.91ක් ලෙසයි.

එහි දී දේශීය මිල දී ගැනීම් රු. බිලියන 4.66 ක් හා දේශීය විකිණුම් රු. බිලියන 4.85ක් ලෙසින් වාර්තා වූ අතර විදේශීය මිල දී ගැනීම් රු. මිලියන 249 ක් හා විදේශීය විකිණුම් රු. මිලියන 55ක් ලෙසින් වාර්තා විය.

පාස්කු ප්‍රහාරය සිදු වූ දා දෙමටගොඩ නිවසින් අත්අඩංගුවට ගත් රන් භාණ්ඩ සම්බන්ධයෙන් දුන් නියෝගය….

පාස්කු ඉරු දින ප්‍රහාර මාලාව සිදු වූ අවස්ථාවේ බෝම්බ ප්‍රහාරයක් සිදු වූ දෙමටගොඩ මහවිල ගාඩ්න්ස්හි නිවසේ පදිංචිව සිටි දෙවන සැකකාර ඊබ්‍රහිම් ඉල්හාම් අහමඩ් යන අයගේ නිවසේ තිබියදී අපරාධ පරීක්ෂණ දෙපාර්තමේන්තුව අත්අඩංගුවට ගත් රන් භාණ්ඩ මැණික් ඇතුළු දේපළ ඔහුගේ සහෝදරයා වන ඉෆ්ලාල් අහමඩ් යන අයට සතියක් ඇතුළත මුදා හරින ලෙස කොටුව මහෙස්ත්‍රාත් ඉසුරු නෙත්තිකුමාරගේ මහතා අද (25) අපරාධ පරීක්ෂණ දෙපාර්තමේන්තුවට නියෝග කළේය.

පූර්වගාමී මහෙස්ත්‍රාත්වරයා විසින් මෙම නියෝගය සිදුකර ඇත්තේ විරෝධතා ගොනු කිරීමට සාධාරණ කාලයක් ලබාදීමෙන් අනතුරුව බව කී මහෙස්ත්‍රාත්වරයා එසේ නොකරන්නේ නම් අධිකරණයට අගෞරව කිරීම සම්බන්ධයෙන් අපරාධ පරීක්ෂණ දෙපාර්තමේන්තුවට එරෙහිව නෛතික පියවර ගන්නා බවද කීවේය.

පාස්කු ඉරිදා කොළඹ ෂැංග්‍රිලා හෝටලයකට බෝම්බ ප්‍රහාරයක් සිදුකරමින් මියගිය ඊබ්‍රහිම් ඉල්හාම් අහමඩ්, දෙමටගොඩ නිවසේ පිපිරී ගිය බෝම්බයෙන් මියගිය ඉන්ෂාෆ් අහමඩ් දෙදෙනගේ සොහොයුරු සහ දෙමටගොඩ නිවසේ පිපුරුණු බෝම්බයෙන් මියගිය ඉන්ෂාෆ් අහමඩ්ගේ බිරිඳ වන ජිෆ්රි ෆාතිමා යන අයගේ මස්සිනා වන ඉෆ්ලාල් අහමඩ් යන අය එම භාණ්ඩ තමන්ට අයත් බවත් එම භාණ්ඩ මුදා හරින ලෙසත් නීතිඥවරයෙකු මාර්ගයෙන් සිදු කරන ලද ඉල්ලීමක් සම්බන්ධයෙන් නියෝගය සිදු කරමින් මහෙස්ත්‍රාත්වරයා මෙම නියෝගය ලබා දී ඇත.

පූර්වගාමී මහෙස්ත්‍රාත්වරයෙක් සිදුකළ නියෝගයක් සම්බන්ධයෙන් තවත් විනිසුරුවරියක් වාර්තාවක් කැඳවන ලෙසට අපරාධ පරීක්ෂණ දෙපාර්තමේන්තුවට නියෝගයක් සිදු කර ඇතත් එම නියෝගයත් නොසලකා හැර අපරාධ පරීක්ෂණ දෙපාර්තමේන්තුව කටයුතු කර ඇති බව  කී මහෙස්ත්‍රාත්වරයා සතියක් තුළ එකී භාණ්ඩ මුදා හරින ලෙසට නියෝග කර සිටියේය.

“මෙම නියෝගය සිදු කිරිමට පෙර පූර්වගාමී මහෙස්ත්‍රාත්වරයා අපරාධ පරීක්ෂණ දෙපාර්තමේන්තුවට විරෝධතා දැක්වීමට සාධාරණ කාලයක් ලබා දී තිබෙනවා. එහිදී කිසිදු කරුණක් දක්වා නැහැ. පූර්වාගාමී මහෙස්ත්‍රාත්වරයා සිදුකර ඇති නියෝගය සම්බන්ධයෙන් ඉන් පසුව මෙම අධිකරණයේ කටයුතු කළ පූර්වාගාමී මහෙස්ත්‍රාත්වරයා හමුවේ එම භාණ්ඩවලට අයිතිවාසිකම් කියමින් එමත්, එම පාර්ශවය සිදුකළ ඉල්ලීමක් සලකා බලා වාර්තාවක් කැඳවීමට මහෙස්ත්‍රාත්වරිය නියෝග නිකුත් කර තිබියදී එම නියෝග නොසලකා හැර අපරාධ පරීක්ෂණ දෙපාර්තමේන්තුව කටයුතු කර තිබෙනවා. ඒ අනුව අදින් සතියක් තුළ මෙම භාණ්ඩ ඉල්ලීම්කාර පාර්ශවයට මුදා හැරීමට කටයුතු කළ යුතුයි. අධීකරණ නියෝග පැහැර හැරීම, මග හැරීම මත අධිකරණයට අපහාසයක් කළ බවට අපරාධ පරීක්ෂණ දෙපාර්තමේන්තුවට එරෙහිව පියවර ගන්නවා” යැයි සිය නියෝගය ප්‍රකාශයට පත් කරමින් මහෙස්ත්‍රාත්වරයා නියෝග කර සිටියේය.

එම භාණ්ඩ මේ වනවිට මහ බැංකුවේ සුරක්ෂිතාගාරයේ තැන්පත් කර ඇති බව අපරාධ පරීක්ෂණ දෙපාර්තමේන්තුව අධිකරණයට දන්වමින් ඒ සඳහා සාධාරණ කාලයක් ලබා දෙන ලෙසට අධිකරණයෙන් ඉල්ලා සිටියේය.

එහිදි මහෙස්ත්‍රාත්වරයා කියා සිටියේ මෙම භාණ්ඩ සතියක් තුළ මුදා හැරිය යුතු බවය. මෙය බරපතළ අනතුරුදායක් තත්තවයක්. අධිකරණ නියෝග ක්‍රියාත්මක නොකිරීම අපරාධ නීතිය යටතේ බරපතළ වරදක්, යැයි කී මහෙස්ත්‍රාත්වරයා අධිකරණ නියෝග ප්‍රකාරව කටයුතු නොකළහොත් අපරාධ පරීක්ෂණ දෙපාර්තමේන්තුවට එරෙහිව නීතිය ක්‍රියාත්මක කිරිමට සිදු වන බවද අවධාරණය කර තිබේ.

එසේම අධිකරණ නියෝග ක්‍රියාත්මක නොකර නිතිපතිවරයාගේ උපදෙස් පැතීම වැරදි ක්‍රිායවක් යැයිද අවධාරණය කළ මහෙස්ත්‍රාත්වරයා නීතිපති උපදෙස් සඳහා නඩුව ලබන ජුනි මස 17 කැඳවන ලෙස නියෝග කළේය.

මරාගෙන මැරෙන බෝම්බ ප්‍රහාරයක් කොළඹ ෂැංග්‍රිලා හෝටලයට සිදු කරමින් මියගිය තවුහිද් ජමාත් සංවිධානයේ නායක මොහොමඩ් කාසිම් මොහොමඩ් සහරාන් නොහොත් මොහොමඩ් අබු උබෙයිදා නොහොත්  මොහොමඩ් සහරාන්  ඔහුගේ බිරිඳ අබ්දුල් කාදර් ෆාතිමා හාදියා ඇතුළු සැකකරුවන් අට දෙනෙකුට එරෙහිව මෙම නඩුව පවරා ඇති අතර මෙහි ඇතැම් සැකකරුවන්ට අධි චෝදනා ගොනු කර ඇති අතර ඇතැම් සැකකරුවන් නිදහස් කර ඇත.

ඒ. එච්. එම්. රිෆාස් සහ මොහොමඩ් නිලාම් යන අය ඇප මත මුදා හැර ඇති අතර නඩුව විවෘතව කැඳවූ අවස්ථාවේදී ඔවුන් දෙදෙනා විවෘත අධිකරණයේ පෙනී සිටියේය.

රටම කතාවෙන සුරේෂ් සලේව අත්අඩංගුවට ගත් හැටි……

පාස්කු ඉරුදින ත්‍රස්ත ප්‍රහාරය සම්බන්ධයෙන් සිදුකරන විමර්ශනවලට අදාළව රාජ්‍ය බුද්ධි සේවයේ හිටපු අධ්‍යක්ෂ, විශ්‍රාමික මේජර් ජෙනරාල් සුරේෂ් සලේ මහතා අපරාධ පරීක්ෂණ දෙපාර්තමේන්තුව විසින් අද (25) පෙරවරුවේ අත්අඩංගුවට ගනු ලැබීය.

ඒ අනුව ඔහුව පැය 72ක් අපරාධ පරීක්ෂණ දෙපාර්තමේන්තුවේ රැඳවුම් නියෝග මත ප්‍රශ්න කරන බව පොලීසිය සඳහන් කළේය.

2019 වසරේ අප්‍රේල් 21 වැනිදා පාස්කු ඉරුදිනයේ සහරාන් හෂීම් ප්‍රමුඛ ම්ලේච්ඡ අන්තවාදීන් කණ්ඩායමක් දිවයිනේ ස්ථාන 08කදී සිදුකළ මරාගෙන මැරෙන ප්‍රහාර 10කදී පුද්ගලයින් 273ක් ජීවිතක්ෂයට පත්විය.

අනතුරුව අදාළ ප්‍රහාර මාලාව සම්බන්ධයෙන් විමර්ශන ඇරඹි අතර, පාර්ලිමේන්තු විශේෂ කාරක සභාවක් සහ ජනාධිපති විමර්ශන කොමිෂන් සභාවක් ඔස්සේද විමර්ශන සිදු කෙරුණි.

එකී සියලු විමර්ශනවලින් අනාවරණය වූ කරුණු මත ත්‍රස්ත ප්‍රහාරය සිදුකළ කණ්ඩායම් සමග සෘජුව සම්බන්ධතා පවත්වා තිබූ නවුෆර් මවුලවි ඇතුළු විත්තිකරුවන් 25 දෙනෙකුට එරෙහිව කොළඹ ස්ථීර ත්‍රිපුද්ගල මහාධිකරණය හමුවේ අධිචෝදනා ගොනු කළේය.

ඊට අදාළ නඩුව මේ වනවිට දිනපතා විභාග කෙරෙමින් පවතී.

මෙවැනි පසුබිමක පාස්කු ඉරුදින ප්‍රහාරය පිටුපස දේශපාලන හස්තයක් ඇතැයි දිගින් දිගටම ඇතැම් පාර්ශ්ව චෝදනා කළේය.

ඒ අතරවාරයේ හිටපු හමුදා බුද්ධි අධ්‍යක්ෂ මේජර් ජෙනරාල් සුරේෂ් සලේ මහතා සහ තවුහිද් ජමාත් සාමාජිකයන්ගේ සහභාගිත්වයෙන් පැවති හමුවකදී රාජපක්ෂවරුන් යළි බලයට ගෙනඒම සඳහා රට තුළ අනාරක්ෂිත තත්ත්වයක් ඇතිකිරීමට යෝජනා වූ බවට බ්‍රිතාන්‍යයේ චැනල් ෆෝ නාලිකාවේ වාර්තාමය වැඩසටහනකින් චෝදනා එල්ල කෙරුණි.

ඒ කලක් පිල්ලෙයාන්ගේ මාධ්‍ය ප්‍රකාශක ලෙස කටයුතු කළ මේ වනවිට ස්විට්සර්ලන්තයේ දේශපාලන රැකවරණ පතන අසාද් මව්ලානා සිදුකළ ප්‍රකාශයකින්ය.

ඒ අනුව පරීක්ෂණ දෙපාර්තමේන්තුව සිදුකළ රහසිගත විමර්ශනයක් පිළිබඳ පසුගිය සමයේ අවස්ථා කිහිපයකදී කොටුව මහෙස්ත්‍රාත් අධිකරණයට වැඩිදුර වාර්තා මගින් කරුණු දක්වා තිබුණි.

එවැනි පසුබිමක හිටපු රාජ්‍ය බුද්ධි ප්‍රධානී විශ්‍රාමික මේජර් ජෙනරල් තුවාන් සුරේෂ් සලේ මහතාව අද පෙ.ව. 8.10ට අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායමක් විසින් අත්අඩංගුවට ගනු ලැබීය.

පාස්කු ඉරුදින එල්ල වූ ත්‍රස්ත ප්‍රහාරයට ආධාර අනුබලදීම හා කුමන්ත්‍රණය කිරීමේ චෝදනාව යටතේ ඔහු අත්අඩංගුවට පත්විය.

සලේ මහතා පෑලියගොඩ පිහිටි පෞද්ගලික ආයතනයක සේවය සඳහා යමින් සිටියදී අත්අඩංගුවට ගත් බව උසස් පොලිස් නිලධාරියෙක් සඳහන් කළේය.

අනතුරුව ඔහුව අපරාධ පරික්ෂණ දෙපාර්තමේන්තුව වෙත රැගෙනවිත් ප්‍රකාශ සටහන් කරගෙන තිබේ.

එමෙන්ම ඔහු භාවිත කරන පරිගණක, ඔහුගේ නිවස, බැංකු ගිණුම් හා ඊමේල් පණිවිඩ පරීක්ෂා කිරීමට නියමිත බවය වාර්තා වේ.

සුරේෂ් සලේ මහතා පාස්කු ඉරුදින ප්‍රහාරය සම්බන්ධයෙන් ඇතැම් තොරතුරු දැන සිට, ඒ පිළිබඳව අදාළ පාර්ශ්වයන් දැනුම්වත් කර නොමැතිද යන්න පිළිබඳව විමර්ශකයින්ගේ අවධානය යොමු වී ඇති බවද සඳහන්ය.

පාස්කු ප්‍රහාරයට සම්බන්ධ බවට සැකකෙරෙන තවත් ප්‍රබල චරිත කිහිපයක් සම්බන්ධයෙන් මේ වනවිට අපරාධ පරීක්ෂණ දෙපාර්තමේන්තුවේ විමර්ශනවල අවධානය යොමු වී ඇති බව වාර්තා වේ.