ශ්රී ලංකා මහ බැංකුව විසින් ප්රකාශයට පත් කරන ලද දෛනික විනිමය අනුපාතික සටහනට අනුව අද (12) දිනයේ දී එක්සත් ජනපද ඩොලරයක ගැනුම් මිල රු. 305.32 ක් හා විකුණුම් මිල රු. 312.91ක් ලෙසින් සටහන් වී තිබේ.
මේ අතර එ. ජ. ඩොලරයේ නිරූපිත එතැන් විනිමය අනුපාතිකය (Indicative Rate of the USD/LKR Spot Exchange Rate) රු. 309.02 ක් ලෙසින් වාර්තා වන අතර එය 2024 මාර්තු 04 දිනෙන් පසු ඩොලරයක් වෙනුවෙන් වාර්තා වී තිබෙන ඉහළම රුපියල් අගය වේ.
අයහපත් කාලගුණය හේතුවෙන් දිවයිනේ දිස්ත්රික්ක 02ක් සඳහා තවදුරටත් නායයෑම් රතු නිවේදන නිකුත් කර ඇති බව ජාතික ගොඩනැගිලි පර්යේෂණ සංවිධානය පවසයි.
ඒ අනුව මහනුවර දිස්ත්රික්කයේ මැදදුම්බර, පාතදුම්බර, ගඟ ඉහළ කෝරළේ, දොළුව, පන්විල, දෙල්තොට, උඩුදුම්බර, මිනිපේ සහ උඩපළාත යන ප්රාදේශීය ලේකම් කොට්ඨාස සඳහා නායයෑමේ රතු නිවේදන නිකුත් කර තිබේ.
එමෙන්ම කුරුණෑගල දිස්ත්රික්කයේ රිදීගම ප්රාදේශීය ලේකම් කොට්ඨාස සඳහා ද ඉවත්වීමේ රතු නිවේදන නිකුත් කර ඇත.
තවත් ප්රාදේශීය ලේකම් කොට්ඨාස කිහිපයක් සඳහා ජාතික ගොඩනැගිලි පර්යේෂණ සංවිධානය නායයෑම් දෙවන මට්ටමේ අනතුරු ඇඟවීම් නිකුත් කර ඇත.
ඒ අනුව බදුල්ල දිස්ත්රික්කයේ ඌව පරණගම, බදුල්ල, කන්දෙකැටිය, බණ්ඩාරවෙල, සොරණතොට, හාලිඇල, මීගහකිවුල, ලුණුගල, වැලිමඩ, හල්දුම්මුල්ල, පස්සර, ඇල්ල සහ හපුතලේ යන ප්රාදේශීය ලේකම් කොට්ඨාස සඳහා මෙසේ දෙවන මට්ටමේ අනතුරු ඇඟවීම් නිකුත් කර තිබේ.
මහනුවර දිස්ත්රික්කයේ තුම්පනේ, හාරිස්පත්තුව, උඩුනුවර, යටිනුවර, පූජාපිටිය, පස්බාගේ කෝරළේ, කුණ්ඩසාලේ, හතරලියැද්ද, පාතහේවාහැට යන ප්රාදේශීය ලේකම් කොට්ඨාස ද මීට ඇතුළත්.
එමෙන්ම කෑගල්ල දිස්ත්රික්කයේ මාවනැල්ල, රඹුක්කන, අරණායක, ගලිගමුව, කෑගල්ල, බුලත්කොහුපිටිය, යටියන්තොට සහ වරකාපොල යන ප්රාදේශීය ලේකම් කොට්ඨාසවලට ද කුරුණෑගල දිස්ත්රික්කයේ මල්ලවපිටිය, අලව්ව, පොල්ගහවෙල සහ මාවතගම යන ප්රාදේශීය ලේකම් කොට්ඨාසවලට මෙසේ දෙවන මට්ටමේ අනතුරු ඇඟවීම් නිකුත් කර ඇත.
මාතලේ දිස්ත්රික්කයේ ලග්ගල පල්ලේගම, මාතලේ, පල්ලේපොල, රත්තොට, යටවත්ත, අඹන්ගඟ කෝරළය, විල්ගමුව, උකුවෙල සහ නාඋල යන යන ප්රාදේශීය ලේකම් කොට්ඨාස සඳහා ද නුවරඑළිය දිස්ත්රික්කයේ අඹගමුව කෝරළය, කොත්මලේ නැගෙනහිර, මතුරට, නෝර්වුඩ්, හඟුරන්කෙත, නුවරඑළිය, කොත්මලේ බටහිර, වලපනේ, තලවාකැලේ සහ නිල්දණ්ඩාහින්න මෙන්ම රත්නපුර දිස්ත්රික්කයේ කහවත්ත, කොළොන්න සහ ගොඩකවෙල ප්රාදේශීය ලේකම් කොට්ඨාස ද මීට ඇතුළත් වේ.
අනතුරු ඇඟවීමේ මට්ටම 1
——————————-
ගම්පහ දිස්ත්රික්කයේ: දිවුලපිටිය, මීරිගම සහ අත්තනගල්ල
කෑගල්ල දිස්ත්රික්කයේ : දැරණියගල, රුවන්වැල්ල සහ දෙහිඕවිට
ආපදා තත්ත්වය හේතුවෙන් නිශ්කාෂන කටයුතුවල ඇතිවූ ප්රමාදයත් සමග මේ වනවිට බහාලුම් නිශ්කාෂනය කිරීමේ යම් ප්රමාදයක් මතුව තිබේ.
බහාලුම් ප්රවාහන රථ හිමියන්ගේ සංගමයේ සභාපති සනත් මංජුල මහතා සඳහන් කළේ මෙම ආපදා තත්ත්වයත් සමග විශාල බහාලුම් තොගයක් රට තුළට ආනයනය වෙන නමුත් එම බහාලුම් නිශ්කාෂනය කර ගැනීමට හැකියාවක් නොමැති බවය.
වරාය පරිශ්රය තුළ දින 4ක් 5ක් පුරා බහාලුම් පටවා ගත් ලොරි රථ 700කට වැඩි ප්රමාණයක් ඇති බව ද ඒ මහතා වැඩිදුරටත් පැවසීය.
මේ සම්බන්ධයෙන් මැදිහත් වී කෙලවරපිටිය අංගනය කඩිනමින් සකස් කර දෙන ලෙස ද ඔහු මෙහිදී ජනාධිපතිවරයාගෙන් ඉල්ලීමක් ද සිදු කළේය.
කෙසේ වෙතත්, මේ සම්බන්ධයෙන් කළ විමසීමකදී රේගු අධ්යක්ෂ ජනරාල් සීවලී අරුක්ගොඩ මහතා ප්රකාශ කළේ, මේ සති අන්තය වනවිට බහාලුම් තදබදය අවසන් කිරීමට හැකිවනු ඇති බවය.
ශ්රී ලංකාවේ ඉන්දියානු මහකොමසාරිස් සංතෝෂ් ජා මහතා අද (12) මහියංගනයේ ස්ථාපිත කර ඇති ඉන්දියානු ජංගම රෝහලේ නිරික්ෂණ චාරිකවට එක්විය.
මෙම ජංගම රෝහල ඉන්දියානු රජයෙන් ලබා දී ඇති අතර එය ගංවතුරින් හානියට පත් මහියංගන රෝහල යථා තත්ත්වයට පත්වන තුරුම ක්රියාත්මක විය.
මේ වනවිට මහියංගන රෝහලේ ප්රතිකාර කටයුතු ආරම්භ කර ඇති අතර ඒ අනුව මෙම ජංගම රෝහලේ වැඩ කටයුතු අද පස්වරුවෙන් අවසන් කෙරිණි.
මෙම අවස්ථාව සඳහා ඌව පළාත් ආණ්ඩුකාර නිතිඥ කපිල ජයෙස්කර මහතා, ඉන්දියානු නියෝජ්ය මහ කොමසාරිස් වී. එස්. සරන්යා මහත්මිය, මහියංගන ප්රාදේශිය සභා සභාපති නිතිඥ උපේක්ෂා විජේතුංග මහත්මිය ඇතුළු පිරිසක් ද එක්ව සිටියහ.
මෙම වසරේදී මෙන්ම පසුගිය වසරේදී මෙරට සංවිධානාත්මක අපරාධකරුවන් විසින් අනීතිකව උපයාගත් දේපල තහනම් කිරීමටත් එම දේපොළ රජය සතු කර ගැනීම සඳහා වූ මූලික පියවර මේ වන විට ලබාගෙන ඇති බව පොලිස් මාධ්ය ප්රකාශක, සහකාර පොලිස් අධිකාරී එෆ්.යූ. වුට්ලර් මහතා පවසයි.
අද (12) පැවැති මාධ්ය හමුවේදී අදහස් දක්වමින් පොලිස් මාධ්ය ප්රකාශකවරයා පැවසුවේ පසුගිය සහ මෙම වසර දෙක ඇතුළත රත්රං පවුම් 354ක්, වාහන 77ක්, මුදලින් රුපියල් තිස් පන් කෝටියක්, රුපියල් එක්කෝටි එකසිය හයක වටිනාකමකින් යුත් දේපොළ රැසක්ද රජය සතු කර ගැනීමට මූලික ක්රියාමාර්ග මේ වන විට ලබා ගෙන ඇති බවය.
එහිදී 2024 වසරේදී රත්රං පවුම් 150ක්, වාහන 64ක්, මුදලින් රුපියල් කෝටි 6ක්, සහ රුපියල් කෝටි 61ක දේපොළ රජය සතු කර ගැනීම සඳහා තාවකාලිකව තහනම් කළ බවත් පොලිස් මාධ්ය ප්රකාශකවරයා සඳහන් කළේය.
එමෙන්ම මෙම වසරේදී රත්රං පවුම් 204ක්, වාහන 13ක්, රුපියල් හැට හත් කෝටි හැත්තෑ අට ලක්ෂයක ඉඩම් සහ දේපොළ සහ නිවාස 18ක අනීතිකව උපයා ගත් දේපොළ රජය සතු කර ගැනීම සඳහා මේ වන විට ක්රියාමාර්ග ගෙන ඇති බවත් ඒ මහතා වැඩිදුරටත් අදහස් දක්වමින් සඳහන් කළේය.
ඉදිරි පැය 36දී උතුරු, උතුරු – මැද, නැගෙනහිර, ඌව, මධ්යම සහ වයඹ පළාත්වල වැසි වාර කිහිපයක් ඇති විය හැකි බව කාලගුණ විද්යා දෙපාර්තමේන්තුව පවසයි.
දිවයිනේ සෙසු ප්රදේශවල පස්වරු 1.00න් පමණ පසුව තැනින් තැන වැසි හෝ ගිගුරුම් සහිත වැසි ඇති විය හැකි අතර ඇතැම් ස්ථානවලට මි.මී. 50 ට වැඩි තරමක තද වැසි ඇති විය හැකියි.
එමෙන්ම මධ්යම කඳුකරයේ නැගෙනහිර බැවුම් ප්රදේශවලත්, උතුරු, උතුරු – මැද සහ වයඹ පළාත්වලත් ත්රිකුණාමලය, හම්බන්තොට සහ මොනරාගල දිස්ත්රික්කවලත් විටින් විට හමන පැ.කි.මී. (30-40) ක පමණ තරමක තද සුළං ඇති විය හැකි බව එම නිවේදනයේ සඳහන්.
සබරගමුව, මධ්යම සහ දකුණු පළාත්වල ඇතැම් ස්ථානවල අළුයම් කාලයේදී මීදුම් සහිත තත්ත්වයක් පැවතිය හැකියි.
ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මඟින් සිදු වන අනතුරු අවම කර ගැනීමට අවශ්ය පියවර ගන්නා ලෙස ද කාලගුණ විද්යා දෙපාර්තමේන්තුව ජනතාවගෙන් ඉල්ලා සිටී.
සියලුම මත්පැන් බලපත්ර ගාස්තු අද (12) සිට වහාම ක්රියාත්මක වන පරිදි 100%කින් ඉහළ දැමීමට පියවර ගෙන තිබේ.
ඒ ජනාධිපතිවරයා විසින් පසුගිය 05 වනදා පාර්ලිමේන්තුවට ඉදිරිපත් කළ යෝජනාවට අනුවය.
ජනාධිපති අනුර කුමාර දිසානායක මහතාගේ අත්සනින් යුතුව ඊට අදාළ ගැසට් නිවේදනය මේ වන විට නිකුත්ව තිබේ.
ඒ අනුව වාර්ෂික සුරාබදු ගාස්තුව, කර්මාන්ත ගාස්තුව සඳහා එක්වරක් අයකරනු ලබන ගාස්තුව සහ ආරක්ෂිත ඇප තැන්පතු මුදල ඉහළ දමා ඇති බව සුරාබදු දෙපාර්තමේන්තුව සඳහන් කළේය.
සුරාබදු දෙපාර්තමේන්තුව පැවසුවේ එම සංශෝධන අනුව ගෙවීම් සිදු කළ යුත්තේ ලබන ජනවාරි පළමුවනදා සිට බවය.
සිවිල් ගුවන් සේවා අමාත්යවරයා වශයෙන් කටයුතු කළ අවධියේ රුපියල් 494,000ක මුදලක් හලාවත ප්රදේශයේ පිහිටි බැංකුවක ගිණුමකට තැන්පත් කරන ලෙස එම අධිකාරියේ නිලධාරීන්ට බලපෑම් සිදු කිරීම තුළින් “දූෂණය” නැමැති වරද සිදුකළේ යැයි චෝදනා ලබා සිටින හිටපු අමාත්ය පියංකර ජයරත්නට මහතාට එරෙහිව අල්ලස් කොමිසම ගොනු කළ නඩුව විභාගය සඳහා මාර්තු 9වනදා කැඳවන ලෙස කොළඹ මහාධිකරණය අද (12) නියම කළේය.
නඩුව කොළඹ මහාධිකරණය විනිසුරු මොහොමඩ් මිහාල් මහතා ඉදිරියේ කැඳවනු ලැබීය.
එහිදී ඉදිරිපත් වූ කරුණු සලකා බැලූ විනිසුරුවරයා නඩු විභාගය මාර්තු 9වනදා කැඳවන ලෙස නියෝග කළේය.
එදින සාක්ෂිකරුවන්ට අධිකරණය හමුවේ පෙනි සිටින ලෙස දන්වා සිතාසි නිකුත් කරන ලෙසත් විනිසුරුවරයා නියෝග කර ඇත.
මාලිමාවේ බලය හිමි රත්නපුරු මහ නගර සභාවේ 2026 වසරට නියමිත මංගල අයවැය රත්තපුර මහ නගර සභාවේ නගරාධිපති ඉන්ද්රජිත් කටුගම්පොල මහතා විසින් අද(12) දින සභාවට ඉදිරිපත් කෙරුණා
එය සම්මත කරගැනීමට ඡන්ද විමසීමක් සිදු කෙරුණා. එහිදී 25 දෙනෙක් ඡන්දය ප්රකාශ කර තිබුණා
අයවැයට පක්ෂව ඡන්ද දොළහකුත් (12)විපක්ෂව ඡන්ද දහතුනකුත් (13)හිමිවිය .
මේ නිසා මාලිමාවේ බලය හිමි රත්නපුර මහ නගර සභාවේ මංගල අයවැය වැඩි ඡන්ද තුනකින්(03) පරාජ විය
රත්නපුර මහ නගර සභාවේ මුළු සභික සංඛ්යාව 27 ක් වන අතර අද දින සභාවට මන්ත්රීවරු දෙදෙනෙක් පැමිණ සිටියේ නැත
එම මන්ත්රීවරු දෙදෙනා ..
1 ශ්රී ලංකා නිදහස් පක්ෂයේ L.P. ලියනාරච්චි
2 එක්සත් ජාතික පක්ෂයේ R.G. ඩයන් නිපුණ රාජපක්ෂ
රත්නපුර – ගයාන් කුඩාගම
