By: නිරාශා පියවදනි – nirashapiyawadani@gmail.com
ඇය ලොව අවසානයට ඉතිරි වන ගැහැණියයි. පිරිමින් පමණක් ශේෂව ගිය ලෝකයක අවසානයට ඉතිරි වූ එකම ගැහැණියකගේ සංවේදනාවන් කෙසේ වනු ඇතිද?
ඒ ගැහැණිය වේදිකාව මත ප්‍රතිනිර්මාණය කරන ගැහැණියගේ මුහුණ දෙස බලා මා විමසුවේ ඔබ ඇයනම් කුමක් කරන්නේද කියාය. ඇය ගත් කටටම කිවේ “වෙන අහවල් දෙයක්ද? මා නම් හැකිතාක් විනෝද බරව මේ අවසන් හෝරා කිහිපය ගෙවා දමමින් ප්‍රීතිමත් අවසානයකට ලක ලැහැස්ති වන බවයි!”
ඉතාලි ජාතික ජුලියා පිලිප්පෝ ඒ මුදා හැරියේ යුරෝපයේ නිෂ්පාදිත ගැහැණු හඩ විය හැකිය. එහෙත් ඉන්දියන් සයුරේ මුතු ඇටය පෝෂණය කළ නිර්මාණකරුවන් දෙපළගේ හිස තුළ මැවුණු ගැහැණිය ඊට ඉදුරා වෙනස්ය. ඇගේ සංවේදනාවන් රාගය කෝපය ඊර්ෂ්‍යාව මුසු වී ව්‍යාකූලව ගොස් ඇත.
කාව්‍යමය ගුණය දෝර ගලා යන අපූරු බස් වහරකින් ඇය ඔංචිල්ලාවක් මත දිග හරින්නේ හදවත පුපුරා ගලා හැලෙනා නේක විධ සංවේදනා සමූහයකි. මෙතෙක් ශ්‍රී ලාංකීය වේදිකා නාට්‍ය ප්‍රේක්ෂකාගාරයට එතරම් නුපුරුදු මේ බස් වහර ගෙත්තම් වන්නේ ප්‍රවීණ කිවියර මංජුල වෙඩිවර්ධනයන් අතිනි. ඔහුගේ මුල් සිංහල පිටපත එහි වන කාව්‍යාත්මක බවින් ඉංග්‍රීයට නගන ලද්දේ දිලිනි ඊරියවල විසිනි.
නාට්‍ය අධ්‍යක්ෂණය ප්‍රවීණ නාට්‍යෙව්දී එම්. සෆීර් විසිනි. නිරන්තර වේදිකාවේ පර්යේෂණාත්මක නිර්මාණකරණයට වෙසෙස් නැඹුරුවක් දක්වන නිර්මාණකරුවෙක් ලෙසින් එම්. සෆීර් හැදින්විය හැකිය.
සිරුරේ හැඩතල භාවිත කරමින් සිදු කරන හැගීම් ප්‍රකාශනයන්, වර්ණවත් ඔංචිල්ලා, කෘතිම වැස්ස, ආදී පර්යේෂණාත්මක අංගයන්ගෙන් වේදිකාව හැඩ කරන මෙම නාට්‍යමය ගෙත්තම ප්‍රේක්ෂකයාට නව්‍ය අත්දැකීමක් තිළිණ කරනු ඇති බව ඔහුගේ විශ්වාසයයි.
ජාත්‍යන්තර තලයට රැගෙන යාමේ අරමුණින් නිර්මාණය වූ මෙම කෘතිය පුරා දිව යන්නේ එකම චරිතයක් පමණි. ඒ කාන්තා චරිතයකි.
වේදිකාවේ ජාත්‍යන්තර අත්දැකීම්වලින් සන්නද්ද වූ ඉතාලියනු රංගවේදිනියක වන ජූලියා ෆිලප්පෝ මේ සදහා තෝරා ගත්තේ ඈ සතු රංගනයේ අත්දැකීම් බහුලකම නිසාම නොවේ.
ඔංචිල්ලාවක හරඹ කරන්නට තරම් අපූරු නම්‍යශීලී සිරුරක් ඇයට හිමිව තිබීමත් ආදරයේ ඔංචිල්ලා පදවන්නට ඇයට විශේෂ සුදුසුකමක් විය. මේ වන විට ජූලියා ෆිලිප්පෝ මෙරට පැමිණ සිටී. ඇය මාසයක කාලයක් පුරාමෙරට රැදෙමීන් පූර්ණකාලීණව පුහුණුවීම්වල නිරත වූ අතර සීමිත ආරාධිත ප්‍රේක්ෂාගාරයක් වෙනුවෙන් පැවැත්වෙන මෙම නාට්‍යය නිර්මාණයේ පූර්ව මංගල දර්ශනය දක්වා අඛණ්ඩව මෙහි රැදී සිටිනු ඇත.
එම පූර්ව මංගල දර්ශනය 21 වන දා එනම් අද දින කොළඹ ලුම්බිණි රගහලේදී වේදිකාගත වේ.
“ආදරයේ ඔංචිල්ලා “ මංගල දර්ශනය පැවැත්වෙන්නේ නොවැම්බර් මස ඉන්දියාවේ පූනේ ‘අයිෆා ජාත්‍යන්තර නාට්‍ය උළෙලේදීය. තවත් විශේෂ දර්ශන වාර තුනක් කොරියාවේ සෝල් නුවර ‘කොරියානු ජාත්‍යන්තර ඩියෝ නාට්‍ය උළෙලෙදී’ පැවැත්වේ. ඉන් පසු එයලොවපුරා ආරාධිත දර්ශන ගණනාවක් වේදිකා ගත කෙරෙයි.
එමෙන්මමෙහි නිෂ්පාදන කළමණාකරණය හා රංගාලෝක රචනය සූජීව පතිනිසේකර විසින් සිදුකෙරෙයි. සංගීත නිර්මාණය වින්දක වීරසිංහගෙනි. වේදිකා කළමණාකරණ ජීවන්තිපෙරේරා සිදුකරන අතර, වේදිකා පරිපාලනය තරුෂිකාවින්දිය. මෙම නිෂ්පාදනයේ ජාත්‍යන්තර සම්බන්ධිකරණ කටයුතු සිදු කරනු ලබන්නේ ජයලත් එස්. ගෝමස් විසිනි.
By: නිරාශා පියවදනි – nirashapiyawadani@gmail.com
