Category: travel

Travel

මෙරට සංචාරක පැමිණීම සියයට 30කින් පමණ අඩුවෙයි…..

මැදපෙරදිග පවතින යුදමය වතාවරණය හේතුවෙන් මේ වනවිට දිවයිනට සංචාරකයින් පැමිණිමට නියමිතව තිබූ ගුවන්ගමන් වාර 768ක් අවලංගු වී ඇති බව සංචාරක කටයුතු නියෝජ්‍ය අමාත්‍ය රුවන් රණසිංහ මහතා පවසයි.

ඔහු පෙන්වා දෙන්නේ මේ හේතුවෙන් 30% පමණ සංචාරකයින්ගේ පැමිණීමේ අඩුවක් දක්නට ලැබෙන බවය.

සංචාරක ව්‍යාපාරය ප්‍රවර්ධනය කිරීම සඳහා මත්තල ගුවන්තොටුපොළ සංවර්ධනය කිරීමට සැලසුම් සකස් කර ඇති බවද රුවන් රණසිංහ නියෝජ්‍ය අමාත්‍යවරයා පැවසීය.

මේ අතර මැදපෙරදිග කලාපයේ හටගෙන ඇති යුදමය තත්ත්වය හේතුවෙන් මෙරට අපනයන ක්ෂේත්‍රය සඳහා බලපෑමක් එල්ලවී ඇති බව අපනයන සංවර්ධන මණ්ඩලය පවසයි.

එහි සභාපති මංගල විජේසිංහ මහතා පැවසුවේ සමස්ථ අපනයනවලින් මැදපෙරදිග කලාපය  8%ක පමණ අපනයන ප්‍රමාණයක් නියෝජනය කරන බවය.

මේ අර්බුදය තවදුරටත් වර්ධනය වුවහොත් ඉරානයට අපනයන කරන 35% ක තේ ප්‍රමාණය වෙනත් රටකට යොමු කිරීම සඳහා සාකච්ඡා කරමින් පවතින බවද මංගල විජේසිංහ මහතා සඳහන් කළේය.

ශ්‍රී ලංකාවේ සිටින අමෙරිකානු පුරවැසියන්ට දැනුම්දීමක්…

ශ්‍රී ලංකාවේ සිටින අමෙරිකානු පුරවැසියන් සඳහා ශ්‍රී ලංකාවේ එක්සත් ජනපද තානාපති කාර්යාලය විසින් විශේෂ දැනුම්දීමක් නිකුත් කර තිබේ.

එහි සඳහන් වන්නේ කටුනායක ගුවන්තොටුපොළේ කටයුතු සාමාන්‍ය ලෙස ක්‍රියාත්මක වන නමුත් මැදපෙරදිග කලාපයේ ගුවන් මාර්ග වසා දමා තිබීම හේතුවෙන් ලෝක ගුවන් ගමන් තවමත් දැඩි ලෙස බාධා වී ඇති බවය.

එහෙත් මැදපෙරදිග හරහා නොයන වාණිජ ගුවන් ගමන් කිහිපයක් භාවිතා කළ හැකි බවත්, ගුවන් ගමන් ප්‍රමාදය හෝ අවලංගු වීම පිළිබඳව තම ගුවන් සමාගම සමඟ සෘජුව සම්බන්ධ විය යුතු බවත් දැනුම්දී ඇත.

මේ අතර ශ්‍රී ලංකා රජය විසින් ශ්‍රී ලංකාවේ සිටින සංචාරකයන්ට විකල්ප පිටත්වීම් සැලසුම් කර ගැනීමට අවස්ථාව ලබාදෙමින් දින 14ක නොමිලේ වීසා දිගුවක් ලබාදීමටද පියවර ගෙන තිබේ.

හදිසි සහාය අවශ්‍ය නම්  එක්සත් ජනපද තානාපති කාර්යාලයෙ හි අමෙරිකානු පුරවැසි සේවා අංශය (+94 11 202 8500) හරහා සම්බන්ධ විය හැකි අතර, සඳුදා සිට බ්‍රහස්පතින්දා දක්වා පස්වරු 1.00 – 2.00 අතර වැඩකරන දිනයන් හිදී  සේවාවද ලබාදෙන බව සඳහන් වේ.

එමෙන්ම ගුවන් ගමන්වලට අමතර කරුණු සඳහා ශ්‍රී ලංකා සංචාරක  1912 අංකයට සම්බන්ධ විය හැකි බවද දැනුම්දී ඇත.

අවසන් ආරක්ෂක යාවත්කාලීන තොරතුරු සඳහා ශ්‍රී ලංකාවේ එක්සත් ජනපද තානාපති කාර්යාලය වෙබ් අඩවිය සහ නිල සමාජ මාධ්‍ය නාලිකා අනුගමනය කරන ලෙසද පුරවැසියන්ට උපදෙස් දී තිබේ.

2026 ලොව වඩාත්ම දැරියහැකි විශ්‍රාමික ගමනාන්තය ලෙස ශ්‍රී ලංකාව නම් කෙරේ…..

2026 වසර සඳහා වන ‘International Living’ වාර්ෂික ගෝලීය විශ්‍රාම දර්ශකයට (Annual Global Retirement Index) අනුව, විදේශිකයන් සඳහා විශ්‍රාමික දිවිය ගතකිරීමට ලොව වඩාත්ම දැරියහැකි (Most Affordable) ගමනාන්තය ලෙස ශ්‍රී ලංකාව තේරී පත්වී ඇත.

ජීවන වියදම, සෞඛ්‍ය පහසුකම්, දේශගුණය සහ පදිංචිය සඳහා ඇති විකල්ප යන නිර්ණායක පදනම් කර ගනිමින් ‘International Living’ සඟරාව විසින් 35 වැනි වරටත් නිකුත් කරන ලද මෙම දර්ශකයට අනුව ග්‍රීසිය ලොව හොඳම විශ්‍රාමික ගමනාන්තය ලෙස ප්‍රථම ස්ථානය දිනාගෙන තිබේ.

ග්‍රීසිය සමස්ත දර්ශකයේ පෙරමුණ ගත්තද, අවම වියදමකින් උසස් ජීවන රටාවක් ගත කළ හැකි රටවල් අතර ප්‍රමුඛයා බවට පත්ව ඇත්තේ ශ්‍රී ලංකාවයි.

පෙබරවාරි පළමු දින අටේදී සංචාරකයන්ගේ පැමිණීම 80000 ඉක්මවයි…..

2026 පෙබරවාරි මාසයේ පළමු දින 08 තුලදී සංචාරකයින් 80,776 ක් මෙරටට පැමිණ තිබේ.

ශ්‍රී ලංකා සංචාරක සංවර්ධන අධිකාරිය නිකුත් කළ නවතම දත්ත වාර්තාවන් මඟින් මේ බව අනාවරණය කර ඇත.

 

ඉන්දියාවෙන් සංචාරකයින් 12,439 ක් පැමිණ ඇති අතර එය 15.0% කි. එක්සත් රාජධානියෙන් 9,283 ක්, රුසියාවෙන් 6,946 ක්, ජර්මනියෙන් 5,401 ක් සහ චීන ජාතිකයින් 5,037 ක් ද ශ්‍රී ලංකාවට පැමිණ ඇත.

2025 පෙබරවාරි මාසයේදී ශ්‍රී ලංකාවට පැමිණි සංචාරකයින් 240,217 ක් බව සඳහන් වේ.

මේ අතර, පෙබරවාරි සඳහා නවතම සංඛ්‍යාලේඛන නිකුත් කිරීමත් සමඟ 2026 දී ශ්‍රී ලංකාවට පැමිණි සංචාරකයින් සංඛ්‍යාව 358,103 දක්වා ඉහළ ගොස් තිබේ.

ඒ අතරින් පුද්ගලයින් 65,500 ක් ඉන්දියාවෙන්, 38,823 ක් එක්සත් රාජධානියෙන් සහ 34,080 ක් රුසියාවෙන් පැමිණි බව ශ්‍රී ලංකා සංචාරක සංවර්ධන අධිකාරිය සඳහන් කළේය.

2025දී මත්තල ගුවන් තොටට වාර්තාගත ගුවන් මගීන් සංඛ්‍යාවක්….

මත්තල රාජපක්ෂ ජාත්‍යන්තර ගුවන් තොටුපොළ 2025 වසර තුළ වාර්තාගත ගුවන් මගීන් සංඛ්‍යාවක් මෙහෙයවීමට සමත් වී ඇති බව ගුවන්තොටුපළ හා ගුවන් සේවා සමාගම පවසයි.

2013 වසරේ ගුවන්තොටුපොළ ආරම්භයෙන් අනතුරුව වාර්තා වූ ඉහළම ගුවන් මගී සංචලන සංඛ්‍යාව මෙය වන අතර, 2025 වසර තුළ ගුවන් මගීන් 140,614 දෙනෙකු මෙහෙයවීමට හැකි වී ඇති බව එම සමාගම සඳහන් කරයි.

ගුවන්තොටුපොළ හා ගුවන් සේවා සමාගමේ දත්ත අනුව, 2025 වසර තුළ මත්තල ජාත්‍යන්තර ගුවන්තොටුපොළ ජාත්‍යන්තර ගුවන්යානා 703ක් සාර්ථකව මෙහෙයවීමටද හැකි වී ඇත.

එමෙන්ම පසුගිය වසර තුන පුරා මත්තල ගුවන්තොටුපොළ ගුවන් මගී හැසිරවීමේ අඛණ්ඩ වර්ධනයක් පෙන්නුම් කර ඇති බවද වාර්තා වෙයි.

නව රජය බලයට පැමිණීමෙන් අනතුරුව මත්තල ගුවන්තොටුපොළ කෙරෙහි විශේෂ අවධානයක් යොමු කිරීම මෙම වාර්තාගත වර්ධනයට ප්‍රධාන හේතුවක් බව ගුවන් තොටුපළ හා ගුවන් සේවා සමාගම පෙන්වා දෙයි.

අතීතයේදී මත්තල ගුවන් තොටුපොළ ආශ්‍රිත වනජීවී ගැටලු හේතුවෙන් ආරක්ෂක කරුණු මත ගුවන් සමාගම් මෙහි ගුවන් ගමන් ක්‍රියාත්මක කිරීමට මැලිකමක් දක්වා තිබුණි.

එම ගැටලු විසඳීමට නව රජය ගත් සාධනීය ක්‍රියාමාර්ග හේතුවෙන් 2025 වසරේදී ගුවන්යානා පැමිණීමේ ද සැලකිය යුතු වර්ධනයක් දක්නට ලැබේ.

මත්තල ජාත්‍යන්තර ගුවන්තොටුපොළ පිළිබඳ විශ්වාසය පළ කරමින් 2025 වසර තුළ යුරෝපය, මැදපෙරදිග සහ දකුණු ආසියාව සම්බන්ධ කරමින් ගුවන්සමාගම් කිහිපයක් මෙහි ගුවන් වාර ක්‍රියාත්මක කර ඇත.

ඒ අනුව රුසියාවේ Red Wings, බහරේන් හා පාකිස්තානයේ සිට SkyUp, ඩුබායි සිට Fly One, උස්බෙකිස්තානයේ සිට Centrum Air සහ Uzbekistan Airways, බල්ගේරියාවේ සිට Bulgaria Air යන ගුවන් සමාගම් මත්තල දක්වා ගුවන් ගමන් ක්‍රියාත්මක කර ඇත.

එමෙන්ම බෙලරූස්හි මින්ස්ක් නගරයෙන් Belavia ගුවන් සේවය 2025 වසරේදී ප්‍රථමවරට මත්තල ජාත්‍යන්තර ගුවන්තොටුපොළ වෙත ගුවන් ගමන් ආරම්භ කිරීමද විශේෂත්වයකි.

මත්තල ජාත්‍යන්තර ගුවන් තොටුපොළෙන් දේශීය සංචාරක ගමනාන්ත රැසකට පහසුවෙන් ළඟා විය හැකි වීම හේතුවෙන් ශ්‍රී ලංකාවේ සංචාරක කර්මාන්ත ප්‍රවර්ධනය සඳහාද එය වැදගත් භූමිකාවක් ඉටු කරයි.

එසේම බණ්ඩාරනායක ජාත්‍යන්තර ගුවන්තොටුපොළේ පවතින අධික තදබදයට විකල්පයක් ලෙස මත්තල ගුවන් තොටුපොළ උපායමාර්ගික වශයෙන්ද විශේෂ වැදගත්කමක් දරයි.

මහජන මුදල් බිලියන ගණනක් වැය කර ඉදිකර අභාවයට යාමට ඉඩ හැර තිබූ මත්තල රාජපක්ෂ ජාත්‍යන්තර ගුවන්තොටුපොළ 2025 වසරේදී වාර්තාගත ගුවන් මගී පැමිණීමක් වාර්තා කිරීම, ගුවන්තොටුපොළ පිළිබඳ නව බලාපොරොත්තු නංවන වැදගත් සන්ධිස්ථානයක් බවද වාර්තා වේ.

නුවරඑළියත් Agoda ගමනාන්ත ලැයිස්තුවට….

ගෝලීය ඩිජිටල් සංචාරක වෙබ් අඩවියක් වන Agoda වෙබ් අඩවිය මේ වසර සඳහා නම් කළ ”හොඳම ආසියානු කඳුකර ගමනාන්ත ලැයිස්තුවට” ශ්‍රී ලංකාවේ මධ්‍යම කඳුකරයේ පිහිටි නුවරඑළියත් ඇතුළත් කර තිබේ.

මිලියන සංඛ්‍යාත පිරිසක් පරිශීලනය කරන Agoda වෙබ් අඩවිය, ලෝකයේ විශාලතම සංචාරක වෙබ් අඩවි අතරින් එකකි.

ඔවුන් එමගින් නුවරඑළිය හඳුන්වාදී ඇත්තේ පුංචි එංගලන්තය ලෙසය.

සෞම්‍ය කාලගුණයක් ඇති නුවරඑළිය උසස් තත්ත්වයෙන් යුතු තේ වගාකිරීම සම්බන්ධව කීර්තියක් උසුලයි.

එහි හරිත පැහැ තේ වගාවන් සහ යටත්විජිත කාලයට අයත් ගොඩනැගිලි අතර සංචාරය කිරීම තුළින් සංචාරකයින්ට වඩාත් විනෝදාත්මක අත්දැකීමක් විඳගත හැකි බව Agoda වෙබ් අඩවිය පෙන්වා දී ඇත.

Agoda කඳුකර ගමනාන්ත ලැයිස්තුවට නුවරඑළිය නගරයට අමතරව ඉන්දියාවේ ශිම්ලා කලාපයත්, එරට මුන්නාර් කඳුකරයත්, මැලේසියාවේ කැමරූන් උස් කඳුකරයත් ඇතුළත් වේ.

එමෙන්ම ඒ අතරට වියට්නාමයේ සපා කඳුකරය , ප්‍රංශ යටත්විජිත ආභාසය ලත් ඩලාත් , ඉන්දුනීසියාවේ බන්ඩුන් කලාපය මෙන්ම භූතානයේ තිම්පු පුරවරයත් ඇතුළත්ව ඇත.

භාෂා 39කින් සේවා සපයන Agoda වෙබ් අඩවිය ඔස්සේ ලැයිස්තුගත කර ඇති හෝටල් සහ සංචාරක නවාතැන් පොළ සංඛ්‍යාව මිලියන 6කට අධිකය.

2026 ජනවාරි මාසයේ වාර්තාගත සංචාරක පැමිණීමක්……

2026 ජනවාරි මාසය තුළ සංචාරකයින් 277,327ක් ශ්‍රී ලංකාවට පැමිණ ඇති බව ශ්‍රී ලංකා සංචාරක සංවර්ධන අධිකාරිය නිකුත් කළ නවතම දත්ත වාර්තාවන් මඟින් අනාවරණය කර ඇත.

එය මෙතෙක් ඉතිහාසයේ කැලැන්ඩර් මාසයක් තුළ ශ්‍රී ලංකාවට පැමිණි ඉහළම සංචාරකයින් සංඛ්‍යාව ලෙස වාර්තා වන බවද එම අධිකාරිය සඳහන් කරයි.

2025 වසරේ ජනවාරි මාසය සමඟ සංසන්දනය කිරීමේදී මෙවර සංචාරක පැමිණීම සීයට 10කට ආසන්න වර්ධනයක් පෙන්නුම් කරන බවද දත්ත වාර්තාවල සඳහන් වේ.

ගත වූ ජනවාරි මාසය තුළ එක් දිනකදී වාර්තා වූ ඉහළම සංචාරක පැමිණීම ජනවාරි 15 වන දින සිදුව ඇති අතර, එදින සංචාරකයින් 10,483ක් මෙරටට පැමිණ ඇත.

එම කාලය තුළ ශ්‍රී ලංකාවට වැඩිම සංචාරකයින් පිරිසක් පැමිණ ඇති රට ලෙස ඉන්දියාව වාර්තා වී ඇති අතර, එරටින් සංචාරකයින් 52,061ක් පැමිණ ඇත.

එසේම එක්සත් රාජධානියෙන් 29,540ක්, රුසියාවෙන් 27,134ක් සහ ජර්මනියෙන් 17,776ක් ලෙස සංචාරකයින් විශාල පිරිසක් මෙරටට පැමිණ ඇති බව සංචාරක සංවර්ධන අධිකාරිය සඳහන් කරයි.

කටුනායක ගුවන්තොටේ E-Gate පද්ධතිය විවෘත කෙරේ…..

කටුනායක ගුවන්තොටුපොළේ පැමිණීමේ පර්යන්තයේ ස්ථාපිත කළ ස්වයංක්‍රීය දේශසීමා පාලන පද්ධතිය (Automated Border Control/E – Gate System) අද (28) පස්වරුවේ විවෘත කළේය.

ජපාන රජයේ අරමුදල් සහාය ඇතිව, සංක්‍රමණය සඳහා වූ ජාත්‍යන්තර සංවිධානය (I.O.M.) විසින් ක්‍රියාත්මක කළ මෙම ව්‍යාපෘතිය මෙරට පළමු ස්වයංක්‍රීය දේශසීමා පාලන පද්ධතිය වේ.

අමෙරිකානු ඩොලර් මිලියන 8.4ක වටිනාකමකින් ඉදිකළ මෙම ගේට්ටු පහසුකම යටතේ බෝවන රෝග හඳුනාගැනීම වැනි පහසුකම් ගණනාවක්ද ඇතුළත්ය.

මෙම පහසුකම යටතේ ගුවන්තොටුපොළේ කාර්යක්ෂමතාව ඉහළ නැංවීමේ හැකියාව පවති අතර, දැනට මෙම පහසුකම මෙරට මගීන්ට පමණක් විවෘතව ඇත.

කටුනායක ගුවන්තොටුපොළ වෙත පැමිණෙන මගීන්ට තත්පර 40ක් වැනි කෙටි කාලයක් තුළ සිය නිශ්කාශන කටයුතු නිමකර ආගමන විගමන දෙපාර්තමේන්තු පරිශ්‍රයෙන් පිටව යාමට නව පද්ධතිය හරහා අවස්ථාව උදාවනු ඇත.

මෙම අවස්ථාවට වරාය, සිවිල් ගුවන් සේවා අමාත්‍ය අනුර කරුණාතිලක, මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජේපාල, වරාය සහ සිවිල් ගුවන් සේවා නියෝජ්‍ය අමාත්‍ය ජනිත් රුවන් කොඩිතුවක්කු, ශ්‍රී ලංකාවේ ජපාන තානාපති අකියෝ ඉසමාතා, ආගමන විගමන දෙපාර්තමේන්තු පාලක ජනරාල් චමින්ද පතිරාජ සහ ශ්‍රී ලංකාව සහ මාලදිවයින සඳහා ජාත්‍යන්තර සංක්‍රමණ සංවිධානයේ මෙහෙයුම් ප්‍රධානී ක්‍රිස්ටීන් පාර්කෝ මහත්මිය ඇතුළු පිරිසක් එක්වූහ.

බදුල්ල – ස්ප්‍රිංවැලි මාර්ගයේ බේලි පාලමේ වැඩ අවසන් අදියරේ….

පසුගියදා ඇති වූ ආපදා තත්ත්වය හේතුවෙන් බදුල්ල – ස්ප්‍රිංවැලි මාර්ගයේ, ස්ප්‍රිංවැලි ප්‍රදේශයේදී දැඩි ලෙස හානි වී විනාශ වූ පාලම වෙනුවට විකල්ප පාලමක් ලෙස බේලි පාලමක් (Bailey Bridge) ඉදිකිරීමේ කටයුතු මේ වන විට අවසන් අදියරට පැමිණ තිබේ.

මාර්ග සංවර්ධන අධිකාරියට (RDA) අයත් මෙම මාර්ගය, ප්‍රදේශයේ ජනතාවගේ දෛනික අවශ්‍යතා මෙන්ම වතු ක්ෂේත්‍රයේ ප්‍රවාහන කටයුතු සඳහාද අතිශය වැදගත් මාර්ගයක් වේ.

එම පාලම විනාශ වීම හේතුවෙන් පොදු ප්‍රවාහන කටයුතු මුළුමනින්ම අඩාල වී තිබුණි.

ඒ අනුව මෙම බේලි පාලම සකසා ඇති අතර කඩිනමින් එහි වැඩ කටයුතු අවසන් කර වාහන ධාවනය සඳහා අවස්ථාව සලසා දීමට බලාපොරොත්තු වන බව මාර්ග සංවර්ධන අධිකාරිය සඳහන් කර සිටී.

සංචාරකයින්ගේ පැමිණීම ලක්ෂ 23 ඉක්මවයි….

මේ වසරේ ලක්ෂ 23 ඉක්මවා සංචාරකයින් දිවයිනට පැමිණි ඇති බව සඳහන් වේ.

සංචාරක අමාත්‍යාංශය පැවසුවේ ඊයේ (26) වන විට සංචාරකයින් 2,320,000ක් පමණ දිවයිනට පැමිණ ඇති බවය.