රුසියාව සහ යුක්රේනය අතර මුහුණට මුහුණ සාකච්ඡා මේ වන විට ඉස්තාන්බුල් හිදී ආරම්භ වී ඇති බව විදෙස් මාධ්ය වාර්තා කර තිබෙනවා.
ඒ අනුව 2022 වසරෙන් පසු දෙරටේ නියෝජිතයින් මුහුණට මුහුණ හමුවන පළමු අවස්ථාව මෙය ලෙසයි වාර්තා වෙන්නේ.
කෙසේ වෙතත්, සාකච්ඡා ආරම්භ වන විට, දෙපාර්ශවය අතර අතට අතදීමක් සිදු නොවූ බවයි පැවසෙන්නේ.
මේ අතර, තමන්ට හැකි ඉක්මනින් රුසියානු ජනපති පුටින් හමුවට අවශ්ය බවට අමෙරිකානු ජනාධිපතිවරයා ප්රකාශ කර තිබෙන බවයි වැඩිදුරටත් සඳහන් වන්නේ.
හලාවත, විලත්තව ප්රදේශයේ මීට සුළු මොහොතකට පෙර වෙඩි තැබීමක් සිදුව තිබෙනවා.
ස්වාමි පුරුෂයා විසින් වායු රයිෆලයක් උපයෝගී කර ගනිමින් සිය බිරිඳට වෙඩි තබා ඇති බවයි පොලීසිය සඳහන් කළේ.
අනතුරුව සැකකාර සැමියා ගෙල වැල ලා ගැනීමට උත්සාහ කර ඇති අතර, දෙදෙනාම මේ වන විට රෝහල්ගත කර ඇති බවයි වැඩිදුරටත් සඳහන් වෙන්නේ.
රටක දියුණුව රැඳී තිබෙන්නේ ඒ රටේ මිනිසුන් රට වෙනුවෙන් ලබාදෙන නිෂ්පාදන දායකත්වය මත බව අග්රාමාත්ය ආචාර්ය හරිනි අමරසූරිය පවසනවා.
ඵලදායීතාවය වැඩි කිරීමෙන් අපේ ජීවන තත්ත්වය උසස් විය හැකි බවත්, ඵලදායීතාවය පහත වැටීම රටකට අහිතකර ලෙස බලපාන බවයි ජාතික ඵලදායීතා සම්මාන තරගාවලිය 2025/2026 ප්රකාශයට පත් කිරීමේ සමාරම්භක අවස්ථාවට එක්වෙමින් අගමැතිවරිය සඳහන් කළේ.
ඵලදායිතාවය යනු වෙහෙස මහන්සි වී වැඩ කිරීම පමණක් නොව, අරපිරිමැස්මෙන් හා වගකීමෙන් භාවිත කිරීම තුළින් ඉහළ ඵලදායීතාවයක් ලබා ගැනීමට හැකිවීම බවද ඇය පවසා සිටියා.
උපායමාර්ගික වශයෙන් ආයෝජන වැඩි කිරීමටත්, තිරසර සංවර්ධනයක් සහතික කිරීමටත්, තරගකාරීත්වය ඉහළ නැංවීමටත් යන කාරණාවලට ඵලදායීතාවය වැඩි කිරීම අත්යවශ්ය වෙන බවයි අගමැතිවරිය වැඩිදුරටත් සඳහන් කර සිටියේ.
Microsoft සමාගම සිය සේවකයින්ගෙන් 3% ක්, එනම් සේවකයින් 6000 ක් සේවයෙන් ඉවත් කිරීමට කටයුතු කර ඇති බව විදෙස් මාධ්ය වාර්තා කරනවා.
පිරිවැය පාලනය කිරීම සහ තවත් හේතු කිහිපයක් මත අවශ්ය ආයතනික වෙනස්කම් සිදු කිරීමට සමගාමීව මෙම පියවර ගෙන ඇති බවයි එම මාධ්ය වාර්තා සඳහන් කරන්නේ.
මේ වන විට Microsoft සමාගමේ සේවකයින් 228,000 ක් පමණ සේවය කරන අතර පසුගිය 2023 වසරේදී සේවකයින් 10,000 ක ප්රමාණයක් ඉවත් කිරීමෙන් අනතුරුව සිදු කරන විශාලතම සේවක කප්පාදුව මෙය ලෙසයි වාර්තා වෙන්නේ.
පදනම් විරහිත ජන සංහාර චෝදනා සහ කැනඩාවේ ඊනියා දෙමළ ජන සංහාර ස්මාරකයක් ඉදිකිරීම සඳහා අනුමැතිය ලබා දීම සම්බන්ධයෙන් ශ්රී ලංකා රජයේ දැඩි විරෝධතාවය කැනඩා මහ කොමසාරිස්වරයා වෙත විදේශ අමාත්ය විජිත හේරත් ප්රකාශ කර තිබෙනවා.
ඒ අනුව යුද ගැටුම්වල අවසාන අදියරේදී ජන සංහාරයක් සිදුකළ බවට එල්ලවන චෝදනා ජාතික හෝ ජාත්යන්තර වශයෙන් කිසිඳු විශ්වසනීය අධිකාරියක් විසින් සනාථ කරන ලද නොවන බවත් එය සමඟ යවන තොරතුරු මත පදනම්වී ඇති අතර ශ්රී ලංකාව මෙම අසත්ය අඛ්යානය තරයේ ප්රතික්ෂේප කරන අතර කැනඩාව තුළ මැතිවරණ වාසි ලබා ගැනීම සඳහා මෙම ප්රචාරය දියත් කර ඇති බවද විදේශ අමාත්යවරයා දැනුම්දී තිබෙනවා.
එවැනි ක්රියාමාර්ග ශ්රී ලංකාවේ විවිධ ප්රජාවන් අතර ජාතික සමගිය, සාමය සහ සංහිඳියාව ප්රවර්ධනය කිරීම සඳහා රජය අඛණ්ඩව දරන උත්සාහයන්ට බාධාවක් සහ සංකීර්ණා ඇති කරන බවයි අමාත්යවරයා වැඩිදුරටත් සඳහන් කර තිබෙන්නේ.
පසුගියදා කැනඩාවේ බ්රැම්ප්ටන් නුවර ඊනියා දෙමළ ජන සංහාර ස්මාරකයක් ඉදිකිරීමට කටයුතු කර තිබුණා.
අදාළ නිවේදනය පහතින්.
ශිෂ්යත්ව උපකාරක පන්ති පවත්වන ජනප්රිය ගුරුවරියක් වන හයේශිකා ප්රනාන්දු හෙවත් ‘ටීචර් අම්මා’ අද (14) මීගමුව මහේස්ත්රාත් අධිකරණය වෙත භාරවී තිබෙනවා.
තරුණයෙකුට සිදුකළ පහරදීමක් හේතුවෙන් ඇයව අත්අඩංගුවට ගැනීමට පොලිස් විමර්ශන ක්රියාත්මක කෙරුණු අතර අදාළ සිද්ධියෙන් පසු හයේශිකා ප්රනාන්දු ප්රදේශයෙන් පලා ගොස් සැඟව සිටි අතර ඒ අනුව අද දිනයේ මෙලෙස අධිකරණය වෙත භාරවී ඇති බවයි සඳහන් වෙන්නේ.
මෙම සිදුවීම සම්බන්ධයෙන් මීට පෙර අත්අඩංගුවට ගෙන රක්ෂිත බන්ධනාගාරගත කර සිටි ඇයගේ සැමියා හා කළමනාකරු යන දෙදෙනාව සහ පහරදීමට සම්බන්ධ තවත් දෙදෙනෙක් අද අධිකරණයට ඉදිරිපත් කර තිබුණා.
ඒ අනුව සැකකාර හයේශිකා ප්රනාන්දු සහ අනෙකුත් සැකකරුවන් සිව්දෙනාට මීගමුව මහේස්ත්රාත් අධිකරණය විසින් ඇප නියම කර ඇති බවයි වැඩිදුරටත් සඳහන් වෙන්නේ.
කොත්මලේ, රම්බොඩ ප්රදේශයේ අද (14) පස්වරුවේ වෑන් රථයක් පෙරළී සිදු වූ අනතුරෙන් තුවාල ලැබූ සංඛ්යාව 17ක් දක්වා ඉහළ ගොස් ඇති බව පොලීසිය පවසනවා.
තුවාලකරුවන් කොත්මලේ රෝහලට ඇතුළත් කර ඇති අතර ඔවුන්ගේ තත්ත්වය බරපතළ නොවන බවයි රෝහල් ආරංචි මාර්ග සඳහන් කළේ.
මෙසේ අනතුරට ලක්ව ඇත්තේ රාජාංගණය ප්රදේශයේ පදිංචිකරුවන් පිරිසක් බවයි පොලීසිය වැඩිදුරටත් සඳහන් කළේ.
ලුණු ආනයනය ප්රමාද වීම හේතුවෙන් වෙළෙඳපොළ තුළ ලුණු හිඟයක් මතුව ඇති බව ලුණු නිෂ්පාදකයින්ගේ සංගමය පවසනවා.
ඒ අනුව ලුණු මෙට්රික් ටොන් 30ක් ආනයනය කිරීමට රජය තීරණය කර තිබුණද එය ප්රමාදවී ඇති බවයි එම සංගමයේ සභාපති ගණක අමරසිංහ සඳහන් කළේ.
ඉදිරි සතිය තුළ අදාළ ලුණු තොග දිවයිනට ලැබීමත් සමග පවතින ලුණු හිඟය පාලනය වනු ඇති බවයි ඔහු වැඩිදුරටත් සඳහන් කළේ.
නිසි සෞඛ්ය ආරක්ෂිත ක්රමවේද අනුගමනය නොකළ දන්සල් 8ක් අත්හිටුවීමට පියවර ගත් බව මහජන සෞඛ්ය පරීක්ෂකවරුන්ගේ සංගමය පවසනවා.
ඒ අනුව තවත් දන්සල් 17ක් නිසි උපදෙස්වලින් අනතුරුව පවත්වාගෙන යාමට අවසර ලබාදුන් බවයි එහි ලේකම් චමිල් මුතුකුඩ සඳහන් කළේ.
වෙසක් දිනයට සමගාමීව දිවයින පුරා දන්සැල් 8,742 කට අධික සංඛ්යාවක් මෙවර ලියාපදිංචි වී තිබුණා.
කොත්මලේ, රම්බොඩ, ගැරඬිඇල්ල ප්රදේශයේදී සිදුවූ අනතුර අදාළ බස් රථයේ යාන්ත්රික දෝෂයක් හේතුවෙන් සිදුවූවක් නොවන බව මූලික විමර්ශනවලදී අනාවරණය වී තිබෙනවා.
ඒ අනුව බස් රථයේ ප්රමාණය ඉක්මවූ පිරිසක් ගමන් කිරීම, අධික වෙහෙස හේතුවෙන් රියදුරුට නින්ද යාම අනතුරට හේතුවන්නට ඇති බවට සැක පළකෙරෙන බවයි නුවරඑළිය දිස්ත්රික් ප්රධාන මෝටර් රථ පරීක්ෂක ජාලිය බණ්ඩාර සඳහන් කළේ.
සිද්ධිය සම්බන්ධයෙන් විශේෂ කමිටුවක් හරහා මේ වනවිට පුළුල් විමර්ශන සිදුකෙරෙන බවත් ඉන් අනතුරුව අනතුරට හේතුවූ නිශ්චිත කරුණු අනාවරණය වනු ඇති බවයි ඔහු වැඩිදුරටත් සඳහන් කළේ.
