Category: news_sub

ඩුබායි ඇතුළු මැදපෙරදිග රටවල සැඟවී සිටින අපරාධකරුවන් අත්අඩංගුවට ගැනීම සඳහා එම රටවල ආරක්ෂක අංශ දියත්කර ඇති විශේෂ මෙහෙයුම්වලදී ශ්‍රී ලාංකික අපරාධකරුවන් කිහිපදෙනෙකුම අත්අඩංගුවට පත්ව ඇතැයි පොලීසිය පවසයි.

පොලිස් ආරංචිමාර්ග පවසන්නේ එලෙස අත්අඩංගුවට ගන්නා ශ්‍රී ලාංකික අපරාධකරුවන් මෙරටට ගෙන්වාගැනීමට අවශ්‍ය ක්‍රියාමාර්ග ගනිමින් සිටින බවය.

මෙරට තුළ සිදුවන බහුතරයක් අපරාධ ක්‍රියාවන් ඩුබායි ඇතුළු මැදපෙරදිග රටවල සැඟවී සිටින ශ්‍රී ලාංකික අපරාධකරුවන් විසින් මෙහෙයනවන බවට ආරක්ෂක අංශ අනාවරණ කරගෙන තිබේ.

ඔවුන් ඉරානයේ සිටින මත්ද්‍රව්‍ය ජාවාරම්කරුවන් සමග සෘජු සබඳතා පවත්වමින් මෙරටට මත්ද්‍රව්‍ය එවන බව පසුගිය කාලයේ සිදුකළ වැටලීම්වලදී හෙළිවිය.

ඒ අනුව විදෙස්ගතව සිටින ශ්‍රී ලාංකික අපරාධකරුවන්ට විරුද්ධව රතු වරෙන්තු නිකුත් කර තිබුණ ද අදාළ අපරාධකරුවන් කඩිනමින් අත්අඩංගුවට ගැනීමට එම රටවල බලධාරීන් පසුගිය කාලය පුරා කටයුතු කර තිබුණේ නැත.

කෙසේවෙතත් මේ වනවිට ඉරානය මැදපෙරදිග කලාපයේ රටවල් වලට ප්‍රහාර එල්ල කිරීමත් සමග එම රටවල් ඉරානයේ අපරාධකරුවන් සමග සබඳතා පවත්වන පිරිස් සොයා විශේෂ මෙහෙයුම් ආරම්භ කර ඇති බව පොලීසිය පවසයි.

ඒ අනුව මෙරට අපරාධකරුවන් රැසක් මේවන විටත් මැදපෙරදිග රටවල් වලදී අත්අඩංගුවට ගෙන ඇති බව වාර්තා වේ.

ඒ අතර බටුවත්තේ චාමර, මෝදර නිපුන, පරෙවි සුදා ඇතුළු අපරාධකරුවන් රැසක් සිටින බවට වාර්තාවුවත් ඒ බව මෙතෙක් නිලවශයෙන් තහවුරු වී නැත.

ඒ අනුව ඒ පිළිබඳව නිලවශයෙන් තමන් දැනුම්වත් කරන ලෙස ශ්‍රී ලංකා පොලීසිය මැදපෙරදිග රටවලින් ඉල්ලීම් කිහිපයක්ම සිදුකර තිබේ.

මෙලෙස සිදුවන අත්අඩංගුවට ගැනීම් හේතුවෙන් මේ වනවිට අපරාධකරුවන් රැසක් මැදපෙරදිගින් යුරෝපා රටවලට පලායෑමට උත්සාහ දරන බවද වාර්තා වේ.

එහි ප්‍රතිඵලයක් ලෙස පසුගියදා කරන්දෙණියේ සුද්දාගේ සහෝදරයා වන රාජු නැමැත්තාව ද ඉන්දියාවේදී අත්අඩංගුවට ගැනුණු අතර ඔහු හෙට (17) දිනයේදී මෙරටට රැගෙන ඒමට නියමිත බව වාර්තා වේ.

මේ අතර කරන්දෙණියේ සුද්දා සමඟ සමීප සබඳතාවක් පැවැත්වූ 30 හැවිරිදි කාන්තාවක් ගාල්ල දිසා අපරාධ කොට්ඨාසය මගින් අත්අඩංගුවට ගැනුණි.

ඇය සතුව තිබී රුපියල් ලක්ෂ 35ක මුදලක් හා රත්‍රං ග්‍රෑම් 99කට අධික ප්‍රමාණයක් සොයාගත් බව පොලීසිය පැවසුවේය.

ඇයගේ සැමියාවද කරන්දෙණියේ සුද්දා විසින් ඝාතනය කර ඇති අතර අනතුරුව ඇය ඔහු සමග සමීප සබඳතාවක් පවත්වා ඇති බවද වාර්තා වේ.

අදාළ කාන්තාව කරන්දෙණිය සුද්දා සමග වීඩියෝ ඇමතුමක් ලබාගන්නා ඡායාරූපයක් ද හඳුනාගෙන ඇත.

ඇය අත්අඩංගුවට ගැනීමෙන් පසුව ඇයගේ මව හා සහෝදරයා ප්‍රදේශයෙන් පලාගොස් ඇති බව පොලීසිය පවසයි.

සිද්ධිය සම්බන්ධ වැඩිදුර විමර්ශන දකුණු පළාත භාර ජ්‍යෙෂ්ඨ නියෝජ්‍ය පොලිස්පති කිත්සිරි ජයලත් මහතාගේ අධීක්ෂණයෙන් ගාල්ල දිසාව භාර නියෝජ්‍ය පොලිස්පති ඒ. පුෂ්පකුමාර මහතාගේ මෙහෙයවීමෙන් ගාල්ල දිසා අපරාධ කොට්ඨාසයේ අධ්‍යක්ෂ සහකාර පොලිස් අධිකාරී නාමල් පෙරේරා මහතා විසින් සිදුකරයි.

ඝාතන ඇතුළු අපරාධ සිද්ධි 15කට අධික සංඛ්‍යාවකට පොලීසියට අවශ්‍යව සිටින රාජු නමැති සැකකරු ඉන්දියාවේදී එරට ආරක්ෂක අංශ අත්අඩංගුවට ගෙන තිබේ.

කරන්දෙණිය සුද්දා නම් අපරාධකරුගේ සහෝදරයා වන ඔහු දිවයිනට රැගෙන ඒමට අද (15) රාත්‍රියේදී හෝ හෙට (16) දිනයේදී අපරාධ පරීක්ෂණ දෙපාර්තමේන්තුවේ විශේෂ කණ්ඩායමක් ඉන්දියාවට යෑමට නියමිත බව පොලිස් ආරංචි මාර්ග සඳහන් කරයි.

දකුණු පළාත කේන්ද්‍ර කරගනිමින් පසුගිය කාලය මුළුල්ලේ ක්‍රියාත්මක වූ ඝාතන රැල්ල සම්බන්ධයෙන් චෝදනා එල්ල වුණේ සෝබන හන්දි ජයලත් ද සිල්වා හෙවත් කරන්දෙණියේ සුද්දාට හා ඔහුගේ සහෝදරයා වන සෝබන හන්දි සනත් ද සිල්වා හෙවත් රාජු නැමැත්තාටය.

කුලී ඝාතකයන් ලෙස සිය පාතාල ගමන ඇරඹූ ඔවුන්ගෙන් ප්‍රධානියා කරන්දෙණියේ සුද්දා වූවත් ඔහු ලබාගන්නා ඝාතන කොන්ත්‍රාත්තු සියල්ල මෙහෙයවා ඇත්තේ රාජු නැමැත්තා විසිනි.

ඔහු පොලිස් විශේෂ කාර්ය බලකායේ සේවය කර පසුව යුද හමුදා විශේෂ බලකායට එක්ව අනතුරුව සේවය අතහැර අපරාධ ක්‍රියා සිදුකර ඇති බවයි පොලීසිය සඳහන් කරයි.

හිත හොඳ දොස්තර ඝාතනය, පොලිස් පරීක්ෂක බාලේන්ද්‍රසිංහ ඝාතනය ඇතුළු ඝාතන සහ අපරාධ ක්‍රියා 15කට අධික සංඛ්‍යාවකට රාජු නැමැත්තා පොලිසියට අවශ්‍යව සිටින අයෙකි.

ඒ අනුව පොලීසිය ඔහුට විරුද්ධව රතු වරෙන්තුවක්  ලබාගෙන, සිදුකළ විමර්ශනවලදී අනාවරණ වී තිබුණේ ඔහු මීට වසර කිහිපයකට පෙර ව්‍යාජ විදෙස්ගමන් බලපත්‍රයක් භාවිත කර සිය සහෝදරයාද සමගින් ඩුබායි රාජ්‍යයට පලාගොස් ඇති බවය.

එවන් පසුබිමක ඔහු මීට දින කිහිපයකට පෙර ඉන්දියාවට පැමිණ ඇති බවටත් එහි සිට යුරෝපා රටකට වීසා ලබාගෙන පලායෑමට සූදානමින් සිටින බවටත් මෙරට ආරක්ෂක අංශ වෙත රහසිගත තොරතුරක් ලැබී තිබේ.

ඒ පිළිබඳව ඉන්දීය ආරක්ෂක අංශ දැනුම්වත් කිරීමෙන් පසුව රාජු නමැත්තා ඉකුත් සඳුදා දිනයේදී අත්අඩංගුවට ගත් බව ඉන්දීය ආරක්ෂක අංශ මෙරටට නිලවශයෙන් තහවුරු කර ඇත.‍

මේ අතර කරන්දෙණියේ සුද්දාගේ ගිනිඅවි ප්‍රවාහනය කළ නුවන් ධනුෂ්ක නැමැත්තෙකු ගාල්ල දිසා අපරාධ කොට්ඨාසය විසින් අද අත්අඩංගුවට ගෙන තිබේ.

ඒ පිස්තෝල වර්ගයේ ගිනිඅවියක් ද සමගින්ය.

දකුණු පළාතේ පසුගිය කාලයේ සිදු වූ ඝාතන රැසක් සඳහා මොහු විසින් ගිනිඅවි ප්‍රවාහනය කර ඇති බවත්, ඒ එක් අවස්ථාවක් සඳහා සැකකරුට රුපියල් 25,000ක මුදලක් ගෙවා ඇති බවත් විමර්ශනවලදී හෙළිවී තිබේ.

26 හැවිරිදි සැකකරු සම්බන්ධයෙන් දකුණු පළාත භාර ජ්‍යෙෂ්ඨ නියෝජ්‍ය පොලිස්පති කිත්සිරි ජයලත් මහතාගේ අධීක්ෂණයෙන් ගාල්ල දිසාව භාර නියෝජ්‍ය පොලිස්පති ඒ. පුෂ්පකුමාර මහතාගේ මෙහෙයවීමෙන් ගාල්ල දිසා අපරාධ කොට්ඨාසයේ අධ්‍යක්ෂ සහකාර පොලිස් අධිකාරී නාමල් පෙරේරා මහතා විසින් විමර්ශන ක්‍රියාත්මක කරනු ලබයි.

මහවැලි ගඟේ වෙරුගල්ආරු පාලම අසල දියනෑමට ගිය පියෙකු සහ පුතුන් සිව්දෙනා අතරින් අතුරුදන් වූ තිදෙනාගෙන් දෙදෙනෙකුගේ සිරුරු අද (15) පස්වරුවේ සොයා ගැනුණි.

පියෙකු සහ පුතුන් සිව්දෙනෙකු ඊයේ (14) පස්වරුවේ දියේ ගිලි මෙලෙස අනතුරකට මුහුණපා තිබුණු අතර ඉන් පියා සහ එක් පුතෙකු දිවි බේරාගැනීමට සමත් වුණි.

අතුරුදන් වූ සෙසු තිදෙනාගෙන් දෙදෙනෙකුගේ සිරුරු අද පස්වරුවේ මෙලෙස සොයා ගෙන තිබේ.

දියේ ගිලි ජීවිතක්ෂයට පත්වුණේ වයස අවුරුදු 35 සහ 34 වයස්වල පසුවන පුද්ගලයින් දෙදෙනෙකි.

කොළඹ රැකියා කටයුතුවල නිරත පුතුන් සිව්දෙනා අලුත් අවුරුද්දට ගමට පැමිණීම හේතුවෙන් ඔවුන් සමඟින් පියා දිය නෑමට යාමේදී අනතුර සිදුවී තිබුණි.