Latest News
ජාත්යන්තර මූල්ය අරමුදලේ දූත පිරිසක් එළැඹෙන 22 වැනිදා සිට 28 වැනිදා දක්වා ශ්රී ලංකාවේ සංචාරයක නිරත වන බව IMF සන්නිවේදන අධ්යක්ෂ ජූලි කොසැක් පවසයි.
පසුගියදා ඇතිවූ දිට්වා සුළි කුණාටුවෙන් සිදුවූ හානිය තක්සේරු කිරීමට සහ විස්තීරණ අරමුදල් පහසුකම (EFF) වැඩසටහන සඳහා ප්රතිපත්තිමය කරුණු සාකච්ඡා කිරීමට මෙම දූත පිරිස මෙරට සංචාරය කරනු ඇති බව ඇය පැවසීය.
වසර 2050 වන විට ශුද්ධ ශුන්ය කාබන් විමෝචන ඉලක්කය සපුරා ගැනීමේ රජයේ වැඩපිළිවෙළට අනුකූලව පෞද්ගලික ආයතනයක් විසින් මන්නාරමේ ඉදිකළ, මෙගාවොට් 20ක ධාරිතාවයකින් යුත් ‘මන්නාරම වින්ඩ්ස්කේප්’ සුළං විදුලි බලාගාරය අද (15) පෙරවරුවේ ජනාධිපති අනුර කුමාර දිසානායක මහතාගේ ප්රධානත්වයෙන් නිල වශයෙන් ජාතික විදුලිබල පද්ධතියට එක් කෙරිණි.
‘මන්නාරම වින්ඩ්ස්කේප්’ සුළං විදුලි ව්යාපෘතිය යටතේ මෙරට බලශක්ති ඉතිහාසයේ පළමු වතාවට, එක් ටර්බයිනයක ධාරිතාව මෙගාවොට් 05 ක් වූ මෙරට ස්ථාපිත විශාලතම සුළං ටර්බයින 04ක් බලගැන්වේ.
මෙය ශ්රී ලංකා ඉතිහාසයේ රාජ්ය හෝ පෞද්ගලික අංශය යටතේ මෙගාවොට් 5 (5 MW) ධාරිතාවෙන් යුතු ටර්බයින භාවිතයෙන් නිමකළ ප්රථම සුළං බල ව්යාපෘතිය වන අතර පූර්ණ දේශීය සමාගමක් මගින් මෙම ව්යාපෘතිය ක්රියාත්මක කරයි.
සුළං විදුලි බලාගාරය විවෘත කරමින් සමරු ඵලකය නිරාවරණය කිරීමේ අවස්ථාවට එක් වූ ජනාධිපතිවරයා ටර්බයින ක්රියාත්මක කිරීමේ අවස්ථාවටද එක් විය.
බලශක්ති අමාත්ය ඉංජිනේරු කුමාර ජයකොඩි, බලශක්ති නියෝජ්ය අමාත්ය අර්කාම් ඉල්යාස් යන මහත්වරු සහ ප්රදේශයේ මහජන නියෝජිතයන්ද, ආරක්ෂක අමාත්යාංශයේ ලේකම් විශ්රාමික එයාර් වයිස් මාර්ෂල් සම්පත් තුයියකොන්තා, පොලිස්පති ප්රියන්ත වීරසූරිය යන මහත්වරු ඇතුළු ආරක්ෂක අංශ ප්රධානිහුද, මන්නාරම දිස්ත්රික් ලේකම් කේ. කනකේෂ්වරන්, ලංකා විදුලිබල මණ්ඩලයේ සාමාන්යාධිකාරී ඉංජිනේරු ශර්ලි කුමාර, ශ්රී ලංකා සුනිත්ය බලශක්ති අධිකාරියේ සභාපති මහාචාර්ය විජේන්ද්ර බණ්ඩාර යන මහත්වරුද, ඇතුළු පිරිසක් මෙම අවස්ථාවට එක්ව සිටියහ.
“රටම එකට” ජාතික මෙහෙයුමේ උතුරු පළාත් වැඩසටහන ජනවාරි 16 වනදා පස්වරුවේ යාපනය, තාක්ෂණ විද්යාලයීය ක්රීඩා පිටියේදී ජනාධිපති අනුර කුමාර දිසානායකගේ ප්රධානත්වයෙන් පැවැත්වීමට නියමිතව තිබේ.
එහිදී විෂ මත්ද්රව්ය උවදුර මුලිනුපුටා දැමීමේ අවශ්යතාව පිළිබඳව එම පළාතේ ජනතාව දැනුවත් කෙරෙනු ඇත.
“රටම එකට” ජාතික මෙහෙයුමේ සමාරම්භක වැඩසටහන 2025 ඔක්තෝබර් 30 දා කොළඹ, සුගතදාස ගෘහස්ථ ක්රීඩාංගනයේදී පැවැත්වුණු අතර එහි දකුණු පළාත් වැඩසටහන 2025 නොවැම්බර් 20 දා තංගල්ලේදී පවත්වන ලදී.
විෂ මත්ද්රව්ය උවදුරට එරෙහිව “රටම එකට” ජාතික මෙහෙයුම ක්රියාත්මක කිරීමේදී ප්රධාන කාර්යයන් කිහිපයක් කෙරෙහි මූලික අවධානය යොමු කර ඇත.
පසුගිය ඔක්තෝබර් මස 30 වැනිදා සිට මේ දක්වා කාලය තුළ මෙම මෙහෙයමු යටතේ විෂ මත්ද්රව්ය වර්ග රැසකට අදාළව වැටලීම් 69,960ක් සිදු කර තිබේ.
එහිදී සැකකරුවන් 69,318ක් අත්අඩංගුවට ගෙන ඇති අතර ඉන් රැඳවුම් නියෝග ලබාගත් සැකකරුවන් ගණන 1,446කි.
සැකකරුවන් 58 දෙනෙකු සම්බන්ධව මේ වන විට නීති විරෝධී වත්කම් විමර්ශන ආරම්භ කර තිබේ.
මත්ද්රව්ය භාවිත කර අත්අඩංගුවට පත්ව මේ වන විට පුනරුත්ථාපනයට යොමු කළ පිරිස 1,384ක් බව පොලිස් මාධ්ය කොට්ඨාසය සඳහන් කරයි.
නිදහස් සෞඛ්ය සේවාවේ සහ වෛද්යවරුන්ගේ ගැටලු විසඳීමට සෞඛ්ය අමාත්යවරයා ලබා දුන් එකඟතා ක්රියාත්මක කිරීමට අපොහොසත් වන්නේ නම් අඛණ්ඩව දීපව්යාප්ත වෘත්තීය ක්රියාමාර්ගයකට එළැඹෙන බව රජයේ වෛද්ය නිලධාරීන්ගේ සංගමය පවසයි.
එම සංගමය පැවසුවේ පසුගිය නොවැම්බර් මාසයේදී ජනාධිපතිවරයා විසින් ඉදිරිපත් කරන ලද 2026 වර්ෂය සඳහා වන අයවැය යෝජනාවලිය තුළ මෙරට සෞඛ්ය සේවයේ සහ වෛද්යවරුන්ගේ සැබෑ ගැටලුු හඳුනාගනිමින් ඒවාට විසඳුම් ලබා දීම සඳහා අවශ්ය කෙටි කාලීන සහ දීර්ඝ කාලීන ප්රතිපත්ති හෝ ක්රියාමාර්ග කිසිවක් අන්තර්ගත නොවීම තුළ සෞඛ්ය පද්ධතිය සහ සෞඛ්ය සේවකයින් තුළ බරපතළ නොසන්සුන්තාවයක් හටගත් බවය.
ඒ අනුව සෞඛ්ය සේවාවේ සහ වෛද්යවරුන්ගේ සැබෑ ගැටලු සඳහා විසඳුම් ලබා දීමට බල කරමින් රජයේ වෛද්ය නිලධාරීන්ගේ සංගමය වෘත්තිය ක්රියාමාර්ග ගණනාවක් දියත් කිරීමෙන් අනතුරුව සෞඛ්ය අමාත්යවරයා විසින් ලබා දුන් ලිඛිත එකඟතාවයන් මත එම වෘත්තිය ක්රියාමාර්ගය තාවකාලිකව අත්හිටුවීමට පියවර ගත් බවත් එම සංගමය සඳහන් කළේය.
ඒ අනුව ඊයේ (13) දින පැවැති රජයේ වෛද්ය නිලධාරීන්ගේ සංගමයේ විධායක සභා රැස්වීමේදී දීර්ඝ ලෙස පවතින ප්රවණතාවයන් සම්බන්ධයෙන් සාකච්ඡාවට ලක්වූ බවත් පෙන්වා දෙන එම සංගමය පැවසුවේ එකඟතා ක්රියාත්මක කරමින් ගැටලු විසඳීම සඳහා ඉදිරි දින 10ක කාලයක් සෞඛ්ය අමාත්යවරයාට සහ සෞඛ්ය අමාත්යාංශයට ලබා දීමට තීරණය කළ බවත්ය.
ඒ අනුව එම කාල රාමුව තුළදී ගැටළු විසඳීමට අමාත්යාංශය අපොහොසත් වන්නේ නම් එළැඹෙන 23 වැනි දින සිට දීපව්යාප්ත අඛණ්ඩ වෘත්තිය ක්රියාමාර්ගයක් ආරම්භ කිරීමට විධායක කමිටුව ඒකමතිකව තීරණය කළ බවත් එම සංගමය වැඩිදුරටත් සඳහන් කළේය.
ජාතික නිදහස් පෙරමුණේ නායක විමල් වීරවංශ මහතා ඇතුළු සිවිල් සංවිධාන නියෝජිතයින් පිරිසක් විසින් ආරම්භ කර තිබූ අඛණ්ඩ සත්යග්රහය මේ වනවිට අවසන් කර තිබේ.
රජය විසින් 6 ශ්රේණියට අදාළ නව අධ්යාපන ප්රතිසංස්කරණ ක්රියාත්මක කිරීම ලබන වසර දක්වා කල් දමා ඇති බව ප්රකාශ කිරීමෙන් අනතුරුව ජාතික නිදහස් පෙරමුණේ නායක විමල් වීරවංශ මහතා මෙලෙස සත්යග්රහය අවසන් කර ඇත.
නව අධ්යාපන ප්රතිසංස්කරණ ක්රියාවලිය වහාම ඉල්ලා අස්කර ගන්නා ලෙසත්, අග්රාමාත්ය හරිනි අමරසූරිය මහත්මිය අධ්යාපන අමාත්ය ධුරයෙන් ඉල්ලා අස්විය යුතු බවත් බලකරමින් මෙම සත්යග්රහය ඊයේ ආරම්භ කර තිබුණි.
අධ්යාපනයට මූලිකත්වය ලබා දෙමින්, දරුවන්ට සමානාත්මතාවයෙන් යුත් අධ්යාපනයක් ලබා දීමට උත්සාහ කරන රාජ්යයන් දෙකක් ලෙස චීනය සහ ශ්රී ලංකාව හඳුන්වා දිය හැකි බව අග්රාමාත්ය ආචාර්ය හරිනි අමරසූරිය මහත්මිය පවසයි.
ඇය මෙම අදහස් පැවසූවේ අද(13) චීනය විසින් පාසල් නිල ඇඳුම් සදහා රෙදි නොමිලේ ලබාදීමේ වැඩසටහනට සහභාගී වෙමිනි.
මෙරට තුළ ගුණාත්මක අධ්යාපනයක් පවත්වා ගැනීමට චීන රජයෙන් ලැබෙන සහයෝගය විශාල ශක්තියක් වන බවත්, ඒ තුලින් රටේ සියලුම දරුවන්ට සමානාත්මතාවයකින් යුතුව අධ්යාපනය හැදෑරීමට අවස්ථාව සැලසෙන බවත් ඇය මෙහිදී අවධාරණය කළාය.
එසේම, නොකඩවා වසර කිහිපයක් පුරා පාසල් නිල ඇඳුම් සඳහා රෙදි ලබා දීමට චීනය ලබා දී ඇති පොරොන්දුව ඉටු කිරීම, ශ්රී ලංකාව හා චීනය අතර පවතින අන්යෝන්ය ගරුත්වය සහ විශ්වාසය පැහැදිලිව ම ඉස්මතු කරන කාරණාවක් බවත් මෙරට මුහුණ දෙන සෑම අසීරු අවස්ථාවකදීම චීන රජය ශ්රී ලංකාවට ධෛර්ය ලබා දෙන බවත් සඳහන් කළ අගමැතිවරිය සමස්ත ශ්රී ලාංකික ජනතාව වෙනුවෙන් මෙම පාසල් නිල ඇඳුම් රෙදි තොගය පරිත්යාග කිරීම සම්බන්ධයෙන් චීන රජයට ස්තූතිය පළ කළාය.
අධ්යාපනය මූලික කරගත් මෙම සහයෝගීත්වය, ඉදිරි කාලය තුළ ද ජාතීන් දෙක අතර මිත්රත්වය තවත් ශක්තිමත් කරනු ඇතැයි ද ඇය වැඩිදුරටත් ප්රකාශ කළාය.
මෙහි දී මහජන චීන සමූහාණ්ඩුව විසින් පූර්ණ ප්රදානයක් ලෙස රෙදි මීටර් මිලියන 11.484ක් මෙරටට ලබා දී ඇති අතර මෙම නිල ඇඳුම් රෙදි නැව් වාර 5කින් ලැබීමට නියමිතය.
මේ වන විට නැව් වාර 03ක් කොළඹ වරාය වෙත ළඟා වී ඇති අතර, එම පාසල් නිල ඇඳුම් නිල වශයෙන් අධ්යාපන, උසස් අධ්යාපන සහ වෘත්තීය අධ්යාපන අමාත්යතුමියට ප්රදානය කිරීම මෙරට මහජන චීන සමූහාණ්ඩුවේ චීන තානාපති චී ජෙන්හොං (HE Qi Zhcnhong) මැතිතුමා විසින් සිදු කරන ලදි.
මෙවර පාසල් නිල ඇඳුම් රෙදි ලබා ගැනීම සඳහා 4,418,404ක පමණ සිසුන් ප්රමාණයක් හිමිකම් ලබන අතර එළැඹෙන 19 දින සිට කොට්ඨාස අධ්යාපන කාර්යාල වෙත එම රෙදි තොග බෙදා හැරීමට කටයුතු කෙරෙනු ඇත.
2026 වර්ෂයට අදාළව පාසල් සිසුන්ට නිල ඇඳුම් ලබා දීම රජයේ හා රජයේ ආධාර ලබන පාසල්වල සිසු දරු දැරියන්ට සහ දිවයින පුරා පිහිටි රජයේ අනුමත පිරිවෙන්වල ශිෂ්ය භික්ෂූන් වහන්සේලා සහ ගිහි සිසුන්ට නොමිලේ පාසල් නිල ඇඳුම් ලබා දීම මෙවර ජනවාරි මස දී ආරම්භ කරන බවත් අධ්යාපන, උසස් අධ්යාපන සහ වෘත්තීය අධ්යාපන අමාත්යාංශය සැලසුම් කර ඇත.
මෙම අවස්ථාවේ දී අදහස් දැක්වූ චීන සමූහාණ්ඩුවේ චීන තානාපති චී ජෙන්හොං මහතා පෙන්වා දුන්නේ විවිධ බාධක මැද වුවත් දීර්ඝ කාලයක සිට චීනය හා ශ්රී ලංකාව අතර නොසැලෙන සම්බන්ධතාවයක් පවතින බවත් ශ්රී ලංකාවේ අධ්යාපනය දියුණු කිරීම උදෙසා ඉදිරියේදීත් කළ හැකි සියලු උපකාර සිදුකරන බවත් ය.
ශ්රී ලංකා රේගුව හා දේශීය ආදායම් දෙපාර්තමේන්තුව එක්ව ඒකාබද්ධ යාන්ත්රණයක් හරහා විමර්ශන කටයුතු සිදු කිරීම සඳහා වන අවබෝධතා ගිවිසුමක් අද (13) මුදල් අමාත්යාංශයේදී අත්සන් කෙරිණි.
මෙම ගිවිසුම මුදල් අමාත්යාංශ ලේකම් ආචාර්ය හර්ෂණ සූරියප්පෙරුම මහතාගේ ඉදිරියේදී අත්සන් කළ බව මුදල් අමාත්යාංශය පවසයි.
ශ්රී ලංකා රේගුව සම්බන්ධ මෙහෙයුම් කමිටුව විසින්, ආනයනකරුවන් භාණ්ඩ ප්රකාශ කිරීමේදී සිදුකරන අඩු තක්සේරු කිරීම් (Under Valuation) හේතුවෙන් රජයට බදු අහිමිවීම් සිදුවන බව හඳුනාගෙන ඇති අතර, ඇතැම් ව්යාපාරිකයින් තෙවැනි පාර්ශවයන් හරහා තාවකාලික පදනමින් භාණ්ඩ ආනයනය කර බදු පැහැර හැරීමත්, එමගින් දේශීය ආදායම් දෙපාර්තමේන්තුවට ගෙවිය යුතු බදු මුදල්ද නොගෙවීමත් සිදුකරන බව අනාවරණය වී ඇති බව සඳහන්ය.
මෙම ගැටලු අවම කිරීම සඳහා දෙපාර්තමේන්තු දෙකෙහි ජ්යෙෂ්ඨ නිලධාරීන්ගෙන් සමන්විත කණ්ඩායමක් විසින් ඒකාබද්ධ යාන්ත්රණයක් සඳහා යෝජනා ඉදිරිපත් කර ඇති අතර, ඒවා ක්රියාත්මක කිරීමේ මූලික පියවරක් ලෙස මෙම අවබෝධතා ගිවිසුම අත්සන් කෙරිණි.
ගිවිසුම මගින් භාණ්ඩ ආනයනකරුවන් සහ වෙෙළඳ ප්රජාව විසින් රේගුවට හා දේශීය ආදායම් දෙපාර්තමේන්තුවට කරන ප්රකාශන ඒකාබද්ධව විමර්ශනය කිරීම සහ විගණනය කිරීමේ හැකියාව ලැබේ.
ශ්රී ලංකා රේගුව, දේශීය ආදායම් දෙපාර්තමේන්තුව සහ සුරාබදු දෙපාර්තමේන්තුව යන ආයතනවල කාර්යක්ෂමතාවය හා ඵලදායීතාවය ඉහළ නැංවීම සඳහා ජනාධිපති ලේකම් කාර්යාලයට අනුබද්ධ ආදායම් පරිපාලන ප්රතිසංස්කරණ හා නවීකරණ කාර්යාංශය මගින් මෙහෙයුම් කමිටු පත් කර ඇති අතර, රාජ්ය බදු ආදායම වැඩි කිරීම සඳහා රජය ගෙන ඇති ක්රියාමාර්ග පිළිබඳව අවධානය යොමු කිරීම එම කාර්යාංශයේ මූලික අරමුණ බව සඳහන් කෙරිණි.
මෙම අවබෝධතා ගිවිසුම අත්සන් කිරීමද එම කාර්යාංශයේ සම්බන්ධීකරණය යටතේ සිදු කෙරිණි.
ජාතික නිදහස් පෙරමුණේ නායක විමල් වීරවංශ මහතා ඇතුළු සිවිල් සංවිධාන නියෝජිතයින් පිරිසක් ඉසුරුපාය අධ්යාපන අමාත්යංශය ඉදිරිපිටදී අද (12) පෙරවරුවේ ආරම්භ කළ අඛණ්ඩ සත්යග්රහයට එරෙහිව අධිකරණ නියෝගයක් ලබා දී තිබේ.
කඩුවෙල මහෙස්ත්රාත් අධිකරණය විසින් මෙම නියෝගය ලබාදී ඇත.
මාර්ගය අවහිර නොවන ලෙසත්, උසස්පෙළ විභාගය පැවැත්වෙන අතරතුර ශබ්ද විකාශන යන්ත්ර භාවිතා නොකරන ලෙසත් අදාළ අධිකරණ නියෝගයෙන් දැනුම්දී තිබේ.
රට යළි ගොඩනැඟීමේ වැඩපිළිවෙල කාර්යක්ෂමව මෙහෙයවීම සඳහා ක්රියාත්මක ‘Rebuilding Sri Lanka’ ජාතික වැඩපිළිවෙළේ සමාරම්භක උත්සවය ජනාධිපති අනුර කුමාර දිසානායක මහතාගේ ප්රධානත්වයෙන් හෙට (13) පැවැත්වීමට නියමිතව තිබේ.
බණ්ඩාරනායක අනුස්මරණ ජාත්යන්තර සම්මන්ත්රණ ශාලාවේදී එම උත්සවය පැවැත්වීමට සැළසුම් කර ඇති බව ජනාධිපති මාධ්ය අංශය සඳහන් කළේය.
‘දිට්වා’ සුළි කුණාටුව හේතුවෙන් සිදු වූ ව්යසනයට අදාළ පශ්චාත් ආපදා පුනරුත්ථාපන හා ප්රතිසාධන කටයුතුවලට ප්රතිචාර දැක්වීම සඳහා ඉහළ මට්ටමේ මනා සම්බන්ධීකරණයෙන් යුතු ජාතික ප්රතිසාධන යාන්ත්රණයක කඩිනම් සහ හදිසි අවශ්යතාව අනුව යමින් ‘Rebuilding Sri Lanka’ වැඩසටහන ක්රියාත්මක කෙරේ.
දේශීය, විදේශීය , රාජ්ය හා පෞද්ගලික අංශයේ පරිත්යාගශීලීන්ගේ සහයෝගය ලබා ගැනීමෙන් ක්රියාත්මක ‘‘රී බිල්ඩින්ග් ශ්රී ලංකා‘‘ වැඩසටහනට අදාලව අග්රාමාත්ය ආචාර්යය හරිනි අමරසූරිය මෙනෙවියගේ ප්රධානත්වයෙන් යුත් අමාත්යවරුන්, රාජ්ය නිලධාරීන් ඇතුළු 25 දෙනෙකුගෙන් සමන්විත ජනාධිපති කාර්ය සාධක බලකායක් ද පත් කර තිබේ.
එමෙන්ම ප්රධාන කමිටුවේ තීරණ ක්රියාත්මක කිරීම, අධීක්ෂණය කිරීම සහ ප්රගතිය නිරීක්ෂණය කිරීම සඳහා උප කමිටු පිහිටුවීමට ද නියමිත බව ජනාධිපති මාධ්ය අංශය සඳහන් කළේය
‘දිට්වා’ සුළි කුණාටුවෙන් පසු චන්ද්රිකා දත්ත ඔස්සේ සිදුකළ පරීක්ෂණ මඟින් නායයෑම් 4,800ක පමණ ප්රමාණයක් හඳුනාගෙන ඇති බව ආතර් සී.ක්ලාක් මධ්යස්ථානයේ අධ්යක්ෂ ජනරාල් කුමාරී මිගහකොටුව මහත්මිය පවසන්නීය.
අද (12) දින ප්රවෘත්ති දෙපාර්තමේන්තුවේ පැවති මාධ්ය සාකච්ඡාවකට එක් වෙමින් ඇය ඒ බව සඳහන් කළාය.
එහිදී ඇය පවසා සිටියේ, දිට්වා සුළි කුණාටුව ඇතිවීමෙන් පසු ලබාගත් චන්ද්රිකා ඡායාරූප සහ දත්ත භාවිත කර නායයෑම් සිතියම් ගත කිරීමක් සිදුකළ බවය.
එම සිතියම් විශ්ලේෂණය කිරීමෙන් මාධ්ය මඟින් මෙතෙක් වාර්තා කර ඇති නායයෑම් සංඛ්යාවට වඩා ඉතා විශාල ප්රමාණයක නායයෑම් සිදුවී ඇති බව හඳුනාගත හැකි වූ බවත් ඇය සඳහන් කළාය.
චන්ද්රිකා ඡායාරූප විශ්ලේෂණය හරහා රට පුරා නායයෑම් සම්පූර්ණ ලෙස සිතියම්ගත කළ අතර, එමඟින් නායයෑම් සිදුවීම් සම්පූර්ණ සංඛ්යාව 4,800කට ආසන්න බව අනාවරණය වී ඇති බවද වාර්තා වේ.
“දිට්වා සුළි කුණාටුව ඇතිවුණ අවස්ථාවේදී චන්ද්රකා ඡායාරූප මඟින් ගත්ත තොරතුරු යොදාගෙන අපි නායයෑම් සිතියම් ගත කිරීමකට ලක්කළා. ඒ සිතියම් අනුව අපිට පෙනුනා මාධ්ය ඔස්සේ ප්රචාරය කරන නායයෑම්වලට වඩා විශාල ප්රමාණයක් නායයෑම තිබෙනවා කියන එක අපි හඳුනා ගත්තා. ඒ චන්ද්රකා ඡායාරූප හරහා 4,800ක පමණ ප්රමාණයක සංඛ්යාවක නායයෑම් සිදුවුණා.”
ප්රශ්නය – ජාතික ගොඩනැගිලි පර්යේෂණ සංවිධානය චන්ද්රිකා ඡායාරූප ආශ්රයෙන් කියලා තිබුණේ ස්ථාන 1,241ක විශාල නායයෑම දක්නට ලැබුණා කියලා. ඊට අමතරව කුඩා ඒවා තවමත් පරික්ෂා කරගෙන යනවා කණ්ඩි කඩාවැටීම් ඇතුළ මධ්ය පරිමාණ නායගිය ස්ථාන ගැන හැබැයි ඔබතුමියලා කියවා 4,800ක් නිරීක්ෂණය වෙනවා කියලා. ඒ කියන්නේ අරවගේ හතරගුණයක්. ඒ කියන්නේ කොස්ලන්නද වගේ විශාල ප්රමාණයේ නායයෑමද මේ 4,800?
ආතර් සී.ක්ලාක් මධ්යස්ථානයේ අධ්යක්ෂ ජනරාල් කුමාරී මිගහකොටුව – “නැහැ මේකෙදී නායයෑමක් විදිහට පස්කඳු කඩාවැටීම් සුළු ඒවා පවා අපේ චන්ද්රකා ඡායාරූපවලින් අපි ලබාගෙන තියෙනවා. සමහර විට ආපදා කළමණාකරණ මධ්යස්ථානය ජනතාව ඉන්න සහ ඒ කියන්නේ මැදිහත්විය යුතු ස්ථාන හඳුනාගෙන ඇති නමුත් අපේ චන්ද්රකා ඡායාරූපවලට වනාන්තරයක් ඇතුළේ සිදුවුණ නායයෑමක් පවා අපේ ගණනයට ලක්වෙනවා. ඒකයි අපේ ප්රමාණ වැඩිවෙන්නේ.”
ප්රශ්නය – ඒ කියන්නේ දිට්වා සුළි කුණාටුවෙන් පස්සේ ඇති වුණ සම්පූර්ණ නායයෑම් ප්රමාණයද ? ඒක දිවයින් පුරාමද නැත්නම් මධ්යම කඳුකරය ආශ්රිතවද ?
ආතර් සී.ක්ලාක් මධ්යස්ථානයේ අධ්යක්ෂ ජනරාල් කුමාරී මිගහකොටුව – “ඔව් දිට්වා සුළි කුණාටුවෙන් පස්සේ ඇති වුණ ඒවා. වැඩිපුරම තියෙන්නේ නායයෑම් තියෙන්නේ මධ්යම කඳුකරය ආශ්රිතව තමයි. නමුත් මේ සංඛ්යාව ලංකාව පුරාම නායයෑම් ගණනය කිරීමක්. සුළු පස් කඳු කඩාවැටීමක් වුණත් මේකෙදි අපි සලකා බලලා තියෙනවා”
