බරපතල වැඩ සහිත වසර 05 ක සිරදඬුවම් සහ දඩ නියම වී සිටි හිටපු ග්රාම නිලධාරියෙකු විසින් එම දඬුවමට එරෙහිව ඉදිරිපත් කළ ඇපෑලක් නිෂ්ප්රභ කළ අභියාචනාධිකරණය එම දඬුවම තහවුරු කිරීමට තීන්දු කර තිබේ.
උපතින් ආබාධිත පුද්ගලයෙකුට රජයෙන් පිරිනමන නිවාස ආධාර ලබාදීම සඳහා රුපියල් ලක්ෂයක අල්ලසක් ඉල්ලා එය ලබාගැනීමේ චෝදනාවට, අදාළ හිටපු ග්රාම නිලධාරිවරයා වදකරු වී සියේය.
විත්තිකරු වරදකරු කිරීම හා ඔහුට දඬුවම් පැමිණවීම මහාධිකරණ විනිසුරුවරයා විසින් තමන්ට ඉදිරිපත් වූ සාක්ෂි වලට අනුකූලව නිවැරදි ආකාරයෙන් සිදුකර ඇති බවත් එබැවින් එම තීන්දුවට මැදිහත්වීමට අභියාචනාධිකරණයට අවශ්යතාවයක් මතුනොවන බවත් විනිසුරු අමල් රණරාජා මහතාගේ එකඟත්වය ඇතිව තීන්දුව ප්රකාශයට පත්කළ අභියාචනාධිකරණ විනිසුරු ශෂී මහේන්ද්රන් මහතා ප්රකාශ කර තිබේ.
මෙම මුල් නඩුකරයේ පැමිණිලිකරු උපතින් ආබාධිතයකු වන අතර ඔහුට රජයෙන් පිරිනමන නිවාසාධාර ලබාදිය හැකි බවට විත්තිකරු විසින් යෝජනා කර ඇත.
එම නිවාස ආධාර වාරික හතරකින් ලැබීමට නියමිත අතර එම එක් වාරිකයක් සඳහා රුපියල් 25,000/- ක අල්ලසක් ලබා දෙන ලෙස විත්තිකරු විසින් පැමිණිකරුට යෝජනා කර තිබේ.
ඒ අනුව 2012 වසරේ සැප්තැම්බර් මස 01 වනදා සහ 2013 වසරේ මාර්තු මස 24 වනදා අතර කාලසීමාව තුළ රුපියල් ලක්ෂයක මුදලක් අල්ලස් වශයෙන් ඉල්ලා ලබා ගැනීම සම්බන්ධයෙන් අල්ලස් කොමිසම විසින් මෙම විත්තිකරුට එරෙහිව චෝදනා හතරක් යටතේ කොළඹ මහාධිකරණය හමුවේ අධි චෝදනා ගොනු කර තිබුණි.
දීර්ඝ විභාගයකින් අනතුරුව එම චෝදනා හතරටම විත්තිකරු වරදකරු කරන බව කොළඹ මහාධිකරණය තීන්දු කර තිබේ.
ඒ අනුව එක් එක් චෝදනාවට විත්තිකරුට බරපතල වැඩ සහිත වසර 05 බැගින් සිර දඬුවම් නියම කළ මහාධිකරණ විනිසුරුවරයා ඊට අමතරව රුපියල් 5000/- බැගින් දඩ මුදල් ද නියම කර තිබුණි.
ඊට අමතරව පැමිණිලිකරුට රුපියල් 100,000/- වන්දියක් ගෙවන ලෙසත් විනිසුරුවරයා විත්තිකරුට නියම කර ඇත.
එම දඬුවම සම්බන්ධයෙන් සෑහීමකට පත් නොවූ විත්තිකරු එම දඬුවමට එරෙහිව අභියාචනාධිකරණයට ඇපෑලක් ඉදිරිපත් කර තිබේ.
විත්තිකරු එම අභියාචනය තුළින් සඳහන් කර තිබුණේ තමන්ට එරෙහිව අල්ලස් කොමිසම විසින් ඉදිරිපත් කළ චෝදනා හතර සාධාරණ සැකයෙන් ඔබ්බට ඔප්පු කිරීමට එම කොමිසම අධිකරණය හමුවේ අසමත් වූ බවය.
එම තීන්දුව ලබාදීමට පෙර විනිසුරුවරයා විත්තිය විසින් ඉදිරිපත් කළ සාක්ෂි සැලකිල්ලට ගෙන නොමැති බවත් එම සාක්ෂි ඇගයීමකට ලක්කර නොමැති බවත් විත්තිකරු සිය අභියාචනය තුළින් සඳහන් කර තිබේ.
කෙසේ වෙතත් අභියාචනා විභාගයේ දී ඉදිරිපත් වූ කරුණු සලකා බැලූ විනිසුරු මඩුල්ල සඳහන් කළේ මහාධිකරණ විනිසුරුවරයා විසින් විත්තිකරු වරදකරු කරමින් දඬුවම් පැමිණවීමට ගත් තීරණය නීත්යානුකූල ආකාරයට සිදුවී ඇති බවය.
ඒ අනුව මහාධිකරණ තීන්දුවට මැදිහත්වීමට අභියාචනාධිකරණයට අවස්ථාවක් නොමැති බවත් ඒ අනුව විත්තිකරුගේ අභියාචනය නිශ්ප්රභ කරන බවත් විනිසුරු මඩුල්ල සිය තීන්දුවේ වැඩි දුරටත් සඳහන් කර ඇත.
