Breaking News
මුහුදුබඩ දුම්රිය මාර්ගයේ දුම්රියක් පීලි පැනීමට ලක්වී තිබෙනවා.
ඒ අනුව පානදුර සිට මරදාන බලා ධාවනය වූ දුම්රියක් මෙලෙස පීලි පැනීමට ලක්ව ඇති බවයි දුම්රිය දෙපාර්තමේන්තුව සඳහන් කළේ.
මේ හේතුවෙන් මුහුදුබඩ දුම්රිය මාර්ගයේ දුම්රිය ප්රමාදයක් සිදුවිය හැකි බව වැඩිදුරටත් සඳහන් වෙනවා.
සංවිධානාත්මක අපරාධකරුවෙකු හා මහා පරිමාණ මත්ද්රව්ය ජාවාරම්කරුවෙක් වන ‘මර්වින් ජානා’ හෙවත් ‘බේකරි ජානා’ නැමති මත්ද්රව්ය ජාවාරම්කරු අත්අඩංගුවට ගෙන තිබෙනවා.
විශේෂ කාර්ය බළකායේ විශේෂ මෙහෙයුමක් අතරතුර අයිස් මත්ද්රව්ය සමග අදාළ සැකකරු අත්අඩංගුවට ගෙන ඇති බවයි සඳහන් වෙන්නේ.
යිස් මත්ද්රව්ය ග්රෑම් 17යි මිලිග්රෑම් 60ක් සන්තකයේ තබාගෙන ජාවාරම් සිදුකිරීම සඳහා මෝටර් රථයකින් යමින් සිටිය දී 45 හැවිරිදි අත්තිඩිය, දෙහිවල ප්රදේශයේ පදිංචි සැකකරු විශේෂ කාර්ය බළකා නිලධාරීන් විසින් අත්අඩංගුවට ගෙන ඇති බවයි සඳහන් වෙන්නේ.
වැඩිදුර විමර්ශන කටයුතු සඳහා සැකකරුව බොරලැස්ගමුව පොලිස් ස්ථානය වෙත භාර දී තිබෙනවා.
උතුරු දුම්රිය මාර්ගයේ අනුරාධපුර – මහව අතර කොටසේ දුම්රිය ධාවනය අද (28) සිට යළි ආරම්භ කර තිබෙනවා.
උතුරු දුම්රිය මාර්ගය නවීකරණය කිරීමෙන් අනතුරුව මෙලෙස යළි ගමනාගමනය ආරම්භ කර ඇති බවයි සඳහන් වෙන්නේ.
ඒ අනුව උතුරු දුම්රිය මාර්ගයේ දුම්රිය ප්රවේශපත්ර වෙන් කරවා ගැනීමද, මේ වන විට ආරම්භ කර ඇති බවයි දුම්රිය දෙපාර්තමේන්තුවේ නියෝජ්ය ගමනාගමන අධිකාරි එන්.ජේ. ඉදිපොලගේ සඳහන් කළේ.
දුම්රිය ගමනාගමනය ආරම්භ කිරීමත් සමග හරස් මාර්ග භාවිත කරන ජනතාව විමසිලිමත්ව කටයුතු කරන ලෙස දුම්රිය දෙපාර්තමේන්තුව වැඩිදුරටත් සඳහන් කර සිටිනවා.
ආසියානු දැල්පන්දු ශූරතාවලියේ අනුශූරතාව දිනා ගැනීමට ශ්රී ලංකා කණ්ඩායම අද (27) සමත් වුණා.
ඒ අනුව සිංගප්පූරුව සමඟ පැවති අවසන් තරගයේදී තියුණු සටනකින් පසු සිංගප්පූරුව හමුවේ ලකුණු 67 – 64ක් ලෙසින් ශ්රී ලංකාව පරාජයට පත් වුණා.
ශ්රී ලංකාව මෙවර ආසියානු දැල්පන්දු ශූරතාවලියේ අවසන් මහා තරගය සඳහා අපරාජිතව පැමිණ තිබුණා.
තමන් මෙන්ම වත්මන් ජනාධිපති අනුර කුමාර දිසානායකද බහුතරයක් නැති ජනාධිපතිවරයෙක් බව හිටපු ජනාධිපති රනිල් වික්රමසිංහ පවසනවා.
ජාතික ජන බලවේගයෙන් ඉදිරිපත් කර ඇති ලැයිස්තුව දෙස බැලූ විට ජනාධිපතිවරයාගේ ආණ්ඩුව මාස තුනක් තියා සති තුනක් යාමට හැකිදැයි ගැටලු සහගත බවයි මීගමුව ප්රදේශයේ නව ප්රජාතන්ත්රවාදී පෙරමුණ පැවැත් වූ ජන හමුවකට එක්වෙමින් හිටපු ජනාධිපතිවරයා සඳහන් කළේ.
පළ පුරුද්දක් ඇති පිරිසක් පාර්ලිමේන්තුවට යවන ලෙසත් රට ඉදිරියට ගෙන යාම සඳහා නව ප්රජාතන්ත්රවාදී පෙරමුණට බහුතරය ලබාදෙන ලෙසයි හිටපු ජනාධිපති රනිල් වික්රමසිංහ වැඩිදුරටත් ප්රකාශ කළේ.
ඇල්පිටිය ප්රාදේශීය සභා ඡන්ද විමසීමේ ප්රතිඵල මේ වන විට නිකුත් කර තිබෙනවා.
ඒ අනුව ජාතික ජන බලවේගය ඡන්ද 17,295 ක් ලබා ගනිමින් මන්ත්රී ධූර 15 ක් දිනාගෙන තිබෙනවා.
සමගි ජන බලවේගය ඡන්ද 7,924 ක් ලබාගෙන මන්ත්රී ධූර 6 ක් දිනාගෙන ඇති අතර ශ්රී ලංකා පොදුජන පෙරමුණ ඡන්ද 3,597 ක් හිමි කරගනිමින් මන්ත්රී ධූර 3 ක් දිනාගෙන තිබෙනවා.
පොදුජන එක්සත් පෙරමුණ ඡන්ද 2612 ක් ලබාගෙන මන්ත්රී ධූර 2 ක් හිමි කරගෙන ඇති අතර ස්වාධීන කණ්ඩායම ඡන්ද 2,560 ක් ලබාගෙන මන්ත්රී ධුර 2 ක් හිමිකරගෙන සිටිනවා.
ජාතික ජනතා පක්ෂය සහ පොදුජන එක්සත් නිදහස් සන්ධානය මන්ත්රී ධූර 01 බැගින් දිනාගෙන ඇති බවයි වැඩිදුරටත් සඳහන් වෙන්නේ.
දෙසැම්බර් මාසයේ දී විදුලි ගාස්තු අඩු කිරීම පිළිබඳව රජයේ අවධානය යොමුවී තිබෙනවා.
ඊට අදාළ විදුලිබල මණ්ඩලයේ යෝජනා මහජන උපයෝගීතා කොමිසම විසින් මේ දිනවල අධ්යයනය කරමින් සිටින බවයි සඳහන් වෙන්නේ.
එසේම වසර හතරකට වරක් සිදුකළ විදුලි ගාස්තු සංශෝධනය, වසර දෙකකට වරක් සිදුකිරීමේ ක්රමවේදයක් ගැනද යෝජනා ඉදිරිපත්ව තිබෙනවා.
ලංකා විදුලිබල මණ්ඩලය ඉදිරිපත් කළ එම යෝජනා සම්බන්ධයෙන් ඉදිරියේ දී කරුණු සලකා බැලීමට නියමිත බවයි මහජන උපයෝගීතා කොමිසම වැඩිදුරටත් පවසා සිටියේ.
ඊශ්රායලය විසින් අද (26) අළුයම ඉරානයේ තෝරාගත් හමුදා ඉලක්ක කිහිපයක් වෙත ගුවන් ප්රහාරයක් එල්ලකළ බව විදෙස් මාධ්ය වාර්තා කරනවා.
පසුගිය ඔක්තෝබර් 01 වැනිදා ඉරානය විසින් එල්ල කළ බැලස්ටික් මිසයිල ප්රහාර 200කට ආසන්න ප්රහාරය ඇතුළුව, ඉරාන පාලනය මාස කිහිපයක සිට තමන්ට එරෙහිව සිදුකරන අඛණ්ඩ ප්රහාරවලට ප්රතිචාර දක්වමින් මෙම ප්රහාරය දියත්කළ බවයි ඊශ්රායල ආරක්ෂක අංශ පවසන්නේ.
මේ අතර, ඉරාන රාජ්ය මාධ්ය විසින් ද ඝෝෂාකාරී පිපිරීම් කිහිපයක් පිළිබඳ වාර්තා කළ බවයි බී.බී.සී. පුවත් සේවය වාර්තා කර සිටියේ.
ඉරානයේ ටෙහෙරාන් අගනුවරට බටහිර ප්රදේශයෙන් මෙම පිපිරීම් හඬ ඇසී තිබෙන බවත්, විශේෂයෙන් ඉරාන අගනුවරට බටහිර සහ නිරිත දෙසින් පිහිටි හමුදා කඳවුරු ඉලක්ක කර මෙම ගුවන් ප්රහාර එල්ල කර ඇති බවත් සඳහන් වෙනවා.
කෙසේ නමුත් ප්රහාරවල ප්රමාණය සහ ඉලක්ක පිළිබඳව ඊශ්රායලය තවමත් පැහැදිලි ප්රකාශයක් සිදුකර නොමැති බවයි වැඩිදුරටත් සඳහන් වන්නේ.
ඇල්පිටිය ප්රාදේශීය සභා ඡන්ද විමසීම අද (26) පෙරවරු 7.00 සිට පස්වරු 4.00 දක්වා පැවැත්වීමට නියමිතයි.
ඡන්ද මධ්යස්ථාන 48කදී මෙම ඡන්ද විමසීම පැවැත්වෙන අතර, ඒ සඳහා ඡන්දදායකයින් 55,643 දෙනෙකු සුදුසුකම් ලබා ඇති බවයි මැතිවරණ කොමිෂන් සභාව සඳහන් කළේ.
ඡන්ද පෙට්ටි සහ නිලධාරින් ප්රවාහනය කිරීම ඊයේ සාර්ථකව සිදු කෙරුණු අතර, ඡන්ද විමසීමේ කටයුතු සඳහා නිලධාරින් 600 දෙනෙකු පමණ යොදවන බව මැතිවරණ කොමිෂන් සභාව සඳහන් කරනවා.
ජනාධිපතිවරණයේදී ඡන්දදායකයාගේ වම් අතෙහි සුළැගිල්ල පාට කර තිබීම නිසා මෙම ඡන්ද විමසීමේදී ඡන්දය සලකුණු කිරීමේදී වම් අතෙහි මහපටඟිල්ල පාට කිරීමට තීරණය කර තිබෙන බවයි වැඩිදුරටත් දැක්වෙන්නේ.
බිත්තරයක් රුපියල් 41 ට අඩුවෙන් සිල්ලර මිලට අළෙවි කිරීමට හැකි වන පරිදි වෙළඳපොළට බිත්තර නිකුත් කිරිමට බිත්තර නිෂ්පාදනය කරන සංගම් නියෝජිතයන් එකඟතාවය පළ කළ බව පාරිභෝගික කටයුතු පිළිබඳ අධිකාරිය පවසනවා.
බිත්තර නිෂ්පාදනය කරන සංගම් නියෝජිතයන් සමඟ වෙළඳ අමාත්යාංශයේදී පැවති විශේෂ සාකච්ඡාවකදී එම නියෝජිතයන් මෙම එකඟතාවය දැක්වූ බවයි පාරිභෝගික කටයුතු පිළිබඳ අධිකාරියේ සභාපති හේමන්ත සමරකෝන් සඳහන් කළේ.
වෙළඳ, වාණිජ, ආහාර සුරක්ෂිතතා අමාත්යංශයේ ලේකම් එම්.එම්. නයිමුදීන් මහතාගේ ප්රධානත්වයෙන් මෙම සාකච්ඡාව පවත්වා තිබෙනවා.
