Breaking News
2025 වසරේ මුල් මාස දෙක තුළ මෙරටට පැමිණ ඇති සමස්ත සංචාරකයින් සංඛ්යාව 485,102ක් බව ශ්රී ලංකා සංචාරක සංවර්ධන අධිකාරිය පවසනවා.
ඒ අනුව පෙබරවාරි මාසයේ පළමු දින 27 තුළ පමණක් 232,341ක සංචාරකයින් පිරිසක් මෙරටට පැමිණ ඇති බවයි එම අධිකාරිය සඳහන් කළේ.
මෙම කාල සීමාව තුළදී ඉන්දියාව, රුසියාව, එක්සත් රාජධානිය, ජර්මනිය, ප්රංශය යන රටවල්වලින් වැඩිම සංචාරකයින් පිරිසක් පැමිණ තිබෙනවා.
අදාළ වාර්තාව පහතින්.
විශේෂ දළදා ප්රදර්ශනය සඳහා දින නියම කර තිබෙනවා.
ඒ අනුව අප්රේල් මස 18 වනදා සිට දින 10 ක් දළදා ප්රදර්ශනය පැවැත්වීමට නියමිත බවයි සඳහන් වෙන්නේ.
සමාරම්භක දිනයේ දළදා ප්රදර්ශනය පස්වරු 3.00 ට ආරම්භ වී පස්වරු 5.00 ට අවසන් කිරීමට නියමිත අතර ඉන් අනතුරුව සෙසු දිනවලදී දහවල් 12.00 සිට පස්වරු 5.30 දක්වා පැවැත්වීමට නියමිත බවයි වැඩිදුරටත් සඳහන් වෙන්නේ.
ඉන්ධන බෙදාහැරීමේ කටයුතු සාමාන්ය ආකාරයට කටයුතු සිද්ධ වන බව ඛනිජ තෙල් නීතිගත සංස්ථාවේ සභාපති ඩී.ජේ. රාජකරුණා පවසනවා.
ඒ අනුව, ඉන්ධන බෙදාහැරීමේ කටයුතුවලින් ඉවත්ව සිටින්නේ කිසියම් කණ්ඩායමක් පමණක් බවයි අද (01) පෙරවරුවේ සභාපතිවරයා පවසා සිටියේ.
අද උදෑසන වන විට CPC ආයතනයට මුදල් ගෙවා ඉන්ධන තොග 1696ක් ඇණවුම් කර තිබෙන බවත්, එසේම, IOC සඳහා 471ක්, Sinopec සඳහා 391ක් සහ RM Park සඳහා 366ක් ආදී ලෙස මුළු ඉන්ධන තොග 2924ක් සාමාන්ය පරිදි බෙදා හරිමින් පවතින බවද සඳහන්.යම් කණ්ඩායමක් විසින් අනවශ්ය ලෙස මාධ්ය හරහා කළබලයක් ඇති කිරීම නිසා මහජනතාව බිය වී ඉන්ධන පෝලිම් ඇති වී ඇති බවත්, මෙම කරුණ ගැන සාකච්ඡා කිරීම සඳහා ලබන අඟහරුවාදා දින සවස 2.00ට අදාළ පාර්ශ්ව කැඳවන බවත් ඔහු සඳහන් කළා.
මේ අනුව ගත්විට, ඉන්ධන ගැටළුවක් ඇතිවීමට කිසිදු හේතුවක් නොමැති බවත්, රටේ ජනතාවට කලබල වීමට හේතුවක් නොමැති බවයි ඛනිජ තෙල් නීතිගත සංස්ථාවේ සභාපති ඩී.ජේ. රාජකරුණා වැඩිදුරටත් පවසා සිටියේ.
යාල ජාතික වනෝද්යානය තාවකාලිකව වසා දැමීමට තීරණය කළ බව එම වනෝද්යානය භාරකාරු මනෝජ් විද්යාරත්න පවසනවා.
පවතින වැසි තත්ත්වය පහව යනතුරු මෙම තීරණය ගත් බවත්, පසුගිය දින දෙක තුළ ඇදහැළුණු ධාරානිපාත වර්ෂාව හේතුවෙන් යාල වනෝද්යානයේ මාර්ග බොහොමයක් ජලයෙන් යටවී ඇති බවත්, වනෝද්යානය තුළ ඇති වැව් ඉවුරු කිහිපයක් කඩාගෙන ගොස් ඇති බවයි ඔහු සඳහන් කළේ.
ඒ අනුව, වන සතුන්ගේ ආරක්ෂාව හා සංචාරකයින්ගේ ආරක්ෂාව වෙනුවෙන් අද (01) සිට වැසි තත්ත්වය පහව යනතුරු යාල ජාතික වනෝද්යානය වසා දැමීමට තීරණය කර ඇති බවත්, යාල කලාප අංක 01ට අදාළ කටගමුව හා පලටුපාන පිවිසුම් දොරටු වසා දමා තිබෙන බවයි වැඩිදුරටත් සඳහන් වන්නේ.
මෙරට තුළ කිසිඳු තෙල් හිඟයක් නොමැති බවත්, තෙල් හිඟයක් ඇතිවීමට ඉඩ නොදෙන බවත් නියෝජ්ය අමාත්ය අනිල් ජයන්ත පවසනවා.
යම් වෘත්තීය සමිති කණ්ඩායමක් විසින් ලබාදුන් ප්රකාශයක් හරහා මෙම ඉන්ධන පෝලිම් නිර්මාණය වී ඇති බවයි අද (01) පාර්ලිමේන්තුවේදී අදහස් දක්වමින් නියෝජ්ය අමාත්යවරයා සඳහන් කළේ.
බෙදුම්කරුවන් ඉන්ධන ඇනවුම් සිදු කරන්නේ තනි තනිව බවත්, කිසිඳු අවස්ථාවක වෘත්තීය සමිතියක් ලෙස ඉන්ධන ඇනවුම් සිදු නොකරන අතර සාමාන්යයෙන් දවසකට ඇනවුම් 1200 ක් ලැබුණද මෙම දින දෙකට පමණක් ඇනවුම් 1800 ක් පමණ ලැබී ඇති බව නියෝජ්ය අමාත්යවරයා සඳහන් කළා.
වෙළඳපොළ තුළ හිඟයක් මවා, යම් අනවශ්ය තත්ත්වයක් නිර්මාණය කිරීමට කටයුතු කරනවා නම්, එය කඩාකප්පල්කාරී ක්රියාවක් බවයි නියෝජ්ය අමාත්ය අනිල් ජයන්ත වැඩිදුරටත් ප්රකාශ කර සිටියේ.
හාලිඇල හා බදුල්ල අතරදී දුම්රිය මාර්ගයට පස් කන්දක් කඩා වැටීම හේතුවෙන් උඩරට දුම්රිය මාර්ගයේ දුම්රිය ධාවනයට බාධා මතුව තිබෙනවා.
එසේම, ඉඟුරුඔය හා ගලබොඩ අතර දී ගසක් කඩා වැටීම නිසා ද ධාවනයට බාධා ඇති වී තිබෙන බවයි සඳහන් වන්නේ.
එම බාධක ඉවත් කිරීමේ කටයුතු මේ වනවිට ආරම්භ කර ඇති බව දුම්රිය දෙපාර්තමේන්තුව පවසා සිටියා.
ශ්රී ලංකාව සමඟ වන මාස 48 ක විස්තීර්ණ අරමුදල් පහසුකම යටතේ IMF විධායක මණ්ඩලයේ තුන්වන සමාලෝචනය සම්පූර්ණ කළ අතර, එමඟින් ආර්ථික ප්රතිපත්ති සහ ප්රතිසංස්කරණ සඳහා සහාය වීම සඳහා මෙරටට ඇමරිකානු ඩොලර් මිලියන 334 ක ක්ෂණික ප්රවේශයක් ලබා දී තිබෙනවා.
ඒ අනුව මේ දක්වා ලබා දී ඇති මුළු IMF මූල්ය ආධාර ප්රමාණය ඇමරිකානු ඩොලර් බිලියන 1.34 ක් බවයි සඳහන් වන්නේ.
මෙරට ආර්ථික ප්රතිසංස්කරණ ඵල දරමින් ඇති අතර, ආර්ථික ප්රකෘතිය කැපී පෙනෙන ලෙස ඉහළ ගොස් තිබෙන බවත්, උද්ධමනය අඩු මට්ටමක පවතින බවත්, ආදායම් එකතු කිරීම වැඩිදියුණු වෙමින්, සංචිත අඛණ්ඩව රැස් වෙමින් පවතින බවත් IMF නියෝජ්ය කළමනාකාර අධ්යක්ෂ කෙන්ජි ඔකමුරා පවසා සිටියා.
ණය තිරසාරභාවය යථා තත්ත්වයට පත් කිරීම සඳහා ණය ප්රතිව්යුහගත කිරීම ඉදිරියට ගෙන යාමේ ප්රගතිය කැපී පෙනෙන බවද, මෑතකදී බැඳුම්කර හුවමාරුව සාර්ථකව නිම කිරීම ණය තිරසාරභාවය යථා තත්ත්වයට පත් කිරීම සඳහා ප්රධාන සන්ධිස්ථානයක් වන බව ද, නිල ණයහිමි කමිටුවේ ණය හිමියන් සමඟ සහ ඉතිරි ණය හිමියන් සමඟ ද්විපාර්ශ්වික ගිවිසුම් කාලෝචිත ලෙස අවසන් කිරීම දැන් ඇති ප්රමුඛතාවය බවද නියෝජ්ය කළමනාකාර අධ්යක්ෂවරයා වැඩිදුරටත් සඳහන් කර තිබෙනවා.
මාසිකව සිදුකරනු ලබන ඉන්ධන මිල සංශෝධනය මෙවර සිදුනොවන බව ලංකා ඛණිජ තෙල් සංස්ථාව පවසනවා.
ඒ අනුව මේ වනවිට වෙළඳපොලේ පවතින මිල ගණන් යටතේම මාර්තු මාසයේ ඉන්ධන අලෙවිය සිදුවන බවයි සඳහන් වෙන්නේ.
ආරක්ෂක අමාත්යංශ වැය ශිර්ෂය අද (28) පාර්ලිමේන්තුවේදී වැඩි ඡන්ද 78කින් සම්මත වුණා.
ඒ අනුව වැය ශීර්ෂයට පක්ෂව ඡන්ද 88 ක් හා විපක්ෂව ඡන්ද 10 ක් හිමිවී ඇති බවයි වැඩිදුරටත් සඳහන් වෙන්නේ.
රුපියල් බිලියන 1400 ක ප්රාග්ධන වියදම් ඉදිරි මාස 08 තුළ ග්රාමීය මට්ටමේ ඵලදායී ව්යාපෘති වෙනුවෙන් වැය කරන ලෙස ජනාධිපති අනුර කුමාර දිසානායක දිස්ත්රික් ලේකම්වරුන්ට උපදෙස් ලබාදී තිබෙනවා.
ග්රාමීය ආර්ථිකය දියුණු කිරීමෙන් රටේ ආර්ථික වර්ධනය 3%- 4% ක් අතර ප්රමාණයකින් ඉහළ දැමිය හැකි බවයි දිස්ත්රික් ලේකම්වරු සමඟ ජනාධිපති ලේකම් කාර්යාලයේදී අද (27) පැවැති සාකච්ඡාවේදී ජනාධිපතිවරයා ප්රකාශ කළේ.
ආර්ථිකය ගමට ප්රසාරණය කිරීමේදී පවත්නා ආර්ථික අවස්ථා වර්ධනය කිරීමත්, නව ප්රභව හඳුනා ගැනීමේත් අවශ්යතාවද ජනාධිපතිවරයා විසින් පැහැදිලි කළ බවයි වැඩිදුරටත් සඳහන් වන්නේ.
මේ සම්බන්ධයෙන් නිකුත් කළ නිවේදනය පහතින්.
