Politics
බාල ගල්අඟුරු සිද්ධිය මුල් කරගනිමින් බලශක්ති අමාත්ය කුමාර ජයකොඩි මහතාට එරෙහිව විශ්වාසභංගය යෝජනාවක් ගෙනඒමට විපක්ෂය පියවර ගෙන ඇත.
ඒ සඳහා මේ වනවිට විපක්ෂනායක සජිත් ප්රේමදාස මහතා ඇතුළු විපක්ෂයේ මන්ත්රීවරුන් 17 දෙනෙකු අත්සන් කර තිබේ.
එම විශ්වාසභංගය යෝජනාව හෙට (19) දිනයේදී කථානායකවරයා වෙත භාරදීමට නියමිත බවද වාර්තා වෙයි.
රට තුළ බලශක්ති සුරක්ෂිතතාව තහවුරු කිරීම මෙන්ම ආර්ථික ක්රියාවලිය සහ අත්යවශ්ය සේවා අඛණ්ඩව පවත්වාගෙන යාම වෙනුවෙන් ගත යුතු පියවර පිළිබඳ සොයා බැලීමේ සාකච්ඡාවක් අද (16) ජනාධිපතිවරයාගේ ප්රධානත්වයෙන් පවත්වා තිබේ.
ඒ, මැදපෙරදිග යුදමය තත්ත්වය හමුවේ මේ වන විට බලශක්ති සැපයුමට එල්ල වී ඇති බාධා සැලකිල්ලට ගනිමිනි.
මෙම සාකච්ඡාව සඳහා අදාළ අමාත්යවරු සහ අමාත්යාංශ ලේකම්වරුන්ගේ එක්ව සිටි බව ජනාධිපති මාධ්ය අංශය නිවේදනය කරයි.
එහිදී බලශක්තිය කළමනාකරණය කර ගනිමින් රටේ ආර්ථික ක්රියාවලිය සහ අත්යවශ්ය සේවා අඛණ්ඩව පවත්වාගෙන යාමේ අවශ්යතාව ජනාධිපතිවරයා අවධාරණය කර ඇත.
මෙම සාකච්ඡාවේදී උද්ගතව ඇති තත්ත්වය හමුවේ රාජ්ය සේවා අඛණ්ඩව පවත්වාගෙන යාම වෙනුවෙන් ගත යුතු ක්රියාමාර්ග පිළිබඳ විශේෂ අවධානය යොමු කෙරිණි.
රජයේ කාර්යාල පවත්වා ගෙන යාමේදී අනුගමනය කළ හැකි විකල්ප ක්රමවේද පිළිබඳව මෙහිදී පුළුල් ලෙස සාකච්ඡා කළ බව ජනාධිපති මාධ්ය අංශය නිකුත් කළ නිවේදනයක දැක්වෙයි.
රාජ්ය සේවය සඳහා එක් දිනක නිවාඩුවක් ලබාදීම තුළින්, බලශක්ති පරිභෝජනය සීමා කරමින් සේවා පවත්වාගෙන යාම පිළිබඳව ද එහිදී සාකච්ඡා කර ඇත.
අධ්යාපන, සෞඛ්යය, සංචාරක, ධීවර, කර්මාන්ත, කෘෂිකර්ම, වරාය හා නාවික කටයුතු, ගුවන්තොටුපොළ සේවා සහ ඩිජිටල් සේවා ආදී ක්ෂේත්රයන්හි සුවිශේෂත්වය සහ ප්රායෝගික තත්ත්වය සැලකිල්ලට ගනිමින්, අවම බලශක්ති පරිභෝජනයක් සහතික වන පරිදි එම සේවා පවත්වාගෙන යාමට මේ මොහොතේ ගත හැකි විකල්ප ක්රියාමාර්ග පිළිබඳව මෙහිදී විමසා බැලූ බව සඳහන්ය.
ප්රධාන ක්ෂේත්රවල සේවා අඛණ්ඩව පවත්වා ගෙන යාමට ලබා දෙන ඉන්ධන ප්රමාණය තීරණය කිරීමට අමාත්යාංශ ලේකම්වරුන් සහ එම ක්ෂේත්ර නියෝජනය කරන ප්රවීණයන්ගෙන් සමන්විත කමිටුවක් මගින් අද දිනය තුළම වාර්තාවක් ලබා දෙන ලෙස ජනාධිපතිවරයා මෙහිදී උපදෙස් දුන්නේය.
එමෙන්ම, මෙවැනි තත්ත්වයකදී නිවසේ සිට රාජකාරී කිරීමේ ප්රායෝගික හැකියාව පිළිබඳ අමාත්යාංශ මට්ටමින් තීන්දු තීරණ ගැනීමේ වැදගත්කම අවධානයට ලක් වූ අතර නිලධාරීන් සේවා ස්ථානය වෙත කැඳවීම පිළිබඳ තීන්දු තීරණ ගැනීම ආයතන ප්රධානියා වෙත පැවරීමටත්, සේවා අඛණ්ඩව පවත්වාගෙන යාමට සුදුසු ක්රමවේදයක් අනුගමනය කිරීමටත් යෝජනා කර තිබේ.
මතුවී ඇති තත්ත්වය හමුවේ කෘෂිකර්ම කටයුතුවලදී ගොවි ජනතාව සහ කර්මාන්ත ක්ෂේත්රයේ සුළු හා මධ්ය පරිමාණ කර්මාන්තකරුවන් මුහුණ දී ඇති ගැටලු පිළිබඳ මෙහිදී ජනාධිපතිවරයාගේ විශේෂ අවධානය යොමු විය.
පවතින තත්ත්වය හමුවේ රටේ ආර්ථිකයට එල්ල විය හැකි බලපෑම් අවම කර ගැනීමට සියලු දෙනාගේ දායකත්වය සහ කැපවීම අවශ්ය බවත්, එහිදී යම් පිරිසකට සහනාධාර ක්රම මගින් පහසුකම් සැපයීමට සිදුවනු ඇති බවත් ජනාධිපතිවරයා මෙහිදී වැඩිදුරටත් පෙන්වා දුන්නේය.
QR ක්රමය හඳුන්වාදීමේ අපේක්ෂාව වන්නේ දෛනික ඉන්ධන පරිභෝජනය පවතින අභියෝගයන්ට අදාළව කළමනාකරණය කිරීම බවද මෙහිදී සඳහන් කෙරිණි.
එමගින් දෛනිකව ලැබෙන මිණුම් විශ්ලේෂණය කරමින් රටේ බලශක්ති සුරක්ෂිතතාව තහවුරු වන පරිදි ආර්ථික සහ සේවා කටයුතු සඳහා ඉන්ධන මුදාහැරීමේ වැදගත්කම අවධාරණය කළ බව ජනාධිපති මාධ්ය අංශය සඳහන් කරයි.
ඉන්ධන සැපයුමේදී QR ක්රමය විධිමත් අයුරින් භාවිත කිරීමේ වැදගත්කමත්, ඒ සඳහා එක් එක් අමාත්යාංශ මට්ටමින් අවශ්ය සියලු දත්ත හැකි කඩිනමින් ඩිජිටල් කටයුතු අමාත්යාංශයට ලබාදීමටත් මෙහිදී සාකච්ඡා කර ඇත.
ඒ අනුව අදාළ අමාත්යාංශ සහ ඛනිජ තෙල් නීතිගත සංස්ථාව එක්ව QR ක්රමය වඩාත් විධිමත් කිරීමටද යෝජනා විය.
මතුව ඇති තත්ත්වය හමුවේ රාජ්ය උත්සව තාවකාලිකව නතර කිරීමටත්, රජය මේ සම්බන්ධව ඉදිරියේදී තවදුරටත් ගනු ලබන ක්රියාමාර්ග පිළිබඳ පෞද්ගලික අංශය දැනුවත් කිරීමේ වැඩපිළිවෙළක් පිළිබඳවත් මෙහිදී යෝජනා වූ බව ජනාධිපති මාධ්ය අංශය නිකුත් කළ නිවේදනයේ වැඩිදුරටත් දැක්වෙයි.
ජාතික ජනබලවේග පාර්ලිමේන්තු මන්ත්රී අසෝක රන්වල මහතාට වරෙන්තු නිකුත් කිරීමට මහර මහේස්තාත් අධිකරණය පියවර ගෙන තිබේ.
ඒ ඒ මහතා විසින් සපුගස්කන්ද ප්රදේශයේදී සිදුකළ රිය අනතුරට අදාළව මහර මහේස්ත්රාත් අධිකරණයේ විභාග වූ නඩුවකට පෙනී නොසිටීම හේතුවෙනි.
ඒ අනුව මහර අතිරේක මහේස්ත්රාත් බණ්ඩාර ඉලංගසිංහ මහතා විසින් පාර්ලිමේන්තු මන්ත්රී අශෝක රන්වල මහතාට වරෙන්තු නිකුත් කිරීමට නියෝග කර තිබේ.
විදේශ අමාත්ය විජිත හේරත් මහතා සහ ඉරාන විදේශ කටයුතු අමාත්ය සෙයිද් අබ්බාස් අරග්චි අතර දුරකථන සංවාදයක් ඊයේ (13) සිදුකර තිබේ.
ඉරාන විදේශ කටයුතු අමාත්යංශය සිය එක්ස් ගිණුමෙහි සටහනක් තබමින් මේ බව ප්රකාශ කළේය.
එම සංවාදයේදී අමෙරිකාව සහ ඊශ්රායලය සිය රටට එරෙහිව සිදු කරනු ලබන හමුදා මෙහෙයුම්වල වත්මන් තත්ත්වය සම්බන්ධයෙන් විජිත හේරත් මහතාට දැනුම්දුන් බව ඉරාන විදේශ අමාත්යවරයා සඳහන් කර ඇත.
IRIS Dena නෞකාවේ සිටි නාවිකයන් මුදා ගැනීම සහා මිය ගිය අයගේ මළ සිරුරු නැවතත් සිය රටට ලබාදීම සම්බන්ධයෙන් ද සෙයිද් අබ්බාස් අරග්චි ශ්රී ලංකාවට සිය කෘතවේදය පළ කළ බව අදාළ සටහනේ දැක්වෙයි.
විපක්ෂයේ දේශපාලන නියෝජිතයින්ගෙන් සැදුම්ලත් ‘මහජන හඬ’ සංවිධානයේ නියෝජිතයින් පිරිසක් අද (13) සර්වජන බලය නායක පාර්ලිමේන්තු මන්ත්රී දිලිත් ජයවීර මහතා හමුවිය.
ඒ, සර්වජන බලය ප්රධාන කාර්යාලයේදීය.
රට තුළ අර්බුද රැසක් පැන නැගී ඇති කාලවකවානුවක විපක්ෂයේ නියෝජිතයින් එකට එක්වී වැඩ කිරීමේ අවශ්යතාව සම්බන්ධයෙන් මෙහිදී දීර්ඝ වශයෙන් සාකච්ඡා කර ඇත.
ඊට අමතරව බලශක්ති අර්බුදය, මැදපෙරදිග යුද්ධය ඇතුළු තවත් මාතෘකා රැසක් ඔස්සේ මෙම සාකච්ඡාව සිදුකර තිබේ.
අනන්යතාව රැකගනිමින් පොදු වැඩපිළිවෙළක් සඳහා විපක්ෂය එක්ව වැඩකිරීමේ අවශ්යතාව සනාථ කරමින් ලියවිල්ලක් මේ වනවිටත් සකස් කර ඇති බවත් ඉදිරියේදී සියලු පාර්ශ්වයන්ගේ අදහස් ලබාගැනීමෙන් අනතුරුව පොදු සම්මුතියක් සකස් කිරීමට බලාපොරොත්තුවන බවත් ඊට එක්වූ මහාචාර්ය ජී. එල්. පීරිස් මහතා පවසා තිබේ.
මැදපෙරදිග පවතින යුද තත්ත්වය හේතුවෙන් මෙරට අනාගතයට විශාල බලපෑමක් ඇති වන බව හිටපු ජනාධිපති මහින්ද රාජපක්ෂ මහතා පවසයි.
ඒ මහතා මේ බව ප්රකාශ කළේ, තිස්සමහාරාම – අකුරුගොඩ සිරි මංගලාරාමය විහාරස්ථානයේ අභිනවයෙන් ඉදිකරන ලද චෛත්ය රාජයාණන් වහන්සේගේ කොත් වහන්සේ නිරාවරණය කිරීමේ උත්සවයෙන් අනතුරුව මාධ්යවේදීන් ඇසූ ප්රශ්නවලට පිළිතුරු ලබා දෙමිනි.
ප්රශ්නය – වත්මන් රජය සම්බුද්ධ සාසනයට දක්වන සේවය සම්බන්ධයෙන් ඔබතුමාගේ අදහස මොකක්ද.?
පිළිතුර – මොනවා හරි සේවයක් කරනවා ද.?
ප්රශ්නය – සම්බුද්ධ සාසනයට දෙවැනිකොට සලකන තත්ත්වයක් තියෙනවා. ඔබතුමාගේ කාලයේදී කොහොමද සැලැකුවේ.?
පිළිතුර – ඉහළින්ම තියලා. දැන් එහෙම කරනවා ද කියන එකත් ප්රශ්නයක්.
ප්රශ්නය – ඔබතුමාගේ කාලයේ හිටිය බුද්ධි අංශ නිලධාරියෙක් අමානුෂික ලෙස සිරගත කරලා තියෙනවා. ඒ සම්බන්ධයෙන් ඔබතුමාගේ අදහස මොකක්ද.?
පිළිතුර – ඔහු කළ සේවය අගයන්න ඕනේ මිස හිර කරන්න නෙවෙයි තියෙන්නේ. හිර කරන කාලයක් නෙවෙයි මේක.
ප්රශ්නය – මේ වනවිට ජාත්යන්තර යුද්ධයක් පැවැත්වෙනවා. තව ටික කාලයක් මේ යුද්ධ පැවැතුණහොත් රටේ අනාගතයට මොකක් වෙයි කියලා ද හිතන්නේ.?
පිළිතුර – ගැටලුවක් ඇති වෙනවානේ. රටට, රටේ අනාගතයට ගැටලුවක් ඇති වෙනවා.
ප්රශ්නය – රටේ දැන් තත්ත්වය ගැන මොකද හිතන්නේ.?
පිළිතුර – කරන එක ගැන නම් කියන්න දෙයක් නැහැනේ. මට වඩා හොඳට ජනතාව දන්නවා.
ආසියානු සංවර්ධන බැංකුවේ නිල ආරාධනය මත පිලිපීනයේ සංචාරයක නිරත අග්රාමාත්ය ආචාර්ය හරිනි අමරසූරිය අද (11) පිලිපීනයේ ලොස් බැනෝස් හි පිහිටි ජාත්යන්තර වී පර්යේෂණ ආයතනයේ (IRRI) ප්රධාන කාර්යාලයේ නිරීක්ෂණයක නිරත විය.
එහිදී ආයතනයේ අධ්යක්ෂ ජනරාල් යොන් පින්ටෝ (Yvonne Pinto) මහත්මිය හමු වූ අග්රාමාත්යවරිය, ශ්රී ලංකාවේ වී වගාව සහ කෘෂිකාර්මික ක්ෂේත්රයේ තිරසාර සංවර්ධනය උදෙසා දෙපාර්ශවය අතර පවතින සහයෝගිතාව තවදුරටත් ශක්තිමත් කරගැනීම පිළිබඳව දීර්ඝ වශයෙන් සාකච්ඡා කළාය.
ශ්රී ලාංකීය වී ගොවීන් මුහුණ දෙන අභියෝග පිළිබඳව විශේෂ අවධානයක් මෙහිදී යොමු කළ අතර විශේෂයෙන්ම, වී නිෂ්පාදනයට බලපාන බාධාවන්, දේශගුණික විපර්යාසයන්ගේ බලපෑම් සහ ගොවි ජනතාව නවීන තාක්ෂණික ක්රමවේද වෙත යොමු කිරීමේ අවශ්යතාව අග්රාමාත්යවරිය විසින් පෙන්වා දුන්නාය.
ශ්රී ලංකාවේ වී අස්වැන්න ඉහළ නැංවීමට සහ ආහාර සුරක්ෂිතතාව තහවුරු කිරීමට අවශ්ය නවීන තාක්ෂණයන් සහ පර්යේෂණ දායකත්වය ලබා ගැනීමේ හැකියාව පිළිබඳව ද මෙහිදී කරුණු සාකච්ඡා විය.
ඒ අනුව, දේශගුණික විපර්යාසයන්ට ඔරොත්තු දෙන නව වී ප්රභේද හඳුන්වා දීම සහ තිරසාර ගොවිතැන් ක්රම ප්රවර්ධනය කිරීම සඳහා IRRI ආයතනය විසින් ක්රියාත්මක කරන ගෝලීය පර්යේෂණ අත්දැකීම් ශ්රී ලංකාව සමඟ හුවමාරු කර ගැනීමට එකඟතාව පළ කෙරිණි.
තවද, ශ්රී ලංකාවේ කෘෂිකාර්මික ආයතනවල ධාරිතාව වර්ධනය කිරීම, පර්යේෂණ හවුල්කාරිත්වයන් ඇති කර ගැනීම සහ දැනුම හුවමාරු කර ගැනීමේ වැඩසටහන් තවදුරටත් පුළුල් කිරීම කෙරෙහි ද දෙපාර්ශවයේ අවධානය යොමු විය.
විද්යාත්මක පදනමක් සහිත කෘෂිකාර්මික නවෝත්පාදනයන් මගින් ශ්රී ලංකාවේ ගොවි ජනතාවගේ ජීවනෝපාය නංවාලීමටත්, ජාතික ආහාර සුරක්ෂිතතාව තහවුරු කිරීමටත් මෙම අන්තර්ජාතික සහයෝගිතාව බෙහෙවින් ඉවහල් වනු ඇති බව අග්රාමාත්යවරිය වැඩිදුරටත් අවධාරණය කළාය.
කුමන බාහිර බලපෑම් එල්ලවුවද බලශක්ති සැපයුම අඛණ්ඩව ලබාදීමට අවශ්ය පියවර ගන්නා බව ජනාධිපති අනුර කුමාර දිසානායක මහතා පවසයි.
අද පස්වරුවේ කොළඹ පැවති උත්සවයක් අමතමින් ජනාධිපතිවරයා මේ බව සඳහන් කළේය.
“මම හිතන්නේ කිසිදු ජගතෙකුට පුරෝකථනය කරන්න පුළුවන් තත්ත්වයක් ලෝකයේ නැහැ. යුද්ධයට මැදිහත් වෙලා ඉන්න පාර්ශවකරුවන්ටත් පුරෝකථනය කරන්න බැහැ. මාස දෙකකට වඩා වැඩිය යුද්ධය යනවා. ඒ නිසා අපි ඔබට සහතිකයක් දෙන්නම් මේ මාස දෙකේ බලශක්ති සැපයුම අඛණ්ඩව ලබාදෙන්න අපි වගවෙනවා. මිල උච්චාවචනය විය හැකියි. මම තෙල් ළිං අයිතිකාරයෙක්, මට ලාභ ගන්න වැඩිකරනවා නෙමෙයි මේ. එහෙම නැත්නම් තෙල් සමාගමක ඒජන්තයෙක් මට ලාභ ලාබාගනීම සඳහා තෙල් වැඩිකරනවා නෙමෙයි. මම තෙල් සමාගම නෙමෙයි කවර සමාගමකවත් ඒජන්තයෙක් නෙමෙයි. හැබැයි අපිට වගකීමක් තියෙනවා ආණ්ඩුවක් විදිහට මේ බලශක්ති සැපයුම අඛණ්ඩව සිදුකරන්න. ඒ සැපයුම සඳහා අවශ්ය මූල්ය උපායන් සියල්ල අපි සකස් කරනවා. අභ්යන්තරව ඇතිවන කම්මපනයට අපිට මුහුණ දෙන්න පුළුවන්කම ලැබුණා. හැබැයි බාහිර කම්පනයට මුහුණ දෙන්න තව ටිකක් කල් යයි මේ ගොඩනැගෙමින් තිබෙන වෙලාවක් අපිට කම්පනයක් ඇතිකරලා තියෙනවා.”
භික්ෂු අධ්යාපනය වැඩිදියුණු කිරීම මගින් හුදෙක් උපාධිධාරීන් බිහිකිරීමෙන් ඔබ්බට ගොස් සමාජ සාධාරණත්වය හා මානව හිතවාදය වෙනුවෙන් පෙනීසිටින, ධර්මධර, විනයධර, ශ්රාස්ත්රිය දැනුමෙන් සන්නද්ධ ප්රඥාවන්ත භික්ෂු පරපුරක් නිර්මාණය කිරීම රජයේ අරමුණ බව අග්රාමාත්ය ආචාර්ය හරිනි අමරසූරිය පවසයි.
අනුරාධපුර ශ්රී ලංකා භික්ෂු විශ්වවිද්යාලයේ අද (07) පැවති සියලු පහසුකම් සහිත නව බහුකාර්ය ශ්රවණාගාර සංකීර්ණය විවෘත කිරීම සහ අටමස්ථානාධිපති නායක ස්වාමීන්ද්ර අභිනන්දනොත්සවයට එක්වෙමින් අග්රාමාත්ය ආචාර්ය හරිනි අමරසූරිය මේ බව සඳහන් කළාය.
එහිදී අදහස් දක්වමින් අග්රාමාත්යවරිය පැවසුවේ රජයක් ලෙස උත්සාහ ගනුයේ නවීන ලෝකයට ගැලපෙන පරිදි විද්යාත්මක හා තාර්කික පදනමකින් යුතුව ඉදිරියට යාමට බවත් නිදහස් අධ්යාපනය තවදුරටත් ශක්තිමත් කරමින් ගුණාත්මක අධ්යාපනයක් සෑම පුරවැසියෙකුටම ලබා දීම සහ අධ්යාපනය පොදු මානව අයිතිවාසිකමක් බවට පත් කරමින් මෙරට අධ්යාපනයේ ගුණාත්මකභාවය ජාත්යන්තරව ප්රචලිත කිරීම බවය.
ශ්රී ලංකා භික්ෂු විශ්වවිද්යාලය මෙරට උසස් අධ්යාපන පද්ධතිය තුළ සුවිශේෂි වනුයේ එහි පාලනය හා අධ්යන කටයුතු භික්ෂූන් වහන්සේලා වෙතම පැවරී තිබීම හේතුවෙන් බවත් මෙහි ප්රදාන පරමාර්ථය විය යුත්තේ හුදෙක් උපාධිධාරීන් බිහි කිරීම පමණක් නොවන බවද අග්රමාත්යවරිය මෙහිදී පැවසුවාය.
එහිදී ඇය පැවසුවේ සමාජ සාධාරණත්වය හා මානව හිතවාදය වෙනුවෙන් පෙනී සිටින, ධර්මධර, විනයධර මෙන්ම ශාස්ත්රීය දැනුමෙන් සන්නද්ධ ප්රඥාවන්ත භික්ෂු පරපුරක් රටටත්, ලෝකයටත් දායාද කිරීම බවය.
තවද භික්ෂූන් වහන්සේලාට පාලි, සංස්කෘත වැනි සම්භාව්ය භාෂා මෙන්ම නූතන ලෝකය ජය ගැනීමට අවශ්ය භාෂාමය දැනුම හා තාක්ෂණික මෙවලම් ලබා දීම හරහා ජාත්යන්තර මට්ටමින් බෞද්ධ දර්ශනය ප්රචාරය කිරීමට රජය උපරිම සහාය ලබා දීමට සූදානම් බවද ඇය මෙහිදී වැඩිදුරටත් අදහස් දක්වමින් පැවසුවාය.
අප අකමැති තත්ත්වයක් ඇතුළේ වුවද යම් යුදමය තත්ත්වයකට රට වැටී ඇති බව මහජන ආරක්ෂක නියෝජ්ය අමාත්ය සුනිල් වටගල මහතා අද(06) පාර්ලිමේන්තුවට ප්රකාශ කර තිබේ.
මෑත ඉතිහාසයේ අන් කවරදාටත් වඩා බිහිසුණු ක්රියාවලියක් දෙස බලාසිටින්නන් පිරිසක් බවට අප පත්ව ඇති බව ද එහිදී නියෝජ්ය අමාත්යවරයා වැඩිදුරටත් පැවසීය.
එමෙන්ම කවුරුන්, කෙලෙස වින්දිතයන් බවට පත් වේද යන්න පුරෝකථනය කළ නොහැකි තත්ත්වයක් උද්ගතව ඇති බවද ඔහු මෙහිදී සඳහන් කළේය.
පසුගියදා ගාලු මුහුදු සීමාවේදී අනතුරට පත් අයිරිෂ් ඩෙනා නෞකාවේ සිද්ධිය ඊට නිදසුන් සපයන බවද නියෝජ්ය අමාත්ය සුනිල් වටගල මහතා අවධාරණය කළේය.
එහිදී වැඩිදුර අදහස් දැක්වූ මහජන ආරක්ෂක නියෝජ්ය අමාත්ය සුනිල් වටගල මහතා,
“කරාපිටිය රෝහලට හදිසියේ භාර ගන්නට සිදුවූ වගකීම වැනි වගකීම් කවදා කොහොම කොයි ආකාරයෙන් තව කාට භාරගන්නට සිදුවේදැයි අපිට අනුමාන කිරීමට හැකියාවක් නැහැ. එවැනි තත්ත්වයක් අපේ රටේ ජන ජීවිතයට කළ හැකි බලපෑම අපිට කල්තියා අනුමාන කරන්න බැහැ. සැතපුම් දහස් ගණනක් ඈත තියෙන කරාපිටිය රෝහලත් මේ යුද්ධයේ දී මෘත ශරීරවලින් පිරී යන්න ගතවුණේ දවසයි. ඒ නිසයි අපි සූදානම් විය යුත්තේ. ඒ නිසයි අපි පූර්ව ආරක්ෂක උපක්රම භාවිත කළ යුත්තේ. හදිසි නීතිය පැනවීමෙන් අපිට අයන් ඩෝම් එකක් ලැබෙන්නේ නැහැ. හැකි පමණින් සූදානම්වීමට අවස්ථාව සැලසෙනවා”
