වන්දි බට්ඨයන් වීමට වටිනා කාලය නාස්ති නොකළ ශක්තිමත් යෞවනයක අද ඉරණම…
යුද්ධය අවසන සතුරා නැසූ ප්රීතියට කිරිබත් කා දහඅට වන්නම නැටූ අපිට දෙපිලේම නැසුනේ මිනිසුන් සතා සී පාවා බව හැගුණේ නැත.
යුධ බිම රූප පෙට්ටියෙන් පමණක් දැක බලා හුරේ තැබූ අයට මිහිදන්ව ගියේ දෙපිලේම ලේ මස් නහර කදුළු බව මතක නැත.
මේ රූප පෙළ සරසන පණ ගැහෙන ජීවිත රා්ද පුටු කිහිලිකරුවලට කොටු වුණේ දෙපිල සිව්පිල කොයිපිලෙත් ජීවිත රැක ගැනීමට කළ අරගලය නිසා බැව් මතක නැත.
තම තමන්ගේ ජාතියට ආගමට පමණක් ආ වඩන වන්දි බට්ඨයන් වීමට වටිනා කාලය නාස්ති නොකළ මේ ශක්තිමත් යෞවනය සිය මුළුමහත් ජීවිතයම කැප කළේ හුදු වෘත්තිය ඉටු කිරීමටම පමණක් නොවේ, යුද්ධයක් නිර්මාණය කිරීමට උඩ ගෙඩි නොදුන් මෙරට දමිළ, සිංහල, මුස්ලිම් සුවහසක් අහිංසක සිවිල් වැසියන් සුරැකීමටය.
රටේ සංවර්ධනයට තෑගි කරන්නට සිහින දකිමින් අම්මලා ලොකු මහත් කළ ඒ ශක්තිමත් දෑත් දෙපා උණ්ඩයට මිසයිලයට පුද කර යුධ බිමෙන් නික්ම ආ ඔවුන් අද සුරක්ෂිතද? මේ සටහන ලියවෙන්නේද ඒ පැනය සෑම මොහොතකම හදවතින් නගන උත්තුංග මිනිස් කැලක් නිසාවෙනි.
වසර 08ක් පුරා අඛණ්ඩව උතුම් නිහඩ මෙහෙවරක නියැලෙන ආර්යා පදනම සරසන එම උතුම් මිනිස් කැල මෙවර දෙසැම්බරයේ නෑගම් ගියේ ගජබා රෙජිමේන්තුවටය.
ඒ අනුව ඉකුත් දෙසැම්බර් 09 වන දා අනුරාධපුරයේ ගජබා රෙජිමේන්තුවේ වෙසෙන ආබාධිත හා පූර්ණ ආබාධිත සොල්දාදුවන්ට ඇවසි කළමනා කිහිපයක් තිළිණ කිරීම මූලික කර ගනිමින් ආර්යා පදනම විසින් උදාරයි ඔබ වැඩ සටහන එහි විධායක අධ්යක්ෂ හිටපු යුධ හමුදාපති ජෙනරල් ශාන්ත කෝට්ටේගොඩ මහතා, ගජබා රෙජිමේන්තුවේ ආඥාපති මේජර් ජෙනරල් ශවේන්ද්ර සිල්වා මහතා සහ ශ්රී ලංකා යුධ හමුදා පා බල අධ්යක්ෂක මේජර් ජෙනරල් චාගි ගාල්ලගේ මහතාගේ ප්රධානත්වයෙන් පැවැත්විය.
ඒ සදහා සහභාගී වූ ප්රවීණ සිනමා රංගවේදියෙකු වන බන්දු සමරසිංහයන් සභාවම සිනා සයුරේ ගැල්වුවද සොල්දාදුවන්ගේ කැපකිරීම් සිහිපත් කරමින් ඔවුන් අභියස සංවේදීව හඩා වැටුනේය. රණවිරුවන් වෙනුවෙන්ම සිය හදවතේ උපන් සුන්දර කවි සංකල්පනාවන් කිහිපයක් වේදිකාව මතදී ගායනා කළ ඔහු වේදිකාවෙන් නික්ම ගියේ දෑත් එක්කොට වැද ඔවුන්ට සිය ආචාරය පුදකරමිනි.
කලාකරුවන්, මාධ්යවේදීන්, හා වෘත්තීයවේදීන් රැසකගේ දහදිය කදුලින් නිර්මාණය වූ ආර්යා පදනමේ මෙම සත්කාර්යය පිළිබද ජෙනරල් ශවේන්ද්ර සිල්වා සිය අදහස් පළ කලේ මෙලෙසිනි.
”ගජබා රෙජිමේන්තුවේ සාමාජිකයන් ගණන 17000ක්. ඒ අතරින් 6200ක්ම ආබාධිතයි. නමුත් ඔවුන් කිසිදා මානසිකව ආබාධිත නැහැ. අදත් ඔවුන් නිර්භීතයි, සිතින් ජවසම්පන්නයි. නමුත් ඔවුන් අතීතයේ කළ උදාරතර කැප කිරීම් මෙරට ජනතාවගේ මතකයෙන් දිනෙන් දින ගිලිහී යන බව දැකීම දැඩි කණගාටුවට කරුණක්. එවන් යුගයක ආර්යා පදනම මෙසේ පැමිණ ඔවුන්ගේ අවශ්යතා විමසා බලා මේ සෙබළ ජීවිත නගා සිටුවීමට උර දෙනු දැකීම සැබවින්ම ලොකු සතුටක්. ”
ආර්යා පදනමට නායකත්වය දෙන විධායක අධ්යක්ෂ හිටපු යුධ හමුදාපති ජෙනරල් ශාන්ත කෝට්ටේගොඩ මහතා මෙවර වැඩ සටහන පිළිබ`ද අදහස් පළ කළේ මෙලෙසින්.
”අපි අද නිදහසේ හෙළන සෑම හුස්මක් පාසාම අපි මේ සොල්දාදුවන්ට ණයගැතියි. ඒ බව බොහෝ ශ්රී ලාංකිකයන්ට අමතක වෙලා. ඒ ගැන ඉතාම කණගාටුයි. මගේ වසර 35ක සේවා කාලය තුළදී යුද්ධය සහ මේ රණවිරුවන් සම්බන්ධ නොමියන අත්දැකීම් මගේ හදවතේ ගැඹුරුම තැනක තැන්පත් වෙලා තියනවා. මම අද විශ්රාම සුවයෙන් පසු වුණත් ආර්යා පදනම හා එක්ව රණවිරුවන් සදහා සිදු කරන සත්කාර්යන්වල නිරත වන්නේ එනිසයි.
ගජබා රෙජිමේන්තුවේ ආබාධිතව සිටින සොල්දාදුවන් ගණන 6200ක්. ඒ සියලූම පිරිසට ප්රමාණවත් අවශ්ය කළමනා සූදානම් කර ගන්න අපිට හැකි වුණේ නැහැ. නමුත් ඒ අතරින් 500ක් පිරිසට අවශ්ය රෝද පුටු කිහිපයක්, වායු සමීකරණ යන්ත්ර, විදුලි පංකා වැනි මිලියනයක් පමණ වටිනා උපකරණ තිළිණ කිරීමට අපිට හැකි වුණා.
මේ රණවිරුවන් ගතින් අබාධිත වුණත් සිතින් ඉතාමත් ශක්තිමත්. ඔබ අද හුස්ම ගන්නෙ සැනසිල්ලෙ ජීවත් වෙන්නෙ මොවුන් නිසයි. එවන් උදාර ජීවිත රෝද පුටු, කිහිලි කරු උඩට කොටු තබන්නෙ නැතිව නගා සිටුවන්න ශක්තියක් වෙන්න. ලොව පුරා සිටින සියලූම ශ්රී ලාංකිකයන්ට මා ඇරයුම් කරනවා ජාති බේද අත හැරදාලා මේ රණවිරුවන්ගේ ජීවිතය මීට වඩා යහපත් කිරීමට සහය දක්වන්න කියා.”
ආර්යා පදනම නිර්මාණය කරමින් එහි අධ්යක්ෂ ධූරය හොබවන චරිත් කිරි ඇල්ලයන් ආර්යා පදනමේ කොදු නාරටිය ලෙසින් හැදින්වීම අතිශයෝක්තියක් නොවේ. මෙවර ”උදාරයි ඔබ” වැඩ සටහන පිළිබ`ද ඔහු සිය අදහස් පළ කළේ මෙලෙසිනි.
”අනුරාධපුර ඓතිහාසික නගරය ගැන ඔබ අසා තිබෙන සුන්දරත්වය මේ රණවිරු ගම්මානයේ දකින්නට නැහැ. ගිනි ගහන අව්වේ මේ ආබාධිත සොල්දාදුවන් ගෙවන්නේ ඇත්තටම අතිශය දුෂ්කර ජීවිතයක්. දිගු ශාලාවල්වල සිය ගණනක් එක පෙළට දැමූ ඇදන්වලටම කොටු වී සිටින ආබාධිත සොල්දාදුවන් සිටිනවා. බොහොමයක් ශ්රී ලාංකිකයන්ට සිහිනෙන්වත් සිතාගත නොහැකි තරම් ඔවුන්ගේ තත්ත්වය ඛේදනීයයි. ඔවුන් දිගු කාලයක් පුරා ඇදන්වලට වෙලා ඉන්නෙ. දහදිය ගලමින් එක්තැන්ව සිටීම සිරුරේ පසු පිටේ සැරව ගලන තුවාල හැදිලා, විවිධ චර්ම රෝගවලට ගොදුරු වෙලා. ඇතැම් අයගේ රෝද පුටු කොහෙත්ම පාවිච්චියට ගන්න බැරි විදියට කැඩිලා බිදිලා ගිහින් ඔවුන් තවත් අන්ත අසරණ වෙලා.
මේ අය මේ විදියට දුක් විදින්නේ කා වෙනුවෙන් සටන් කළ නිසාද? මේ මුළු රටේම යුද්ධ කරන්න බැරි සියලූ ජාති ආගම්වලට අයත් මිනිසුන්ගේ හුස්ම පොද රැක දෙන්නයි ඔවුන් සටන් කළේ. මේ අය සටන් වැදුණේ එක ජාතියකට ආගමකට කඬේ යන්න නෙවෙයි, සිංහල දෙමළ මුස්ලිම් සියලූ මිනිස් ජීවිත රැක ගන්න. එසේනම් මෙ විදියට ඔවුන් අමතක කරදාලා අපේ ජීවිත විතරක් සුඛිත මුදිත කර ගැනීම සාධාරණද?
මම ආරාධනා කර සිටිනවා හෘද සාක්ෂියක් තිබෙන සියලූම ශ්රී ලාංකිකයන්ට, කිසිම ජාති බේදයක් නැතිව එන්න අපිත් එක්ක අත්වැල් බැද ගන්න, මේ රණවිරුන්ගේ ජීවිත ආලෝකමත් කරන්න. ”
BY: Nirosha Piyawadani
බොස්ටන් ලංකා විශේෂ වාර්තාකරු
