Author: Supun

තැපැල් ඡන්දය දින නියමයක් නොමැතිව කල්දැමීමට තීරණය කර ඇති බව මැතිවරණ කොමිසම පවසනවා.

අද මැතිවරණ කොමිසමේ පැවති සාකච්ඡාවකින් අනතුරුව මෙම තීරණය ගෙන ඇති බවයි සඳහන් වන්නේ

හෙට (15) දිනයේ දී තැපැල් ඡන්ද පත්‍රිකාවල බෙදාහැරීම් සිදුකිරීමට නොහැකි බව මැතිවරණ කොමිසම පැවසු බව ශ්‍රී ලංකා පොදුජන පෙරමුණේ මහ ලේකම් පාර්ලිමේන්තු මන්ත්‍රී සාගර කාරියවසම් පවසනවා.

අද (14) මැතිවරණ කොමිසන් සභාව සමඟ පැවති සාකච්ඡාවේ දී මේ බව දැනුම් දුන් බවයි මාධ්‍ය වෙත අදහස් දක්වමින් මන්ත්‍රීවරයා සඳහන් කළේ.

ඡන්ද පත්‍රිකා මුද්‍රණය සඳහා වැයවන වියදම් පියවා ගැනීමට අවශ්‍ය මුදල් ලබා දෙන තෙක් නිල ඡන්ද පත්‍රිකා මුද්‍රණය තවදුරටත් සිදු කළ නොහැකි බවට රජයේ මුද්‍රණ දෙපාර්තමෙන්තුව මැතිවරණ කොමිසමට දැනුම්දී ඇති බව මෙම සාකච්ඡාවේදී දැනුම්දුන් බවද පාර්ලිමේන්තු මන්ත්‍රී සාගර කාරියවසම් සඳහන් කළා.

ඒ අනුව තැපැල් ඡන්ද පත්‍රියා බෙදාහරින බව මීට පෙර දැනුම්දී තිබූ බවත් නමුත් අද පැවති සාකච්ඡාවේදී තැපැල් ඡන්ද පත්‍රිකා හෙට දිනයේ බෙදාහැරීමේ හැකියාවක් නොමැති බවට මැතිවරණ කොමිසම දැනුම්දුන් බවද ඔහු සඳහන් කළා.

ඡන්ද පත්‍රිකා මුද්‍රණය සඳහා වැයවන වියදම් පියවා ගැනීමට අවශ්‍ය මුදල් ලබාදෙන තෙක් ඉතිහාසයේ පළමු වතාවට ඡන්ද පත්‍රිකා මුද්‍රණය නැවතී ඇති බවට වාර්තා වන බව පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි පවසනවා.

අද (14) පැවති මාධ්‍ය හමුවකට එක් වෙමින් ඔහු සඳහන් කළේ, මීට පෙර පැවති සෑම මැතිවරණයකම බොහෝමයක් රාජ්‍ය ආයතන ගෙවීමේ පදනම මත මැතිවරණ කොමිසම සමඟ සහයෝගයෙන් කටයුතු කළ බවත් පළමුවතාවට මෙවර එම තත්ත්වය වෙනස් වී ඇති බවයි.

මෙහි වගකීම ආණ්ඩුව දැරිය යුතු බවත් රටේ ප්‍රජාතන්ත්‍රවාදය තනි ආණ්ඩුවක් විසින් යටපත් කරන තත්ත්වයක් උදාවී ඇති බවයි පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි සඳහන් කළේ.

මෙම තත්ත්වය වෙනස් කිරීමට නම් මැතිවරණ කොමිසමට මූල්‍ය ස්වාධීනභාවය ලබාදීම අනිවාර්යෙන්ම සිදුවිය යුතු බවත් මේ තුළින් ඉදිරියේදී මැතිවරණ කොමිසමට නිදහසේ මැතිවරණය පැවැත්වීමට ඉඩකඩ ලැබෙන බවද ඔහු සඳහන් කළා.

එසේම ආර්ථික සාධකය මත මැතිවරණය කල් දැමීමට කටයුතු කළහොත් අනාගතයේ එන ඕනෑම පාලකයෙකුට, පාර්ලිමේන්තු මැතිවරණයද ආර්ථික සාධක මත කල් දැමීමට හැකිවීමේ බරපතල අවදානමක් ඇති බවයි ඔහු වැඩිදුරටත් සඳහන් කළේ.

ඡන්දය නොපැවැත්වීමේ අදහසක් රජයට කිසිසේත් නොමැති බව කැබිනට් මාධ්‍ය ප්‍රකාශක අමාත්‍ය බන්දුල ගුණවර්ධන පවසනවා.

ඒ අනුව මාධ්‍යවේදියෙක් යොමුකළ ප්‍රශ්නයකට පිළිතුරු ලබාදෙමින් අමාත්‍යවරයා සඳහන් කළේ, මහා භාණ්ඩාගාරය එදිනෙදා මූල්‍ය තත්ත්වය සම්බන්ධයෙන් ගැටලුවකට මුහුණදී ඇති බවයි.

ණය ප්‍රතිව්‍යුහගතකරණය සිදු නොකළහොත් ණය ලබාගැනීමට හැකියාවක් නොමැති බවත්, අප්‍රේල් වන විට ජාත්‍යන්තර මූල්‍ය අරමුදලේ ණය සහනය ලබා ගැනීමට නොහැකිවුවහොත් රට ඉදිරියට ගෙනයාමට නොහැකි බවයි අමාත්‍යවරයා සඳහන් කළේ.

රටේ වත්මන් මුදල් තත්ත්වය සම්බන්ධයෙන් මහා භාණ්ඩාගාරය භාර ලේකම්වරයා විසින් අධිකරණයටද කරුණු ඉදිරිපත් කර ඇති බවයි කැබිනට් මාධ්‍ය ප්‍රකාශක අමාත්‍ය බන්දුල ගුණවර්ධන වැඩිදුරටත් සඳහන් කළේ.

පාර්ලිමේන්තුව එළැඹෙන 21 වනදා සිට 24 වනදා දක්වා නැවත රැස්වීමට නියමිත බව පාර්ලිමේන්තු සන්නිවේදන දෙපාර්තමේන්තුව පවසනවා.

ඒ අනුව ලබන අඟහරුවාදා (21) උදෑසන 09.30ට පාර්ලිමේන්තුව රැස්වීමට නියමිත බවයි පාර්ලිමේන්තු සන්නිවේදන දෙපාර්තමේන්තුව වැඩිදුරටත් සඳහන් කරන්නේ.