Author: Supun

තිරිඟු පිටි ජනතාවට අත්‍යවශ්‍ය භාණ්ඩයක් වන බැවින් 2023 ජුනි 16 මධ්‍යම රාත්‍රීයේ සිට ක්‍රියාත්මක වන පරිදි “නිශ්චිත භාණ්ඩ” යටතට ගෙන එමින් ගැසට් නිවේදනයක් නිකුත් කර තිබෙනවා.
ඒ අනුව වෙළඳ අමාත්‍ය නලීන් ප්‍රනාන්දු විසින් අදාළ ගැසට් නිවේදනය නිකුත් කර තිබෙනවා.

මිනුවන්‌ගොඩ, බොර‌ගොඩවත්ත ඔස්ටින් මාවත ප්‍රදේශයේ සිදුකළ වෙඩිතැබීමකින් පුද්ගලයින් දෙදෙනෙකු තුවාල ලබා ඇති බව පොලීසිය පවසනවා.

ඒ අනුව ඊයේ (17) රාත්‍රී මෝටර් රථයකින් පැමිණි පිරිසක් විසින් යතුරුපැදියකින් ගමන් කරමින් සිටි දෙදෙනෙකුට මෙලෙස වෙඩිතබා ඇති බවයි සඳහන් වන්නේ.

වෙඩි වැදීමෙන් තුවාල ලබා ඇත්තේ 33 හැවිරිදි සහ 43 හැවිරිදි පුද්ගලයින් දෙදෙනෙක් වන අතර සිද්ධිය සම්බන්ධයෙන් පොලීසිය වැඩිදුර විමර්ශන සිදු කරනවා.

උසස් පෙළ උපකාරක පන්ති ක්ෂේත්‍රය නියාමනයකට ලක් කිරීමට කටයුතු කරන බව උසස් අධ්‍යාපන රාජ්‍ය අමාත්‍ය ආචාර්ය සුරේන් රාඝවන් පවසනවා.

උසස් පෙළ පන්තිවල අයකරන ගාස්තු, එම පන්තිවල පවසන කරුණු ආදී අංශ කිහිපයක් පදනම් කර ගනිමින් මෙම නියාමනය සිදුකිරීමට අපේක්ෂා කරන බවයි මාධ්‍ය හමුවකට එක්වෙමින් රාජ්‍ය අමාත්‍යවරයා සඳහන් කළේ.

ඒ අනුව උපකාරක ගුරුවරුන්ගේ සංගමය සමඟ සාකච්ඡා කර උපකාරක පන්ති සිදුකරන පිරිස් සඳහා බලපත්‍රයක් හඳුන්වාදීමට කටයුතු කරන බවත් දේශන ශාලාවල ඇති පහසුකම් සම්බන්ධයෙන්ද එහිදී අවධානය යොමු කරන බවද රාජ්‍ය අමාත්‍යවරයා සඳහන් කළා.

වැඩබලන මුදල් අමාත්‍යවරයෙක් සහ වැඩබලන ආරක්ෂක අමාත්‍යවරයෙක් පත්කර තිබෙනවා.

වැඩබලන මුදල් අමාත්‍යවරයා ලෙස රාජ්‍ය අමාත්‍ය ශෙහාන් සේමසිංහ පත්කර ඇති අතර වැඩබලන ආරක්ෂක අමාත්‍යවරයා ලෙස ප්‍රමිත බණ්ඩාර තෙන්නකෝන් පත්කර ඇති බවයි සඳහන් වන්නේ.

නිල සංචාරයක් සඳහා ජනාධිපතිවරයා දිවයිනෙන් පිටත්ව යෑම හේතුවෙන් මෙම පත්කිරීම සිදුකර ඇති බවයි වැඩිදුරටත් සඳහන් වන්නේ.

පාර්ලිමේන්තුව ලබන 20 වනදා සිට 23 වනදා දක්වා රැස්වීමට පාර්ලිමේන්තු කටයුතු පිළිබඳ කාරක සභාවේදී තීරණය කර තිබෙනවා.
ඒ අනුව අයවැය කාර්යාලය පනත් කෙටුම්පත දෙවන වර කියවීමේ විවාදය 20 වනදා පැවැත්වීමට එහිදී තීරණය කර ඇති බවයි පාර්ලිමේන්තු සන්නිවේදන දෙපාර්තමේන්තුව සඳහන් කළේ.
දූෂණ විරෝධි පනත් කෙටුම්පත දෙවන වර කියවීමේ විවාදය ලබන 21 වනදා පැවැත්වීමට සහ පසුගිය පළමු වනදා ජනාධිපතිවරයා විසින් ජාතිය අමතා කළ කතාව පිළිබඳ සභාව කල්තැබීමේ විවාදය විපක්ෂයේ යෝජනාවක් මත ලබන 22 වනදා පැවැත්වීමට නියමිතයි.

ඉදිරි වසර 05 තුළ ඉංග්‍රීසි භාෂාව ඉගැන්වීමට අවශ්‍ය ගුරුවරු හා යටිතල පහසුකම් ලබාදී ඉංග්‍රීසි භාෂාව ජාතික භාෂාවක් ලෙස ඉදිරියට ගෙන ඒමට කටයුතු කරන බව ජනාධිපති රනිල් වික්‍රමසිංහ පවසනවා.
ඉංග්‍රීසි භාෂාවට පමණක් සීමා නොවී චීන, ජපන්, හින්දි, අරාබි වැනි භාෂා ඉගෙනගැනීමට අවස්ථාව සලසන බවයි ජනාධිපතිවරයා සඳහන් කළේ.
ජනාධිපති රනිල් වික්‍රමසිංහ මහතා මේ බව සඳහන් කළේ අද (16) පෙරවරුවේ අරලියගහ මන්දිරයේ පැවති 2018- 2022 අධ්‍යයන වසර – ජාතික ශික්ෂණ විද්‍යා ඩිප්ලෝමාධාරීන් සඳහා ගුරු පත්වීම් ප්‍රදානය කිරීමේ ජාතික උත්සවය අමතමින්.