කොමිෂන් සභා දෙකක පවතින පුරප්පාඩු සඳහා ව්යවස්ථාදායක සභාවේ අනුමැතිය ලබාදීම තවදුරටත් කල් දමා ඇති බව කථානායක මහින්ද යාපා අබේවර්ධන පවසනවා.
ඒ අනුව ඒ සම්බන්ධයෙන් තීරණය කිරීම සඳහා මේ මස 22 වන දින යළි ව්යවස්ථාදායක සභාව රැස්වීමට නියමිත බවයි සඳහන් වන්නේ.
ව්යවස්ථාදායක සභාව ඊයේ (02) රැස්වූ අතර එහිදී දැනට පුරප්පාඩුව පවතින මැතිවරණ කොමිෂන් සභාවේ සාමාජිකයින් දෙදෙනා සහ පොලිස් කොමිෂන් සභාවේ පුරප්පාඩු සාමාජිකයා පත්කිරීම පිළිබඳව අනුමැතිය ලබාදීමට නියමිතව තිබුණා.
අද (02) මධ්යම රාත්රියේ සිට ක්රියාත්මක වන පරිදි ජල ගාස්තු සංශෝධනය කරන බව ජාතික ජල සම්පාදන ජලාපවාහන මණ්ඩලයේ සාමාන්යාධිකාරීවරයා පවසනවා.
ඒ අනුව ගෘහස්ථව පරිභෝජනය කරන ජල ඒකක කාණ්ඩ කීපයක් යටතේ 30% සිට 50% අතර ගාස්තු වැඩිවීමක් සිදුවනු ඇති බවද, අඩු අදායම් ලබන පවුල්වලට බලපෑමක් මෙයින් සිදු නොවනු ඇති බවද ඔහු වැඩිදුරටත් සඳහන් කරනවා.
ජල ගාස්තු සංශෝධනයට අදාළ ගැසට් නිවේදනය රජයේ මුද්රණාලය වෙත යවා ඇති බවයි වාර්තා වන්නේ.
එක්සත් ජාතික පක්ෂය විසින් හරින් ප්රනාන්දු සහ මනුෂ නානායක්කාර යන අමාත්යවරුන්ට පනවා තිබූ පක්ෂ තහනම ඉවත් කර තිබෙනවා.
ඒ අනුව අද (02) පැවැති කෘත්යාධිකාරී මණ්ඩලයේදී එම තීරණය ගෙන ඇති බවයි වැඩිදුරටත් සඳහන් වන්නේ.
දේශීය කුකුළු මස් කිලෝවක මිල රුපියල් 100කින් අඩු කිරීමට දේශීය කුකුළු මස් නිෂ්පාදන කර්මාන්තකරුවන් එකඟතාව පළ කර තිබෙනවා.
ඒ අනුව කෘෂිකර්ම අමාත්ය මහින්ද අමරවීර සමඟ ප්රධාන කුකුළු මස් නිෂ්පාදනකරුවන් ඊයේ (01) පැවති සාකච්ඡාවේදී මෙම එකඟතාව පළ කර ඇති බවයි කෘෂිකර්ම අමාත්යාංශය සඳහන් කළේ.
ආනයනික බඩඉරිඟු කිලෝග්රෑමයක් සඳහා පනවා ඇති රුපියල් 75ක ආනයනික බද්ද මෙලෙස මස් මිල ඉහළ යාමට හේතුවී ඇති බවත් එය රුපියල් 25ක් දක්වා අඩු කරදෙන ලෙසයි අදාළ ව්යාපාරිකයින් අමාත්යවරයාගෙන් ඉල්ලා සිට තිබෙනවා.
මේ සම්බන්ධව ජනාධිපතිවරයා දැනුම්වත් කිරීමට පියවර ගන්නා බවයි එහිදී කෘෂිකර්ම අමාත්ය මහින්ද අමරවීර වැඩිදුරටත් සඳහන් කළේ.
2023 ලංකා ප්රිමියර් ලීග් ක්රිකට් තරගාවලියේ ඊයේ (01) පැවති තරගවලින් ජය ගැනීමට Dambulla Aura කණ්ඩායම සහ Galle Titans කණ්ඩායම සමත් වුණා.
ඒ අනුව ඊයේ පැවති පළමු තරගය Dambulla Aura කණ්ඩායම සහ Jaffna Kings කණ්ඩායම සමඟ පැවති අතර එහිදී කාසියේ වාසිය දිනාගත් Jaffna Kings කණ්ඩායම පළමුවෙන් පන්දුවට පහරදීමට තීරණය කළා.
ඒ අනුව ඔවුන් සිය පන්දුවාර 20 තුළ කඩුලු 7 ක් දැවී ලකුණු 129 ක් ලබාගත් අතර එම කණ්ඩායම වෙනුවෙන් චරිත් අසලංක ලකුණු 56 ක් ලබා ගත්තා.
පිළිතුරු ඉනිම ක්රීඩා කළ Dambulla Aura කණ්ඩායම පන්දුවාර 16 යි පන්දු දෙකක් අවසානයේ සිය ජයග්රාහී ඉලක්කය පසුකර යාමට සමත් වූ අතර එහිදී එම කණ්ඩායම වෙනුවෙන් අවිශ්ක ප්රනාන්දු ලකුණු 52 ක් ලබා ගත්තා.
ඉන් අනතුරුව ඊයේ පැවති දෙවන තරගය Galle Titans කණ්ඩායම සහ B-Love Kandy කණ්ඩායම සමඟ පැවති අතර එහිදී කාසියේ වාසිය දිනා ගත් Galle Titans කණ්ඩායම පළමුවෙන් පන්දුවට පහරදීමට තීරණය කළා.
Galle Titans කණ්ඩායම සිය පන්දුවාර 20 තුළ කඩුලු 5 ක් දැවී ලකුණු 180 ක් ලබාගත් අතර එම කණ්ඩායම වෙනුවෙන් Tim Seifert ලකුණු 74 ක්, Shakib Al Hasan ලකුණු 30 ක් හා ශෙවෝන් ඩැනියල් ලකුණු 25 ක් ලබා ගත්තා.
පිළිතුරු ඉනිම ක්රීඩා කළ B-Love Kandy කණ්ඩායමට පන්දුවාර 17 ක් අවසානයේ සියලු දෙනා දැවී ලබා ගැනීමට හැකියාව ලැබුණේ ලකුණු 97 ක් පමණක් වන අතර එම කණ්ඩායම වෙනුවෙන් වැඩිම ලකුණු ලබාගත්තේ අශේන් බණ්ඩාර වන අතර ඔහු ලකුණු 27 ක් ලබා ගත්තා.
ඒ අනුව Galle Titans කණ්ඩායම ලකුණු 83 ක විශිෂ්ට ජයක් වාර්තා කිරීමට සමත් වුණා.
සිනොපෙක්හි පළමු ඉන්ධන තොගය ගොඩබෑම ආරම්භ කර ඇති බව අමාත්ය කංචන විජේසේකර පවසනවා.
ඒ අනුව Twitter පණිවිඩයක් නිකුත් කරමින් අමාත්යවරයා සඳහන් කරන්නේ, දෙවන ඉන්ධන තොගයද අද (02) පැමිණෙන බවයි.
ඉන්ධන පිරවුම්හල් අලෙවිකරුවන් සමඟ ගිවිසුම් අත්සන් කර අවසන් වූ පසු සිනොපෙක් දිවයින පුරා ඉන්ධන පිරවුම්හල් 150ක් සමඟ ඛනිජ තෙල් මෙහෙයුම් ආරම්භ කරන බවයි අමාත්ය කංචන විජේසේකර වැඩිදුරටත් සඳහන් කළේ.
සෞඛ්ය වෘත්තීය සමිති හෙට (03) දිනයේ සිදුකිරීමට නියමිතව තිබූ වර්ජනය තාවකාලිකව අත්හිටුවීමට තීරණය කර තිබෙනවා.
ඒ අනුව මේ සම්බන්ධයෙන් සාකච්ඡා කිරීමට සෞඛ්ය ලේකම්වරයා විසින් අද (02) දිනයේ සාකච්ඡාවක් ලබාදීම හේතුවෙන් වර්ජනය අත්හිටුවීමට තීරණය කළ බවයි සෞඛ්යය වෘත්තීයවේදීන්ගේ විද්වත් සංගමයේ සභාපති, රවි කුමුදේශ් සඳහන් කළේ.
සෞඛ්ය සේවාවට අදාළ ගැටලු මාධ්යයට නිරාවරණය කිරීම තහනම් කරමින් සෞඛ්ය ලේකම්වරයා නිකුත් කරන ලද චක්රලේඛයට එරෙහිව සෞඛ්යය වෘත්තිය සමිති හෙට දිනයේ දී වැඩ වර්ජනයක් සිදුකිරීමට සැලසුම් කර තිබුණා.
දේශපාලකයින්ට සහ පුද්ගලයින්ට අවශ්ය පරිදි සහනාධාර ලබා දෙන ක්රමවේදය අවසන් කිරීමට පියවර ගන්නා බව මුදල් රාජ්ය අමාත්ය ශෙහාන් සේමසිංහ පවසනවා.
නියම දුප්පතුන්ට සහන ලබාදෙන විට එයට විරුද්ධ වන්නේ මුදල් ඇති පිරිස් බවයි මාධ්ය වෙත අදහස් දක්වමින් රාජ්ය අමාත්යවරයා සඳහන් කළේ.
එක් එක් දේශපාලන පක්ෂවලට, පුද්ගලයින්ට කැමති ආකාරයට සුබසාධන ඉවත් කිරීමට සහ ලබාදීමට හැකියාව තිබූ ක්රමවේදය ඉවත් කර ඇති බවත් වසර 25 ක් පැරණි ක්රමවේදයක් වෙනස් කර නව ක්රමවේදයක් හඳුන්වාදීමේදී අඩුපාඩු පැමිණිය හැකි බවද රාජ්ය අමාත්යවරයා පෙන්වා දෙනවා.
රටේ සුබසාධන දීමනා ලැබිය යුතු සුදුසුම කණ්ඩායමට සුබසාධන දීමනා වැඩි වශයෙන් ලබාදෙන්න කටයුතු කරන බවත් සමෘද්ධි ව්යාපාරය කප්පාදුවකට ලක් නොවන බවයි මුදල් රාජ්ය අමාත්ය ශෙහාන් සේමසිංහ වැඩිදුරටත් සඳහන් කළේ.
රට බංකොලොත්භාවයට පත්වීමේ හේතු සෙවීමට පත්කළ පාර්ලිමේන්තු විශේෂ කාරක සභාව හමුවට සියලු විශ්ව විද්යාලවල ආර්ථික විද්යා අධ්යයන අංශවල ප්රධානීන් අද (02) කැඳවා තිබෙනවා.
ඒ අනුව කාරක සභාවේ කටයුතු සඳහා මාර්ග සිතියමක් සකසා ගැනීම හා ඊට උපදෙස් ලබා ගැනීම මෙහි අරමුණ බවයි එහි සභාපති නීතිඥ සාගර කාරියවසම් සඳහන් කළේ.
රට බංකොලොත්භාවයට පත්වීමේ හේතු සෙවීම සඳහා එම පාර්ලිමේන්තු කාරක සභාව ශ්රී ලංකා පොදුජන පෙරමුණේ මහ ලේකම් නීතිඥ සාගර කාරියවසම්ගේ ප්රධානත්වයෙන් පසුගිය මස 6 වනදා පත් කළා.
ඔක්තෝම්බර් මාසය වන තෙක් ප්රමාණවත් වැසි නොලැබෙන බව කාලගුණ විද්යා දෙපාර්තමේන්තුව පවසනවා.
නිරිතදිග මෝසම ද ප්රමාණවත් පරිදි නොලැබුණු බවයි එහි අධ්යක්ෂිකා ශිරෝමනී ජයවර්ධන සඳහන් කළේ.
පවතින වියළි කාලගුණයත් සමග ජලාශවල ජල මට්ටම් ශීඝ්රයෙන් පහළ යමින් පවතින අතර ජලාශවල ධාරිතාව 33.3% ක් දක්වා පහළ ගොස් ඇති බවයි වාරිමාර්ග දෙපාර්තමේන්තුවේ ජල කළමනාකරණ අධ්යක්ෂිකා සුදර්ශනී විදානපතිරණ සඳහන් කළේ.
මහවැලි ජලාශ පද්ධතියේ ධාරිතාව ද 34% ක් දක්වා පහළ ගොස් ඇති අතර මේ හේතුවෙන් ජල විදුලි ජනනය සමස්ත විදුලි ජනනයෙන් 16% ක් දක්වා පහළ ගොස් ඇති බවයි ශ්රී ලංකා මහවැලි අධිකාරියේ නියෝජ්ය අධ්යක්ෂ ජනරාල් නිලන්ත ධනපාල සඳහන් කළේ.
