Author: Supun

මේ දිනවල පවතින වර්ෂාවත් සමග ඩෙංගු සහ චිකන්ගුන්යා රෝගය ව්‍යාප්ත වීමේ දැඩි අවදානමක් පවතින බව සෞඛ්‍ය අංශ පවසනවා.

දීර්ඝ සති අන්ත නිවාඩුව සහ පාසල් නිවාඩුව හේතුවෙන් බොහෝ පිරිස් විනෝද චාරිකා ගොස් ඇති බවත් මේ හේතුවෙන් නිවාස සහ අවට පරිසරය පිරිසිදු කර ගැනීමේ හැකියාව මග හැරී ගොස් ඇති බවයි ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ ලේකම් චමිල් මුතුකුඩ පෙන්වා දෙන්නේ.

මේ හේතුවෙන් මදුරුවන් බෝවන ස්ථාන වැඩි වී ඇති බවයි ඔහු පෙන්වා දෙන්නේ.

ඩෙංගු සහ චිකන්ගුන්යා රෝග පතුරුවනු ලබන්නේ එකම මදුරුවෙකු විසින් බවත් මෙම රෝග ව්‍යාප්ත වීම පාලනයට නිවෙස් අවට පරිසරය පිරිසිදු කරගන්නා ලෙසයි ඔහු අවධාරණය කරන්නේ.

ජේසුස් ක්‍රිස්තුස් වහන්සේගේ උත්ථානය සිහිපත් කරමින් ලොව පුරා කිතුණු බැතිමතුන් සමරනු ලබන පාස්කු දිනය අදට (20) යෙදී තිබෙනවා.

ජේසුස් ක්‍රිස්තුස් වහන්සේ සකල ලෝක වර්ගයා පාපයෙන් ගලවා ගැනීම සඳහා කුරුස ගස තුළ සිය ජීවිතය පූජාකර දින 03කට පසු උත්ථානය ලැබීම පාස්කු මංගල්‍යය ලෙස කිතුණුවන් සමරනවා.

ජේසුස් වහන්සේගේ දුක් විඳීම, මරණය සහ උත්ථානය සිහිපත් කරමින් කිතුණුවන් විවිධ වත් පිළිවෙත් අතර ගතකළ දින 40ක චතාරික සමය ද පාස්කු ඉරිදා දිනයෙන් අවසන් වන බවයි සඳහන් වෙන්නේ

පාස්කු ඉරිදා වෙනුවෙන් කොළඹ අගරදගුරු අති උතුම් මැල්කම් කාදිනල් රංජිත් හිමිපාණන් සහභාගී වූ විශේෂ දේව මෙහෙය ඊයේ රාත්‍රී කොටහේන ශාන්ත ලුසියා ආසන දෙව්මැදුරේ දී පැවැත් වුණා.

සිරි දළදා වන්දනාවට පැමිණෙන ජනතාව ඉහළ යාම හේතුවෙන් තවත් අතිරේක දුම්රිය දෙකක්  ධාවනයේ යෙදවීමට දුම්රිය දෙපාර්තමේන්තුව පියවර ගෙන තිබෙනවා.

ඒ අනුව ලබන 28 වැනිදා දක්වා මෙම අතිරේක දුම්රිය සේවා ක්‍රියාත්මක කිරීමට නියමිත බවයි දුම්රිය දෙපාර්තමේන්තුව සඳහන් කළේ.

ඒ අනුව කොළඹ කොටුවේ සිට මහනුවර දක්වා සෑම දිනකම පස්වරු 07.55 ට ‍එක් දුම්රියක් ගමන් ඇරඹීමට නියමිත අතර එම දුම්රිය මහනුවර දුම්රිය ස්ථානයට මධ්‍යම රාත්‍රී 12.00 වනවිට ළඟා වීමට නියමිත බවයි සඳහන් වන්නේ.

එමෙන්ම මහනුවර සිට කොළඹ කොටුව බලා සෑම දිනකම පස්වරු 08.30 ට දුම්රියක් ගමන් ඇරඹීමට නියමිත අතර එම දුම්රිය කොළඹ කොටුව දුම්රිය ස්ථානයට මධ්‍යම රාත්‍රී 12.00 වනවිට ළඟාවීමට නියමිත බවයි වැඩිදුරටත් සඳහන් වෙන්නේ.

අලුත් අවුරුදු උත්සව සමයේ කළ වැටලීම්වලදී, නීති විරෝධීව මත්පැන් අළෙවි කළ, සුරාබදු බලපත්‍ර හිමි මත්පැන් අළෙවිසැල් තුනකට මුද්‍රා තැබූ බව සුරාබදු දෙපාර්තමේන්තුව පවසනවා.ඒ අනුව, එම මත්පැන් අළෙවිසැල්වලට එරෙහිව උපරිමයෙන් නීතිය ක්‍රියාත්මක කරන බවයි එම දෙපාර්තමේන්තුව සඳහන් කළේ.

සුරාබදු දෙපාර්තමේන්තුව විසින් අප්‍රේල් 03 වැනිදා සිට 17 වැනිදා දක්වා වූ කාලය තුළ සුරාබදු වැරදි සම්බන්ධයෙන් වැටලීම් 1,235 ක් කර ඇති බවද, එම වැටලීම්වලදී පුද්ගලයන් 1,320 ක් අත්අඩංගුවට ගෙන නඩු පැවරීමට කටයුතු කරමින් සිටින බවද එම දෙපාර්තමේන්තුව පවසා සිටියා.

එහිදී, නීති විරෝධී ලෙස නිෂ්පාදනය කළ ස්ප්‍රීතු සන්තකයේ තබා ගැනීම, ප්‍රවාහනය කිරීම සහ විකිණීමට සම්බන්ධ වැටලීම් 658 ක් සහ නීතිවිරෝධී මත්පැන් ස්කාගාර පවත්වාගෙන යෑම සම්බන්ධ වැටලීම් 224 ක් සිදු කර තිබෙන බවයි වැඩිදුරටත් සඳහන් වන්නේ.