උමාඔය ව්යාපෘතිය යටතේ මෙගාවොට් 120ක විදුලි ධාරිතාවක් ලබන මාසයේ සිට ජාතික විදුලි පද්ධතියට එක් කිරීමට නියමිත බව වාරිමාර්ග රාජ්ය අමාත්ය ශෂීන්ද්ර රාජපක්ෂ පවසනවා.
වාරිමාර්ග අමාත්යාංශය හරහා මහා පරිමාණ බහුකාර්ය සංවර්ධන ව්යාපෘති ගණනාවක් දැනට ක්රියාත්මක වන බවත්, ඒ යටතේ ආරම්භ කළ උමා ඔය ව්යාපෘතියෙහි වැඩ කටයුතු අවසන් අදිරයට පැමිණ ඇති බවත් අමාත්යවරයා සඳහන් කරනවා.
උමාඔය ව්යාපෘතියට සමගාමීව කුඹුරු හෙක්ටයාර් 4500කට සහ නව කුඹුරු හෙක්ටයාර් 1500කට ජලය සැපයීමට ද නියමිත බවයි ඔහු වැඩිදුරටත් සඳහන් කළේ.
මියගිය සනත් නිශාන්ත අමාත්යවරයාගේ පුද්ගලික ආරක්ෂකයෙක් ලෙස සේවය නියුතුව සිටි, අනුරාධ ජයකොඩි පොලිස් කොස්තාපල්වරයාගේ පවුලේ ඥාතීන් වෙත මුදල් පරිත්යාගයක් ලබා දී තිබෙනවා.
ඒ අනුව වැඩබලන පොලිස්පති දේශබන්දු තෙන්නකෝන් අතින් ඔහුගේ පවුල වෙත රුපියල් ලක්ෂ 15ක මුදලක් ලබා දී තිබෙන බවයි සඳහන් වන්නේ.
එසේම, මිය ගිය පොලිස් කොස්තාපල්වරයා සැරයන් නිලයට උසස් කර තිබෙන බවද පොලිස් මාධ්ය කොට්ඨාසය නිවේදනයක් නිකුත් කරමින් පවසනවා.
අද (27) රාත්රී 7.00 සිට රාත්රි 8.30 දක්වා නිට්ටඹුව ශ්රී විජයරාම විහාරස්ථානයේ දුරුතු මහ පෙරහැර පැවැත්වීම හේතුවෙන් නුවර – කොළඹ ප්රධාන මාර්ගයේ වාහන ගමනාගමනය සීමා කරන බව පොලීසිය දැනුම් දෙනවා.
පෙරහැර නිට්ටඹුව මල්වත්ත ශ්රී බෝධි විහාරයේ සිට කොළඹ – මහනුවර ප්රධාන මාර්ගයේ නිට්ටඹුව මංසන්ධිය දක්වා ගමන් කර දකුණට හැරී, අත්නගල්ල මාර්ගයේ ගමන් කර නිට්ටඹුව ශ්රී විජයාරාම විහාරස්ථානයට පැමිණීමට නියමිතව තිබෙනවා.
පෙරහැර ගමන් කරන කාලය තුළ නුවර – කොළඹ ප්රධාන මාර්ගය මල්වත්ත හංදියේ සිට නිට්ටඹුව මංසන්ධිය දක්වා නුවර දෙසට වූ මං තීරුවේ රථ වාහන ගමනාගමනයට සීමා කරන අතර, කොළඹ දෙසට වූ මං තීරුව රථවාහන ගමනාගමනය සඳහා සාමාන්ය පරිදි විවෘතව පවතින බවයි පොලිසිය සඳහන් කරන්නේ.
මේ නිසා කොළඹ දෙස සිට නිට්ටඹුව නගරය පසුකර නුවර දෙසට ගමන් කිරීමට අපේක්ෂිත රියැදුරන්ට සහ මහජනතාවට විකල්ප මාර්ග භාවිත කරන ලෙස පොලීසිය ඉල්ලා සිටිනවා.
අද (26) මධ්යම රාත්රියේ සිට ක්රියාත්මක වන පරිදි පාර්ලිමේන්තුව වාර අවසාන කරමින් ජනාධිපති රනිල් වික්රමසිංහ විසින් ගැසට් නිවේදනයක් නිකුත් කර තිබෙනවා.
ඒ අනුව පාර්ලිමේන්තුවේ මීළඟ සැසි වාරය පෙබරවාරි 7 වැනිදා පෙරවරු 10.30ට ආරම්භ වන බවයි ජනාධිපතිවරයා සිය ගැසට් නිවේදනය මඟින් වැඩිදුරටත් දක්වා තිබෙන්නේ.
අදාළ ගැසට් නිවේදනය පහතින්.
ලිට්රෝ සමාගම පසුගිය වසරේ ලාභාංශ ලෙස උපයා ගත් රුපියල් බිලියන 1.5ක මුදලක් භාණ්ඩාගාරයට ලබාදීමට තීරණය කර තිබෙනවා.
ඒ අනුව පසුගිය වසරේ ලැබූ මුළු ලාභය රුපියල් බිලියන 7ක් බවයි එහි සභාපති මුදිත පීරිස් අද (26) පැවති මාධ්ය හමුවකට එක්වෙමින් සඳහන් කළේ.
පසුගිය ඔක්තෝබර් මාසයේද ලාභාංශ කොටසක් ගෙවූ බවත් එයත් සමඟ 2023 වසරේ රුපියල් බිලියන 3 ක් ලාභාංශ වශයෙන් රජයට ගෙවා ඇති බවයි ඔහු වැඩිදුරටත් සඳහන් කළේ.
ජාත්යන්තර මූල්ය අරමුදල සමඟ ගිවිසුම ඉදිරියට ක්රියාත්මක කරන්නේ කෙසේද යන්න පිළිබඳව එහි කළමණාකාර අධ්යක්ෂවරිය සමඟ සාකච්ඡාවකට එක්වන ලෙස පාර්ලිමේන්තුව නියෝජනය කරන සියලු දේශපාලන පක්ෂ නායකයන්ට ජනාධිපති රනිල් වික්රමසිංහ ආරාධනා කරනවා.
ජාත්යන්තර මූල්ය අරමුදල සමඟ වන ගිවිසුමෙන් ශ්රී ලංකාව ඉවත් වුවහොත් රටේ ආර්ථිකය පිළිබඳ නැවත විශ්වාසයක් තැබිය නොහැකි බව පෙන්වා දුන් ජනාධිපතිවරයා සියලු දෙනා එක්ව පොදු එකඟතාවයකින් රට ජයග්රහණය කරා මෙහෙයවිය යුතු බවයි සඳහන් කළේ.
පොරොන්දු දේශපාලනයෙන් සිදු වූයේ රටේ ආර්ථිකය විනාශ වීම බවත්, මැතිවරණයකට සූදානම් වනවා නම් රට ගොඩනැගිය හැක්කේ කෙසේද යන්න පිළිබඳ සැලැස්මක් සියලු දේශපාලන පක්ෂ වෙත තිබිය යුතු බවයි රේගු මූලස්ථානයේ දී අද (26) පෙරවරුවේ පැවති ජාත්යන්තර රේගු දින සැමරුම් උත්සවය අමතමින් ජනාධිපතිවරයා වැඩිදුරටත් සඳහන් කළේ.
මේ සම්බන්ධයෙන් නිකුත් කළ නිවේදනය පහතින්.
ජනාධිපතිවරයාගේ ප්රධානත්වයෙන් පසුගියදා පැවති අමාත්ය මණ්ඩල රැස්වීමේ දී දණ්ඩ නීති සංග්රහය සඳහා සංශෝධනයන් ඉදිරිපත් කිරීමට අමාත්ය මණ්ඩල අනුමැතිය හිමිවී තිබෙනවා.
දණ්ඩ නීති සංග්රහයේ සඳහන් ව්යස්ථාපිත ස්ත්රී දුෂණය පිළිබඳ නීති සංශෝධනය කිරීම සඳහාත්, ස්ත්රී දුෂණය සම්බන්ධ නීතියේ පවතින අඩුපාඩු නිවැරදි කිරීම සඳහා සහ පිරිමි ළමයින් දුෂණය කිරීම සාපරාධී ක්රියාවක් බවට පත්කිරීම සඳහාත් දණ්ඩ නීති සංග්රහය සඳහා සංශෝධන හඳුන්වා දීමට 2021.01.18 සහ 2021.06.28 යන දිනවල පැවති අමාත්ය මණ්ඩල රැස්වීම්වලදී අනුමැතිය ලබාදී ඇති බව අදාළ නිවේදනයේ සඳහන්.
එම පනත් කෙටුම්පත රජයේ ගැසට් පත්රයේ පළ කිරීමටත්, ඉන් අනතුරුව අනුමැතිය පිණිස පාර්ලිමේන්තුවට ඉදිරිපත් කිරීමටත්, අධිකරණ අමාත්යවරයා ඉදිරිපත් කළ යෝජනාවට අමාත්ය මණ්ඩල අනුමැතිය හිමිවී තිබෙනවා.
දුම්රිය තුළ පිහිටුවා ඇති ආපනශාලා හදිසි පරික්ෂාවන්ට ලක් කිරීමට තීරණයක් ගෙන ඇති බව ශ්රී ලංකා මහජන පරික්ෂකවරුන්ගේ සංගමයේ ලේකම් ශානක බෝපිටිය පවසනවා.
පසුගියදා මීනගයා දුම්රියේ ආපනශාලාව පරීක්ෂාවට ලක්වූ අතර, එහිදී එම ආපනශාලාව අපිරිසිදු ලෙස පවත්වාගෙන යන බව නිරීක්ෂණය වීමත් සමග ඉහත තීරණය ගත් බවයි ඔහු සඳහන් කළේ.
මේ අතර, පරීක්ෂාවට ලක්වූ මීනගයා දුම්රිය ආපනශාලා මැදිරිය අධිකරණ නියෝගයක් මත තාවකාලිකව අත්හිටුවීමට පියවර ගෙන තිබෙනවා.
රාජ්ය අමාත්ය සනත් නිශාන්තගෙන් පුරප්පාඩු වන පාර්ලිමේන්තු මන්ත්රී ධුරය සඳහා මනාප අනුපිළිවෙල අනුව ජගත් ප්රියංකර සුදුසුකම් ලබා තිබෙනවා.
2020 වර්ෂයේ පැවති පාර්ලිමේන්තු මැතිවරණයේදී ශ්රී ලංකා පොදුජන පෙරමුණ පුත්තලම දිස්ත්රික්කයෙන් ඔහු මනාප 40,527ක් ලබාගෙන තිබුණා.
ජගත් ප්රියංකර ශ්රී ලංකා පොදුජන පෙරමුණෙන් තරඟ වැදුනේ විමල් වීරවංශගේ නායකත්වයෙන් යුතු ජාතික නිදහස් පෙරමුණ නියෝජනය කරමින්.
විදුලි බිල නොගෙවීම හේතුවෙන් බම්බලපිටිය දුම්රිය ස්ථානයේ විදුලිය විසන්ධි කර තිබෙනවා.
විදුලිය නොමැතිව දින දෙකක් පමණ දුම්රිය ස්ථානයේ කටයුතු කුප්පි ලාම්පු හා වෙනත් ආධාරක මඟින් පවත්වාගෙන ගොස් ඇති බවයි වාර්තා වන්නේ.
මේ සම්බන්ධයෙන් දුම්රිය ස්ථානාධිපති සංගමයෙන් සිදුකළ විමසීමකදී ඔවුන් සඳහන් කළේ, මේ වන තෙක් විදුලි සැපයුම නැවත ලබාදීමක් සිදුකර නොමැති බවයි.
