Author: Supun

ජුනි මස 06 වැනිදා සජිත් ප්‍රේමදාස නොඑන විවාදයට අනුර කුමාර දිසානායක සමඟ තමන් සහභාගී වීමට කැමති බව මව්බිම ජනතා පක්ෂයේ නායක දිලිත් ජයවීර පවසනවා.

ජාතික ජන බලවේගයේ නායක අනුර කුමාර දිසානායක, සමගි ජන බලවේගයේ නායක සජිත් ප්‍රේමදාසට විවාදයකට ආරාධනා කර ඇති බවද, සජිත් ප්‍රේමදාස අහිංසකයෙක් බැවින් ඔහුට කරදර නොකර තමන් සමඟ විවාදයකට එන ලෙස අනුර කුමාර දිසානායකට ආරාධනා කරන බවයි ඔහු සඳහන් කළේ.

තමන් අනුර කුමාර දිසානායකගෙන් අසීරු ප්‍රශ්න කිසිවක් නොඅසන නමුත්, ඔහුට තමන්ගෙන් කැළණියේ නයා ගැන, ධම්මික පැණිය ගැන සහ ඇන්ටිජන් ගැන ඇතුළු ඕනෑම දෙයක් ගැන ප්‍රශ්න ඇසිය හැකි බව ඔහු වැඩිදුරටත් සඳහන් කළා.

ජාතික ජන බලවේගයේ මුළු දේශපාලනයම ඇත්ත මත පදනම් වූ දේශපාලනයක් බව එහි නායක අනුර කුමාර දිසානායක පවසනවා.

සමාජයේ ඇත්ත සහ බොරුව කියා දෙකක් ඇති බවද, තම පක්ෂය ඇත්ත මත පදනම් වුවද, වත්මන් පාලකයින්ගේ මුළු දේශපාලනයම බොරුව මත පදනම් වූ දේශපාලනයක් බවයි ඔහු පෙන්වා දෙන්නේ.

ඔවුන් ජනතාවට ඇත්තටම ආදරය කරනවා නම්, ජනතාවට විදින බෙහෙතට වස දැමීමටත්, ජනතාව බොන තේකට එක්කරන සීනිවලට අය කරන බද්දෙන් සොරකම් කිරීමටත්, මුළු රටේම වාහන පර්මිට් නතර කර තිබියදී පර්මිට් ගැනීමට ලියුම් අත්සන් කිිිිිරීමටත් ඔවුන්ට හැකි දැයි ඔහු ප්‍රශ්න කර සිටිනවා.

තම පක්ෂයේ සියලු දෙනා සැබැවින්ම මෙරට ජනතාවට හොඳ ජීවිතයක් සහ යහපත් රාජ්‍යයක් අපේක්ෂා කරන අය බවත්, මෙම ඇත්ත සහ බොරුව අතර වෙනස ජනතාවට හෙළිදරව් කළ යුතු බවයි ඔහු වැඩිදුරටත් අවධාරණය කළේ.

තමන් සමඟ සම සමව රටට අගයක් එකතු කිරීම සඳහා වේගයෙන් වැඩ කළ හැකි වෙනත් කිසිඳු සමකාලීනයෙකු නොමැති බව විපක්ෂ නායක සජිත් ප්‍රේමදාස පවසනවා.

කෙසේ නමුත් තමන්ගේ වේගය අඩු වී යමෙකු තමාට වඩා පරිණතව දක්ෂ ආකාරයෙන් ඉදිරියට එන බව තමාට වැටහෙයි නම්, පොදුජනතාව තමාට යන්නට කියන තෙක් නොසිට සුදුස්සාට තැන දෙන බවද ඔහු සඳහන් කළා.

නමුත් මේ මොහොතේ තමන්ට ඉතා හොඳ ගමනක් යා හැකි බව තමන් තරයේ විශ්වාස කරන බවයි YouTube වැඩසටහනකට එක් වෙමින් ඔහු අවධාරණය කළේ.