Author: Supun

පෞද්ගලික හා අර්ධ රාජ්‍ය අංශයේ සේවකයන්ගේ සේවාවන් වඩාත් කඩිනමින් ඉටු කිරීම සදහා කම්කරු අමාත්‍යාංශය විසින් නව WhatsApp අංකයක් හඳුන්වා දීමට පියවර ගෙන තිබෙනවා.

ඒ අනුව කම්කරු අමාත්‍යාංශය හා කම්කරු දෙපාර්තමේන්තුව වෙතින් සහන, මැදිහත්වීම් ඉල්ලා සේවකයින් විසින් ඉදිරිපත් කරන ලිපි සම්බන්ධයෙන් කඩිනම් ප්‍රතිචාර දැක්වීම සදහා 070 722 7877 යන WhatsApp අංකය මේ අනුව හඳුන්වා දී ඇති බවයි එම අමාත්‍යංශය සඳහන් කළේ.

මෙරට පෞද්ගලික හා අර්ධ රාජ්‍ය අංශයේ සේවකයන්ගේ සේවා ගැටලුවලට කඩිනම් සහන සැලසීම කම්කරු දෙපාර්තමේන්තුවේ අරමුණ බවයි සඳහන් වෙන්නේ.

ඒ අනුව මහජනතාවගේ කාලය සහ වියදම් අවම කිරීම හා කඩිනම් ප්‍රතිචාර දැක්වීම වර්ධනය කිරීමටත්, නිලධාරීන්ගේ කාලය කළමනාකරණය කරගැනීමේ පහසුව සදහාත් මෙම WhatsApp අංකය හදුන්වා දී ඇති බව කම්කරු නියෝජ්‍ය අමාත්‍ය මහින්ද ජයසිංහ සඳහන් කළේ.

අනුරාධපුර දිස්ත්‍රික් ලේකම් කාර්යාලයේ සියලු නිලධාරින් එක්ව අද (01) උදෑසන, 2025 නව වර්ෂය සැමරී ය. ඒ අනුරාධපුර දිස්ත්‍රික් ලේකම් රංජිත් විමලසූරිය මහතාගේ ප්‍රධානත්වයෙන්. කාර්යාලයට සේවය ලබා දෙන සියලු අංශවල නිලධාරින් මේ අවස්ථාවට සහභාගී වූහ.
බෞද්ධ ආගමික වතාවත් සිදු කලේ , ශ්‍රී සම්බුද්ධත්ව ජයන්ති විහාරාධිපති උතුරු මධ්‍යම දෙදිසාවේ ප්‍රධාන සංඝනායක පූජ්‍ය නුගේතැන්නේ පඥ්ඥානන්ද නායක හිමිපාණන් වහන්සේ යි.
ආගමික වතාවත්වලින් අනතුරුව ජනාධිපති ලේකම් කාර්යාලයේ දී ආරම්භ කළ “Clean Sri Lanka,, වැඩසටහන රූපවාහිනිය ඔස්සේ සියලුම රාජ්‍ය නිලධාරින්ට නැරඹිමට සැලැස්වී ය.
නව අවුරුදු සැමරුම් වැඩසටහනේ දී දිස්ත්‍රික් ලේකම්වරයා විසින් කාර්යාලයේ දැක්ම හා මෙහෙවර නව වර්ෂය තුල ක්‍රියාවට නැන්විමේ දී ගතයුතු ක්‍රියාමාර්ග පිලිබදව පැහැදිලි කරන ලදි. එහිදී අප සිටින්නේ කොතැන ද , යා යුත්තේ කවර ඉලක්කයකට ද සහ එම ඉලක්කය සපුරාගත හැක්කේ කෙසේ ද යන්න පිලිබදව සවිස්තරාත්මකව පැහැදිලි කළේ ය. අනුරාධපුර දිස්ත්‍රික්කයේ දැනට පවතින දරිද්‍රතා මට්ටම මෙම වසරේ දී 01% කින් අවම කිරීමටත් , වී නිෂ්පාදනය 0.5% කින් ඉහළ නැන්වීම මෙන්ම ව්‍යවසායක ක්ෂේත්‍රයේ නියැලෙන පිරිස් තවත් 02% කින් පමණ වැඩි කිරිම යනාදිය ඉලක්ක කරගන්නා බව පැවසූ අතර ඒ සදහා සියලු නිලධාරීන් කාර්යක්ෂම කටයුතු කිරිමේ වැදගත්කම ද පෙන්වා දුන්නා.
වැඩසටහනින් අනතුරුව කාර්යාලයේ සියලුම නිලධාරින් වෙනුවෙන් තේ පැන් සංග්‍රහයක් ද පැවැත්විණි.
අතිරේක දිස්ත්‍රික් ලේකම්වරුන් වන සන්ධ්‍යා අබේසේකර , ශාමිලා වික්‍රමආරච්චි යන මහත්මීන් , ක්‍රම සම්පාදන අධ්‍යක්ෂ සුගත් නයනානන්ද , ප්‍රධාන ගණකාධිකාරි චමින්ද හේරත් , සහකාර දිස්ත්‍රික් ලේකම් ප්‍රසන්න යසරත්න යන මහත්වරුන් ඇතුළු කාර්යාලයේ සියලුම මාණ්ඩලික නිලධාරින් හා අනෙකුත් නිලධාරී පිරිස මේ අවස්ථාවට එක් වූහ.

කාන්තා හා ළමා කටයුතු අමාත්‍ය සරෝජා සාවිත්‍රි පෝල්රාජ් වැලිකඩ බන්ධනාගාරයේ නිරීක්ෂණ චාරිකාවක නිරත වී තිබෙනවා.

වැලිකඩ බන්ධනාගාරයේ කාන්තා අංශයේ රැඳවියන් සහ දිවා සුරැකුම් මධ්‍යස්ථානයේ දරුවන් හමුවී ඇය ඔවුන්ගේ සුවදුක් විමසා බලා ඇති බවයි අමාත්‍යංශය සඳහන් කළේ.

ඒ අනුව එහිදී අදහස් දැක්වූ අමාත්‍යවරිය සඳහන් කළේ, Clean Sri Lanka වැඩසටහන යටතේ කාන්තා හා ළමා අමාත්‍යාංශය විසින් වඩා හොඳ හෙට දවසක් වෙනුවෙන් නව වැඩපිළිවෙළක් ක්‍රියාත්මක කරන බවයි.

පිළිකා රෝගී දරුවන් වෙනුවෙන් ඇටමිදුළු හා රුධිර ජනන සෛල බද්ධ කිරීමේ ඒකකයක් මහරගම අපේක්ෂා රෝහලේ දී අද (02) විවෘත කර තිබෙනවා.

ඒ අනුව ශ්‍රී ලංකා ගුවන් හමුදා ශ්‍රම දායකත්වයෙන් හා රුහුණු කතරගම මහා දේවාලයේ මුල්‍ය අනුග්‍රාහකත්වයෙන් මෙය ඉදිකර ඇති බවයි සඳහන් වෙන්නේ.

පිළිකා රෝගී දරුවන් වෙනුවෙන් රජයේ රෝහලක් තුළ ඉදිකරනු ලැබූ පළමු හා එකම ඇටමිදුළු හා රුධිර ජනන සෛල බද්ධකිරීමේ ඒකකය ද මෙය ලෙසයි සඳහන් වෙන්නේ.

සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස, සෞඛ්‍ය අමාත්‍යාංශයේ ලේකම් වෛද්‍ය අනිල් ජාසිංහ, ගුවන් හමුදාධිපති එයාර් මාර්ෂල් උදේනි රාජපක්ෂ හා කතරගම දේවාලයේ බස්නායක නිළමේ ඩිෂාන් ගුණසේකර එම විවෘත කිරීමේ අවස්ථාවට එක්ව තිබෙනවා.