හසන්තිකා බිනේෂනී කොඩිතුවක්කු මෙවර සිහිනයක ස්වරය නොහොත් Dream Voice රියලිටි තරඟාවලියේ පස්වන වාසනාවන්ත ජයග්රාහිකාව බවට පත් විය. සිංහල ඉංග්රීසි මෙන්ම හින්දි භාෂාව ලිවීම කියවීම මැනවින් ප්රගුණ කළ නිසාවෙන් ඇයට මෙම භාෂා ත්රිත්වයේම ගීත හොදින් ගායනා කිරීමේ හැකියාව ඇත. උසස් පෙළ ප්රතිඵලයටත් පෙර සංගීත විශාරද උපාධිය. ලබා ගන්නා ඇයට විවාහයෙන් පසුව විදේශ ගත වීමට සිදු වන නිසා සංගීතයෙන් මදක් ඈත් වන්නට සිදුවිය. මේ වන විට සුරතල් දියණියක් දෙදෙනෙක්ගේ මවක් ගෘහනියක්ව කටයුතු කරන්නීය. සියල්ල සමඟ විදේශ ගත ශ්රී ලාංකිකයන්ට නවමු වින්දනීය ආශ්වාදයක් ලබා දුන් ඩ්රීම් වොයිස් වේදිකාවේ තවත් ජයග්රාහිකාවක් ගලායන ජීවිතයේ ස්වර වැයුම ගැන අදහස් දැක්වුයේ මෙලෙසිනි.
“මේක මගේ පළමු රියලිටි අත්දැකීම. වසර 14ක් දැන් විදෙශ් ගත වෙලා. හිරවෙලා එක්තැන් වෙලා විනෝදාංශයක් පමණක් වෙලා තිබුණ මගේ සංගීත හැකියාව නැවත එළියට ගන්න ඩ්රීම් වොයිස් වේදිකාව ඉවහල් වුණා. මල්ලිගෙ යාලුවෙක් මම කියන ගීතයක් දැකලා මල්ලිට කියලා තිබුණා මෙහෙම තරඟයක් තියෙනවා කියලා. එහෙමයි ඩ්රීම් වොයිස් එකට අයදුම් කළේ. මම ඇත්තටම මෙය සංවිධානය කළ චිත්රාල් ද මේල් මහතාට සහ එම මහත්මියට ස්තුතිවන්ත වෙනවා. ඩ්රීම් වොයිස් මගේ සංගීත පිපාසාවට දිය දෝතක් බවට පත් වුණා. ඒවගේම මගේ හැමදේම මගේ මහත්තයා ගයාන් චතුරංග කොඩිතුවක්කු. ඔහු ගණකාධිවරයෙක්. එයා නැත්නම් මේ දේවල් මෙහෙම සාර්ථකව කර ගන්නත් බැහැ.
මෙතැනට එන්නට නිසි ගුරුහරුකම් ලබා දෙන්නේද සුවහසක් දරුවන්ට නිසි පාර පෙන්වූ දෙපලකි. ඔවුන් අනෙක් දරුවන්සේ සිය දරුවන්ටද පොතපතේ මෙන්ම කලාවේ අධ්යාපනයද නියමාර්යෙන් ලබා දුන් නිසා හසන්තිකා මෙන් නිර්මාණශීලි සම්පුර්ණ දරුවෙක් බිහිවී ඇත. ඒ කතාව,
“මගේ පියා පියා සරත් අතපත්තු විශ්රාමික විදුහල්පති කෙනෙක්. අම්මා විශ්රාමික ගුරු උපදේශිකාවක්. මට ඉන්නේ අක්කයි මල්ලියි. පොඩි කාලේ අම්මා රෑට කෑම හදනකල් තාත්තා අපි තුන් දෙනාව එකතු කරගෙන ගීත ගායනා කරනවා. ඔහු සංගීතයට පුදුමාකාර ලෙසින් ලෙන්ගතුවූ චරිතයක්. ගීත ලියන්න වගේම තනු යොදන්නත් වාද්ය භාණ්ඩ වාදනය කිරීමේ හැකියාවත් ඔහුට තිබුණා. තාත්තා තමයි අපි තුන් දෙනාව සංගීතයට යොමු කළේ. පුංචි කාලෙම විශාරද මාලනී බුලත්සිංහල මියගේ පංති ගියා ඔතනදි අපි විවිධ ප්රසංග රුපවාහිනී වැඩසටහන් වලටත් සම්බන්ද වුනා. සාමාන්ය පෙළට සංගීතය විෂයක් ලෙස මම ගන්නවා මෙතැනදී නිතා මංගලිකා සහ ඉන්ද්රනී යන පාසල් ගුරු දෙපළත් දුන් ගුරුහරුකම් බොහොමයි. ඔය කාලේදී පාසලේ විවිධ තරඟ, අන්තර් පාඨශාලා තරඟ, සමස්ත ලංකා තරඟ වලින් ජයග්රහණ රාශියක් ලබා ගත්තා.පසුව සමිතා මුදුන්කොටුව මියගේ පියා ආචර්ය ප්රේමදාස මුදුන්කොටුව සර් ගෙන් සංගීතය හැදෑරුවා. ඔතනදි මම සංගීත විශාරධ විභාගේ සමත් වෙලා 1999 උපාධිය ලබා ගන්නවා. පසුව උසස්පෙළට අනුලා විදුහලට ඇතුලත් වුණා. සංගීතයට තියෙන ආශාව නිසාම කලා විශය ධාරාවෙන් උසස් පෙළ සමත්ව ජයවර්ධනපුර වි.වි. ඇතුලත් වුණා. උසස් පෙළ අපේ ගුරුවරිය ලෙස කටයුතු කළේ විශාරද දීපිකා ප්රියදර්ශනී මිය. විශ්ව විද්යාලයේදීත් සංගීතය අනු විෂයක් ලෙසින් හදාරමින් ජනමාධ්ය සහ ජන සන්නිවේදන උපාධියක් ලබා ගත්තා. හරිම සුන්දර මතක නම් ගොඩයි. කොහොමහරි පස්සේ චිත්රපට සංස්ථාවේ සේවය කිරීමට අවස්ථාවක් ලැබුණා. එහෙම ඉන්නකොට මට සංගීත ගුරුපත්වීමකුත් ලැබුණා. ඒත් ඒ වෙද්දී විවාහ වෙලා විදේශ ගත වීමට තීරණය කරලා තිබුණ නිසා ඒ දේවල් දාලා මෙහෙ එන්න සිද්ධ වුණා.
ඔවුන් එලෙස මිට වසර 14කට පෙර බොට්ස්වානා බලා පියාසර කරන අතර එතැනින් බර්මියුඩා සිට මේ වන විට කැනඩාවේ ටොරොන්ටෝහි මිසිසාගා වල ජිවත් වෙයි. අද ඇයගේ බාල සොහොයුරා සංගීත නිපුන් ශාස්ත්රපති අසිත් චනුෂ්ක අතපත්තු සෞන්දර්ය කලා විශ්ව විද්යාලයේ ජේයෂ්ට කථිකාචාර්යවරයෙකව කටයුතු කරමින් ඔවුන් ඉගෙන ගත් දේ දැයේ දරුවන්ට බෙදා දෙන්නේය. ජිවතය මෙසේ ගලා යද්දී, සංගීතය ඔවුනොවුන්ගේ ජීවිතය වෙලා ගනිද්දී, මේ සියල්ල ඉටු කල දෙමවුපියන් දෑස් දල්වා ඔවුන් දෙස සතුටින් බලා සිටින්නේය. හසන්තිකා සහ ගයාන්ගේ පුංචි සමනළියන් තෙනුකි සහ සෙනුලි දෙදෙනා ද ගයන්නට දක්ෂය. පරම්පරා කිහිපයකටම සංගීතය මෙසේ සම්මිශ්රණය වීම හරි අපූරුය. ඩ්රීම් වොයිස් නොදැනුවත්ව තවත් එක් උදාර කටයුත්තක් මෙතැනදී උරදී ඇත. ඒ මෙම තරඟාවලිය දෙස බලා සිටින තෙනුකි සහ සෙනුලි දැන් සිංහල ගීත ගයන්නට ප්රිය වන්නියන් බවට පත්ව හමාරය. සිංහල අපේකමට ද ඩ්රීම් වොයිස් එලෙසින් මාවතක් විවිර කර ඇත.
මෙපමණකට දක්ෂව මෙපමනකටම උගත් ඈ ට ජයග්රාහී කිරුළ ගිලිහුණේ ඇයි යන්න ප්රශ්නකි, එයට ද ඇය සතු පිළිතුරකි. “විනිශ්චය මණ්ඩලයට මම ගරු කරනවා. ඔවුන් සාධාරණ විනිශ්චයක් ලබා දුන්නා. තරඟ කරුවන් සියල්ලෝම අති දක්ෂයි. එම අවස්ථාවේ තිබුණ චකිතය නිසා මට මගේ උපරිමය එළියට දෙන්න බැරි වුණා කියලා මට හිතෙනවා. මගේ උපරිමය පෙන්වන්න නොහැකි වීම ගැන පොඩි දුකක් තියෙනවා. නමුත් බොහෝ කලකට පසු මගේ ගායනයට නැවත පණක් ලැබුණා. ඒ ගැන හරිම සතුටුයි”.
හෙට දවස ගැන හසන්තිකගේ හිතේ නැගෙන්නේ මෙවැන්නකි. ” මගේ සැමියා මට මගේ නමින් යු ටියුබ් චැනලයක් සකස් කර දීලා තියෙනවා.ඒ ඔස්සේ මේ දින වල කවර්ස් වගයක් කරලා තියෙන්නේ. Boston Lanka එකෙනුත් අපේ ගීතයක් කිරීමට අවස්ථාව ලබා දී තියෙනවා. ඒ ගමන් මගේ මල්ලි එක්ක එකතු වෙලා මගේම නිර්මාණ කිහිපයක් කිරීමට බලාපොරොත්තුවෙන් ඉන්නේ.
හසන්තිකාගේ කතාවේ තව බොහෝදේ ඇති බව අපි දනිමු. සියල්ල පුංචි බ්ලොග් එකකට කැටි කල නොහැකි බවද ඔබත් මමත් හොදින්ම දනිමු. එනමුදු අපේ මේ සංවාද සටහන අවසන් කරන්නට මට තවත් එක් පුංචි ප්රශ්ණයක් විය.
හිතට එකඟව කියන්න ඔබ එදා සංගීත තිබූ බැදීම එක්ක ගුරුපත්වීම අරන් ලංකාවේ හිටියනම් ද හොද ? නැත්නම් ඔහේ ගිය එකද හොද ? කිසිසේත්ම බලාපොරොත්තු නොවූ වෙනස්ම ප්රශ්ණයක් හමුවේද ඇය මෙලෙස හඬ අවධි කළාය. ” ඇත්තටම දෙමවුපියන් සහ සහෝදරයන් දෙදෙනාගෙන් වෙන්වීම ගැන පුංචි දුකක් පමණයි තියෙන්නේ. මට ඒ කාලේ විශ්ව විද්යාලයේ කථිකාචාර්යවරියක් වීමේ ලොකු අපේක්ෂවකුත් තිබුණා. නමුත් අද දරුවන්ගේ අනාගතේ ගැන හිතනකොට මෙහෙ ජිවිතේ හොදයි කියලා හිතෙනවා. මෙහෙ ජිවිතේ නිදහස් සතුටින් ඉන්නවා අපි. ඒවගේම ලංකාවෙත් තත්වේ ඉදිරියට හොද වෙයි කියලත් හිතෙනවා.