ඒකාබද්ධ විපක්ෂයේ නායක, පාර්ලිමේන්තු මන්ත්‍රී දිනේෂ් ගුණවර්ධන මහතාගේ පාර්ලිමේන්තු කටයුතු සතියකට අත්හිටුවීමට පාර්ලිමේන්තුව තීරණය කර තිබේ.
ජාතික නිදහස් පෙරමුණේ නායක, විමල් වීරවංශ ඇතුළු එම පක්ෂයේ නියෝජිතයින්ට පාර්ලිමේන්තුවේ ස්වාධීන පක්ෂයක් හෝ කණ්ඩායමක් ලෙස නියෝජනය විය නොහැකි බවට කථානායකවරයාගේ තීන්දුව ලබාදීමත් සමග ඒකාබද්ධ විපක්ෂයේ පිරිසක් කලහකාරී ලෙස හැසිරෙන්නට වූහ.
එහිදී මෙම පිරිස් පාර්ලිමේන්තු සභා ගර්භය තුළට පැමිණ පාර්ලිමේන්තුවේ කටයුතුවලට බාධා පැමිණවීම නිසා විනාඩි 10ට පාර්ලිමේන්තුව අත්හිටුවීමට ක්‍රියා කෙරුණු අතර අනතුරුව අයුතු ලෙස හැසිරුණු දිනෙෂ් ගුණවර්ධන මහතාට පාර්ලිමේන්තු සභා ගර්භයෙන් පිටව යන ලෙස කථානායකවරයා විසින් නියෝග කරන ලදී.
එම නියෝගය පිළිනොගනිමින් දිගින් දිගටම කටයුතු කළ මන්ත්‍රීවරයාට කථානායකවරයා තෙවන වරටත් පාර්ලිමේන්තුවෙන් පිටව යන ලෙස නියෝග කිරීමෙන් පසු පාර්ලිමේන්තු සභා ගර්භය තුළට වේත්‍රධාරී සමග පොලීසිය කැඳවීමට සිදුවිය.
එහෙත් පිටවයාම ප්‍රතික්ෂේප කළ දිනේෂ් ගුණවර්ධන මහතා තමා පාර්ලිමේන්තුවෙන් පිටව යන්නේ තමාට එරෙහිව මන්ත්‍රීවරයෙකු විසින් යෝජනාවක් ගෙනවිත් එය පාර්ලිමේන්තුවෙන් සම්මත කළහොත් පමණක් බව කියා සිටිමින් තවදුරටත් පාර්ලිමේන්තු කටයුතුවලට බාධා කරමින් එහි රැඳී සිටියේය.
අවසන අමාත්‍ය ලක්ෂ්මන් කිරිඇල්ල මහතා විසින් දිනේෂ් ගුණවර්ධන මහතා පාර්ලිමේන්තුවෙන් පිටව යා යුතු බව හා සතියක කාලයක් ඔහුගේ පාර්ලිමේන්තු කටයුතු අත්හිටුවිය යුතු බවට යෝජනාවක් ගෙන ආ අතර එම යෝජනාව සභා සම්මතවීම සිදුවිය.
මන්ත්‍රීවරයා පාර්ලිමේන්තුවෙන් ඉවත්කිරීමේ මෙම යෝජනාවට පක්ෂව ඡන්ද 85 ලැබී ඇති අතර විපක්ෂව ලැබී ඇත්තේ ඡන්ද 22 ක් පමණි.
පාර්ලිමේන්තු මන්ත්‍රීවරුන්ගෙන් 114ක් ඡන්දය විමසන අවස්ථාවේ පාර්ලිමේන්තුවේ නොසිටි බවත්, තිදෙනෙකු ඡන්දය ප්‍රකාශ කිරීමෙන් වැළකී සිටි බවත් අද දෙරණ වාර්තාකරු පවසයි.
