Category: news_sub

eZ Cash / M Cash මඟින් සිදුකරන නීති විරෝධී මත්ද්‍රව්‍ය ජාවාරම් මැඩලීමට යුක්ති මෙහෙයුමට සමගාමීව පොලිසිය විශේෂ වැඩපිළිවෙළක් ආරම්භ කරයි…..
වර්තමාන සමාජය තුළ මත්ද්‍රව්‍ය මිලදී ගැනීම සඳහා මුදල් ගෙවීමට යොදා ගන්නා ක්‍රමවේදයක් වන eZ Cash සහ M Cash භාවිත කරමින් මත්ද්‍රව්‍ය සඳහා මුදල් ගෙවන පුද්ගලයින් අත්අඩංගුවට ගැනීමේ විශේෂ මෙහෙයුමක් 2024.04.06 දින සිට 2024.04.10 දින දක්වා යුක්ති මෙහෙයුමට සමගාමීව පොලිස්පති දේශබන්දු තෙන්නකෝන් මහතාගේ උපදෙස් පරිදි ආරම්භ කර ඇත.

ඒ අනුව, 2024.04.06 දිනය තුළ දිවයින පුරා සිදුකරන ලද මෙහෙයුම් වලදී eZ Cash සහ M Cash භාවිතා කරමින් නීති විරෝධී මත්ද්‍රව්‍ය ජාවාරම් සිදු කරනු ලබන පුද්ගලයින් 198 දෙනෙකුගෙන් තොරතුරු ලබාගෙන ඇත.

මොවුන් සම්බන්ධයෙන් සිදුකරන ලද වැඩිදුර විමර්ශන වලදී මත්ද්‍රව්‍ය ජාවාරම්කරුවන් 18 දෙනෙකු සම්බන්ධයෙන් බැංකු ගිණුම් වාර්තා ඔස්සේද, තවත් මත්ද්‍රව්‍ය ජාවාරම්කරුවන් 71 දෙනෙකු සම්බන්ධයෙන් දුරකථන කුළුණු විශ්ලේෂණ වාර්තා ඔස්සේද පොලිස් මත්ද්‍රව්‍ය නාශක කාර්යාංශය මගින් වැඩිදුර විමර්ශන සිදුකරනු ලබන බව පොලිස් මුලස්ථානය සදහන් කරයි.

ගල්පාත- චන්දන පෙරේරා
2024 -4-6

ඊයේ (5)රාත්‍රී 7.45ට පමණ තම නිවස ඉදිරිපිටදීම රිය අනතුරකින් මියගිය පුද්ගලයෙක් නිසා උරන වූ පුද්ගලයින් එකතුවී අනතුර සිදුවූ යතුරුපැදිය ගිනිතබා විනාෂ කල ඇතැයි බුලත්සිංහල පොලිසිය පවසයි.

මෙසේ මරණයට පත් වී ඇත්තේ හල්වතුර වත්තපහල කොටසේ පදිංචි
මාරි මුත්තු නැමති ( 65) හැවිරිදි පුද්ගලයෙක් බව පොලීසිය පවසයි.මියගිය පුද්ගලයා බීමත්ව සිට ඇති අතර
නිවස ඉදිරිපිට වෙළඳසැලට ගොස් නැවත පැමිණෙමින් සිටියදී මෙම අනතුර සිදුවී ඇති බව පරීක්ෂණ වලදී අනාවරණය වී ඇත.

යතුරුපැදිකරු ඉංගිරිය දෙස සිට බුලත්සිංහල දෙසට ගමන් කරමින් සිටියදී බෝගහා හංදිය අසලදී මෙම අනතුර සිදුවී ඇති අතර එම ස්ථානයේදීම අනතුරට මුහුන පැ පුද්ගලයා මිය ගොස් ඇති බව පොලීසිය පවසයි.

එම ස්ථානයේ සිටි පුද්ගලයින් විසින් බුලත්සිංහල පොලිසියට මේ පිළිබඳව දැන්වීමෙන් පසු පොලිස් නිලධාරීන් එම ස්ථානයට පැමිණ යතුරුපැදිකරු අත්අඩංගුවට ගෙන ඇත. එම ස්ථානයේ පරීක්ෂණ පැවැත්වීමට රැඳී සිටි පොලිස් නිලධාරීන්ට මිය ගිය පුද්ගලයින්ගේ සිරුර රෝහල වෙත රැගෙන යාමට නොදී සිට ඇති අතර අනතුර සිදු කල යතුරුපැදියටද හානි කරමින් ප්‍රකෝපකාරී ලෙස හැසිරෙමින් පසුව යතුරුපැදියට ගිනි තබා ඇත. එම අවස්ථාවේ 200 පමන පිරිසක් එම ස්ථානයේ සිට ඇති බව පොලීසිය පවසයි.

පසුව තත්වය පාලනය කිරීම සදහා ඉංගිරිය පොලිසියේ නිලධාරීන් සහ බුලත්සිංහල පොලිසිය නිලධාරීන් එම ස්ථානයට තත්වය පාලනය කලේය.සිරුර බුලත්සිංහල රෝහල වෙත රැගෙන ගොස් ඇති අතර ගිනි තබා විනාශවී ගිය යතුරුපැදිය බුලත්සිංහල පොලිසිය වෙත රැගෙනයන ලදි.

යතුරුපැදීය ගිනි තැබූ සැකපිට පුද්ගලයන් දෙදෙනෙකු පොලීසිය මගින් අත්අඩංගුවට ගෙන ඇති අතර දේහය බුලත්සිංහල රෝහලේ සිට මරණ පරීක්ෂණය සඳහා හොරණ රෝහල වෙත රැගෙන ගොස් ඇති අතර අද (6)මරණ පරීක්ෂණය සිදු කිරීමට නියමිතයි

මේ පිළිබඳ වැඩිදුර පරීක්ෂණ බුලත්සිංහල පොලිසියේ ස්ථානාධිපති ප්‍රධාන පොලිස් පරීක්ෂක චන්දන විධානගේ මහතා පො.සැ.31320 අජන්ත, පො.කෝ.204136 ලියනගේ ඇතුළු නිලධාරින් පරීක්ෂණ මෙහෙයවයි.

දුම්රිය සේවාවට වසර 100ක් පිරීම නිමිත්තෙන් අද (05) සිට “දුන්හිඳ Odyssey” නමින් විශේෂ දුම්රියක් ධාවනය ආරම්භ කර තිබෙනවා.

ඒ අනුව මෙම දුම්රිය අඟහරුවාදා‍, සිකුරාදා සහ ඉරිදා දිනවල පෙරවරු 6.30 ට කොළඹ කොටුවෙන් ආරම්භ වන අතර බදුල්ලට සවස 5.37 ට ළඟා වන බවයි දුම්රිය දෙපාර්තමේන්තුව සඳහන් කළේ.

එසේම සඳුදා‍, බදාදා සහ සෙනසුරාදා දිනවල බදුල්ලේ සිට කොළඹ කොටුව දක්වා මෙය ධාවනය වීමට නියමිතයි.

එහිදී බදුල්ලෙන් පෙරවරු 8.00 ට ගමන් ආරම්භ කර පස්වරු 6.51 ට කොළඹ කොටුවට ළඟාවීමට නියමිත බවයි සඳහන් වන්නේ.

මෙම සංචාරක දුම්රිය හොස්ටේල් දියඇල්ල, ශ්‍රී පාද කන්ද, ශාන්ත ක්ලෙයාර් දියඇල්ල, එල්ජින් දියඇල්ල, සමිට් ලෙවල්, අංක 18 බිංගෙය, සුළං කපොල්ල (ඉදල්ගස්හින්න – හපුතලේ), කිතල් ඇල්ල දියඇල්ල, ආරුක්කු 9 පාලම, දෙමෝදර බිං ගෙය යන ස්ථාන වලදී සංචාරකයින්ට නැරඹුම් ස්ථාන ලෙස නැවැත්වීමට නියමිතයි.

අදාළ දුම්රිය කාලසටහන හා ආසන වෙන් කිරීමේ ගාස්තු පහතින්.

ඡායාරූප – RDMNS Railway Network

අද (05) සිට ලබන 15 වන දා දක්වා දිවයිනට සෘජුවම ඉහළින් සූර්යයා පිහිටන කාලගුණ විද්‍යා දෙපාර්තමේන්තුව පවසනවා.

ඒ අනුව අද දහවල් 12.12 ට බලපිටිය, ඇල්පිටිය , මොරවක සහ තිස්සමහාරාම යන ප්‍රදේශවලට හිරු මුදුන් වීමට නියමිත බවයි එම දෙපාර්තමේන්තුව වැඩිදුරටත් සඳහන් කළේ.

සිය වැඩසටහනට අදාළ දෙවැනි සමාලෝචනය අවසන් කිරීමෙන් අනතුරුව, ශ්‍රී ලංකාව එම වැඩසටහනේ පරාමිතීන්ට අනුකූලව ජාත්‍යන්තර වාණිජ ණය හිමියන් සමග ගිවිසුම්වලට එළැඹෙනු ඇති බවට අපේක්ෂා කරන බව ජාත්‍යන්තර මූල්‍ය අරමුදල පවසනවා.

ශ්‍රී ලංකාවේ සාර්ව ආර්ථික ප්‍රතිපත්ති ප්‍රතිසංස්කරණ ඵල දැරීම ආරම්භ වී ඇති බවයි ජාත්‍යන්තර මූල්‍ය අරමුදලේ සන්නිවේදන දෙපාර්තමේන්තුවේ අධ්‍යක්ෂ ජූලි කොසැක් සඳහන් කළේ.

සැලකිය යුතු රාජ්‍ය මූල්‍ය ප්‍රතිසංස්කරණවලින් පසුව රාජ්‍ය මූල්‍ය ශක්තිමත් වී ඇති අතර, මෙම ප්‍රතිසංස්කරණ ගම්‍යතාව අඛණ්ඩව පවත්වාගෙන යාම ඉතා වැදගත් බවයි ඇය වැඩිදුරටත් ප්‍රකාශ කළේ.

දමිතා අබේරත්න සහ ඇගේ සැමියා අප්‍රේල් 17 දක්වා රක්ෂිත බන්ධනාගාරගත කර තිබෙනවා.

ඒ කොළඹ කොටුව මහෙස්ත්‍රාත්වරයා විසින්.

අතුරුදන්ව සිටි ඔවුන් දෙදෙනා ඊයේ කොළඹ කොටුව අධිකරණයට පැමිණි අවස්ථාවේ දී අපරාධ පරීක්ෂණ දෙපාර්තමේන්තුවේ නිලධාරීන් අත්අඩංගුවට ගත්තා.

ඒ විදේශ රැකියා ලබාදෙන බව පවසා මුදල් වංචා කිරීමේ චෝදනාවකටයි.

අදාළ චෝදනාවට ඔවුන් දෙදෙනාට විදෙස් ගමන් තහනමක් ද පනවා තිබෙනවා.

ප්‍රවීණ රංගන ශිල්පිනි දමිතා අබේරත්න සහ ඇගේ සැමියා අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබෙනවා.

මුදල් වංචාවකට අදාළව ඔවුන් අපරාධ පරීක්ෂණ දෙපාර්තමේන්තුව මඟින් අත්අඩංගුවට ගෙන ඇති බවයි වාර්තා වෙන්නේ.

උත්සව සමයේ භාණ්ඩ මිලදී ගැනීමේදී ජනතාව වැඩි අවධානයක් යොමු කළ යුතු බව පාරිභෝගික සේවා අධිකාරිය පවසනවා.

ඒ අනුව භාණ්ඩ මිලදී ගැනිමේදී නිෂ්පාදිත දිනය හා කල් ඉකුත් වීමේ දිනය පිළිබඳ වැඩි සැලකිල්ලක් දැක්විය යුතු බවයි පාරිභෝගික සේවා අධිකාරියේ වැටලීම් සහ විශේෂ විමර්ශන ඒකකයේ අධ්‍යක්ෂ සංජය ඉරසිංහ සඳහන් කළේ.

එළඹෙන අලුත් අවුරුදු සමය මුල් කර ගනිමින් අත්‍යවශ්‍ය ආහාර වැටලීම් මේ වන විට දෛනිකව සිදු කරන බවද ඔහු ප්‍රකාශ කළා.