Category: news_main

ශ්‍රී ලංකාව සිය ජාත්‍යන්තර බැඳුම්කර ප්‍රතිව්‍යුහගත කිරීම සාර්ථකව අවසන් කරන ලද බව මුදල් අමාත්‍යංශ ලේකම් මහින්ද සිරිවර්ධන පවසනවා.

මෑත ඉතිහාසයේ වඩාත් සංකීර්ණ සහ අභියෝගාත්මක ස්වෛරී ණය ප්‍රතිව්‍යුහගත කිරීමේ කාර්යයක් අවසන් වූ බවයි ඔහු සිය X ගිණුමේ සටහනක් තබමින් සඳහන් කර සිටින්නේ.

මේ බව මුදල් අමාත්‍යාංශයද නිල වශයෙන් නිවේදනයක් නිකුත් කරමින් සඳහන් කර තිබෙන අතර, එයට අනුව ස්වෛරී බැඳුම්කර හිමියන්ගෙන් 98%ක් බැඳුම්කර හුමවාරුව සඳහා කැමැත්ත පළ කර තිබෙන බවයි වැඩිදුරටත් සඳහන් වන්නේ.

නව පාසල් වාරය ආරම්භ වීමට පෙර සිසුන් අතට පාසල් නිල ඇඳුම් ලබාදීමට උපදෙස් දී ඇති බව අධ්‍යාපන අමාත්‍යාංශය පවසනවා.

ඒ අනුව, එම නිල ඇඳුම් කට්ටල කොට්ඨාස අධ්‍යාපන කාර්යාල හරහා පාසල් වෙත යොමු කරන බවයි එම අමාත්‍යාංශයේ ලේකම් නාලක කළුවැව සඳහන් කළේ.

2025 වර්ෂය සඳහා පාසල් නිල ඇඳුම් අවශ්‍යතාවය රෙදි මීටර් මිලියන 11,817ක් වන අතර, නිල ඇඳුම් ලබා දීමට නියමිත සිසුන් සංඛ්‍යාව 4,640,086ක් බවද අධ්‍යාපන අමාත්‍යාංශය පවසා සිටිනවා.

මෙවර පාසල් නිල ඇඳුම් සියල්ලම චීන රජයේ ප්‍රදානයක් ලෙස ලැබී තිබෙනවා.

නව ප්‍රජාතන්ත්‍රවාදී පෙරමුණේ ජාතික ලැයිස්තු මන්ත්‍රීධුරය සඳහා ෆයිසර් මුස්තාෆාගේ නම ගැසට් කර තිබෙනවා.

ඒ අනුව ඊට අදාළ ගැසට් නිවේදනය මැතිවරණ කොමිසම විසින් නිකුත් කර ඇති බවයි වැඩිදුරටත් සඳහන් වෙන්නේ.

අදාළ ගැසට් නිවේදනය පහතින්.

අද රටේ ජනාධිපති අනුර කුමාර දිසානායකද නැතහොත් ඩඩ්ලි සිරිසේන දැයි සැකයක් මතුවන බව හිටපු පාර්ලිමේන්තු මන්ත්‍රී සමන් රත්නප්‍රිය පවසනවා.

පාලන මිලට සහල් ලබාදීමට නොමැකිව යළි සහල් මෝල් හිමියන් කැඳවා මේසයට ගසා 220 ට තිබූ සහල් 230 කර ලබාදුන් බවයි අද (11) පැවති මාධ්‍ය හමුවකට එක්වෙමින් හිටපු මන්ත්‍රීවරයා සඳහන් කළේ.

ඔවුන් මීට පෙර ප්‍රකාශ කළේ, වී වැවෙන රටේ සහල් පිටරටින් ගෙන්වන ආණ්ඩුවක් කුමකටද යන්න බවත් අපටත් අසන්නට ඇත්තේ මේ ආණ්ඩුව කුමකටද බවයි හිටපු පාර්ලිමේන්තු මන්ත්‍රී සමන් රත්නප්‍රිය වැඩිදුරටත් ප්‍රකාශ කළේ.

වත්මන් ආණ්ඩුව සම්බන්ධයෙන් විශාල බලාපොරොත්තුවක් ජනතාව තබා තිබුණද, ජනතාවගේ ප්‍රධාන ආහාරය වන බත් ටික සොයාගැනීමට නොහැකිව කාලය ගත කරන තත්ත්වයකට පත්ව ඇති බව හිටපු පාර්ලිමේන්තු මන්ත්‍රී අජිත් රාජපක්ෂ පවසනවා.

සහල් හිඟයක් රට තුළ ඇතිවීමට කිසිදු හැකියාවක් නොමැති බවත් ආණ්ඩුව විසින් සහල් මෝල් හිමියන් සතුටු කිරීමට ගත් ක්‍රියාමාර්ග නිසා මෙම ගැටලුව ඇතිවී ඇති බවයි මාධ්‍ය වෙත අදහස් දක්වමින් ඔහු සඳහන් කළේ.

සහල් ප්‍රශ්නයක් විසඳා ගැනීමට නොහැකි ආණ්ඩුවක් රට තුළ තිබී ඵලක් නොමැති බවයි හිටපු පාර්ලිමේන්තු මන්ත්‍රී අජිත් රාජපක්ෂ වැඩිදුරටත් ප්‍රකාශ කළේ.

යූ.එල්. උදය කුමාර පෙරේරා සුරාබදු කොමසාරිස් ජනරාල් තනතුරට පත්කිරීමට මුදල්, ක්‍රමසම්පාදන සහ ආර්ථික සංවර්ධන අමාත්‍යවරයා ලෙස ජනාධිපති අනුර කුමාර දිසානායක ගෙන ආ යෝජනාවකට කැබිනට් අනුමැතිය හිමිවී තිබෙනවා.

ඔහු මේ වන විට දේශීය ආදායම් දෙපාර්තමේන්තුවේ ජ්‍යෙෂ්ඨ කොමසාරිස්වරයෙක් වශයෙන් සේවය කරන බවයි සඳහන් වෙන්නේ.

ඒ අනුව මෙතෙක් සුරාබදු කොමසාරිස් ජනරාල් තනතුරේ වැඩ බැලූ යූ.ඩී.එන්. ජයවීර නැවත දේශීය ආදායම් දෙපාර්තමේන්තුවට අනුයුක්ත කර තිබෙනවා.

සිරියානු කැරලිකරුවන් එරට ඩැමැස්කස් අගනුවරට ඇතුළු වී ඇති බව විදෙස් මාධ්‍ය වාර්තා කරනවා.

කැරලිකරුවන් ඊයේ (07) ඩැමැස්කස් අගනුවර ආසන්නයේ හොම්ස් නගරයේ ද සිය පාලනයට නතු කර ගැනීමට සමත්ව ඇති බවයි සඳහන් වෙන්නේ.

අගනුවරට තදාසන්න පෙදෙස් රැසක් කැරලිකරුවන්ගේ පාලනයට යටත් වී ඇති අතර  සිරියානු ජනාධිපති බෂර් අල් අසාද් පෞද්ගලික ගුවන්යානයකින් රටින් පළාගොස් ඇති බවයි සඳහන් වෙන්නේ.

වසර 54ක් පුරා සිරියාවේ පැවති කෘෘර අසාද් පාලනය මේ වනවිට බිඳ වැටී ඇති බවයි විදෙස් මාධ්‍ය වාර්තා වැඩිදුරටත් සඳහන් කරන්නේ.