Category: news_main

Miss World 2025 අවසන් මහා තරගයට ශ්‍රී ලංකාව නියෝජනය කරමින් සහභාගී වන අනුදි ගුණසේකර වෙත ජනාධිපති අනුර කුමාර දිසානායක විසින් උණුසුම් සුබ පැතුම් එක්කර තිබෙනවා.

අද (31) දින පස්වරුවේ සිය X (ට්විටර්) ගිණුමේ සටහනක් තබමින් ජනාධිපතිවරයා මේ බව සඳහන් කළා.

මෙවර ලෝක රූ රැජින තරගයේ අවසන් මහා උළෙල අද ඉන්දියාවේ හයිද්‍රාබාද් නුවරදී පැවැත්වීමට නියමිතයි.

අදාළ X පණිවුඩය පහතින්.

2025 Miss World තරගාවලියේ අවසන් මහා තරඟය අද (31) සවස ප.ව. 6.30ට ඉන්දියාවේ හයිද්‍රාබාද් හි HITEX සම්මේලන මධ්‍යස්ථානයේදී ආරම්භ වීමට නියමිතව තිබෙනවා.

රටවල් 100කට අධික සංඛ්‍යාවකින් රූප රාජිනියන් 100කට අධික දෙනෙකු මෙම තරගය සඳහා සහභාගී වූ අතර, ශ්‍රී ලංකාව නියෝජනය කරමින් ඊට සහභාගි වූ අනුදි ගුණසේකර මෙම තරගාවලිය තුල කැපී පෙනෙන දක්ෂතා දැක්වීමට සමත් වුණා.

Miss World තරගාවලියේදී පසුගිය මාසය පුරාවට, රූ රැජිණියන් විසින් ක්‍රීඩා අභියෝගතා, දක්ෂතා ප්‍රදර්ශනය කිරීම්, Head-to-Head Challenge, Top Model Competition, සහ Multimedia Challenge ඇතුළු තරග මාලාවකට සහභාගී වුණා.

මෙවර ලෝක රූ රැජින තේරීමේ ආකෘතියට අනුව, අර්ධ අවසන් පූර්ව වටයට 40 දෙනෙකු තෝරාගනු ලබන අතර, පසුගිය දින කිහිපයේ එක් එක් තේමා යටතේ පැවැත් වූ ඉසව් හරහා දැක්වූ දක්ෂතා මත ඉන් 18 දෙනෙකු දැනටමත් ඒ සඳහා තෝරාගෙන තිබෙනවා.

එම ‍තෝරාගත් 18 දෙනා අතර ශ්‍රී ලංකා රූ රැජින වන අනුදි ගුණසේකර තේරී නොමැති නමුත්, අද පැවැත්වෙන අදියරේදී දක්වන දක්ෂතා අනුව ඇයට අර්ධ අවසන් පූර්ව වටය සඳහා සුදුසුකම් ලැබීමට වැඩි ඉඩක් ඇති බවයි සඳහන් වන්නේ.

මෙම 40 දෙනාගෙන් ඇරඹී, එක් එක් මහාද්වීප කළාපයෙන් පස් දෙනෙකු ‍ලෙස 20 දෙනෙකු දක්වා අඩුවන අතර, පසුව එක් එක් මහාද්වීප කළාපයෙන් අවසන් තරගකරුවන් දෙදෙනෙකු බැගින් තෝරා ඉහළම 08 දෙනා තෝරා ගනු ලබනවා.

අවසාන වටයේදී, සෑම මහාද්වීපයකින්ම එක් නියෝජිතයෙකු බැගින් කිරුළ සඳහා තරඟ කිරීමට නියමිතයි.

ඔවුන් අතරින් ජයග්‍රාහකයා 2025 ලෝක රූ රැජින ලෙස කිරුළු පළඳිනු ලබන අතර, අනෙක් අය පළමු, දෙවන සහ තෙවන අනුශූරයන් ලෙස නම් කරනු ලබනවා.

පවතින අයහපත් කාලගුණ තත්ත්වයත් සමඟ අද (30) පස්වරු 4.00 වන විට විදුලිය බිඳ වැටීම් 29,451 ක් වාර්තා වී ඇති බව ලංකා විදුලිබල මණ්ඩලය පවසනවා.

ඒ අනුව අදාළ විදුලිය බිඳ වැටීම් යථා තත්ත්වයට පත් කිරීම සඳහා විදුලිබල මණ්ඩල සේවකයින් මේ වන විට කටයුතු කරමින් ඇති බවයි සඳහන් වෙන්නේ.

විදුලිය බිඳ වැටීම් සම්බන්ධ තොරතුරු 1987 දුරකථන අංකයට දැනුම්දිය හැකි බවයි ලංකා විදුලිබල මණ්ඩලය වැඩිදුරටත් සඳහන් කළේ.

කැරම් බෝඩ් සිද්ධිය සම්බන්ධයෙන් අධිකරණය විසින් ලබාදුන් තීන්දුව රටේ ජයග්‍රහණයක් බව සමගි ජන බලවේගයේ පාර්ලිමේන්තු මන්ත්‍රී ආචාර්ය හර්ෂ ද සිල්වා පවසනවා.

මෙම නඩු තීන්දුව හරහා පෙන්නුම් කරන්නේ විනිසුරු මඩුල්ලට නොබියව තමන්ට සුදුසු යැයි හැ‍‍ගෙන තීන්දුවක් ලබාදීමට හැකියාව ලැබී ඇති බවත්, ඒ සම්බන්ධයෙන් අනුර කුමාර දිසානායක ජනාධිපතිවරයාට ස්තූතිවන්ත විය යුතු බවයි SLVLOG නාලිකාව සමඟ පැවති සාකච්ඡාවකට එක්වෙමින් මන්ත්‍රීවරයා සඳහන් කළේ.

දූෂණය සම්බන්ධයෙන් වැරදිකරුවෙකු බවට පත්වීම නිසා, අනෙකුත් අයටත් පාඩමක් වන ලෙස සලකා දැඩි තීන්දුවක් ලබාදී ඇති බවත්, කවුරුන් හෝ මින් ඉදිරියට මෙවැනි දෙයක් සිදුකර ලිස්සා යාමට කටයුතු කරන්නේ නම් එසේ කළ නොහැකි බවත් මන්ත්‍රීවරයා ප්‍රකාශ කළා.

දූෂණය නැති කළ හැකි නම්, රටේ අනාගතයට එය සුබවාදී වනු ඇති බවයි පාර්ලිමේන්තු මන්ත්‍රී ආචාර්ය හර්ෂ ද සිල්වා වැඩිදුරටත් සඳහන් කළේ.

සෑම පාර්ශ්වයක්ම යුද්ධ කළේ සාමය වෙනුවෙන් බවට ජනාධිපති අනුර කුමාර දිසානායක රණවිරු සැමරුමේදී සිදුකළ ප්‍රකාශය තමන් අනුමත නොකරන බව ෆීල්ඩ් මාෂල් සරත් ‍ෆොන්සේකා පවසනවා.

සාමය සඳහා ශ්‍රී මහා බෝධියට හෝ දළදා මාලිගාවට පහරදීමේ අවශ්‍යතාවක් නොවන බවත්, ප්‍රභාකරන් හැසිරුණු ආකාරය අනුව ඔහු යුද්ධ කළේ සාමය වෙනුවෙන් බවට කිසිවෙකුත් විශ්වාස නොකරන බවයි රූපවාහිනී වැඩසටහනකට එක්වෙමින් ඔහු සඳහන් කළේ.

හමුදාව පිරිස් බලයෙන් අඩු කිරීමට තමා එකඟ නොවන බවද, හමුදාව විසුරුවා හැර ඉතුරු කරන බිලියන 80 කින් පමණ රට හැදීමට නොහැකි බවද, තවත් ටික කාලයක් ගතවූ විට රෝහල්ද වසා දැමිය යුතු බවට ඔවුන් පවසනු ඇති බවද සරත් ෆොන්සේකා ප්‍රකාශ කළා.

රට තුළ මහජන ආරක්ෂාවේ හිඩැසක් පවතින බවත්, වෙඩි තැබීම් සිදුවන්නේ ඒවා වැළැක්වීමට ඇති ආයතනවල යම් දුර්වලතාවයක් තිබෙන නිසා බවත්, මේ සම්බන්ධයෙන් අවබෝධයක් ඇති දක්ෂ පුද්ගලයින් එම ආයතන භාරගත යුතු බවයි ෆීල්ඩ් මාෂල් සරත් ‍ෆොන්සේකා වැඩිදුරටත් ප්‍රකාශ ක‍ර සිටියේ.

ශ්‍රී ලංකාවේ ආර්ථිකය 2018 තිබුණු මට්ටමට පැමිණීමට තව වසර දෙකක හෝ තුනක කාලයක් ගත වනු ඇති බව ශ්‍රී ලංකා මහ බැංකුවේ සහකාර අධිපති ආචාර්ය චන්ද්‍රනාත් අමරසේකර පවසනවා.

ඒ අනුව 2019 – 2023 යන වසර පහක කාලය තුළ ධන ආර්ථික වර්ධනයක් අත්පත් කර ගැනීමට සමත්ව ඇත්තේ 2021 වසරේදී පමණක් බවත්, සෙසු සෑම වසරකදීම වාර්තා වන්නේ ආර්ථිකයේ සංකෝචනය වීමක් බවයි 2024 වාර්ෂික ආර්ථික විවරණයෙන් පිළිබිඹු වන ශ්‍රී ලංකා ආර්ථිකය මැයෙන් ඊයේ (27) කොළඹ මහ බැංකු මූලස්ථාන පරිශ්‍රයේ පැවති දේශනයෙන් අනතුරුව පැවති සාකච්ඡාවකදී ඔහු සඳහන් කළේ.

පාස්කු ඉරිදා ප්‍රහාරය, කොවිඩ් වසංගතය හා ආර්ථික අර්බුදය ‍හේතුවෙන් ආර්ථිකය ඉතා පහළ මට්ටමක පැවති බවද ඔහු ප්‍රකාශ කළා.

2018 වසරේ දී රු. ට්‍රිලියන 13.2ක් ලෙස පැවති මෙරට මූර්ත දළ දේශීය නිෂ්පාදිතය, 2023 වසර වන විට රු. ට්‍රිලියන 11.9ක් දක්වා අඩු වී ඇති බවත්, එය 2024 වසරේ දී රු. ට්‍රිලියන 12.5ක් දක්වා වර්ධනය වී ඇති බවත් ඔහු පවසා සිටියා.