Category: business

ජාත්‍යන්තර මූල්‍ය අරමුදලේ ණය යෝජනා ක්‍රමය මාර්තු මාසයේ දී ක්‍රියාත්මක කිරීමට හැකිවනු ඇතැයි අපේක්ෂා කරන බව ජනාධිපති රනිල් වික්‍රමසිංහ පවසනවා.

එසේම මේ වන විට උද්ධමනය ක්‍රමිකව අඩු වීමට සාපේක්ෂව බැංකු පොළී අනුපාත අඩු කිරීම පිළිබඳවද සළකා බලන බවයි ජනාධිපතිවරයා සඳහන් කළේ.

සුළු හා මහා පරිමාණ සහල් මෝල් හිමියන් මුහුණ දී ඇති ගැටලු සහ ඒවා විසඳා ගැනීමට ගතයුතු පියවර පිළිබඳ සොයා බැලීමට ඊයේ (16) පස්වරුවේ ජනාධිපති කාර්යාලයේ පැවති සාකච්ඡාවකට එක්වෙමින් ජනාධිපතිවරයා මේ බව සඳහන් කළා.

මේ සම්බන්ධයෙන් නිකුත් කළ නිවේදනය පහතින්,

විදුලි ගාස්තු සංශෝධනය සඳහා අනුමැතිය ලබාදීම විදුලිබල පනතේ 30 වන වගන්තියට පටහැනි බව මහජන උපයෝගීතා කොමිසමේ සභාපති ජනක රත්නායක පවසනවා.

ඒ අනුව සෙසු සාමාජිකයන් මෙවැනි නීති විරෝධී තීරණයක් ගනු ලැබුවේ දේශපාලන අධිකාරියේ, ලංකා විදුලිබල මණ්ඩලයේ හා විදුලිබල අමාත්‍යංශයේ නිලධාරීන්ගේ බලපෑම්වලට යටත්ව බවයි ප්‍රකාශයක් නිකුත් කරමින් ඔහු සඳහන් කරන්නේ.

පාඩු ලබන විදුලිබල මණ්ඩලයේ අලාභය පියවා ගැනීම, ඉදිරියේදී වැඩි මිලක් ගෙවා ගල් අඟුරු සහ ඉන්ධන ලබා ගැනීම සඳහා අවශ්‍ය කටයුතු සිදු කෙරෙමින් ඇති බවයි ඔහු පෙන්වා දෙන්නේ.

මෙම ගාස්තු සංශෝධනය නීතියට පටහැනි බවත් ඉදිරියේදී අවශ්‍ය නීතිමය පියවර ගෙන මෙම අත්තනෝමතික ලෙස වැඩිකරනු ලැබූ විදුලි ගාස්තු සංශෝධනය නතර කරනු ඇතැයි බලාපොරොත්තු වන බවයි මහජන උපයෝගීතා කොමිසමේ සභාපති ජනක රත්නායක වැඩිදුරටත් සඳහන් කළේ.

රුපියල් බිලියන 287 ක අමතර ආදායමක් විදුලි බල මණ්ඩලයට ලැබෙන පරිදි 66% කින් විදුලි ගාස්තු වැඩි කිරීමට මහජන උපයෝගීතා කොමිසමේ බහුතර සාමාජිකයන්ගේ අනුමැතිය හිමිවී තිබෙනවා.

මෙම යෝජනාව සඳහා මහජන උපයෝගීතා කොමිසමේ සභාපති ජනක රත්නායක සිය විරෝධය පළකර ඇති අතර සෙසු සාමාජිකයන් තිදෙනා වන නීතීඥ චතුරිකා විජේසිංහ, ඩග්ලස් නානායක්කාර සහ එස්. ජී. සේනාරත්න එකඟතාව පළ කිරීම හේතුවෙන් එම යෝජනාව සම්මත වී ඇති බවයි සඳහන් වන්නේ.

මහජන උපදේශන හා සියලු පාර්ශවයන්ගේ යෝජනා අනුව රුපියල් බිලියන 142 ක ආදායමක් ලැබෙන පරිදි 36% ක විදුලි ගාස්තු වැඩිවීමක් මහජන උපයෝගීතා කොමිසම සකස් කර තිබූ නමුත් ඊට පක්ෂ වී ඇත්තේ කොමිසමේ සභාපති ජනක රත්නායක පමණක් බවයි සඳහන් වන්නේ.

ඒ අනුව අද (15) සිට මෙම සංශෝධනය ක්‍රියාත්මක වීමට නියමිත බවයි වාර්තා වන්නේ.

අත්‍යවශ්‍ය සහ හදිසි සෞඛ්‍ය සේවාවන් බාධාවකින් තොරව පවත්වාගෙන යාම තහවුරු කිරීම සඳහා ඩොලර් මිලියන 38ක ප්‍රදානයක් ලබාදීමට ජපන් රජය එකඟතාව පළකර තිබෙනවා.

ඒ අනුව අත්‍යවශ්‍ය සේවා සහ ප්‍රවාහන පහසුකම් තහවුරු කරමින් ශ්‍රී ලංකාවේ සෞඛ්‍ය අංශයේ සෞඛ්‍ය සේවා සැපයුම් පද්ධතිය වැඩිදියුණු කිරීම සඳහා මෙම ප්‍රදානය ලබාදී ඇති බවයි කැබිනට් තීරණ දැනුම්දීමේ මාධ්‍ය හමුවට එක්වෙමින් කැබිනට් මාධ්‍ය ප්‍රකාශක අමාත්‍ය බන්දුල ගුණවර්ධන සඳහන් කළේ.

සෞඛ්‍ය සේවාවන් බාධාවකින් තොරව පවත්වාගෙන යාම තහවුරු කිරීම සඳහා මෙම ප්‍රදානය හරහා ඉන්ධන සැපයීමට මෙම ජපාන ආර්ථික හා සමාජ සංවර්ධන වැඩසටහන යටතේ බලාපොරොත්තු වන බවයි අමාත්‍යවරයා වැඩිදුරටත් සඳහන් කළේ.

ලෝක වෙළෙඳපොළෙහි බොර තෙල් මිල අඩුවී ඇති බව විදෙස් මාධ්‍ය වාර්තා කරනවා.

ඒ අනුව අද (13) බ්‍රෙන්ට් බොර තෙල් බැරලයක මිල ඩොලර් 85.59 ක් ලෙස සටහන් වී ඇති අතර WTI බොර තෙල් බැරලයක මිල ඩොලර් 78.89 ක් ලෙසයි සටහන්වී තිබෙන්නේ.

අමෙරිකාවේ උද්ධමන දත්ත මෙලෙස බොරතෙල් මිල අඩුවීමට හේතුවී ඇති බවයි විදෙස් මාධ්‍ය වාර්තා වැඩිදුරටත් සඳහන් කරන්නේ.

2022 ජනවාරි මාසයේ දී ලැබුණු විදේශ ප්‍රේෂණ ප්‍රමාණය වූ අමෙරිකානු ඩොලර් මිලියන 259.2 ට සාපේක්ෂව 2023 ජනවාරි මාසයේ දී අමෙරිකානු ඩොලර් මිලියන 437.5ක් ලැබී ඇති බව අමාත්‍ය මනූෂ නානායක්කාර පවසනවා. 2022 ජනවාරි මාසයේ ලැබූ විදේශ ප්‍රේෂණයන් ප්‍රමාණයට වඩා මෙරව අමෙරිකානු ඩොලර් මිලියන 178.3ක් ලැබී ඇති අතර එය 68.8%ක වර්ධනයක් බවයි අමාත්‍යවරයා කියා සිටියේ.

ණය සහන සම්බන්ධයෙන් ද්වීපාර්ශ්වික ණය හිමියන් ලබාදෙන එකඟතාවයන් මත ශ්‍රී ලංකාවට ලබාදීමට නියමිත ඩොලර් බිලියන 2.9 ක විස්තීරණ මූල්‍ය පහසුකම පිළිබඳ තීරණය රඳා පවතින බව ජාත්‍යන්තර මූල්‍ය අරමුදල පවසනවා.

ණය හිමියන්ගෙන් අදාළ එකඟතාවයන් ලැබුණු විගස විස්තීරණ මූල්‍ය පහසුකම පිළිබඳ කාර්ය මණ්ඩල එකඟතාවය ජාත්‍යන්තර මූල්‍ය අරමුදලේ විධායක මණ්ඩලයේ අනුමැතිය සඳහා ඉදිරිපත් කරන බවයි එම අරමුදල සඳහන් කරන්නේ.

රාජ්‍ය ආදායම් තත්ත්වය යහපත් වන තෙක් රාජ්‍ය සේවය පවත්වාගෙන යාමේ අරමුණින් අත්‍යාවශ්‍ය රාජ්‍ය වියදම් සඳහා පමණක් ප්‍රතිපාදන සැපයීමට මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යවරයා ලෙස ජනාධිපති රනිල් වික්‍රමසිංහ මහා භාණ්ඩාගාර ලේකම්වරයාට උපදෙස් දී තිබෙනවා.

රජයේ කටයුතු සඳහා පෙර සිදු කළ පරිදි අරමුදල් නිකුත් කිරීම ජනතාවගේ අත්‍යාවශ්‍ය සේවා සැපයීමේ කාර්යයට මේ මොහොතේ අහිතකර ලෙස බලපාන අතර එය රටේ ආර්ථිකය යළි ප්‍රකෘතිමත් කිරීමේ ක්‍රියාවලියට ද බාධාවක් බව ජනාධිපතිවරයා පෙන්වා දී ඇති බවයි ජනාධිපති මාධ්‍ය අංශය සඳහන් කළේ.

මේ සම්බන්ධව ජනාධිපති රනිල් වික්‍රමසිංහ කැබිනට් මණ්ඩලය දැනුවත් කිරීමට ද පසුගියදා කටයුතු කළ බවයි නිවේදනයක් නිකුත් කරමින් ජනාධිපති මාධ්‍ය අංශය වැඩිදුරටත් සඳහන් කරන්නේ.

වැටුප් මත බදු අය කිරීමේදී පෞද්ගලික ප්‍රතිලාභ සලකාබලන සීමාවන් සංශෝධනය කිරීමට තීරණය කළ බව මුදල් රාජ්‍ය අමාත්‍ය රංජිත් සියඹලාපිටිය පවසනවා. ඒ අනුව නිවාස සඳහා දැනට රුපියල් ලක්ෂ දෙකට අඩු ආදායම් ලබන පුද්ගලයින්ගෙන් රුපියල් 20,000 ක් හෝ මුළු වැටුපෙන් 12.5% ක් ලෙස සහ රුපියල් ලක්ෂ දෙකට වඩා ආදායම් ලබා ගන්නා පුද්ගලයින්ගෙන් රුපියල් 40,000 ක් හෝ වැටුපෙන් 12.5% ක් ලෙස සැලකූ ප්‍රතිලාභය මූලික වැටුපෙන් 12.5% ක් ලෙස සංශෝධනය කිරීමට කටයුතු කර තිබෙනවා. ගෘහ භාණ්ඩ වෙනුවෙන් වූ රුපියල් 5,000 හෝ වැටුපෙන් 2.5% ක ප්‍රතිලාභයද චක්‍රලේඛයෙන් ඉවත් කර ඇති බවයි මුදල් රාජ්‍ය අමාත්‍ය රංජිත් සියඹලාපිටිය සඳහන් කළේ. එසේම වාහන සඳහාද ඇන්ජින් ධාරිතාව ඝන සෙන්ටිමීටර් 1800 ට අඩු සහ වැඩි ලෙස පිළිවෙලින් රුපියල් 50,000 සහ 75,000 ලෙස සැලකූ ප්‍රතිලාභය වාහනය සඳහා රුපියල් 20,000 ක්, රියදුරු සඳහා රුපියල් 10,000 ක් සහ ඉන්ධන සඳහා රුපියල් 20,000 ක් ලෙස සංශෝධනය කර ඇති බවද සඳහන්. මේ අතර 100% ක් බද්දට යටත් වූ දුරකථන දීමනාවෙන් 25% ක් පමණක් ප්‍රතිලාභ ලෙස නව සංශෝධන මඟින් සලකන බවයි එහි වැඩිදුරටත් දැක්වෙන්නේ.