Category: breaking_news

පවතින අයහපත් කාලගුණ තත්ත්වය මත, ප්‍රදේශ කිහිපයක් සඳහා නායයාමේ පූර්ව අනතුරු ඇඟවීමේ නිවේදන නිකුත් කර තිබෙනවා.

ඒ අනුව, අනතුරු ඇඟවීමේ මට්ටම 2 සඳහා ‘අවදානයෙන් සිටින්න (ඇම්බර්)’ තත්ත්වය යටතේ කෑගල්ල දිස්ත්‍රික්කයේ යටියන්තොට, ⁠රුවන්වැල්ල යන ප්‍රදේශවලට නාය යෑමේ පූර්ව අනතුරු ඇඟවීම් නිකුත් කර තිබෙනවා.

එමෙන්ම අනතුරු ඇඟවීමේ මට්ටම 1 සඳහා ‘විමසිලිමත් වන්න (කහ)’ යටතේ ගම්පහ දිස්ත්‍රික්කයේ ⁠අත්තනගල්ලටත්,  මහනුවර දිස්ත්‍රික්කයේ හාරිස්පත්තුව, ⁠දෙල්තොට යන ප්‍රදේශවලටත්, කෑගල්ල දිස්ත්‍රික්කයේ දෙහිඹ්විට, ⁠බුලත්කොහුපිටිය යන ප්‍රදේශවලටත් නාය යෑමේ පූර්ව අනතුරු ඇඟවීම් නිකුත් කර තිබෙනවා.

ඉහත මට්ටම යටතේම, කුරුණෑගල දිස්ත්‍රික්කයේ රිදීගම, ⁠මාවතගම යන ප්‍රදේශවලටත්, මාතලේ දිස්ත්‍රික්කයේ ⁠අඹන්ගග කෝරළයටත්, මාතර දිස්ත්‍රික්කයේ  ⁠වැලිපිටිය, ⁠කොටපල හා ⁠පස්ගොඩ යන ප්‍රදේශවලටත් අනතුරු ඇඟවීම් නිවේදන නිකුත් කර තිබෙනවා.

මෙම නායයාමේ පූර්ව අනතුරු ඇඟවීමේ නිවේදන අද ප.ව. 7.30 දක්වා වලංගු වන ලෙසට නිකුත් කර ඇති බවයි සඳහන් වන්නේ.

දඹුල්ල – මහියංගනය මාර්ගයේ මාතලේ, එලවනකන්ද ප්‍රදේශයේදී බස් රථයක් සහ වෑන් රථයක් එකිනෙක ගැටීමෙන් සිදුවූ අනතුරකින් පුද්ගලයින් තිදෙනෙක් මියගොස් තිබෙනවා.

අනතුරෙන් පුද්ගලයින් 39 ක් තුවාල ලබා ඇති අතර එම පිරිස මේ වන විට රෝහල්ගත කර ඇති බවයි සඳහන් වෙන්නේ.

අනතුර සම්බන්ධයෙන් පොලීසිය වැඩිදුර විමර්ශන සිදුකරන බවයි පොලිස් මාධ්‍ය ප්‍රකාශක නියෝජ්‍ය පොලිස්පති නීතීඥ නිහාල් තල්දුව වැඩිදුරටත් ප්‍රකාශ කළේ.

අද (14) දිනයේ දහවල් 2.00 පමණ පසු සන්ධ්‍යා කාලයේදී හෝ රාත්‍රී කාලයේදී දිවයිනේ බොහෝ ප්‍රදේශවලට වැසි හෝ ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක පවසනවා.

බස්නාහිර, සබරගමුව, වයඹ පළාත්වලත් ගාල්ල, මාතර දිස්ත්‍රික්කවල 100mm ඉක්මවූ වර්ෂාපතනයක් ඇතිවිය හැකි බවත් අනෙකුත් පළාත්වලත් 75mm ක පමණ වර්ෂාපනයක් ඇතිවිය හැකි බවත් ඔහු සඳහන් කළා.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙසයි ඔහු වැඩිදුරටත් ජනතාවගෙන් ඉල්ලා සිටින්නේ.

කාලගුණ විද්‍යා දෙපාර්තමේන්තුවේ වෙබ් අඩවිය සයිබර් ප්‍රහාරයට ලක්වී ඇති බව පරිගණක හදිසි ප්‍රතිචාර සංසදය පවසනවා.

කාලගුණ විද්‍යා දෙපාර්තමේන්තුවේ වෙබ් අඩවිය යථා තත්ත්වයට පත් කිරීමේ කටයුතු මේ වනවිට සිදු කරමින් පවතින බවයි පරිගණක හදිසි ප්‍රතිචාර සංසදයේ ජ්‍යෙෂ්ඨ තොරතුරු ආරක්ෂක නිලධාරි චරුක දමුණුපොළ සඳහන් කළේ.

නොවැම්බර් පළමුවෙනිදා කාලගුණ විද්‍යා දෙපාර්තමේන්තුවේ නිල වෙබ් අඩවියට මෙලෙස සයිබර් ප්‍රහාරයක් එල්ල වී ඇති බවයි වැඩිදුරටත් සඳහන් වෙන්නේ.

මහ මැතිවරණය හේතුවෙන් දිවයින පුරා පිහිටි සුරාසැල් නොවැම්බර් 14 සහ 15 යන දෙදින වසා තැබීමට නියමිත බව සුරාබදු දෙපාර්තමේන්තුව පවසනවා.

නොවැම්බර් 14 වැනිදා මහ මැතිවරණය පැවැත්වීමට නියමිත අතර, 15 වැනිදාට පොහොය දිනය යෙදී ඇති බැවින් මෙම දිනයන් දෙකෙහිම සුරාසැල් වසා තැබෙන බවයි එම දෙපාර්තමේන්තුව සඳහන් කළේ.

සුරාසැල් වසා තැබීමට නියමිත දිනවල නීති උල්ලංඝනය කරමින් නීති විරෝධී ආකාරයට කටයුතු කරන සුරාසැල්වලට නීතිය දැඩිව ක්‍රියාත්මක කරන බවයි සුරාබදු දෙපාර්තමේන්තුව වැඩිදුරටත් ප්‍රකාශ කළේ.