Category: breaking_news

පරිගණක අපරාධ විමර්ශන වයඹ පළාත් ඒකකය විසින් මුදල් වංචාවකට සම්බන්ධ සැකකරුවෙකු අත්අඩංගුවට ගෙන තිබෙනවා.

අන්තර්ජාලය හරහා මුදල් උපයාගත හැකි බවට පවසා, සමාජ මාධ්‍ය ඔස්සේ සම්බන්ධ වූ පුද්ගලයෙකු රවටා මෙම මුදල් වංචාව සිදුකර ඇති බවයි පොලීසිය සඳහන් කළේ.

රුපියල් ලක්ෂ 05 කට අධික මුදලක් සැකකරු විසින් එලෙස ගිණුම්ගත කරවාගෙන වංචාව සිදුකර ඇති අතර අත්අඩංගුවට ගත් සැකකරු වයස අවුරුදු 22 ක් වන දිගන ප්‍රදේශයේ පදිංචිකරුවෙක් බවයි සඳහන් වෙන්නේ.

පරිගණක අපරාධ විමර්ශන වයඹ පළාත් ඒකකය වැඩිදුර විමර්ශන සිදුකරනවා.

පාර්ලිමේන්තු මැතිවරණය සඳහා තරඟ කළ සියලුම අපේක්ෂකයින් හට තමන්ගේ ආදායම් සහ වියදම් වාර්තා ලබාදීමට ලබා දී තිබුණු අවසාන දිනය හෙට (06) මධ්‍යම රාත්‍රී 12න් අවසන් වීමට නියමිතව තිබෙනවා.

වාර්තා වී ඇති ආකාරයට දැනට 20% ආසන්න ප්‍රමාණයක් පමණක් මෙම ආදායම් සහ වියදම් දිස්ත්‍රික්ක මට්ටමෙන් භාර දී ඇති බවත්, මේ වාර්තා භාරදීමට අසමත් වුවොත් මැතිවරණ නීතිය ඉදිරියේ වරදකරුවෙක් වන බවත් පැෆ්රල් සංවිධානයේ විධායක අධ්‍යක්ෂ රෝහණ හෙට්ටිආරච්චි පවසා සිටියා.

මෙම වාර්තා භාරදීමට අපොහොසත් වන අපේක්ෂකයින්ට ඉදිරි පළාත් පාලන මැතිවරණයේදී ඡන්දය භාවිතා කිරීමේ හා තරග කිරීමේ අයිතිය අහිමි වීමට බොහෝ දුරට ඉඩකඩ ඇති බවත්, මේ සම්බන්ධයෙන් අධිකරණ ක්‍රියාමාර්ග ගතහොත්, ඒ අයගේ ඡන්දය භාවිතා කිරීමේ අයිතිය සහ ලියාපදිංචි අයිතිය අනිවාර්යයෙන්ම වසර තුනකට අහිමි වීමට ද පුළුවන්කම ඇති බවයි ඔහු මාධ්‍ය හමුවේ කියා සිටියේ.

එළැඹෙන 09, 10, 11, 12 දිනයන් වල නැවත වරක් වැසි තත්ත්වයේ වර්ධනයක් ඇති විය හැකි බව කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක මාධ්‍ය වෙත අදහස් දක්වමින් පවසා සිටියා.

නිරිතදිග බෙංගාල බොක්කේ, දකුණු අන්දමන් දූපත් අසල නැවත වරක් කැළඹෙන ස්වභාවයක් උද්ගත වී ඇති බවත්, දැනට එහි යම් වර්ධනයක් පෙන්නුම් කරන බවත් ඔහු සඳහන් කර සිටියා.

මෙහි වක්‍ර බලපෑමක් බොහෝවිට 9, 10, 11, 12 වැනි දිනයන් වලදී ඇතිවීමට හැකියාවක් ඇති බවත්, එම වක්‍ර බලපෑම හේතුකොට ගෙන උතුර, නැගෙනහිර, උතුරුමැද, සහ ඌව වැනි පළාත්වල වැසි තත්ත්වයේ වැඩිවීමක් 09 වනදා රාත්‍රී කාලයෙන් පසු ඇතිවීමේ ලකුණු දැනට පහළ වී ඇති බවයි අධ්‍යක්ෂ ජනරාල්වරයා පෙන්වා දෙන්නේ.

මෙය ඉදිරියේදී අඩු පීඩන කලාපයක් දක්වා වර්ධනය වෙනවාදැයි තහවුරු කර, ඉදිරියේදී පැහැදිලිව ජනතාවට දැන ගැනීමට සලස්වන බවද, ඉදිරියේදී දැනුම්දෙන කාලගුණ අනාවැකි සම්බන්ධයෙන් අවධානයෙන් සිටින ලෙසද ඔහු වැඩිදුරටත් ජනතාවගෙන් ඉල්ලා සිටිනවා.

අද (04) අළුයම යාපනය – ගුරුනගර් ප්‍රදේශයට ඔබ්බෙන් වූ මුහුදු ප්‍රදේශයේ දී, ශ්‍රී ලංකා නාවික හමුදාව විසින් සිදුකල විශේෂ සෝදිසි මෙහෙයුමකදී කේරළ ගංජා කිලෝග්‍රෑම් 188.35 ක තොගයක් රැගත් ඩිංගි යාත්‍රාවක් නාවික හමුදා භාරයට ගෙන තිබෙනවා.

මෙම කේරළ ගංජා තොගයේ දළ වටිනාකම රුපියල් මිලියන 75 කට අධික වන බවයි පැවසෙන්නේ.

ඉදිරි නීතිමය හා විමර්ශන කටයුතු සඳහා නාවික හමුදා භාරයට ගත් කේරළ ගංජා තොගය සහ ඩිංගි යාත්‍රාව යාපනය පොලිස් ස්ථානය වෙත භාරදීමට කටයුතු කර තිබෙනවා.

පවතින සහල් අර්බුදයට විසඳුමක් ලෙස අද (04) සිට දිනකට සහල් කිලෝ ලක්ෂ 02 ක් සතොස හරහා ජනතාවට අලෙවි කෙරෙන බව වෙළෙඳ අමාත්‍ය වසන්ත සමරසිංහ පාර්ලිමේන්තුවේදී පවසා සිටියා.

එම සහල් කිලෝවක් රුපියල් 220ක මිලක් යටතේ ජනතාවට මිලදී ගත හැකි බවයි ඔහු සඳහන් කළේ.

රජය විසින් මෝල් හිමියන් ගෙන්වා සිදුකළ සාකච්ඡාවේදී බැංකු ප්‍රශ්න නිසා මෝල්වල ඇති සහල් නිදහස් කිරීමට නොහැකි බව පැවසූ බවත්, එයට පිළිතුරක් ඊයේ සපයා දුන් බවත්, ඒ අනුව අද සිට දිනකට සහල් කිලෝ ලක්ෂ 02 ක් සතොස හරහා සියලුම ජනතාවට රුපියල් 220 ක වෙළෙඳපොළ මිල යටතේ ලබාදීමට මෝල් හිමියන් එකඟ වූ බවයි වෙළෙඳ අමාත්‍ය වසන්ත සමරසිංහ වැඩිදුරටත් පවසා සිටියේ.

අද (02) පස්වරුවේ අධ්‍යාපන අමාත්‍යාංශය ඉදිරිපිට පැවති උද්ඝෝෂණය අතරතුරදී සිදුවූ උණුසුම්කාරී සිදුවීම් නිසා   අත්අඩංගුවට ගත් විරෝධතාකරුවන් සිව්දෙනා දෙසැම්බර් 10 වැනිදා දක්වා රක්ෂිත බන්ධනාගාරගත කිරීමට නියෝග කර තිබෙනවා.

අදාළ විරෝධතාකරුවන් කඩුවෙල මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව එම නියෝගය නිකුත්කළ බවයි වාර්තා වෙන්නේ.

පාසල්වල ඉගැන්වීම් කටයුතු සිදුකරන සංවර්ධන නිලධාරීන් අද අධ්‍යාපන අමාත්‍යංශය ඉදිරිපිට විරෝධතාවයක් සිදුකළ අතර, එහිදී කලහකාරී ලෙස හැසිරුනු විරෝධතාකරුවන් සිව්දෙනෙකු පොලීසිය විසින් අත්අඩංගුවට ගනු ලැබුවා.

එහිදී පොලිස් නිලධාරීන් කිහිපදෙනෙකුට ද තුවාල සිදුවී ඇති බවයි වැඩිදුරටත් වාර්තා වන්නේ.

පහ ශ්‍රේණිය ශිෂ්‍යත්ව විභාගයේදී කලින් පිට කළ බව කියන ප්‍රශ්න තුන සඳහා සියලු සිසුන්ට නිදහස් ලකුණු ලබාදීමට අමාත්‍ය මණ්ඩලය නිර්දේශ කර ඇතැයි නීතිපතිවරයා අද (02) ශ්‍රේෂ්ඨාධිකරණයට දැනුම් දුන්නා.

මෙම ප්‍රශ්න පත්‍රය සඳහා යළි විභාගය පැවැත්වීමෙන් සිසුන් පීඩාවට පත්විය හැකි බව අමාත්‍ය මණ්ඩලයේ අදහස වන බවත්, ඒ අනුව යළි විභාගය පැවැත්වීම නුසුදුසු බවට අමාත්‍ය මණ්ඩලය නිර්දේශ කර තිබෙන බවත් නීතිපතිවරයා වෙනුවෙන් පෙනී සිටි සොලිසිටර් ජනරාල් විරාජ් දයාරත්න ශ්‍රේෂ්ඨාධිකරණයට දැනුම් දෙනු ලැබුවා.

ශිෂ්‍යත්ව විභාගය පැවති ආකාරය අභියෝගයට ලක් කරමින් ගොනුකර තිබූ මූලික අයිතිවාසිකම් පෙත්සම් අද (02) කැඳවා තිබුණු අතර, පෙත්සම් විභාගය ලබන 11 වනදා පැවැත්වීමට එහිදී තීරණය කෙරුණා.

මෙරට වායු තත්ත්ව දර්ශක අගයන් ඉදිරි දින කිහිපය ඇතුළත සාමාන්‍ය අගයට හැරෙනු ඇති බවට බලාපොරොත්තු වන බව මධ්‍යම පරිසර අධිකාරියේ අධ්‍යක්ෂ (පරිසර අධ්‍යාපන), මාධ්‍ය ප්‍රකාශක ආචාර්ය අජිත් ගුණවර්ධන මහතා පවසනවා.

වායු තත්ත්ව දර්ශකය ඉහළ යාම නිසා සෞඛ්‍යයට එල්ල වූ බලපෑම් ද ඉදිරි දින කිහිපය තුළ අඩු වී යනු ඇති බවයි ඔහු පවසන්නේ.

කෙසේ නමුත් මෙම තත්ත්වයට සංවේදී පුද්ගලයින්ට අහිතකර තත්ත්වයන් ඇති කළ හැකි බැවින්, එවැනි පුද්ගලයින් වෛද්‍යවරයෙකු හමු වී ප්‍රතිකාර ලබා ගන්නා ලෙසද අධ්‍යක්ෂවරයා මහජනතාවට දැනුම් දෙනවා.

වායු තත්ත්ව දර්ශකය 100 ට වැඩි වීම තරමක් අහිතකර බව ද, එම අගය 50 ට අඩුවීම හිතකර සහ මෙරට නිරන්තරයෙන් දක්නට ලැබෙන තත්ත්වයක් බව ද, 0-100 ත් අතර අගය මහජනතාවට ගැටලුකාරී නොවන තත්ත්වයක් බව ද ඔහු වැඩිදුරටත් සඳහන් කරනවා.

හෙළයට සිරිය ගෙනෙන දුන්හිද ඇල්ල
ඌව පළාතේ බදුලු පුරවරයට අභිමානය ගෙන දෙන මෙම දුන්හිද ඇල්ල මිහිඳුම් පටලයකින් සමන්විත විශාල භූමි ප්‍රදේශයක් නහවමින් ගලා බසි.

මන දොළ පිනවමින් ඇද හැලෙන මෙම දිය ඇල්ල දෙස් විදෙස් සංචාරකයන්ගේ ආකර්ෂණය දිනා ගැනීමට සමත් මෙම දිය ඇල්ල උස මීටර් 64 කින් හා අඩි 210 කින් යුත් හෙට්ටිපොල කඳුවැටියෙන් ගලා බසි.

පරිසරයේ සුන්දරත්වය විඳිමින් ඉදිරියට ඇදෙන ඔබට දේශීය නිෂ්පාදන බොහෝ දෑ එම
කඩමණ්ඩි වලින් මිලදී ගත හැක.

වඳ වීමේ තර්ජනයට ලක්වෙන බොහෝ ශාක ගණනාවක් හා විවිධ සත්ත්ව කොටස් මෙහිදී දැකගත හැක.

මෙම ස්ථානයේ පුස්සැල්ලක් බැඳී ඇති අතර එම නිසා ජල මාර්ගය අවහිරවීම හේතුවෙන් එය පිටාර ගැලීම නිසා මුළු බදුලු පුරවරයම යට වී ඇති බවත් කොස්ගොල්ල පදිංචිව සිටි අයෙක් එම කාලයේ පුස්සැල්ලව කපා ඉවත් කිරීමෙන් අනතුරුව එය පිරිසිදු වී ජලය ගලායන මාර්ග අවහිරවීම නැවති ජල මාර්ගය සක්‍රිය වී ඇත. එම ජල දහරාව මෙලෙස දුන්හිද ඇල්ල නමින් ජනප්‍රිය වූ බවත් ජනප්‍රවාදයක් පවතී. බදුල්ල කච්චේරියේ සිට මුතියංගනය දක්වා බෝට්ටුවලින් ගිය බව පැරැන්නන් කියා සිටි. එම පුස්සැල්ල වැලේ කෙළවරේ පුස්සල්ලාව ගමක් පිහිටා තිබෙන බවත් ඔවුන් කියා සිටි. මෙම ජල දහරාව අවහිර වුවහොත් අදටත් මුළු බදුල්ලම ජලයෙන් යටවන අතර මුතියංගන චෛත්‍යය හා බදුල්ල කච්චේරිය පමණක් ඉතිරි වන බවත් ඔවුන් කියා සිටි.

මෙම පුස්සැල්ල කැපීමට පෙර ජලය අවහිර වූ පසු එම ජල ධාරාව රිදී පානෙන් දැමූ බවත් එම ස්ථානය දොරකඩ ලෙස නම් දරා ඇත.

නරඹන්නන් පැමිණිය විට බොහෝ අනතුරුද සිදුවී ඇති බවත් මෙම ඇල්ල පතුලේ නිදන් හා අත්භූත දේවල් සිදුවන බවත් අපහට වාර්තා විය.

වයස62 වන WM ඥානපාල මහතා අපහට කියා සිටියේ විදේශිකයෙන් විසින් මෙය සොයා ගත් බවත් මිනිසුන් විසින් භාවිතා කොට ඇති අතර පසු කලෙක දුන්හිද ඇල්ල නමින් ජනප්‍රියතාවයට පත් වූ බවත් ඔහු අප හට කියා සිටියේ මහත් වූ ආඩම්බරයෙනි.

මෙහි දියණෑම සඳහා ස්වාභාවික තටාකයක්ද පවතී.

මෙහි සුන්දරත්වය නැරඹීමට යන ඔබ පොලිතීන් ප්ලාස්ටික් රැගෙන යන්නේ නම් එය එම ස්ථානවල නොදමා ඒමට ඔබ සැලකිලිමත් විය යුතුය.

මෙය විදේශ විනිමය ගෙන ඒමටද හොඳ තෝතැන්නකි.

මෙවන් සම්පත් ආරක්ෂා කිරීම ඔබේත් මගේ යුතුකමයි.

සටහන –
මහනුවර දිස්ත්‍රික් වාර්තාකරු
කොලින් හරිශ්චන්ද්‍ර