Author: Supun

ජනාධිපති රනිල් වික්‍රමසිංහගේ උපදෙස් මත ක්‍රියාවට නංවන ලද “අස්වැසුම” සමාජ සුබසාධක ප්‍රතිලාභ ගෙවීම මෙන්ම සමෘද්ධි සහ වැඩිහිටි ආධාර ඇතුළු දැනට රජය මගින් ලබා දෙන සුබසාධක මූල්‍යාධාර ජූලි මස සිට සෘජුවම ප්‍රතිලාභියාගේ බැංකු ගිණුමට බැර කිරීමට අවශ්‍ය කටයුතු යොදා ඇති බව සුබසාධක ප්‍රතිලාභ මණ්ඩලය පවසනවා.

ඒ අනුව සුබසාධක ප්‍රතිලාභීන් සිය දීමනා ලබා ගැනීමට යෑමේදී මුහුණ දෙන දුෂ්කරතා සැලකිල්ලට ගනිමින් මෙම පියවර ගෙන ඇති බවයි සඳහන් වන්නේ.

එසේම බැංකු ගිණුම් නොමැති ප්‍රතිලාභීන්ට ද බැංකු ගිණුම් විවෘත කිරීමට ද අවශ්‍ය පියවර ගෙන ඇතැයි සුබසාධක ප්‍රතිලාභ මණ්ඩලයේ සභාපති බී. විජයරත්න සඳහන් කළා.

ජුලි 1 වනදා සිට ක්‍රියාත්මක වන පරිදි මෙරට උද්භිද උද්‍යාන සඳහා ඇතුලුවීමේ ගාස්තු ඉහළ දමමින් සංචාරක හා ඉඩම් අමාත්‍ය හරීන් ප්‍රනාන්දු විසින් ගැසට් නිවේදනයක් නිකුත් කර තිබෙනවා.

ඒ අනුව ශ්‍රී ලාංකික වැඩිහිටියන් සහ අවුරුදු 12 ට වැඩි ළමුන් සඳහා ගාස්තුව රුපියල් 200 ක් දක්වා ඉහළ දමා ඇති අතර වයස අවුරුදු 12 ට අඩු ළමුන් සහ පාසල් සිසුන් සඳහා ගාස්තුව රුපියල් 30 ක් සහ අවුරුදු 60 ට වැඩි වැඩිහිටියන් සඳහා රුපියල් 50 ක් ලෙස ගාස්තු ඉහළ දමා ඇති බවයි සඳහන් වන්නේ.

එසේම විදේශික වැඩිහිටියන් සහ අවුරුදු 12 ට වැඩි ළමුන් සඳහා ගාස්තුව රුපියල් 3000 ක් දක්වා ඉහළ දමා ඇති බවයි අදාළ ගැසට් නිවේදනයේ වැඩිදුරටත් දැක්වෙන්නේ.

ජාත්‍යන්තර මූල්‍ය අරමුදල මගින් ශ්‍රී ලංකාවට ලබාදී ඇති විස්තීර්ණ ණය පහසුකමට අදාළ පළමු සමාලෝචනය එළඹෙන සැප්තැම්බර් මාසයේදී සිදුකරන බව මෙරටට පැමිණි ජාත්‍යන්තර මූල්‍ය අරමුදලේ නියෝජිත කණ්ඩායම පවසනවා.

ඒ අනුව ශ්‍රී ලංකා ආර්ථිකයේ යම් යම් සුභදායි වෙනස්කම් සිදුවුවද සමස්ත සාර්ව ආර්ථික සහ ප්‍රතිපත්තිමය පරිසරය අභියෝගාත්මකව පවතින බවයි Peter Breuer සහ Masahiro Nozaki නිවේදනයක් නිකුත් කරමින් සඳහන් කරන්නේ.

පළමු සමාලෝචනය වනවිට වැඩසටහන් ඉලක්කවලට අනුකූලව ණයහිමියන් සමඟ කාලානුරූපී ප්‍රතිව්‍යුහගත ගිවිසුම් සාක්ෂාත් කර ගැනීම ණය තිරසාරභාවය ප්‍රතිස්ථාපනය කිරීම අත්‍යවශ්‍ය බවද ඔවුන් සඳහන් කර තිබෙනවා.

ශ්‍රී ලංකාව ආර්ථික අර්බුදයෙන් ගොඩඒම මෙන්ම මහ බැංකු ස්වාධීනත්වය සහතික කිරීම, පාලනය වැඩිදියුණු කිරීම සහ අවදානමට ලක්වූවන් ආරක්ෂා කිරීම ඇතුළුව ප්‍රතිසංස්කරණ පවත්වා ගැනීම සහ වැඩසටහන් බැඳීම් කාලෝචිත ලෙස ක්‍රියාත්මක කිරීම සහතික කිරීම අත්‍යාවශ්‍ය වන බවයි එහි වැඩිදුරටත් දැක්වෙන්නේ.