රටේ අධ්යාපන ප්රතිපත්ති දේශපාලනයට යට කිරීමට හෝ එක් එක් අමාත්යවරයාට අවශ්ය ආකාරයට වෙනස් කිරීමට ඉඩ නොතබා එය එක් නීති රාමුවක් යටතට ගෙන එන බව ජනාධිපති රනිල් වික්රමසිංහ පවසනවා.
ආර්ථික වශයෙන් කඩා වැටුණු ශ්රී ලංකාව යළි ගොඩනඟමින් සිටින මෙම අවස්ථාවේ රට ශීඝ්ර සංවර්ධනයක් කරා ගෙන යාමට නම් නව අධ්යාපන ක්රමයක් කඩිනමින් රටට හඳුන්වා දිය යුතු බවයි උත්සවයකට සහභාගී වෙමින් ජනාධිපතිවරයා සඳහන් කළේ.
අනාගතයේදී ශ්රී ලංකාවේ අධ්යාපන ක්රමය ලෝකයටම සරසවියක් වන ආකාරයෙන් ස්ථාපිත කිරීමට බලාපොරොත්තු වන බවයි ජනාධිපතිවරයා වැඩිදුරටත් සඳහන් කළේ.
මේ සම්බන්ධයෙන් නිකුත් කළ නිවේදනය පහතින්.
ශ්රී ලංකාවේ නිල සංචිත වත්කම් ප්රමාණය ජුලි මාසයට සාපේක්ෂව අගෝස්තු මාසයේදී 4.4% ක සුළු අඩුවීමක් සිදුව ඇති බව මහ බැංකුව පවසනවා.
ඒ අනුව මෙරට නිල සංචිත වත්කම් 2023 ජුලි මාසයේදී ඩොලර් මිලියන 3,765 සිට 2023 අගෝස්තු මාසයේදී ඩොලර් මිලියන 3,598ක් දක්වා 4.4%කින් අඩුවී ඇති බවයි මහ බැංකුව සඳහන් කරන්නේ.
චීන මහජන බැංකුවේ හුවමාරු පහසුකම යටතේ සපයා ඇති ඩොලර් බිලියන 1.4 ක මූල්ය පහසුකමද ඊට ඇතුළත් බවයි වැඩිදුරටත් සඳහන් වන්නේ.
සෞඛ්ය අමාත්ය කෙහෙළිය රඹුක්වැල්ලට එරෙහිව ඉදිරිපත්ව ඇති විශ්වාසභංග යෝජනාවට අදාළ ඡන්ද විමසීම අද (08) පැවැත්වෙනවා.
ඒ අනුව අද තෙවන දිනටත් විවාදය පැවැත්වීමෙන් අනතුරුව සවස ඡන්ද විමසීමට සිදු කිරීමට නියමිත බවයි සඳහන් වන්නේ.
සමගි ජන බලවේගය විසින් මෙම විශ්වාසභංග යෝජනාව පාර්ලිමේන්තුවට ඉදිරිපත් කර තිබුණා.
නව දුෂණ විරෝධි පනත මේ මස 15 වනදා සිට ක්රියාත්මක කරන බව අධිකරණ, බන්ධනාගාර කටයුතු හා ආණ්ඩුක්රම ව්යවස්ථා ප්රතිසංස්කරණ අමාත්ය විජයදාස රාජපක්ෂ පවසනවා.
ඒ සඳහා අදාළ ගැසට් පත්රය ද ඉදිරියේ දී පළ කිරීමට නියමිත බවයි මාධ්ය හමුවකට එක් වෙමින් අමාත්යවරයා සඳහන් කළේ.
දැනට පවතින අල්ලස් නීතිය ක්රියාත්මක වූයේ රාජ්ය අංශයට හා දේශපාලඥයන්ට පමණක් බවත්, නව පනත තුළින් පෞද්ගලික අංශයේ දූෂණ සම්බන්ධයෙන් ද විමර්ශන සිදු කිරීමේ හැකියාව පවතින බවයි අමාත්යවරයා සඳහන් කළේ.
ආසියානු කුසලාන එක්දින ක්රිකට් තරගාවලියේ සුපිරි 4 වටයේ පළමු තරගයෙන් බංග්ලාදේශය පරදා කඩුලු 7 ක ජයක් වාර්තා කිරීමට පාකිස්තාන කණ්ඩායම සමත් වුණා.
පාකිස්තානයේ ලාහෝර් ක්රීඩාංගනයේ පැවැති තරගයේ කාසියේ වාසිය දිනා පළමුව පන්දුවට පහරදුන් බංග්ලාදේශය පන්දුවාර 38.4 ක් අවසානයේ සියලු දෙනා දැවී ලබා ගත්තේ ලකුණු 193 ක් පමණයි.
පිළිතුරු ඉනිම ක්රීඩා කළ පාකිස්තානය පන්දුවාර 39.3 ක් අවසානයේ කඩුලු 3 ක් පමණක් දැවී ජයග්රාහී ඉලක්කය පසුකර යාමට සමත් වුණා.
එංගලන්ත කාන්තා කණ්ඩායම සමග පැවැති තරග 3කින් යුත් පන්දුවාර විස්සයි විස්ස තරගාවලිය තරග 2-1 ක් ලෙස ජය ගනිමින් එංගලන්තයට එරෙහිව ඕනෑම තරග රටාවකින් තමන් ඉතිහාසයේ ලැබූ පළමු තරගාවලි ජය වාර්තා කිරීමට සංචාරක ශ්රී ලංකා කාන්තා කණ්ඩායම සමත්ව තිබෙනවා.
ඒ, දෙරට අතර පැවැති අවසන් විස්සයි විස්ස තරගයෙන් ශ්රී ලංකාව කඩුලු 7 ක විශිෂ්ඨ ජයක් වාර්තා කිරීමත් සමගයි.
කාසියේ වාසිය දිනූ ශ්රී ලංකාවේ ආරාධනයෙන් පළමුව පන්දුවට පහර දුන් එංගලන්තය පන්දුවාර 19 ක් අවසානයේ සියලු දෙනා දැවී ලබා ගත්තේ ලකුණු 116 ක් පමණයි.
පන්දු යැවීමේ චමරි අතපත්තු ලකුණු 21 කට කඩුලු 3 ක් දවා ගත්තා.උදේශිකා ප්රබෝදනී හා කවීෂා දිල්හාරි ලකුණු 16 බැගින් ලබා දෙමින් කඩුලු 2 බැගින් බිද හෙලුවා.
පිළිතුරු ඉනිම ක්රීඩා කළ ශ්රී ලංකාව පන්දුවාර 17 ක් අවසානයේ කඩුලු 3 ක් දැවී ජයග්රාහී ඉලක්කය පසු කළා.
චමරි පන්දු 28 කින් ලකුණු 44 ක් රැස් කළ අතර හර්ෂිතා සමරවික්රම නොදැවී ලකුණු 26 ක් ලබා ගත්තා.
සලෙයිගේ අතීතය බැලුවම එයා මේක කරා කියලා මං විශ්වාස කරනවා – සරත් ෆොන්සේකා
පාස්කු ප්රහාරය පිළිබඳ විශේෂ හෙළිදරව්වක් සහිත Channel 4 වාර්තා වැඩසටහන සම්බන්ධයෙන් හිටපු ජනාධිපති ගෝඨාභය රාජපක්ෂ ප්රතිචාර දක්වා නිවේදනයක් නිකුත් කර තිබෙනවා.
ඒ අනුව Channel 4 නවතම වැඩසටහන 2005 සිට පැවති රාජපක්ෂ පාලනයට මඩ ගැසීම අරමුණු කරගත් රාජපක්ෂ විරෝධී ප්රහාරයක් බවයි හිටපු ජනාධිපතිවරයා සිය නිවේදනය මඟින් පෙන්වා දෙන්නේ.
ඇතැම් පුද්ගලයින් දේශපාලනික ස්ථාවරයක සිට තමන්ට චෝදනා එල්ල කළ ද, තමන් රජයේ තනතුරු දැරූ සෑම අවස්ථාවකම රෝමානු කතෝලික ප්රජාවට කළ හැකි සෑම සේවයක්ම කර ඇති බවද ඔහු සිය නිවේදනයේ වැඩිදුරටත් සඳහන් කර තිබෙනවා.
සම්පූර්ණ නිවේදනය පහතින්.
පාස්කු ප්රහාරය නිශ්චිතවම බලයට ඇති කෑදරකම වෙනුවෙන් සැලසුම්සහගතව ක්රියාත්මක කරන ලද්දක් බව Channel 4 හෙළිදරව්වෙන් සනාථ වන බව පාර්ලිමේන්තු මන්ත්රී විජිත හේරත් පවසනවා.
එම වැඩසටහනෙන් චෝදනා එල්ලවන සුරේෂ් සලෙයි තවමත් රාජ්ය බුද්ධි අංශ ප්රධානී ලෙස කටයුතු කරන බවද, ඔහු එම ධුරයේ තබාගෙන පාස්කු ප්රහාරය ගැන පරීක්ෂණ කිරීමෙන් කිසි ඵලක් නොමැති බවද ඔහු පෙන්වා දෙනවා.
එම නිසා රටේ ආරක්ෂක ඇමති ලෙස කටයුතු කරන ජනාධිපති රනිල් වික්රමසිංහ විසින් වහාම සුරේෂ් සලෙයි එම ධුරයෙන් ඉවත් කළ යුතු බවද, එසේ කිරීමෙන් අනතුරුව ස්වාධීන අපක්ෂපාතී පරීක්ෂණයක් ආරම්භ කළ යුතු බවද අවධාරණය කරනවා.
එමෙන්ම අදාළ වැඩසටහනෙන් රාජ්ය අමාත්ය ෂිවනේෂතුරෙයි චන්ද්රකාන්තන් හෙවත් පිල්ලෙයාන් පිළිබඳවද නිශ්චිත තොරතුරු හෙළිදරව් කර ඇති හෙයින් ඔහු පිළිබඳවද පරීක්ෂණ පවත්වා නීතිය ක්රියාත්මක කර යුතු බවද ඔහු පෙන්වා දෙනවා.
රටේ ජනතාවගේ ආරක්ෂාව වෙනුවෙන් මෙම දෙදෙනාට එරෙහිව වහාම නීතිය ක්රියාත්ම කරන ලෙස ජාතික ජන බලවේගය රජයට බලකර සිටින බවයි ඔහු වැඩිදුරටත් සඳහන් කළේ.
පාස්කු ප්රහාරය සම්බන්ධයෙන් ජාත්යන්තර සහාය ඇතිව, ප්රහාරයේ සියලු අංශ ආවරණය කෙරෙන ස්වාධීන පරීක්ෂණයක් පැවැත්වීය යුතු බව ජිනීවා නුවර එක්සත් ජාතීන්ගේ මානව හිමිකම් මහ කොමසාරිස් කාර්යාලය පවසනවා.
එක්සත් ජාතීන්ගේ මානව හිමිකම් පිළිබඳ මහ කොමසාරිස් වෝල්කර් ටර්ක් ශ්රී ලංකාව පිළිබඳ සිය වාර්ෂික වාර්තාව ඉදිරිපත් කරමින් මේ බව සඳහන් කර තිබෙනවා.
රජය නව සත්ය සෙවීමේ යාන්ත්රනයක් යෝජනා කළද, සත්ය සෙවීම පමණක් ප්රමාණවත් නොවන අතර වරදකරුවන්ට දඬුවම් ලබාදීමට ප්රමාණවත් යාන්ත්රණයක් ලබාදීමට සියලුදෙනා කැපවිය යුතු බවත්, ඒවා ක්රියාවට නැංවීම සඳහා දේශපාලන අධිෂ්ඨානයක් තිබිය යුතු බවද ඔහු පෙන්වා දෙනවා.
මහජන විරෝධතාවලින් බලාපොරොත්තු වූ ආකාරයේ ශ්රී ලංකා පාලන තන්ත්රයේ පරිවර්තනයක් සිදුව නොමැති බවත්, මේ නිසා දිගු කලක සිට පවතින අභියෝගවලට විසඳුම් සැපයීම තවදුරටත් පමා වන බවයි ඔහු පෙන්වා දී ඇත්තේ.
ශ්රී ලංකාව අඛණ්ඩව වගවීමකින් තොරව කටයුතු කරමින් සිටින බවද, මෑත කාලීනව මානව හිමිකම් උල්ලංඝණය හා අනිසි ලෙස බලය භාවිතා කිරීම රට තුළ දැකගත හැකි බවද ඔහු වැඩිදුරටත් සඳහන් කර තිබෙනවා.
