අද (04) පෙරවරු 09 සිට හෙට (05) දහවල් 12 දක්වා වැල්ලම්පිටිය මංසන්ධියේ සිට කොලොන්නාව මංසන්ධිය දක්වා මාර්ගය වසා තබන බව ශ්රී ලංකා පොලීසිය නිවේදනය කරනවා.
මෙයට හේතුව වී ඇත්තේ ජාතික ජල සම්පාදන සහ ජලප්රවාහන මණ්ඩලය යටතේ අධීක්ෂණය වන පෞද්ගලික ආයතනයක් මඟින් අදාළ කොටසේ භූගත ජල නල පද්ධතියක් එලීමේ කටයුත්තක නිරත වීම බවයි පොලීස් නිවේදනයේ සඳහන් වන්නේ.
මේ සම්බන්ධව වන නිවේදනය පහතින්,
වේගා මෝටර් රථ සඳහා මෝටර් රථ ප්රවාහන දෙපාර්තමේන්තුවේ අනුමැතිය හිමිව තිබෙනවා.
ඒ අනුව මෙරට ලියාපදිංචි කරන ලද ශ්රී ලංකාවේ නිෂ්පාදනය කරන ලද ප්රථම වේගා මෝටර් රථය සඳහා අංක ලියාපදිංචි අංක තහඩුව ලබාදීම අද (03) ප්රවාහන අමාත්ය ආචාර්ය බන්දුල ගුණවර්ධන සහ අමාත්ය රමේෂ් පතිරණගේ ප්රධානත්වයෙන් සිදු කෙරුණා.
වේගා මෝටර් රථය සම්පුර්නයෙන්ම ශ්රී ලංකාවේ ඉංජිනේරුවන්ගේ දැනුමෙන් හා නිර්මාණශිල්පීන්ගේ දායකත්වයෙන් නිර්මාණය කර තිබීම විශේෂත්වයක්.
කොළඹ ප්රදේශ කිහිපයකට හෙට (04) පස්වරු 2 සිට ඉරිදා (05) වනදා පස්වරු 2 දක්වා ජල සැපයුම අත්හිටුවන බව ජාතික ජල සම්පාදන හා ජලාපවහන මණ්ඩලය පවසනවා.
ඒ අනුව කොළඹ 01 සිට 04, කොළඹ 07 සිට 11, කඩුවෙල නගරය සහ ඒ අවට කොලොන්නාව නගර සභා ප්රදේශය, වැල්ලම්පිටිය සහ කොටිකාවත්ත යන ප්රදේශවලට මෙලෙස ජල සැපයුම අත්හිටුවන බවයි සඳහන් වන්නේ.
මාලිගාකන්ද ජලාශය වෙත ජලය සැපයෙන සම්ප්රේෂණ ජල නල පද්ධතියට අදාළව ව්යාපෘති මගින් සිදුකරනු ලබන අත්යාවශ්ය වැඩිදියුණු කිරීමක් හේතුවෙන් මෙලෙස ජල සැපයුම අත්තිටුවන බවයි සඳහන් වන්නේ.
හරිත බලශක්ති ආර්ථිකයක් මගින් ඉදිරි වසර පහක කාලය තුළ ශ්රී ලංකාවේ ආර්ථිකය ජාත්යන්තර තලයට ඔසවා තැබිය හැකි පදනම නිර්මාණය කරන බව ජනාධිපති රනිල් වික්රමසිංහ පවසනවා.
ජනාධිපතිවරයා මේ බව සඳහන් කළේ, මින්නේරිය වෝල්ටා ඔටෝ ටෙක් ඉංජිනියරින් ආයතනය විවෘත කිරීම වෙනුවෙන් අද (02) පැවැති උත්සවයට එක්වෙමින්.
රටේ පවතින ඉන්ධන අර්බුදයට විසඳුමක් ලෙස විද්යුත් යතුරු පැදි සහ ත්රී රෝද රථවල අවශ්යතාවය පවතින මෙවැනි යුගයක එකලස් කරන ලද ට්රැක්ටර් , විද්යුත් යතුරුපැදි හා ත්රීරෝද රථ අද සිට මිලදී ගැනීමට වෝල්ටා ඔටෝ ටෙක් ඉන්ජිනියර්න්ස් ආයතනය මගින් පහසුකම් සලසා තිබෙනවා.
මහජන උපයෝගීතා කොමිසම සඳහා නියෝජ්ය සභාපතිවරයෙකු පත්කර තිබෙනවා.
තමන්ට හිමිව ඇති බලතල අනුව එස් ජී සේනාරත්න අද සිට ක්රියාත්මක වන පරිදි එම තනතුරට පත්කළ බවයි මහජන උපයෝගීතා කොමිසමේ සභාපතිවරයා සඳහන් කලේ.
මහජන උපයෝගීතා කොමිසමේ නියෝජ්ය සභාපතිවරයා ලෙස කටයුතු කළ බී කේ යූ ඒ වික්රමසිංහ එම තනතුරින් ඉල්ලා අස්වී තිබුණා.
රජයේ නව බදු ප්රතිපත්තියට විරෝධය පළ කරමින් ක්ෂේත්ර රැසක වෘත්තීය සමිති අද (01) විවිධ වෘත්තීය ක්රියාමාර්ගවල නිරත වෙමින් සිටිනවා.
වරාය, ඛනිජ තෙල්, විදුලිය, ජල, බැංකු ඇතුළු ක්ෂේත්ර රැසක වෘත්තීය සමිති 40 ක් එක්දින වැඩ වර්ජනයක් ප්රකාශයට පත් කළ අතර වෛද්ය, දුම්රිය, ගුරු සහ තැපැල් වෘත්තීය සමිති එයට එක්නොවී විරෝධතා පමණක් පවත්වන බවට ප්රකාශ කළා.
ඒ අනුව වරාය වෘත්තීය සමිති සහ ඛනිජ තෙල් වෘත්තීය සමිති අකුරට වැඩ කිරීමේ වෘත්තීය ක්රියාමාර්ගයක් ආරම්භ කර ඇති අතර සමස්ත ලංකා හෙද සංගමයද අද පෙරවරු 10.00 සිට පස්වරු 2.00 දක්වා සේවයෙන් ඉවත්ව සිටීමේ වෘත්තීය ක්රියාමාර්ගයක් ආරම්භ කර තිබෙනවා.
මේ අතර රජයේ වෛද්ය නිලධාරීන්ගේ සංගමය පැය 24 ක කාලයක් සහභාගීත්ව වෘත්තීය ක්රියාමාර්ගයක නිරත වන අතර බැංකු සේවකයින් එක්දින වැඩ වර්ජනයකට සහභාගී වී ඇත. ලංකා විදුලි බල මණ්ඩලය ඇතුළු වෘත්තීය සමිති අසනීප නිවාඩු වාර්තා කිරීමේ වෘත්තීය ක්රියාමාර්ගයක් ආරම්භ කර ඇති බවයි සඳහන් වන්නේ.
එසේම ගුරුවරුන් සහ තැපැල් දෙපාර්තමේන්තු සේවකයන් කළු ඇඳුමින් සැරසී සහ කළු පටි පැළඳ රජයේ නව බදු ප්රතිපත්තියට විරෝධය කළ කිරීමට කටයුතු කර තිබෙන අතර තවත් බොහෝ වෘත්තීය සමිති අද දිනයේ විරෝධතා සඳහා එක්වී තිබෙනවා.
අද (01) මධ්යම රාත්රීයේ සිට ක්රියාත්මක වන පරිදි ලංකා භූමිතෙල් ලීටරයක මිල රුපියල් 50 කින් අඩු කිරීමට ලංකා ඛනිජ තෙල් නීතිගත සංස්ථාව තීරණය කර තිබෙනවා.
එසේම ලංකා කාර්මික භූමිතෙල් මිලද රුපියල් 134 කින් අඩු කිරීමට පියවර ගෙන ඇති අතර සෙසු ඉන්ධන වර්ගවල මිලෙහි වෙනසක් සිදු නොවන බවයි ලංකා ඛනිජ තෙල් නීතිගත සංස්ථාව වැඩිදුරටත් සඳහන් කරන්නේ.
ඒ අනුව අඩු වූ මිල සහ නව මිල පහතින් දැක්වෙනවා.
* ලංකා භූමිතෙල් – රු.50 කින් (නව මිල රු.305)
* ලංකා කාර්මික භූමිතෙල් – රු.134 කින් (නව මිල රු.330)
හිටපු ජනාධිපති මෛත්රීපාල සිරිසේන විසින් ඉදිරිපත් කළ අභියාචනා පෙත්සම රුපියල් 21,000 ක ගාස්තුවකට යටත්ව නිෂ්ප්රභා කිරීමට බස්නාහිර පළාත් සිවිල් අභියාචනා මහාධිකරණය නියෝග කර තිබෙනවා.
එම අභියාචනා පෙත්සම අද (01) කැඳවූ අවස්ථාවේදී සංජීව මොරායස් සහ ෆ්රෑන්ක් ගුණවර්ධන යන විනිසුරු මඩුල්ල විසින් මෙම නියෝගය නිකුත් කර ඇති බවයි සඳහන් වන්නේ.
පාස්කු ප්රහාරයෙන් වින්දිතයින් බවට පත්වූ පුද්ගලයින් වන්දි අයකර දෙන ලෙස ඉල්ලා තමාට එරෙහිව කොළඹ දිසා අධිකරණය හමුවේ ගොනුකර තිබෙන නඩු සියල්ල ප්රතික්ෂේප කර තමන්ව එම නඩුවලින් නිදහස් කරන නියෝගයක් නිකුත් කරන ලෙස ඉල්ලා මෛත්රීපල සිරිසේන විසින් මෙම පෙත්සම ඉදිරිපත් කර තිබුණා.
අද (01) සිට හයිලෙවල් මාර්ගයේ ගමන් ගන්නා සියලුම මගී ප්රවාහන බස්රථ කොට්ටාව-මාකුඹුර බහුවිධ ප්රවාහන මධ්යස්ථානය හරහා ගමන් කිරීම අනිවාර්යය කර තිබෙනවා.
ඒ අනුව අදාළ තීරණයට පටහැනිව කටයුතු කරන බස්රථවල බලපත්ර අහෝසි කිරීමට පියවර ගන්නා බවයි ප්රවාහන අමාත්ය බන්දුල ගුණවර්ධන සඳහන් කළේ.
කොට්ටාව-මාකුඹුර බහුවිධ ප්රවාහන මධ්යස්ථානය ඉදිරිපිට හයිලෙවල් මාර්ගයේ මගීන් පැටවීමට හෝ මගීන් බැස්සවීමට වාහන නැවැත්වීම සපුරා තහනම් බවයි අමාත්යවරයා වැඩිදුරටත් සඳහන් කළේ.
රජයේ බදු ප්රතිපත්තියට විරෝධය පළ කිරීම ඇතුළු කරුණු කිහිපයක් මුල්කර ගනිමින් හෙට (01) දැවැන්ත එක්දින වැඩ වර්ජනයක් ක්රියාත්මක කිරීමට ක්ෂේත්ර රැසක වෘත්තීය සංගම් තීරණය කර තිබෙනවා.
ඒ අනුව වරාය, ඛනිජ තෙල්, විදුලිය, ජල, බැංකු, විශ්වවිද්යාල සහ ටෙලිකොම් වෘත්තීය සමිති මෙම වැඩවර්ජනයට එක්වන බව මේ වන විට නිල වශයෙන් ප්රකාශ කර තිබෙනවා.
මේ අතර රජයේ වෛද්ය නිලධාරීන්ගේ සංගමය වර්ජනයට එක්නොවී ප්රාදේශීය වශයෙන් විරෝධතා වල නිරත වීමට තීරණය කර තිබෙනවා. රෝහල් වලට පැමිණෙන රෝගීන්ව අපහසුතාවට ලක් නොකර ප්රතිකාර ලබාදීමට උපරිම උත්සාහ ගැනීම වෙනුවෙන් මෙම තීරණය ගත් බවයි ඔවුන් සඳහන් කරන්නේ.
තැපැල් සහ ගුරු වෘත්තීය සමිති මෙම වැඩ වර්ජනයට සහය ලබාදෙන නමුත් වර්ජනයට එක් නොවී කළු පටි සහ කළු ඇඳුම්වලින් සැරසී මේ සඳහා සහයෝගය ලබාදෙන බවයි එම වෘත්තීය සමිති පෙන්වා දෙන්නේ.
දුම්රිය වෘත්තීය සමිතිද වර්ජනයට එක්නොවී විරෝධතාවක නිරතවෙමින් වර්ජනයට සහය පළකිරීමට තීරණය කර ඇති අතර මේ හේතුවෙන් දුම්රිය ප්රමාදයන් සිදුවිය හැකි බවයි ඔවුන් පෙන්වා දෙන්නේ.
