Category: news_sub

සයිනෝපෙක් සමාගම මෙරට ඉන්ධන බෙදා හැරීම ඊයේ (30) ආරම්භ කර තිබෙනවා.
ඒ අනුව ඛණිජ තෙල් සංස්ථාව අයත්ව තිබූ මත්තෙගොඩ පිහිටි ඉන්ධන පිරවුම්හලක් මෙලෙස සයිනෝපෙක් සමාගම යටතට පවරා ඇති බවයි සඳහන් වන්නේ.
සයිනෝපෙක් සමාගම ඇති කරගත් ගිවිසුම අනුව දිවයින පුරා පිරවුම්හල් 150 ක් එම සමාගම යටතට පැවරෙන අතර නව ඉන්ධන පිරවුම්හල් 50 ක් ඉදි කිරීමටද ඔවුන්ට අවස්ථාව සැලසෙනවා.

මේ වසරේ ගත වූ කාලය තුළ ළමා අපයෝජන සම්බන්ධයෙන් පැමිණිලි 5,456 ක් ලැබී ඇති බව ජාතික ළමා රක්ෂණ අධිකාරියේ සභාපති ජ්‍යෙෂ්ඨ කථිකාචාර්ය උදය කුමාර අමරසිංහ පවසනවා
ඒ අතර ළමුන් කෘෘරත්වයට පත්කිරීම සම්බන්ධයෙන් පැමිණිලි 1,296 ක්, බරපතළ තුවාල සිදුකිරීම් සම්බන්ධයෙන් පැමිණිලි 163 ක්, බරපතළ ලිංගික අපයෝජන සිදුකිරීම් සම්බන්ධව පැමිණිලි 242 ක් ලැබී තිබෙන බවයි සඳහන් වන්නේ.
ළමුන් සිඟමනේ යෙදවීම සම්බන්ධයෙන් ද පැමිණිලි 196 ක් ලැබී ඇති බවත් ළමුන් සිඟමනට යෙදවීම් සම්බන්ධයෙන් ළමා ආරක්ෂණ අධිකාරිය දැඩි අවධානයක් යොමුකර තිබෙන බවයි ජාතික ළමා රක්ෂණ අධිකාරිය සඳහන් කළේ.
අදාළ පැමිණිලි සම්බන්ධයෙන් විමර්ශන කටයුතු සිදුකිරීම සඳහා මේ වන විටත් එම පැමිණිලි පොලිස් ස්ථාන වෙත යොමුකර ඇති බව ජාතික ළමාරක්ෂණ අධිකාරිය වැඩිදුරටත් සඳහන් කළේ.

අද (30) දින රාජ්‍ය බැංකු විවෘත කිරීමට රජය පියවර ගෙන ඇති බව මුදල් රාජ්‍ය අමාත්‍ය රංජිත් සියඹලාපිටිය පවසනවා.

පොහෝ දිනයක් වුවත්, අද දින අස්වැසුම ප්‍රතිලාභ ගෙවීම සඳහා පමණක් බැංකු විවෘතව තැබෙන බවයි සඳහන් වන්නේ.

ඒ අනුව අද උදෑසන 8.00 සිට පස්වරු 3.00 දක්වා මහජන බැංකුව, ඉතිරි කිරීමේ බැංකුව සහ ලංකා බැංකු සියලු ශාඛාවන් විවෘතව තැබෙනවා.

අයිස් මත්ද්‍රව්‍ය කිලෝ ග්‍රෑම් 3යි ග්‍රෑම් 394ක් සමඟ පුද්ගලයෙකු උයිලන්කුලම ප්‍රදේශයේදී අත්අඩංගුවට ගෙන තිබෙනවා.

ඒ අනුව මෙලෙස අත්අඩංගුවට ගෙන ඇත්තේ, මන්නාරම ප්‍රදේශයේ පදිංචි 28 හැවිරිදි පුද්ගලයෙකු බවයි පොලිස් විශේෂ කාර්ය බළකාය සඳහන් කළේ.

පොලිස් විශේෂ කාර්ය බළකායේ මන්නාරම කඳවුරේ උතුරු පළාත් විශේෂ වැටලීම් ඒකකයේ නිලධාරීන්ට ලද තොරතුරකට අනුව මෙම වැටලීම සිදුකර තිබෙනවා.

සැකකරු වැඩිදුර විමර්ශන සඳහා මන්නාරම පොලිස් මත්ද්‍රව්‍ය කාර්යංශය වෙත භාරදී ඇති බවයි වැඩිදුරටත් සඳහන් වන්නේ.

නිකිණි පුර පසළොස්වක පොහොය දිනය අදට (30) යෙදී තිබෙනවා.

ශාසන ප්‍රතිපත්තීන්ට අනුව පෙරවස් එළැඹීමට නොහැකි වූ උපසම්පදා භික්ෂුන් වහන්සේලා නිකිණි පුන් පොහෝ දිනයේදී පසුවස් එළැඹීම සිදු කෙරෙනවා.

බුදුරජාණන් වහන්සේගේ ධර්ම භාණ්ඩාගාරික ආනන්ද හිමියෝ සියලු කෙලෙසුන් නසා රහත් වී ඇත්තේ ද බුදුරජාණන් වහන්සේගේ ලලාට ධාතුව නිධන් කර සේරුවිල මංගල චෛත්‍යරාජයා තැනීම ආරම්භ කිරීම සිදුව ඇත්තේ ද අද වැනි නිකිණි පොහොය දිනක බවයි ශාසන ඉතිහාසයේ දැක්වෙන්නේ.

අජාසත් රජුගේ දායකත්වයෙන් සම්බුද්ධ ශාසනයේ චිරස්ථිතිය උදෙසා, රජගහ නුවර දී ප්‍රථම ධර්ම සංගායනාව පැවැත් වූ දිනය ලෙස ද නිකිණි පුර පසළොස්වක පොහොය වැදගත් වනවා.

සමාජ සුබසාධන ප්‍රතිලාභ ලබාදීම සඳහා ලක්ෂ 5 ක් වූ ඉතිරි පුද්ගලයින් තෝරාගැනීමේ කටයුතු කඩිනමින් සිදුකරන බව මුදල් රාජ්‍ය අමාත්‍ය ශෙහාන් සේමසිංහ පවසනවා.
ඒ සඳහා ඉදිරිපත් වූ අභියාචනා සහ විරෝධතා සලකා බැලීමේ කටයුතු කඩිනම් කරන බවයි මුදල් රාජ්‍ය අමාත්‍යවරයා සඳහන් කළේ.
අසත්‍ය තොරතුරු ඉදිරිපත් කර අස්වැසුම ප්‍රතිලාභ ලබා ගන්නන්ගෙන් එම මුදල අය කර ගන්නා බවත්, ඔවුන්ට එරෙහිව නීතිමය ක්‍රියාමාර්ග ගන්නා බවයි මුදල් රාජ්‍ය අමාත්‍ය ශෙහාන් සේමසිංහ සඳහන් කළේ.

කොටුව – කටුනායක අධිවේගී මාර්ගයේ ධාවනයේ නිරත සුඛෝපභෝගී පෞද්ගලික බස් රථ සේවකයින් ආරම්භ කළ වර්ජනය අවසන් කර තිබෙනවා.
ඒ අනුව ප්‍රවාහන රාජ්‍ය අමාත්‍ය ලසන්ත අලගියවන්න සමග පැවති සාකච්ඡාවකින් අනතුරුව එළැඹි එකඟතාවයට අනුව බස් රථ ධාවනය කිරීම අද (29) සිට යළි ආරම්භ කරන බවයි ගුවන් තොටුපොළ – කොටුව බස් රථ සේවක සංගමයේ සභාපති ඉන්දික ගුණසේකර සඳහන් කළේ.
බස් රථ ධාවන මාර්ගයක් සංශෝධනය කිරීමට එරෙහිව මෙම වර්ජනය ක්‍රියාත්මක කළ බවයි ඔහු වැඩිදුරටත් සඳහන් කළේ.

කොළඹ ජාත්‍යන්තර පොත් ප්‍රදර්ශනය 24 වන වරටත් ලබන සැප්තැම්බර් 22 වනදා සිට ඔක්තොම්බර් පළමුවනදා දක්වා දින 10 ක් පුරා කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරිශ්‍රයේදී පැවැත්වීමට නියමිතයි.

විශේෂ වට්ටම් යටතේ තමන්ට අවශ්‍ය සියලු පොත් මිලදී ගැනීමට එහිදී පාඨකයින්ට අවස්ථාව හිමිවන බවයි ශ්‍රී ලංකා පොත් ප්‍රකාශයන්ගේ සංගමයේ සභාපති සමන්ත ඉන්දීවර වැඩිදුරටත් සඳහන් කළේ.

මහනුවර ඓතිහාසික ඇසළ පෙරහැර මංගල්‍යයේ තුන්වෙනි රන්දෝලි පෙරහැර අද (28) රාත්‍රියේ වීථි සංචාරය කිරීමට නියමිතව තිබෙනවා.

ඒ අනුව තුන්වෙනි රන්දෝලි පෙරහැර අද රාත්‍රී 6.48ට දළදා වීථිය, ඊ.එල් සේනානායක වීථිය, ශ්‍රීමත් බෙනට් සොයිසා වීථිය, කුමාර වීථිය, ඊ.එල් සේනානායක වීථියෙන් හරස් වීථියට පැමිණ ඩී.එස්. සේනානායක වීථිය, රජ වීථිය ඔස්සේ ගමන් කර මාළිගාවට ගෙවැදීමට නියමිතයි.

අද (28) දිනයේ ප්‍රදේශ කිහිපයක උණුසුම් දර්ශකය මිනිස් සිරුරට දැනෙන අවධානය යොමු කළ යුතු මට්ටමක පවතින බව කාලගුණ විද්‍යා දෙපාර්තමේන්තුව පවසනවා.

ඒ අනුව උතුරු-මැද, නැගෙනහිර පළාත් සහ වවුනියාව, මුලතිව් දිස්ත්‍රික්කවල ඇතැම් ස්ථානවල මෙලෙස උණුසුම අවධානය යොමු කළ යුතු මට්ටමක පවතින බවයි සඳහන් වන්නේ.

මෙම තත්ත්වය තුළ ප්‍රමාණවත් පරිදි ජලය පානය කිරීම, හැකි තාක් සෙවණ ඇති ස්ථානවල රැඳී සිටීම සිදුකළ යුතු අතර කුඩා ළමුන්, වැඩිහිටි හා රෝගී පුද්ගලයින් සම්බන්ධයෙන් විශේෂ අවධානය යොමු කළ යුතු බව කාලගුණ විද්‍යා දෙපාර්තමේන්තුව වැඩිදුරටත් සඳහන් කරනවා.