Category: news_main

පාලිත අබේලාල්

රාජ්‍ය නාට්‍ය උපදේශක මණ්ඩලය, සංස්කෘතික කටයුතු දෙපාර්තමේන්තුව සහ අභ්‍යන්තර කටයුතු , වයඹ සංවර්ධන හා සංස්කෘතික කටයුතු අමාත්‍යංශය විසින් සංවිධානය කරන ලද 45 වන රාජ්‍ය නාට්‍ය උළෙලේ සම්මාන ප්‍රදානය ඉකුත් මාර්තු 27 වන දින නෙළුම් පොකුණ රඟහලේදී පැවැත්විණි.

මෙම වසරේ පෙබරවාරි මාසයේ 15 වනදින සිට 28 වන දින දක්වා මරදාන ටවර් රඟහලේදී රංග ගතවූ සිංහල අංශයේ දිගු නාට්‍ය 10 ක්, කෙටි නාට්‍ය 09 සහ දමිළ අංශයෙන් කෙටි නාට්‍ය 05 ක් අතුරන් ප්‍රශස්ත දක්ෂතාවයන් දැක්වූ නිර්මාණ කරුවන් මෙහිදී සම්මානයට පාත්‍රවිය.

2017 වර්ෂය සඳහා වන නාට්‍ය කීර්ති සම්මානය

ප්‍රවීණ නාටයකරුවකු මෙන්ම සාහිත්‍ය නිර්මාණ කරුවකු වන මානා මක්කීන් මහතා

ප්‍රවීණ නාට්‍යවේදී මානෙල් වීරමුණි මහතා

දිගු නාට්‍ය අංශය

හොඳම දිගු නාට්‍ය – රාජිත දිසානායකගේ නැතුවම බැරි මිනිහෙක් නාට්‍ය

හොඳම නාට්‍ය නිෂ්පාදනය – රාජිත දිසානායක (නැතුවම බැරි මිනිහෙක්)

හොඳම ස්වීය රචනය – රාජිත දිසානායක (නැතුවම බැරි මිනිහෙක්)

හොඳම ස්වීය නොවන රචනය – ජයවතී ජයසිංහ (ප්‍රේමවන්ත කුමාරයෝ)

හොඳම නළුවා – ධර්මප්‍රිය ඩයස්  ( නැතුවම බැරි මිනිහෙක්)

හොඳම නිළිය – දිනූපා කෝදාගොඩ (ගිරිකූඨ කාශ්‍යප)

හොඳම සහය නළුවා – ශ්‍යාම් ප්‍රනාන්දු (නැතුවම බැරි මිනිහෙක්)

හොඳම සහය නිළිය – බිම්සරා ප්‍රේමරත්න ( නැතුවම බැරි මිනිහෙක්)

හොඳම රංග වින්‍යාසය – විශ්ව චින්තක තිලකරත්න ( Mr.Wහෙවත් අත්තනායකගේ අවසන් දවස් )

හොඳම සංගීත නිර්මාණය – ලහිරු මාඩිවිල (ගිරිකූඨ කාශ්‍යප)

හොඳම වේදිකා පරිපාලනය – බිම්සර හතරසිංහ ( Mr.Wහෙවත් අත්තනායකගේ අවසන් දවස් )

හොඳම අංග රචනය – ලක්ෂිත සංකල්ප ජයකොඩි, චමරි නිසංසලා සහ අශාන් උඩුපිල්දෙණිය (ප්‍රේමවන්ත කුමාරයෝ)

හොඳම පසුතල නිර්මාණය – අනුරාධ මල්ලවආරච්චි  ( නැතුවම බැරි මිනිහෙක්)

හොඳම රංග වස්ත්‍ර නිර්මාණය – අනුදත් රාජපක්ෂ සහ අඛිල සපුමල් (ගිරිකූඨ කාශ්‍යප)

හොඳම රංගාලෝක නිර්මාණය – අනුරාධ මල්ලවආරච්චි  ( නැතුවම බැරි මිනිහෙක්)

කෙටි නාට්‍ය (සිංහල)

හොඳම කෙටි නාට්‍ය නිෂ්පාදන -1ආනනද චන්ද්‍රකුමාර (ලද ලබ නාට්‍ය)

2 සමන්ත පරණලියනගේ (කිරිඅම්මා අවතාරේ)

3සුදර්ශන ක්‍රිෂාන්ත (ස්වර්ණ භූමි)

හොඳමරචනය – 1 දමිත් වැලිකල (ලද ලබ නාට්‍ය)

                          2 සමන්ත පරණලියනගේ (කිරිඅම්මා අවතාරේ)

3සුසිත් විජයමුණි (ආණ්ඩුවේ රස්සාව )

හොඳම නළුවා 1 (සම සම්මාන) ජනක මුණසිංහ සහ ක්‍රිෂාන්ත ජයබාහු (ලද ලබ නාට්‍ය)

                      2සුදර්ශන ක්‍රිෂාන්ත (මිඩ්නයිට් ඩ්‍රීම්ස්)

                      3 ජූඩ් ක්ලෝඩියස් (කිරි අම්මා අවතාරේ)

හොඳම නිළිය 1 ජීවන්ති පෙරේරා (කිරි අම්මා අවතාරේ)

                      2 සුරනි අනූපමා (ආණ්ඩුවේ රස්සාව)

                      3 මල්කි තාරුකා පෙරේරා (එම්බාම්)

හොඳම රංග වින්‍යාසය -ජූඩ් ක්ලෝඩියස් (ලද ලබ )

හොඳම සංගීත නිර්මාණය – සුදර්ශන ක්‍රිෂාන්ත සහ නිලූෂා දිල්හානි (ස්වර්ණ භූමි)

හොඳම වේදිකා පරිපාලනය – ආනනද චන්ද්‍රකුමාර (ලද ලබ )

හොඳම අංග රචනය – පසන් මල්ෂාන් (ස්වර්ණ භූමි)

හොඳම පසුතල නිර්මාණය -(සම සම්මාන) ප්‍රදීප් ඇරෑගම(ආණ්ඩුවේ රස්සාව)  සහ නුවන් දර්ශන ( මිඩ්නයිට් ඩ්‍රීම්)

හොඳම රංග වස්ත්‍ර නිර්මාණය – ආනනද චන්ද්‍රකුමාර (ලද ලබ )

හොඳම රංගාලෝක නිර්මාණය – ආලෝක සම්පත් ( මිඩ්නයිට් ඩ්‍රීම්)

 කෙටි නාට්‍ය (දමිළ)

හොඳම කෙටි නාට්‍ය නිෂ්පාදනය – 1එස්. කාර්තික්කේසු ( කල්ලරෛයියාන කරුවරෛයි)

2 එම්. කාලිදාස් ( තෝලන්)

හොඳම රචනය- 1 එස්. කාර්තික්කේසු ( කල්ලරෛයියාන කරුවරෛයි)

හොඳම නළුවා -1 එස්.තුජාන් (Magic Box)

2 ආනා ප්‍රශාන්තන් ( කල්ලරෛයියාන කරුවරෛයි)

3 එස්. තුජාන් ( අර්ථම්)

හොඳම නිළිය- 1 ටී. මේගලාදේවි ( කල්ලරෛයියාන කරුවරෛයි)

2 ආර්. දර්ශණා ( කල්ලරෛයියාන කරුවරෛයි)

හොඳම රංග වින්‍යාසය –එස්. කාර්තික්කේසු ( කල්ලරෛයියාන කරුවරෛයි)

හොඳම සංගීත නිර්මාණය – කේ. සංගුලක්ෂ්මි ( කල්ලරෛයියාන කරුවරෛයි)

හොඳම වේදිකා පරිපාලනය – එන්. නිරුත්තිගන් ( කල්ලරෛයියාන කරුවරෛයි)

හොඳම අංග රචනය – වී. සුදර්ශන් (අර්ථම්)

හොඳම පසුතල නිර්මාණය – ඒ. විමල්රාජ් ( කල්ලරෛයියාන කරුවරෛයි)

හොඳම රංග වස්ත්‍ර නිර්මාණය – එම්. ඉන්දුජා (Magic Box)

හොඳම රංගාලෝක නිර්මාණය – එම්. නවනීදන් (තෝලන්)

හිටපු ජනාධිපති මහින්ද රාජපක්ෂ මහතා ඊයේ (මාර්තු 24) බරපතල වංචා විමර්ෂණ ජනාධිපති කොමිසම ඉදිරියේ සාක්ෂි දීම සදහා පෙනී සිටියේය.

ඉකුත් සතියේද ඒ මහතා මේ වෙනුවෙන් පෙනී සිටීමට නියමිතව තිබුණද නොවැළක්විය හැකි කරුණක් හේතුවෙන් එදින තමාට පෙනී සිටිය නොහැකි බව ඒ මහතා නීතිඥයෙක් මාර්ගයෙන් දන්වා තිබුණි.

පසුගිය ජනාධිපතිවරණ සමයේ ශ්‍රී ලංකා රෑපවාහීනී සංස්ථාවේ පලකරන ලද දැන්වීම් වෙනුවෙන් අයවිය යුතු රැපියල් මිලියන ගණනක මුදල් නොගෙවීම සම්බන්ධයෙන් ප්‍රශ්න කිරීම සදහා ඒ මහතා කොමිසම වෙත පැමිණියේය.

මෙහිදී අදාළ සිදුවීම සම්බන්ධයෙන් විනාඩි 45කට ආසන්න කාලයක් හිටපු ජනාධිපතිවරයාගෙන් ප්‍රශ්න කරන ලදී. මෙම අවස්ථාවට ඒකාබද්ධ විපක්ෂය නියෝජනය කරන පාර්ලිමේන්තු මන්ත්‍රීවරු පිරිසක්ද සහභාගී වූහ

ශ්‍රී ලංකා යුද හමුදා මාණ්ඩලික ප්‍රධානියා ලෙස මේජර් ජෙනරාල් මහේෂ් සේනානායක මහතා පත්කර තිබේ.

2016 වසරේ නොවැම්බර් 04 වන දින සිට හෙතෙම යුද හමුදා නියෝජ්‍ය මාණ්ඩලික ප්‍රධානියා ලෙස කටයුතු කරමින් සිටි අතර මේජර් ජෙනරාල් යූ.ඒ.බී මැදවල මහතාගෙන් පුරප්පාඩු වූ මාණ්ඩලික තනතුරේ හෙතෙම අද වැඩබාර ගන්නා ලදී.

ඔහු 1981 ඔක්තෝබර් 16 වන දින ශ්‍රී ලංකා යුද හමුදාවේ කෙඩෙට් නිලධාරි පාඨමාලා අංක 16 (දිගු කාලීන පාඨමාලා) යටතේ සිය මූලික පුහුණවීම් ලබා 1983 ජුනි මස 23 වන දින දෙවන ලුතිතන්වරයෙක් ලෙස අධිකාරියට පත්ව 1 වන ක්ෂේත්‍ර ඉංජිනේරු රෙජිමේන්තුවට එක්වූවේය. හෙතෙම තමා හැදෑරූ එම පාඨමාලාවේ හොඳම නිලධාරියාට පිරිනැමෙන සම්මානය සහ අසිපත ද දිනා ගනු ලැබීය.

ජ්‍යෙෂ්ඨ නිලධාරියෙකු ලෙස යුද හමුදාව තුළ වගකීම් බහුල තනතුරු රැසක් හෙබවූ මේජර් ජෙනරාල් සේනානායක ශ්‍රී ලංකා යුද හමුදා ක්ෂේත්‍ර ඉංජිනේරු රෙජිමේන්තුවේ භට පිරිස් අණදෙන නිලධාරි/ බලඝණ නිලධාරි ආදි නිලයන් හෙබවූ අතර, දියතලාව ශ්‍රී ලංකා යුද හමුදා විද්‍යා පීඨයේ උපදේශකවරයෙක් ලෙස ද ක්‍රියා කළේය. අන්තර් ඒකක නිලධාරි මාරුකිරීම්වල ප්‍ර‍තිඵලයක් ලෙස මේජර් ජෙනරාල් සේනානායක 1989 වසරේ සිට විශේෂ බලකායට අනුයුක්ත කෙරිණි.

හෙතෙම ශ්‍රී ලංකාව තුල පැවති උතුරු – නැගෙනහිර යුද්ධයේ දී ප්‍ර‍ධාන හමුදා මෙහෙයුම් රැසකට සිය දායකත්වය ලබා දුන්නේ 1 වන විශේෂ බලකායේ බලඝණ නිලධාරි ලෙස සහ දිගු දුර විහිදුම් බලකාය හා දිගු දුර මුර සංචාර ශ්‍රී ලංකා යුද හමුදාවට හඳුන්වා දුන් 3 වන විශේෂ බලකායේ අණදෙන නිලධාරි ලෙස කටයුතු කරමිනි. විශේෂ බලකායේ රෙජිමේන්තු මධ්‍යස්ථාන සේනාවිධායක, 211 පාබල බලසේනාවේ (වව්නියාව) බල සේනාධිපති, විශේෂ බලකා බලසේනාවේ බල සේනාධිපති සහ 52 සේනාංකයේ (යාපනය, වරණිහි පිහිටි) සේනාංකාධිපති ලෙස ද එතුමා කටයුතු කළේය.

යුද්ධය පැවති සමයේ විවිධ කාලයන් තුල 52 සේනාංකයේ කර්නල් ප්‍ර‍ධාන මාණ්ඩලික සහ යාපනය ආරක්ෂක සේනා මූලස්ථානයේ බ්‍රිගේඩියර් ප්‍ර‍ධාන මාණ්ඩලික නිලධාරි ලෙස ද ක්‍රියා කලහ. යුද හමුදා අණ හා මාණ්ඩලික විද්‍යාලයේ නියාමන උපදේශක වශයෙන් මෙන්ම මානුෂීය මෙහෙයුම් සමයේ තීරණාත්මක අවධියේ සැලසුම් අධ්‍යක්ෂ ලෙස ද මෙම ජ්‍යෙෂ්ඨ නිලධාරි මහත් කාර්යභාරයක් ඉටු කළේය. එමෙන්ම යුද හමුදා මූලස්ථානයේ හමුදා ලේකම් ලෙස ද මේජර් ජෙනරාල් සේනානායක කටයුතු කළේය.

තව ද මේජර් ජෙනරාල් සේනානායක එක්සත් රාජධානියේ යුද හමුදා අණ දෙන සහ ප්‍ර‍ධාන මාණ්ඩලික විදුහලේ සිවිල් ඉංජිනේරු විද්‍යාවේදි උපාධිධරයෙකි. යුද මෙහෙයුම්වල දී දැක්වූ දැඩි කැපවීම සහ දක්ෂතාවය වෙනුවෙන් රණවික්‍ර‍ම පදක්කම, රණශූර පදක්කම මෙන්ම යුද හමුදාව තුල සිදු කළ නිකැළැල් සේවාව වෙනුවෙන් උත්තම සේවා පදක්කම ද එතුමා වෙත පිරිනමා ඇත. මේජර් ජෙනරාල් සේනානායක ආර්ඩබ්පී ආර්එස්පී යූඑස්පී පීඑස්සි යාපනය ආරක්ෂක සේනා මූලස්ථාන ආඥාපති ධූරය සහ විශේෂ බලකායේ බලකාධිපති ධූරය හොබවන ලදී.

ශ්‍රී ලංකාව සම්බන්ධයෙන් 2015 දී එක්සත් ජාතීන්ගේ මානව හිමිකම් කවුන්සිලයට ඉදිරිපත්වූ යෝජනාව මුළුමනින්ම ක්‍රියාත්මක කිරීම ප්‍රමුඛත්වයෙහිලා සැලකිය යුතු බව ශ්‍රී ලංකා රජය පිළිගෙන තිබේ.

යුරෝපා සංගමය හා ශ්‍රී ලංකා රජය එක්ව ප්‍රකාශයට පත්කළ ඒකාබද්ධ නිවේදනයක දැක්වෙයි.

යුරෝපා සංගමය යටතේ නීතිය, සාමය හා මානව හිමිකම් පිිළිබඳ ක්‍රියාකාරී කමිටුවේ නියෝජිතයින් ලෙස  ශ්‍රී ලංකා රජය-යුරෝපා සංගමය ඒකාබද්ධ කොමිසමේ මාර්තු 13-14 යන දෙදින පැවති දෙවන රැස්වීමෙන් අනතුරුව මෙම ඒකාබද්ධ නිවේදනය නිකුත් කර ඇත.

2015 වසරේ දී ශ‍්‍රී ලංකාව සම්බන්ධයෙන් ඉදිරිපත් වු යෝජනාවේ සදහන් කරුණු ක‍්‍රියාත්මක කිරීමට මේ වන තෙක් කාලය හිමි වු අතර එහි ඇතුළත් යෝජනා ක‍්‍රියාත්මක කිරීම සදහා මාස 12 ක කාලයක් හිම ව තිබේ.

ලඟදි පැවැත්වීමට නියමිත අමාත්‍ය මණ්ඩල සංශෝධනයේදී ජනමාධ්‍ය අමාත්‍ය ධුරය අමාත්‍ය අකිල විරාජ් කාරියවසම් වෙත පැවරීමට තීරණය කර ඇතැයි ‘සිරිකොත’ එජාප මුලස්ථාන ආරංචිමාර්ග පවසයි.

ඔහුට එම අමාත්‍ය ධුරය පවරනු ලබන්නේ ඔහු දැනට දරන ඇමති ධුරයට අමතරව බවද එම ආරංචිමාර්ග වැඩිදුරටත් කියා සිටියි.

ජනමාධ්‍ය අමාත්‍යංශයේ ඇමති, නියෝජ්‍ය ඇමති හා ලේකම් යන තිදෙනාම වෙනස්වන බවට වරින් වර විවිධ වාර්තා පළ විය.

පසුගියදා ජාතික රූපවාහිනියේ නව අධ්‍යක්ෂ ජෙනරාල්වරයා වැඩ භාර ගැනීමේ උත්සවයට සහභාගී වෙමින් අමාත්‍යංශ ලේකම් නිමල් බෝපගේ මහතා ප්‍රකාශ කර සිටියේ තමන් ලේකම්ධූරයේ සිටින්නේ තවත් සුලු කාලයක් බව තමන්ට හැගී යන බවයි.

ඉන්පසු ජනාධිපති ලේකම් කාර්යාල ආරංචි මාර්ග පවසා සිටියේ ජනමාධ්‍ය ඇමතිධූරය ඇතුලු ඇමතිධූර රැසක් සංශෝධනය කිරීම සඳහා තීරණය කර ඇති බවයි.

අමාත්‍යංශයේ ලේකම් නිමල් බෝපගේ මහතාද වෙනත් අමාත්‍යංශයකට පත්කරනු ඇතැයිද එම ආරංචිමාර්ග ප්‍රකාශ කර සිටියේය.

ඇමති, නියෝජ්‍ය ඇමති හා ලේකම් යන තිදෙනාම වෙනස්වන එකම අමාත්‍යංශය ජනමාධ්‍ය අමාත්‍යංශය වන අතර මීට හේතුව වී ඇත්තේ අමාත්‍යංශයේ ඇතිවූ බලඅරගලය බවද පැවසේ.

මෙම සංශෝධනයෙන් පසු ජාතික රූපවාහිනිය, ස්වාධීන රූපවාහිනිය හා රජයේ මුද්‍රණාලය හැර අනෙක් සියලුම ආයතනවල සභාපතිවරුන් අධ්‍යක්ෂ ජෙනරාල්වරුන් වෙනස් කිරීමද සිදු කිරීමට නියමිත බවත් අගමැති කාර්යාල අරංචිමාර්ග වැඩිදුරටත් සඳහන් කර සිටී.

ආන්දෝලනයට තුඩු දුන් බැඳුම්කර ගනුදෙනුවලට සම්බන්ධ පාර්ශවයක් ආණ්ඩුවට සෘජු අලාභයක් සිදුකර ඇත්නම් රජයට එය අයකර ගත හැකි බව නීතිපති ජයන්ත ජයසූරිය මහතා ප්‍රකාශ කර සිටියි.

නීතිපතිවරයාගේ අත්සනින් යුතුව කථානායකවරයාට යොමු කොට 07 වන දා පාර්ලිමේන්තුවේ සභාගත කරන ලද ලිපිය මගින් හෙතෙම මේ බව සඳහන් කර තිබේ.

මෙම සිද්ධියට අදාළව කෝප් කමිටුව විසින් තමා වෙත යොමුකරන ලද වාර්තාවේ මුදල් අවභාවිතයක් හෝ ගනුදෙනු සිදුකිරීමේදී නීතියට පටහැණිව එය සිදුවිය හැකි බව දක්වා ඇති බවත්, 1937 ලියාපදිංචි කොටස් හා සුරැකුම්පත් ආඥා පනත යටතේ කිසියම් පුද්ගලයෙකු අදාළ රෙගුලාසි, විධිවිධාන හා මගපෙන්වීම් අනුව කටයුතු කිරීමට අසමත් වන්නේනම් දඬුවම් ලැබිය හැකි වරදක් බවද නීතිපතිවරයා එම ලිපියෙන් පෙන්වාදී තිබේ.

දැනට මේ සිදුවීම සම්බන්ධයෙන් වත්මන් මහබැංකු අධිපතිවරයා විසින් අපරාධ පරීක්ෂණ දෙපාර්තමේන්තුවට පැමිණිල්ලක් සිදුකර ඇති බැවින් ඒ සම්බන්ධයෙන් සිදුකෙරෙන පරීක්ෂණ කඩිනම් කරන ලෙස තමන් උපදෙස් ලබාදී ඇති බවත්, සිදුකෙරෙන පරීක්ෂණවල ප්‍රගතිය දැක්වෙන  වාර්තාවක් තමන් වෙත යොමුකරන ලෙස දන්වා ඇති බවත් නීතිපතිවරයාගේ ලිපියේ වැඩිදුරටත් දැක්වෙයි.

ඉකුත් 2013 වසරේ අගෝස්තු මස සිට 2015 ජූලි මස දක්වා රාජක්ෂ පාලන සමයේ දී ඇමරිකාවේ ලොස් ඇන්ජලීස් නුවර පිහිටා ඇති ශ්‍රී ලංකා කොන්සල් ජෙනරල් කාර්්‍යාලයට අයත් නිල නිවසේ ලැගුම් ගනිමින් එහි සුපිරි පහසුකම් අයථා ලෙස භුක්ති විදි අභි රහස් යුවලක් පිළිබද  වාර්තා  වී ඇත.

ලොස් ඇන්ජලීස් නුවර  පදිංචි ශ්‍රී ලාංකිකයන් පවසන්නේ මෙම පවුල හා මහින්ද රාජපක්ෂ අතර දැඩි සමීප සබදතාවක් පැවති බවයි.

මේ පිළිබද තතු අනාවරණය වීම ආරම්භ වූයේ  විදේශ කටයුතු අමාත්‍යංශයේ විගණකාධිපතිවරුන් විසින් ලොව පුරා මෙහෙය වූ සෙසු ශ්‍රී ලාංකේය මෙහෙයුම් වලට සමගාමීව ලොස්ඇන්ජලීස් නුවර පිහිටි ශ්‍රී ලංකා කොන්සල් කාර්්‍යාලයේ ද සිදු කළ මූල්‍ය විගණන කටයුතු හරහාය. එම විගණන කටයුතු වලින් 2013 වසරේ සිට 2015 දක්වා කාලයේ සිදු වූ මූල්‍යමය අක්‍රමිකතා කිහිපයක තතු මේ වන විට අනාවරණය වෙමින් පවතී.

කැලිෆෝනියා ප්‍රාන්තයේ ලොස් ඇන්ජලීස් නුවර Glendale නගරයේ පිහිටා ඇති  ශ්‍රී ලංකා කොන්සල් ජනරාල්  නිල නිවසේ වහා ක්‍රියාත්මක කළ FCID පරීක්ෂණ වලින්  මෙම විගණන පිළිබද තොරතුරු හෙළි වී තිබේ.  ‍මෙම ඉඩ පහසුකම් සහිත සුඛෝපභෝගී නිවස එවක කොන්සාල් ජෙනරල්  ආචාර්්‍යය හෙක්ටර් වීරසිංහ මහතා විසින් මසකට ඩොලර් 8200ක මුදලට කුලියට ගෙන ඇත. 2013 වසරේ ජූලි මස 30 වනදායින් හෙක්ටර් වීරසිංහ මහතාගේ නිල කාලය හමාර වී ඇති අතර එබැවින් එම නිල නිවසින් ඔහු පිටව ගොස් ඇත.  ඔහුගෙන් පසුව මල්රාජ් ද සිල්වා මහතා අදාල ධූරය සදහා පත්වීම් භාර ගනු ලැබූවද ඔහු මෙම නිල නිවස සිය පදිංචිය සදහා භාවිතා ක නැති බව වැඩි දුර ආරංචි මාර්ග සදහන් කර සිටියි.

ලොස් ඇන්ජලීස් හි ශ්‍රී ලාංකේය කොල්සාල් ජෙනරාල්වරයාට අනුව  මෙම  කාර්්‍යාලයීය නිල නිවසේ සියලු වරප්‍රසාද රිසි පරිදි භුක්ති විදි යුවල සදහා එම ස්ථානය ලබා දී ඇති ක්‍රම වේදය ද අභිරහසක්ය. තවද ශී ලංකා බදු ගෙවන්නන්ට මේ වෙනුවෙන් 2013 වසරේ අගෝස්තු මස සිට 2015 ජූනි දක්වා ගෙවීමට සිදු වූ පිරිවැය ඩොලර් 174300/- ක් පමණ බවද වාර්තා වේ. බොස්ටන් ලංකා විසින් ලොස් ඇන්ජලීස් කොන්සාල් ජෙනරල් කාර්්‍යාලය සම්බන්ධ කරගත් අවස්ථාවේ එහි සේවයේ නියුතු ස්වර්ණා ගුණරත්න විසින් මේ බව සනාථ කරනු ලැබිණි. මීට අමතරව නිල නිවස යළි බාර දීමේදී  නිවස ඉතා හොද තත්ත්වයේ පවතින්නේ නම් භාවිතා කළ පුද්ගලයාට යළි ලබා දෙන ඩොලර් 10000/-ක ආරක්ෂිත තැන්පතු මුදලට සිදු වූයේ කුමක්ද යන්න කිසිවෙකු දන්නේ නැත.

කෙසේ වුවත් අනාවරණය වන පරිදි එහි සුපිරි පහසුකම් භාවිතය සහ විශාල කුලී මුදල පමණක් නොව නිල නිවස සදහා අනුයුක්ත කර තිබූ රියැදුරන් දෙදෙනාට මෙම අභිරහස් යුවල සදහා වසර 2ක් පමණ සේවය කිරීමට ද සිදුව ඇත. එම අදාල කාලය තුළ   ලොස් ඇන්ජලීස් හි ඔවුන්ගේ වැටුප් ගෙවීමට බලයලත් ශ්‍රී ලාංකේය කොන්සල්වරයාට සම්බන්ධ  නිළධාරියා වන මහේෂ් කුමාර්  මහතා වෙත මේ වන තුරුම ඔවුන් සේවය වාර්තා කර නොමැති බවද හෙළි වී ඇත.

නමුත් රියදුරන් විසින් පවත්වාගෙන ගොස් තිබූ ලොග් සටහන්වලට අනුව සොයාගෙන ඇත්තේ ඔවුන් දිනපතා Pomona College සිට  California ප්‍රාන්තයේ Claremontනගරයට දිනපතා ගමන් බිමන් සිදු කර ඇති බවයි. ඔවුහු මෙලෙස Glendale සිට Claremont දක්වා ගමන් බිමන් සිදු කිරීමට හේතු අනුමාන කිරීමට හැකි සාක්ෂි බොහොමයක්  හමු වුවද ඒ කිසිවක්  නිල කොන්සාල් කටයුතු සම්බන්ධ කටයුතු නොවීම විශේෂත්වයකි.

මේ වන විටත්  ලොස් ඇන්ජලීස් හි පිහිටි කොන්සාල් කාර්්‍යාලයේ සිදු වූ බවට සැක කෙරෙන මෙම අනිසි මුදල් භාවිතය සහ මූල්‍යමය අක්‍රමිකතා පිළිබද FCID විසින් පරීක්ෂණ ආරම්භ කර ඇති බව වාර්තා වේ.

යොවුන් පාර්ලිමේන්තුව තුලින් විද්‍යාමාන වනුයේ අනාගත පාර්ලිමේන්තුවක කැඩපත බවත් වත්මන් පාර්ලිමේන්තුවේ දහතුන් දෙනෙකු වන කාන්තා නියෝජනය යොවුන් පාර්ලිමේන්තුව තුළ එමෙන් දෙගුණයක් වීම සුභවාදී තත්ත්වයක් වුව ද එය තවදුරටත් වර්ධනය කළ යුතු බවත්, ලෝකයේ දියුණු රටවල ව්‍යවස්ථාදායකයේ කාන්තා නියෝජනය 30% ඉක්මවන බවත් කථානායකවරයා පැවසීය.

පාර්ලිමේන්තු ක්‍රමයේ දශක හතක ඉතිහාසයක් සම්පූර්ණ කරන ශ්‍රී ලංකාව පාර්ලිමේන්තු ප්‍රජාතන්ත්‍රවාදයේ පරිණතභාවයට පත් ව ඇතැයි ද තරුණ කැරලි දෙකක් බිහිසුනු යුද්ධයක් මෙන්ම විවිධ දේශපාලන හැප්පිලි ඔස්සේ ඉගෙන ගත් පාඩම් වලින් එම ඉතිහාසය සැකසී ඇති බව අමතක කළ යුතු නැතැයි ද කථානායක කරු ජයසූරිය මහතා පැවසීය.

කථානායකවරයා මේ බව පළ කළේ අද පෙරවරුවේ ජාතික තරුණ සේවා සභාවේ යොවුන් පාර්ලිමේන්තු නියෝජිතයන් 225 දෙනා සඳහා පාර්ලිමේන්තුවේ කමිටු ශාලා අංක 01 හිදී පැවැති විශේෂ වැඩමුළුවේදී ප්‍රධාන ආරාධිතයා ලෙසින් එක්වෙමිනි.

වත්මන් පාර්ලිමේන්තුව කෙටි කාලයක් තුල  ආංශික කාරක සභා ක්‍රමය , තොරතුරු දැන ගැනීමේ පනත සම්මත කර ගැනීම, ස්වාධීන කොමිෂන් සභා ක්‍රියාත්මක කිරීම, විද්‍යුත් ඡන්ද ක්‍රමයක් හඳුන්වා දීම, අන්තර් පාර්ලිමේන්තු රාජ්‍ය තාන්ත්‍රික සබඳතා ගොඩ නැංවීම,  පාර්ලිමේන්තු සභා රැස්වීම් සජීවීව නැරඹීමට ජනතාවට අවස්ථාව සැලසීම, ලෝකයේ ඕනෑම තැනක සිට පාර්ලිමේන්තුවේ කටයුතු භාෂා ත්‍රිත්වයෙන්ම දැන ගැනීමට ජංගම අන්තර්ජාල යෙදුමක් හදුන්වා දීම, ස්ථාවර නියෝග යාවත්කාලීන කිරීම, නව ආචාර ධර්ම පද්ධතියක් සඳහා මූලික පියවර ගැනීම ආදී ඉදිරි පියවර රැසක් තබා ඇති බව ද කථානායකවරයා මෙහිදී පෙන්වා දුන්නේය.

පාර්ලිමේන්තු මහලේකම් ධම්මික දසනායක, පාර්ලිමේන්තු කාර්ය මණ්ඩල ප්‍රධානී නියෝජ්‍ය මහලේකම් නීල් ඉද්දවල, සහකාර මහලේකම්වරුන් වන ටිකිරි ජයතිලක, කුෂානි රෝහණධීර යන මහත්ම මහත්මීහු ද මෙහිදී විශේෂ දේශන පැවැත්වූහ.

යොවුන් පාර්ලිමේන්තු මන්ත්‍රීවරුන් අමතමින් තව දුරටත් අදහස් දැක්වූ කථානායකවරයා මෙසේ ද පැවසීය.

රටේ මිලියන 22 කට ආසන්න ජනතාව අතරින් ඔබට යොවුන් පාර්ලිමේන්තුවේ 225 දෙනා අතර එක්වන්න හැකියාව ලැබීම විශාල භාග්‍යයක් ලෙසයි මම සලකන්නේ. මේ ලැබුණ අවස්ථාව රට වෙනුවෙන් යමක් ඉටු කරන්න මූලාරම්භයක් වගේම ඔ‍බේ ජීවිත ගමනටත් හොඳ ආරම්භයක් වේවා කියා මම ප්‍රාර්ථනා කරනවා. කෙසේ වෙතත්, පාර්ලිමේන්තු ක්‍රමය වගේම දේශපාලන අභි‍යෝග එදා අපි දේශපාලනයට පිවිසි යුගයට වඩා දැන් වෙනස් වී තිබෙනවා.

මීට දශක කිහිපයකට පෙර දේශපාලනය තුළින් ලැබුවේ රට ‍දැය වෙනුවෙන් සේවය කිරීමේ ආත්ම තෘප්තිය සහ ගෞරවය පමණයි.  වර්තමානයේ තිබෙන ප්‍රභල සන්නිවේදන මාධ්‍ය භාවිතා කර අධම මිනිසෙක් සාන්තුවරයෙකු බවටත්, සාන්තුවරයෙකු මහා ද්‍රෝහියෙකු බවටත් පත් කරන්නට පුළුවන්.

සැබැවින්ම අද වන විට බලය දේශපාලන ප්‍රතිපත්ති අතර, තරඟයකට වඩා ලෝකයේ ප්‍රභල දැන්වීම් ප්‍රචාරක සමාගම්  අතර තරඟයක් බවට පත්ව තිබෙනවා.

නමුත්,  දේශපාලනඥ‍යෙකුට වඩාත්ම ගැඹුරුම ගණුදෙනුව තිබෙන්නේ ස්වකීය හෘද සාක්ෂිය සමගයි. පිරිසිදු දෑතින් දේශපාලනයට පැමිණ පිරිසිදු දෑතින් සමුගෙන යන්නට හැකි නම් දේශපාලනයට පිවිසෙන්න කියලා මම ඔබෙන් ඉල්ලා සිටිනවා.

විශේෂයෙන්ම මන්ත්‍රී ආචාර ධර්ම පිළිබඳව විශාල කතිකාවක් පසුගිය කාලයේ ඇති වුනා.  අපට අද එහි ඉදිරි පියවර රැසක් තබන්නට හැකි වී තිබෙනවා.  ගරු මන්ත්‍රීතුමා කියලා කථා කරන්න පුළුවන් මන්ත්‍රීවරයෙක් අපට අවශ්‍යයි.  යොවුන් පාර්ලිමේන්තුවටත් මේ ආචාර ධර්ම ඉතාම වැදගත් වේවි.  විශේෂයෙන්ම පාර්ලිමේන්තු රැස්වීම්වලට උපරිම ලෙස සහභාගී විය යුතුයි.  එසේ නොහැකි නම් මන්ත්‍රීධූරය භාර ගැනීම කිසිසේත්ම තේරුමක් නැති දෙයක්.  පසුගිය යොවුන් පාර්ලිමේන්තුවලදී වැදගත් හරවත් සංවාද ඇති වුන බව මා දන්නවා.

ඇත්තටම රටේ ‍දේශපාලනය පමණක් නොවෙයි, ලෝක ආර්ථික දේශපාලන  සමාජ ප්‍රවණතා ගැනත් ඔබ අවධානය යොමු කළ යුතුයි.  අද මුළු ලොවම එකම ගමක් බවට පත්ව තිබෙනවා.  ඒ තුළ ඔබ ලෝක පුරවැසියෙක් බවට පත්ව තිබෙනවා.  අද වන විට අපගේ පාර්ලිමේන්තුව තුළිනුත් පාර්ලිමේන්තු රාජ්‍ය තාන්ත්‍රික සබඳතා ගොඩ නැංවීම ආරම්භ කර තිබෙනවා.

ලෝකයේ විවිධ රටවල පාර්ලිමේන්තු ක්‍රම පිළිබඳව අත්දැකීම් ලබා ගැන්මට මන්ත්‍රීවරුන් අතර දැනුම හුවමාරු කිරීම් වැඩසටහන් ආරම්භ කර තිබෙනවා. විශේෂයෙන්ම ජනතා අවශ්‍යතා ඉටු කරන්නට යොවුන් පාර්ලිමේන්තුවටත් යම් මුදලක් වෙන් වීම ඉතාම සතුටට කරුණක් බවත්, පසුගිය කාලයේ වෙන් වුණු මුදල්වලට වඩා දියත් කළ ව්‍යාපෘතිවල වටිනාකම විශාල ප්‍රමාණයකින් වැඩි වීම සහ සම්පූර්ණ මුදල් ප්‍රමාණය යොදා ගෙන ඵලදායී ලෙස කටයුතු කිරීම අප පාර්ලිමේන්තුවටත් වැදගත්  ආදර්ශයක් ලබා දී තිබෙන බව ද කථානායකවරයා පැවසීය.

සම්මුතිවාදී රජය ක්‍රියාත්මක කරන සංහිදියා වැඩපිළිවල, ප්‍රජා තන්ත්‍රවාදය තහවුරු කිරීමේ වැඩපිළිවෙළ සහ රටේ ආර්ථික ප්‍රතිපත්තිය ඇමරිකානු කොංගසයේ ඇගයීමට ලක් වූ බව ජනාධිපති මාධ්‍ය අංශය සදහන් කර සිටියි. ඉකුත් 24 වන දා සවස ජනාධිපති නිල නිවසේ දී ඇමරිකානු කොංග්‍රස් මණ්ඩලයේ නියෝජිතයින් පිරිසක් අතිගරු ජනාධිපති මෛත්‍රීපාල සිරිසේන මැතිතුමා සමග පැවති හමුවකදී ඒ ඔවුහු ඒ බව පවසා ඇත.

එහිදී ඇමරිකා එක්සත් ජනපදය සහ ශ්‍රී ලංකාව අතර ද්විපාර්ශවික සබදතා ශක්තිමත් කර ගැනීම සම්බන්ධයෙන්ද  දීර්ඝ වශයෙන් සාකච්ඡාවට ලක් වී ඇත. එසේම මෙරට නව සංවර්ධන සැලැස්ම සදහා සහය අපේක්ෂා කරන බවද ජනපති වරයා නියෝජිත පිරිස හමුවේ පවසා සිටියේය.

රට තුළ සංහිදියාව ඇති කිරීම සදහා රජය ගෙන යන වැඩ පිළිවෙළ සම්බන්ධයෙන්ද ජනපතිවරයා ඇමරිකානු කොංග්‍රස් මණ්ඩලයේ අධිකරණ කටයුතු පිළිබද අධීක්ෂණ සභාපති Bob Goodlatteමහතා ඇතුළු පිරිස දැනුවත් කළ අතර රටේ සියලු ජනතාවගේ ජන ජීවිත නගා සිටුවීම සිය අපේක්ෂාව බවද ජනපතිවරා එහිදී සදහන් කර සිටියේය.

ශ්‍රී ලංකාව සුවිශාල විදේශ ගිවිසුම් ඇති කර ගැනීමේදී ජාතික ආරක්ෂාව මෙන්ම කලාපීය ආරක්ෂාව පිළිබදවද අවධානයෙන් කටයුතු කරන බව පැවසූ ජනාධිපතිවරයා මෙරට හමුදා නිළධාරීන්ට ඇමරිකා එක්සත් ජනපදයේ පුහුණුව යළි ලබා දෙන ලෙසද ඉල්ලීමක් කිරීමටද අමතක කළේ නැත.