Latest News
නාරම්මල දී ඊයේ (18) ලොරි රථ රියදුරෙකුට වෙඩි තැබීමේ සිද්ධියට සම්බන්ධ උප පොලිස් පරීක්ෂකවරයා ලබන 23 වනදා දක්වා රක්ෂිත බන්ධනාගාරගත කිරීමට නියෝග කර තිබෙනවා.
ඒ අනුව නාරම්මල මහෙස්ත්රාත් අධිකරණයට ඔහු අද (19) ඉදිරිපත් කිරීමෙන් අනතුරුව මෙම නියෝගය ලබාදී ඇති බවයි සඳහන් වන්නේ.
ඊයේ රාත්රියේ නාරම්මල නගරයේ දී ගිරිඋල්ල දෙසට ධාවනය වූ ලොරි රථයක සිටි පුද්ගලයෙකුට අදාළ නිලධාරියා විසින් වෙඩි තබා තිබුණා.
ශ්රී ලංකා පොදුජන පෙරමුණේ ජනාධිපති අපේක්ෂකයා ලෙස ප්රකට ව්යාපාරික ධම්මික පෙරේරා ඉදිරිපත් කිරීමට ඔහු සමඟ එකඟතාවක් ඇති කරගෙන නොමැති බව අමාත්ය ප්රසන්න රණතුංග පවසනවා.
ඒ අනුව රටේ ජාතික ප්රශ්නය විසඳිය හැකි නායකයෙක් ලෙස තවත් එක් අවස්ථාවක් රනිල් වික්රමසිංහට ලබාදිය යුතු බවට තමා විශ්වාස කරන බවයි මාධ්ය වෙත අදහස් දක්වමින් අමාත්යවරයා සඳහන් කළේ.
ආර්ථික අර්බුදය විසඳන තෙක් වත්මන් ජනාධිපතිවරයාට අවස්ථාව ලබාදිය යුතු බවත් ඉන් පසු හොරු අල්ලන සහ කයිවාරු ගසන නායකයින් පත් කරගත හැකි බවයි ඔහු වැඩිදුරටත් සඳහන් කළේ.
ලංකාවේ ග්රාම නිලධාරී වසම් 14,022 තුළම ප්රජා පොලිස් කමිටු පිහිටුවා ඇති බව වැඩබලන පොලිස්පති දේශබන්දු තෙන්නකෝන් පවසනවා.
එම කමිටු හරහා සෑම නිවසකම සිටින්නේ කවුරුන්ද යන්න තොරතුරු ලබා ගැනීමට අපේක්ෂා කරන බවයි අද (18) පැවති මාධ්ය හමුවකට එක්වෙමින් වැඩබලන පොලිස්පතිවරයා සඳහන් කළේ.
ඒ අනුව කවුරුන් හෝ පුද්ගලයෙක් අදාළ ග්රාම සේවා වසමට අලුතින් පදිංචියට පැමිණෙන්නේ නම් අදාළ කමිටුව හරහා ළඟම ඇති පොලිස් ස්ථානයට වාර්තා කරන බවද ඔහු සඳහන් කළා.
එසේම කවුරුන් හෝ පදිංචිය අතහැර යන්නේ නම් ඉවත්වීම හා යන ස්ථානය සම්බන්ධයෙන් අදාළ ප්රජා පොලිස් කමිටු හරහා පොලීසිය දැනුවත් කළ යුතු බවත් එමඟින් විවිධ අපරාධ සිදු කිරීමට අදාළ ස්ථාන භාවිතා කිරීම වැළැක්වීමට අදහස් කරන බවයි වැඩබලන පොලිස්පති දේශබන්දු තෙන්නකෝන් වැඩිදුරටත් සඳහන් කළේ.
එළඹෙන ජනාධිපතිවරණයෙන් සමගි ජන බලවේගයේ නායක සජිත් ප්රේමදාස ජනාධිපති ධූරයට පත්වන බව එහි මහ ලේකම් රංජිත් මද්දුමබණ්ඩාර පවසනවා.
ඒ අනුව තම ආණ්ඩුවක් යටතේ ජනතාව සහන සැලසීමට කටයුතු කරන බවයි මාධ්ය වෙත අදහස් දක්වමින් ඔහු සඳහන් කළේ.
තම පක්ෂය ඕනෑම මැතිවරණයකට සූදානම් බවත්, රජයෙන් ඉල්ලා සිටින්නේ හැකි ඉක්මනින් මැතිවරණ පවත්වන ලෙසත් බවයි ඔහු වැඩිදුරටත් සඳහන් කළේ.
අන්තර්විශ්වවිද්යාල ශිෂ්ය බල මණ්ඩලයේ විරෝධතාවයක් විසුරුවා හැරීම සඳහා පොලීසිය විසින් ජල හා කඳුළු ගෑස් ප්රහාරයක් එල්ලකර තිබෙනවා.
ඒ අනුව ශ්රී ජයවර්ධනපුර විශ්වවිද්යාලය අසලදී මෙලෙස ජල හා කඳුළු ගෑස් ප්රහාරය එල්ල කර ඇති බවයි සඳහන් වන්නේ.
රජය විසින් පාර්ලිමේන්තුවට ඉදිරිපත් කර තිබෙන ත්රස්ත විරෝධි පනත් කෙටුම්පතේ ඇතැම් වගන්ති ආණ්ඩුක්රම ව්යවස්ථාවට පටහැණි යැයි තීන්දු කරන ලෙස ඉල්ලා අන්තර් සමාගම් සේවක සංගමයේ කැඳවුම්කරු වසන්ත සමරසිංහ විසින් අද (17) ශ්රේෂ්ඨාධිකරණයට පෙත්සමක් ගොනුකර තිබෙනවා.
එම පනත් කෙටුම්පතේ අන්තර්ගත විධිවිධානවලින් යුද හමුදාව, පොලීසිය සහ වෙරළාරක්ෂක බළකායට ඕනෑම පුද්ගලයකු සාධාරණ හේතුවක් නොමැතිව අත්අඩංගුවට ගෙන රඳවා ගැනීමේ බලය ලබාදී තිබෙන බවයි ඔහු පෙන්වා දෙන්නේ.
මේ තුළින් ආණ්ඩුක්රම ව්යවස්ථාව මඟින් සහතික කර තිබෙන පුද්ගල නිදහස, අදහස් ප්රකාශ කිරීමේ නිදහස ඇතුළු මූලික අයිතීන් උල්ලංඝනය වන බවත්, එබැවින් අදාළ පළාත් කෙටුම්පත සම්මත කිරීමට අවශ්ය නම් පාර්ලිමේන්තුවේ තුනෙන් දෙකක බහුතර ඡන්දයකින් සහ ජනමත විචාරණයකින් එය අනුමත විය යුතු බවට තීන්දුවක් ලබා දෙන ලෙසයි ඔහු සිය පෙත්සම මඟින් වැඩිදුරටත් ඉල්ලා තිබෙන්නේ.
එහි වග උත්තරකරු ලෙස නීතිපතිවරයා නම් කර ඇති බවයි වැඩිදුරටත් සඳහන් වන්නේ.
කන්දකාඩු පුනරුත්ථාපන මධ්යස්ථානයේ රැඳවියන් පිරිසක් පළායාමට අදාළ සිදුවීම සම්බන්ධයෙන් විමර්ශනයක් සිදුකිරීමට පංච පුද්ගල කමිටුවක් පත්කර තිබෙනවා.
ඒ අනුව අදාළ සිද්ධිය ගැන පරීක්ෂණ පවත්වා අවශ්ය නිර්දේශ ලබාදීම සඳහා අධිකරණ බන්ධනාගාර හා ආණ්ඩුක්රම ව්යවස්ථා ප්රතිසංස්කරණ අමාත්ය, ජනාධිපති නීතිඥ ආචාර්ය විජයදාස රාජපක්ෂ විසින් මෙම කමිටුව පත්කර ඇති බවයි සඳහන් වන්නේ.
අදාළ සිද්ධිය සම්බන්ධයෙන් පරීක්ෂණ හා නිර්දේශය ඇතුළත් වාර්තාව සති 03ක් ඇතුළත තමන් වෙත ලබාදෙන ලෙසයි අමාත්යවරයා විසින් පංච පුද්ගල කමිටුවට උපදෙස් ලබාදී ඇත්තේ.
එහි සභාපතිවරයා ලෙස ශ්රේෂ්ඨාධිකරණ විනිසුරු හෙක්ටර් යාපා පත්කර ඇති අතර සෙසු සාමාජිකයන් ලෙස එම්.එස්.පී. සූරියප්පෙරුම, ආර්.එස්. හපුගස්වත්ත, පියුමන්ති පීරීස් හා ඩී. එම්. සමන් දිසානායක පත්කර තිබෙනවා.
නායයාමක් නිසා සතියක පමණ කාලයක් අවහිර වී තිබුනු බදුල්ල – බණ්ඩාරවෙල මාර්ගය ගමනාගමන කටයුතු සඳහා යළි විවෘත කර තිබෙනවා.
අද (16) දහවල් එම මාර්ගය විවෘත කළ අතර, පිළිසකර කිරීමෙන් පසු එම ස්ථානයෙන් ගමන් කිරීමට සුදුසු තත්ත්වයක තිබේදැයි ජාතික ගොඩනැගිලි පර්යේෂණ සංවිධානයේ භූ විද්යාඥයන් විසින් පරීක්ෂා කළ බවයි බදුල්ල දිස්ත්රික් ලේකම් ප්රභාත් අබේවර්ධන පවසා සිටියේ.
බදුල්ල – බණ්ඩාරවෙල මාර්ගය 7 කණුව ප්රදේශයේ ඉකුත් 9 වනදා සිදුවූ නායයාමක් නිසා දින 7 ක පමණ කාලයක් මාර්ගය අවහිර වී ගමනාගමනය ඇණ හිට තිබුණා.
ක්ෂණිකව ධනවතුන් වූ විශාල පිරිසක් පසුපස යුක්තිය මෙහෙයුම දියත් කරමින් තිබෙන බව වැඩබලන පොලිස්පති දේශබන්දු තෙන්නකෝන් පවසනවා.
ඒ අනුව එවැනි පුද්ගලයින් 50,000ක් පමණ ඇති බවයි සීතාවක පොලිස් කොට්ඨාසයේ ප්රජා පොලිස් කමිටු සාමාජිකයින් දැනුවත්කිරීම සඳහා විශේෂ වැඩසටහනට එක්වෙමින් ඔහු සඳහන් කළේ.
ඔවුන් ඉවර කරනතෙක් යුක්තිය මෙහෙයුම ක්රියාත්මක කරන බවත් අපරාධවලට සම්බන්ධවූ කිසිවෙකුට එළියේ සිටීමට ඉඩ නොදෙන බවයි ඔහු වැඩිදුරටත් සඳහන් කළේ.
හින්දු බැතිමතුන්ගේ සුවිශේෂී උත්සවයක් ලෙස සැලකෙන තෛපොංගල් උත්සවය ලොව වැසි සියලූම හින්දු ජනයා විසින් අද (15) සමරනු ලබනවා.
පොංගල් යන දමිළ වචනයේ අදහස වන්නේ “උතුරා යාම නැතිනම් පිටාර ගැලීමයි”. මැටි කළයක කිරි උතුරා යාමට සැලැස්වීම අනාගත සෞභාග්යයේ සළකුණක් ලෙස හින්දු ජනතාව සලකන අතර හින්දු භක්තිකයන් තම පළමු අස්වැන්න සූර්යයාට පුජා කිරීම මෙම සුර්ය මංගල දිනයේ දී සිදු කරනවා
මෙම උත්සවය සෞභාග්යය සහ ස්තුති කිරීම හා බැඳී පවතින අතර තම අස්වැන්න සරු විමට උපකාර කළ වර්ෂාව, සූර්යයා හා ගොවි සතුන්ට ස්තූති කිරීම සඳහා මෙම උත්සවය පවත්වනු ලබන බවයි සඳහන් වන්නේ.
