Latest News
පාසල් නිවාසාන්තර ක්රීඩා උළෙල අලුත් අවුරුදු නිවාඩුවෙන් පසුව සංවිධානය කරන ලෙස විදුහල්පතිවරුන්ට චක්රලේඛයක් මගීන් දැනුම්දෙන බව අධ්යාපන අමාත්ය ආචාර්ය සුසිල් ප්රේමජයන්ත පවසනවා.
උෂ්ණාධික කාලගුණ තත්ත්වය නොසළකමින් පාසල් රැසක් නිවාසාන්තර ක්රීඩා උළෙල සංවිධානය කර ඇති බව නිරීක්ෂණය වී ඇති බවයි අමාත්යවරයා පෙන්වාදෙන්නේ.
පළමු පාසල්වාරය අලුත් අවුරුදු නිවාඩුවෙන් පසුව ද ක්රියාත්මක වන බැවින් එම කාලයේ දී ක්රීඩා තරග පැවැත්වීමේ හැකියාව පවතින බවයි අමාත්යවරයා වැඩිදුරටත් සඳහන් කළා.
දුම්රිය ආසන වෙන්කිරීම සම්පුර්ණයෙන්ම Online සිදු කිරීමේ හැකියාව මේ වන විට ලබාදී ඇති අතර රාත්රී 7.00 සිට දුම්රිය ආසන වෙන් කිරීම කළ හැකි බව දුම්රිය දෙපාර්තමේන්තුව පවසනවා.
නව ක්රමවේදයට අනුව දුම්රිය ආසන වෙන් කිරීම https://seatreservation.railway.gov.lk/mtktwebslr/ යන වෙබ් අඩවිය ඔස්සේ සිදුකළ හැකි බවයි දුම්රිය නියෝජ්ය සාමාන්යාධිකාරී එන්. ජේ. ඉදිපොලගේ සඳහන් කළේ.
එලෙස වෙන්කරගත් දුම්රිය ආසනයට අදාළ ප්රවේශ පත්රය PDF file එකක් ලෙස download කරගත හැකි අතර එය මුද්රණය කර හෝ ජංගම දුරකථනයෙන් පෙන්වීම මඟින් අපහසුතාවකින් තොරව ගමන් කළ හැකි බවයි දුම්රිය දෙපාර්තමේන්තුව වැඩිදුරටත් සඳහන් කළේ.
පානීය ජල ගැටලු ඇති ප්රදේශවල ජනතාවට වහාම 117 දුරකථන අංකය ඔස්සේ දිස්ත්රික් ආපදා කළමනාකරණ මධ්යස්ථානය වෙත දැනුම් දෙන ලෙස එම මධ්යස්ථානය ඉල්ලීමක් කරනවා.
අදාළ ප්රදේශයේ ග්රාම නිලධාරීවරයා හා සම්බන්ධ වී ආපදා කළමනාකරණ මධ්යස්ථානය වෙත දැනුම්දෙන ලෙසයි ආපදා කළමනාකරණ මධ්යස්ථානයේ නියෝජ්ය අධ්යක්ෂ ප්රදීප් කොඩිප්පිලි පවසා සිටියේ.
මේ අතර පවතින අධික උණුසුම් කාලගුණය හමුවේ කෑගල්ල සහ කුරුණෑගල දිස්ත්රික්කවල පවුල් 3,000 ක් පමණ පානීය ජල ගැටලුවකට මුහුණ දී ඇති බවයි ආපදා කළමනාකරණ මධ්යස්ථානය පවසන්නේ.
එවැනි ස්ථානවල ජනතාවට ජාතික ආපදා සහන සේවා මධ්යස්ථාන සමඟත් ජල ප්රවාහන ඒකක සමඟත් එක්ව මෙම තත්ත්වය විසඳීමට වැඩසටහන් ක්රියාත්මක වන බව ද නියෝජ්ය අධ්යක්ෂවරයා වැඩිදුරටත් සඳහන් කර සිටිනවා.
2021/2022 අධ්යයන වර්ෂයේ උසස් පෙළ විභාග ප්රතිඵල මත ජාතික අධ්යාපන විද්යා පීඨවලට ශික්ෂණලාභීන් ඇතුළත් කර ගැනීමට අදාළ අයදුම්පත් කැඳවා තිබෙනවා.
ඒ අනුව මීට අදාළ ගැසට් නිවේදනය ශ්රී ලංකා ප්රජාතාන්ත්රික සමාජවාදී ජනරජයේ අංක 2376 දරන අද (15) ගැසට් පත්රයේ පළ කර ඇති බවයි අධ්යාපන අමාත්යංශය නිවේදනය කළේ.
අද දහවල් 12.00 සිට මාර්ගගත ක්රමවේදය ඔස්සේ මේ සඳහා අයදුම් කළ හැකි අතර අයදුම් කිරීමේ කාල සීමාව 2024.04.05 දිනයෙන් අවසන් වන බවද සඳහන් වනවා.
මාර්ගගත ක්රමය ඔස්සේ මේ සඳහා අයදුම්පත් ඉදිරිපත් කළ යුතු අතර අයදුම්පත් අතරින් සුදුස්සන් තෝරා ගැනීම ද මාර්ගගත ක්රමය ඔස්සේ ම මෙවර සිදුකරන බවයි අධ්යාපන අමාත්යංශය වැඩිදුරටත් සඳහන් කළේ.
කැනඩාවේ, ඔටාවා හී ශ්රී ලාංකිකයින් 6 දෙනෙකු ඝාතනය කිරීමේ සිද්ධියට අදාළ නඩු විභාගය යළි කැඳවා තිබෙනවා.
එහිදී ඔටාවා හි රැඳවුම් මධ්යස්ථානයක රඳවා සිටින සැකකාර 19 හැවිරිදි ශ්රී ලාංකික සිසුවා දුරකථනය ඔස්සේ අධිකරණය හමුවේ සිදුතළ නඩු විභාගය විනාඩි 4 කට සීමාවී ඇති බවයි විදෙස් මාධ්ය වාර්තා කරන්නේ.
නඩු විභාගය අතරතුර ඔහුගේ නම සහ උපන්දිනය කෙඳිරි හඬින් පවසා ඇති අතර විශෝධන නිලධාරීයා එය පැහැදිළිව ඇසෙන ලෙස උස් හඬින් ප්රකාශ කරන ලෙස දැනුම්දී තිබෙනවා.
නඩු විභාගයේදී මියගිය ශ්රී ලාංකික පවුලේ අයගේ නම්වල දෝෂ නිවැරදි කර ඇති අතර චෝදනාවලද කිසිඳු වෙනසක් සිදු නොවූ බවද කැනඩා මාධ්ය වාර්තා කර තිබුණා.
සැකකරු තවදුරටත් රක්ෂිත බන්ධනාගාරගත කර ඇති අතර නඩු විභාගය එළඹෙන 28 වනදා යළි කැඳවීමට නියමිත බවයි වැඩිදුරටත් විදෙස් මාධ්ය වාර්තා වාර්තා කරන්නේ.
ප්රධාන පෙළේ මත්ද්රව්ය ජාවාරම්කරුවෙකු බව පැවසූ මොහොමඩ් ශිරාන් බාසික් නැමැත්තා නිදොස් කොට නිදහස් කිරීමට කොළඹ මහාධිකරණය අද (14) නියෝග කර තිබෙනවා.
පොලිස් මත්ද්රව්ය නාශක කාර්යාංශයේ නිලධාරීන් ලබාදුන් සාක්ෂිවල ඇති බලවත් පරස්පරතා හේතුවෙන් ඔහුව නිදොස් කොට නිදහස් කරන බවයි මහාධිකරණ විනිසුරු මංජුල තිලකරත්න නියෝග කර තිබෙන්නේ.
සැකකරු 2011 වසරේ ජනවාරි මස 11 වනදා කිරුළපන එඩ්මන්ටන් නිවාස සංකීර්ණය අසළදී හෙරොයින් ග්රෑම් 4.53ක ප්රමාණයක් සමග අත්අඩංගුවට ගත් බවට පැමිණිල්ලේ දැක්වූ අතර, ප්රථමයෙන් සඳහන් කර තිබුණේ ඔහු තනිව අත්අඩංගුවට ගත් බවට වුවද, පසුව අදාළ පොලිස් නිලධාරීන් පවසා ඇත්තේ ඔහුගේ දරුවා සමග සිටියදී සැකකරු අත්අඩංගුවට ගත් බවයි.
එසේම තමාට ලද දුරකථන ඇමතුමකට අනුව අදාළ වැටලීම කළ බවට පොලිස් නිලධාරියෙකු විසින් අධිකරණය හමුවේ පවසා තිබුණද, එම දුරකථන අංකය වසර එකහමාරකට පමණ පෙර විසන්ධි කර ඇති බවට සාක්ෂි සහිතව විත්තියේ නීතිඥවරයා අධිකරණය හමුවේ පෙන්වා දී තිබෙනවා.
එම සාක්ෂි අනුව විත්තිිකරු වරදකරු කිරීම නුසුදුසු බවට විනිසුරුවරයා එහිදී නිගමනයකට එළඹ තිබු අතර, විත්තිකරු ඩුබායි රාජ්යයට පළාගොස් තිබීම හේතුවෙන් ඔහු නොමැතිව සාක්ෂි විභාගය පැවැත්විණි.
මුහුදුබඩ මාර්ගයේ දුම්රිය ධාවනය යථා තත්ත්වයට පත්ව ඇති බව දුම්රිය දෙපාර්තමේන්තුව පවසනවා.
අද (14) උදෑසන දුම්රියක් පිලී පැනීම හේතුවෙන් මුහුදුබඩ මාර්ගයේ ගමනාගමන කටයුතුවලට බාධා මතුව තිබුණා.
ප්රවීණ නිවේදක සහ ජ්යෙෂ්ඨ මාධ්යවේදී අශෝක තිලකරත්න මහතා අභාවප්රාප්ත වී තිබෙනවා.
මියයන විට අශෝක තිලකරත්න මහතා 82 හැවිරිදි වියේ පසු වුණා.
ඒ මහතා අසනීප තත්ත්වයක් හේතුවෙන් කළුබෝවිල රෝහලේ ප්රතිකාර ලබමින් සිටියදී මෙලෙස අභාවප්රාප්ත වී තිබෙනවා.
වෛද්යවරුන් විදෙස්ගතවීමේ යම් අඩුවක් දක්නට ලැබෙන බව නියෝජ්ය අධ්යක්ෂ ජනරාල් වෛද්ය ජී. විජේසූරිය පවසනවා.
ආර්ථික ගැටලුකාරී තත්ත්වය හා විවිධ අර්බුද හමුවේ විදෙස්ගත වූ විශේෂඥ වෛද්යවරුන්, වෛද්යවරුන් හා හෙද නිලධාරීන් යම් පිරිසක්ද සේවයට පැමිණ ඇති බවයි ඔහු සඳහන් කළේ.
ඒ අනුව පසුගිය කාලයේ පැවති උග්ර සෞඛ්ය නිලධාරීන්ගේ හිඟය මේ වන විට යම්තාක් දුරකට පහව ගොස් විශේෂඥ වෛද්යවරුන් රෝහල්වලට අනියුක්ත කිරීමට හැකියාව ලැබී ඇති බවයි ඔහු වැඩිදුරටත් සඳහන් කළේ.
පාසල් මැරතන් ධාවන තරගයක් අතරතුර හදිසියේ ඇති වු අසනීප තත්ත්වයකින් සිසුවෙකු මියයාමේ සිද්ධිය සම්බන්ධයෙන් අධ්යාපන අමාත්යංශය විමර්ශනයක් ආරම්භ කර තිබෙනවා.
ඊයේ (11) දිනයේ තිරුක්කෝවිල් හි පාසලක පැවති මැරතන් ධාවන තරගයකට සහභාගී වු 16 හැවිරිදි සිසුවෙකු හදිසියේ රෝගී වීමෙන් අක්කරෙයිපත්තුව රෝහලට ඇතුළත් කිරීමෙන් පසු මියගොස් තිබුණා.
අදාළ සිසුවා මියයාමට හේතුව මෙතෙක් නිශ්චිතව අණාවරණය වී නොමැති අතර පශ්චාත් මරණ පරීක්ෂණය අම්පාර රෝහලේ දී සිදුකිරීමට නියමිතව තිබෙනවා.
කෙසේ නමුත් පවතින උෂ්ණාධික කාලගුණික තත්ත්වයත් සමග එළිමහනේ ක්රියාකාරකම් සීමාකරන ලෙස දන්වමින් අධ්යාපන අමාත්යංශය විසින් සියලු පාසල් බලධාරීන් වෙත විශේෂ චක්රලේඛයක් ද පසුගියදා නිකුත් කිරීමට කටයුතු කළා.
