Category: breaking_news

යතුරුපැදි දෙකක් එකිනෙක ගැටී සිදුවූ අනතුරකින් එක් යතුරුපැදිකරුවෙක් බරපතළ තුවාල ලබා රෝහල්ගත කිරීමෙන් පසු මියගොස් තිබෙනවා.

ඊයේ (15) හංවැල්ල පොලිස් වසමේ ඇඹුල්ගම පනාගොඩ මාර්ගයේ, ජල්තර ප්‍රදේශයේදී මෙම අනතුර සිදුව ඇති බවයි සඳහන් වෙන්නේ.

යතුරුපැදි දෙක එකිනෙක ගැටීමෙන් අනතුරුව එක් යතුරුපැදියක් මාර්ගයෙන් ඉවතට පැන අසල තිබූ දුරකථන රැහැන් කණුවක ද ගැටී ඇති අතර අනතුරෙන් යතුරුපැදි දෙකෙහිම පැදිකරුවන් දෙදෙනා තුවාල ලබා හෝමාගම රෝහලට ඇතුළත් කෙරුණු අතර පසුව එක් අයෙක් මියගොස් තිබුණා.

2024 ජනාධිපතිවරණය සඳහා ඉදිරිපත් වන අපේක්ෂකයින් ප්‍රකාශයට පත් කෙරේ

2024 ජනාධිපතිවරණය සඳහා නාමයෝජනා 39 ක් පිළිගත් බව මැතිවරණ කොමිෂන් සභාවේ සභාපතිවරයා සඳහන් කළා.

ඒ අනුව මෙවර ජනාධිපතිවරණය සඳහා අපේක්ෂකයින් ලෙස පිළිගත් අයගේ නම් මැතිවරණ කොමිෂන් සභාවේ සභාපතිවරයා විසින් ප්‍රකාශයට පත් කළා.

අදාළ නම් පහතින්.

* දිලිත් සුසන්ත ජයවීර

* සරත් මනමේන්ද්‍ර

* අබුබකර් මොහොමඩ් ඉන්ෆාස්

* එස්. පී. ලියනගේ

* පානි විජේසිරිවර්ධන

* ප්‍රියන්ත පුෂ්පකුමාර වික්‍රමසිංම

* අජන්ත ද සොයිසා

* බත්තරමුල්ලේ සීලරතන හිමි

* සරත් ෆොන්සේකා

* නුවන් සංජීව බෝපගේ

* හිටිහාමිලාගේ දොන් ඕෂල ලක්මාල් අනිල් හේරත්

* ජනක ප්‍රියන්ත රත්නායක

* කේ.කේ පියදාස

* මයිල වාගනම් තිලකරාජා

* සිරිපාල අමරසිංහ

* පාක්‍ය සෙල්වම් අරියනේත්‍රන්

* සරත් කීර්තිරත්න

* කේ. ආනන්ද කුලරතන්

* නාමල් රාජපක්ෂ

* අක්මීමන දයාරතන හිමි

* කේ.ආර්. කිෂාන්

* පොල්ගම්පොළ රාළලාගේ චමින්ද අනුරුද්ධ

* විජයදාස රාජපක්ෂ

* අනුර සිඩ්නි ජයරත්න

* සිරිතුංග ජයසූරිය

* මහින්ද දේවගේ

* මොහොමඩ් ඉල්ලයාස්

* ලක්ෂ්මන් නාමල් රාජපක්ෂ

* ඇන්ටනි වික්ටර් පෙරේරා

* කීර්ති වික්‍රමරත්න

* සජිත් ප්‍රේමදාස

* රනිල් වික්‍රමසිංහ

* මරක්කල මානගේ ප්‍රේමසිරි

* ලලිත් ද සිල්වා

24-08-15
කැකිරාව කුෂාන් ජයවර්ධන

තිරප්පනේ පාසැලක සිසුන් 21ක් හදිසියේ රෝහල් ගත කෙරේ..
============

හදිසියේ ඇති වූ ඇඟ කැමීමේ තත්වයක් හේතුවෙන් තිරප්පනේ ප්‍රෙද්ශයේ පාසැලක සිසුන් 21 දෙනෙකු රෝහල් ගතකර ඇතැයි තිරප්පනේ සෞඛ්‍ය වෛද්‍ය නිලධාරී කාර්යාලය පවසයි. .
මෙලෙස රෝහල් ගතකර ඇත්තේ තිරප්පනය ඇතුන්ගම ගැමුණු විද්‍යාලයේ 4 වැනි වසරේ ඉගෙනුව ලබන සිසුන් පිරිසකි. විදුරුවලින් ආවරණය කළ පංති කාමරය එම සිසුන් ආහාර ගැනීම සිදු කර ඇති අතර ඉන් අනතුරුව සිසුන්ගේ ඇඟ කැසීමේ තත්වයක මතුව ඇති බව සෞඛ්‍ය අංශ පවසයි. රෝහල් ගතකර ඇති සිසුන් 21 දෙනා අතරින් 06 දෙනෙකුගේ ශරීරයේ පලු දැමීහා බිබිලි මතුවීම සිදුව ඇති බව පැවැසේ.
සිසුන් අතර මෙම ලක්ෂණ පහළ වීමත් සමග විද්‍යාල‍යේ විදුහල්පතිවරයා ඇතුළු ආචාර්ය මණ්ඩලය එක්ව 1990 සුවසැරිය ගිලන් රථ සේවාව මඟින් එම සිසුන් කඩිනමින් රෝහල් ගත කිරීමට පියවර ගෙන තිබිණ.
සෞඛ්‍ය අංශ අනුමාන කරනුයේ ආවරණය කර තිබූ පංති කාමරයේ තිබූ දූවිල්ල හෝ වෙනත් තත්වයක් මත එම සිසුන්ට මෙම ආසාත්මිකතාවය ඇති වන්නට ඇති බවයි.
සිද්දිය සම්බන්ධයෙන් මේ වනවිට තිරප්පනේ සෞඛ්‍ය වෛද්‍ය නිලධාරී කාර්යාලය මඟින් විමර්ශනයක් ද ආරම්භ කර තිබේ.
මේ සම්බන්ධයෙන් අප කළ විමසීමකදී තිරප්පනේ සෞඛ්‍ය වෛද්‍ය නිලධාරී කාර්යාලයෙන් කළ විමසීමකදී එහි ප්‍රකාශකයකු සඳහන් කලේ වීදුරුවලින් ආවරණය කරන ලද පංති කාමරයක ආහාර ගත් සිසුන් අතර මෙම තත්වය මතුව ඇති බවයි. එසේම ආහාර ගැනීමෙන් පසුව සිසුන් අතර මෙම තත්වය මතුව තිබීම නිසා මෙම තත්වය කිසියම් ආඝ්‍රාහණයකින් සිදුවූයේද නැතිනම් ආහාර හේතුවෙන් සිදු වූයෙ ද යන්න මෙතෙක් නිශ්චිතව අනාවරණය වී නැති බවයි. අද දිනයේ සිසුන් 80කට ආසන්න පිරිසකට මෙලෙස පාසැලෙන් ආහාර ලබා දී තිබූ බවත් ඒ අතරින් සිසුන් 21 දෙනෙකු මෙම ආසාත්මිකතාවයට ලක්ව ඇති බවත් හදුනාගෙන ඇති බැවින් වැඩිදුර විමර්ශණය සඳහා පාසැලෙන් සිසුන්ට ලබා දී තිබූ ආහාරවල සාම්පල ද ලබා ගැනීමට කටයුතු කර ඇති බව එම ප්‍රකාශකයා වැඩිදුරටත් පැවැසීය.
ආසාත්මිකතාවයට ලක්වූ එම සිසුන් ප්‍රතිකාර සඳහා මරදන්කඩවල ප්‍රාදේශීය රෝහලට ඇතුළත් කර ඇති අතර තිරප්පනේ සෞඛ්‍ය වෛද්‍ය නිලධාරී කාර්යාලය මඟින් සිද්දිය සම්බන්ධයෙන් වැඩි දුර විමර්ශණ ආරම්භ කර තිබේ.

බඹර ප්‍රහාරයක් එල්ලවීම හේතුවෙන් දෙස් විදෙස් සංචාරකයින් සදහා සීගිරිය තාවකාලිකව වසා දමා තිබෙනවා.

අද (14) දහවල් එල්ලවූ මෙම බඹර ප්‍රහාරය හේතුවෙන් විදේශිකයින් ද ඇතුලුව සංචාරකයින් 30 දෙනෙකු පමණ රෝහල් ගත කළ බවයි පොලීසිය සඳහන් කළේ.

වතු කම්කරු දෛනික වැටුප රුපියල් 1,700 දක්වා ඉහළ නැවීමට අදාළ ගැසට් නිවේදනය නිකුත් කර තිබෙනවා.

පඩි පාලක සභාවේ සභාපති එච්.කේ.කේ.ඒ. ජයසුන්දරගේ අත්සනින් යුතුව මෙම ගැසට් නිවේදනය නිකුත් කර ඇති බවයි සඳහන් වෙන්නේ.

තේ වතු කම්කරුවකුගේ දෛනික වැටුප 1,350 ලෙස එහි සඳහන් වන අතර, ඊට අමතරව ඵලදායිතාව මත පදනම් වූ දිරි දීමනාවක් ලෙස රුපියල් 350ක මුදලක්ද ගෙවිය යුතු බවත්, එම වැටුප සේවක අර්ථසාධක අරමුදල් සහ සේවා නියුක්තිකයින්ගේ භාර අරමුදල් ගෙවීම්වලට යටත්ව සිදුකළ යුතු බවත් අදාළ ගැසට් නිවේදනයේ සඳහන් වනවා.

අදාළ ගැසට් නිවේදනය පහතින්.

ජල ගාස්තු අඩු කිරීමට අමාත්‍ය මණ්ඩලයේ අනුමැතිය හිමිවී තිබෙනවා.

ඒ අනුව සමෘද්ධිලාභීන් සහ නාගරික වතු ජනවාස හැරුණු කොට ගෘහස්ථ කාණ්ඩය ගෘහස්ත කාණ්ඩයට ජල ගාස්තුව 7%කින්, රජයේ රෝහල් සඳහා 4.5% ක් පාසල් සහ පූණ්‍ය ආතන සඳහා 6.3 ක් ලෙස ජල ගාස්තු පහළ දැමීමට නියමිත බවයි අදාළ කැබිනට් තීරණයේ දැක්වෙන්නේ.

විදුලි ගාස්තු අඩු කිරීම, ඉන්ධන, රසායනික ද්‍රව්‍ය හා පොලී පිරිවැය අඩුවීම සැලකිල්ලට ගනිමින් මෙම තීරණය ගෙන තිබෙනවා.

අදාළ කැබිනට් තීරණය පහතින්.

Facebook සහය කණ්ඩායම් ලෙස පෙනී සිටිමින් පුද්ගලයින්ගේ පෞද්ගලික දත්ත සොරකම් කිරීමේ ජාවාරමක් ක්‍රියාත්මක වන බව ශ්‍රී ලංකා පරිගණක හදිසි ප්‍රතිචාර සංසදය (SLCERT) පවසනවා.

පසුගිය දින කිහිපය තුළ මේ සම්බන්ධයෙන් පැමිණිලි ලැබී ඇති බවයි එහි ජ්‍යෙෂ්ඨ තොරතුරු ආරක්ෂණ ඉංජිනේරු චාරුක දමුණුගල සඳහන් කළේ.

Facebook පරිශීලකයින්ගේ Facebook ගිණුම හෝ Page එක තාවකාලිකව අත්හිටුවා ඇති බවට මොවුන් Facebook සහය කණ්ඩායමකින් එවන පණිවිඩයක් ලෙසින් ව්‍යාජ පණිවිඩ එවන බවද, එම ගිණුම් හෝ Pages නැවත ලබා ගැනීමට යම් මුදලක් සහ පුද්ගලික තොරතුරු ලබා දිය යුතු බව දන්වා සිටින අතර, ඊට රැවටී එම තොරතුරු ලබාදෙන්නන් මෙම ජාවාරමට හසුවන බවද ඔහු සඳහන් කළා.

එබැවින් යම් හෙයකින් ඔබේ Facebook ගිණුම හෝ Page එක තාවකාලිකව අත්හිටුවීමකට ලක් වුවද මෙැවනි පණිවුඩ සඳහා ප්‍රතිචාර නොදක්වන ලෙසයි ඔහු සඳහන් කළේ.

ග්‍රාම නිලධාරීන් සිය රාජකාරීවලින් ඉවත්වීමට තීරණය කළ බව ග්‍රාම නිලධාරී වෘත්තීය සමිති පවසනවා.

ඒ අනුව අද (12) සහ හෙට (13) දිනයන් වල සේවයෙන් ඉවත් වීමට ද කටයුතු කරන බවයි ග්‍රාම නිලධාරී වෘත්තිය සමිති සන්ධානයේ සම සභාපති නන්දන රණසිංහ සඳහන් කළේ.

ග්‍රාම නිලධාරීන්ගේ සේවා ව්‍යවස්ථාවට ග්‍රාම නිලධාරී වෘත්තීය සංගම් ලබා දුන් යෝජනා ඇතුළත් නොකිරීමට විරෝධය පළ කරමින් මෙම විරෝධතාව පවත්වන බවයි වැඩිදුරටත් සඳහන් වෙන්නේ.