Author: Supun

මෙරට හමුදා ප්‍රධානීන් කිහිප දෙනෙකු එරෙහිව එක්සත් රාජධානිය විසින් සම්බාධක පැනවීම ගැන ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ විසින් X පණිවිඩයක් නිකුත් කර තිබෙනවා.

එක්සත් රාජධානියේ නවතම සම්බාධක පැනවීම් මානව හිමිකම් ගැන කාරණයක් නොව LTTEයේ සහාය ලත් අයගේ අඛණ්ඩ බලපෑම්වල ප්‍රතිඵලයක් බවත්, මෙය යුක්තිසහගත නොවන බවයි ඔහු පවසා සිටින්නේ.

මෙය සමහර බටහිර දේශපාලනඥයන් මුදල් හරහා බලපෑම් කිරීමේ වරප්‍රසාද භුක්ති විඳිමින්, අපේ ජාතියේ සංහිඳියාව අවදානමට ලක්කිරීමක් බවද සිය X පණිවිඩය මඟින් මන්ත්‍රීවරයා සඳහන් කර තිබෙනවා.

මෙම සම්බාධක මගින් අපගේ හමුදාවන්ගේ චිත්ත ධෛර්යය පහත හෙළනු ඇති බවද, එවැනි තවත් අර්බුදයක් ඇති වුවහොත්, හමුදාවන්ට සටන් කිරීමට ධෛර්යයක් නොමැති විය හැකි බවද ඔහු සඳහන් කරනවා.

ඇතැම් ජාත්‍යන්තර රාජ්‍ය නොවන සංවිධාන හරහා ප්‍රජාවන් අතර බෙදීම් ඇති කිරීම සඳහා වරප්‍රසාද ලබා ගන්නා ඇතැම් දෙමළ දේශපාලනඥයන්ගේ න්‍යාය පත්‍රයට හසු නොවන ලෙසයි නාමල් රාජපක්ෂ මන්ත්‍රීවරයා වැඩිදුරටත් සඳහන් කරන්නේ.

අදාළ X පණිවිඩය පහතින්.

සේවය අත්හිටුවා ඇති පොලිස්පති දේශබන්දු තෙන්නකෝන්ට එරෙහිව රජය විසින් ඉදිරිපත් කරන ලද විශ්වාසභංග යෝජනාව කථානායකවරයා වෙත ඉදිරිපත් කර තිබෙනවා.

ඒ අනුව ජාතික ජන බලවේගයේ මන්ත්‍රීවරුන් 115 දෙනෙකුගේ අත්සන් සහිතව මෙම යෝජනාව ඉදිරිපත් කර ඇති බවයි වැඩිදුරටත් සඳහන් වෙන්නේ.

මෙම වසර මැද වන විට සහල් හිඟයක් ඇති විය හැකි බව රුහුණු විශ්ව විද්‍යාලයේ බෝග විද්‍යාව පිළිබඳ ජ්‍යෙෂ්ඨ මහාචාර්ය අරුණ කුමාර පවසනවා.

මහ කන්නයේ අපේක්ෂිත වී අස්වැන්න සැලකිය යුතු මට්ටමකින් අඩුවීම හේතුවෙන් එවැනි තත්ත්වයක් නිර්මාණය විය හැකි බවයි මාධ්‍ය වෙත අදහස් දක්වමින් ජ්‍යෙෂ්ඨ මහාචාර්යවරයා සඳහන් කළේ.

ඒ අනුව, මහ කන්නය යනු මෙරට සහල් අවශ්‍යතාවයෙන් 65%ක් සම්පූර්ණ කරගන්නා කන්නය බවත්, එම කන්නයේදී අපේක්ෂිත අස්වැන්න අඩු වනු ඇති බවට රජයට ප්‍රකාශ කර ඇති බවත් ඔහු සඳහන් කළා.

මේ වන විට ආරම්භවීමට ඇත්තේ යල කන්නය වන අතර, එහි අස්වැන්න ලැබීමට මාස 04 ක කාලයක් ගත වන බැවින්, වසර මැද මෙම සහල් හිඟය ඇතිවිය හැකි බවයි ඔහු ප්‍රකාශ කළේ.

පවත්නා තත්ත්වය යටතේ ඉදිරියේදී සහල් මිල, පවතින පාලන මිල ද ඉක්මවා යනු ඇති බවත්, එම තත්ත්වය පාලනය කිරීම සඳහා පවතින ආනයන බදු අඩු කර සහල් ආනයනය කිරීමට රජයට සිදුවනු ඇති බවයි ජ්‍යෙෂ්ඨ මහාචාර්යවරයා වැඩිදුරටත් සඳහන් කර සිටියේ.