Author: Supun

ඉන්ධන නැති, පොහොර නැති, කඩා වැටුණු ආර්ථිකයක් ඇති යුගයකට රට යළි පත් කළ නොහැකි බව ජනාධිපති රනිල් වික්‍රමසිංහ පවසනවා.

දුෂ්කර වුවද මෙම මාර්ගයේ ඉදිරියට යාමෙන් රටේ ආර්ථිකය කඩිනමින් ශක්තිමත් කරගත හැකි බවත්, වැරදි ආර්ථික තීන්දු ගැනීමෙන් සිදුවන්නේ රුපියල නැවත අවප්‍රමාණය වීම බවයි ජනාධිපතිවරයා පෙන්වාදෙන්නේ.

ඇතැමුන් පවසන ආකාරයේ ජනප්‍රිය තීන්දු ගෙන රටේ අනාගතය අඳුරු කිරීමට තමන් සූදානම් නොමැති බවත්, අසීරුතා හමුවේ ද ජනතාවට හැකි සෑම සහනයක්ම ලබාදීමට ඉදිරියේද කටයුතු කරන බවයි “ශිල්ප අභිමානී 2023” ජනාධිපති හස්ත කර්මාන්ත සම්මාන උළෙල අමතමින් ජනාධිපතිවරයා වැඩිදුරටත් සඳහන් කළේ.

මේ සම්බන්ධයෙන් නිකුත් කළ නිවේදනය පහතින්.

ඉතාලියේ සිට මෙරටට යොමු කරන ලද රුපියල් කෝටි 6කට වඩා වටිනාකමක් ඇති හෂීෂ් මත්ද්‍රව්‍ය තොගයක් අඩංගු පාර්සලයක් සීදූව ප්‍රදේශයේ භාණ්ඩ නිෂ්කාශන ආයතනයකින් සොයාගෙන තිබෙනවා.

මෙම මත්ද්‍රව්‍ය තොගය ඉතාලියේ සිට හෝමාගම ප්‍රදේශයේ ලිපිනයකට යොමු කරන ලද පාර්සලයක තිබී සොයාගෙන ඇති බවත්, එහි හෂීස්  කිලෝග්‍රෑම් 4යි ග්‍රෑම් 91ක තොගයක් තිබී ඇති බවයි රේගු මාධ්‍ය ප්‍රකාශක සීවලී අරුක්කොඩ පැවසුවේ.

අදාල පාර්සලය නිශ්කාශනය කර ගැනීමට පැමිණි නියෝජිතයෙකුද එහිදී අත්අඩංගුවට ගෙන ඇති අතර ඔහු ඉදිරි විමර්ශන සඳහා පොලිස් මත්ද්‍රව්‍ය නාශක කාර්‍යාංශය වෙත භාරදුන් බව රේගු මාධ්‍ය ප්‍රකාශකවරයා පැවසුවා.

දින ගණනාවක් පුරා පොළොන්නරුව දිස්ත්‍රික්කයට බලපා ඇති අධික වර්ෂා තත්ත්වය හේතුවෙන් මැදිරිගිරිය ප්‍රාදේශීය ලේකම් කොට්ඨාශයේ කුඹුරු අක්කර 1000 ක් පමණ විනාශ වී තිබෙනවා.

පරාක්‍රම සමුද්‍රය, කවුඩුල්ල, මින්නේරිය හා මොරගහකන්ද යන ජලාශවල වාන් දොරටු විවෘත කිරීමෙන් මහවැලි ගඟ පිටාර ගැලීම නිසා කුඹුරු ජලයෙන් යටවීමෙන් මෙසේ ගොයම විනාශ වී ඇති බවයි ගොවියන් පවසන්නේ.

මෙම වසරේදී මෙරටට සංචාරකයින් ලක්ෂ 23 ක් ගෙන්වා ගැනීමට සැලසුම් කර ඇති බව ශ්‍රී ලංකා සංචාරක සංවර්ධන අධිකාරිය පවසනවා.

ඒ අනුව ඒ හරහා ඇමෙරිකානු ඩොලර් බිලියන 4.6 ක ආදායමක් ඉපැයීම අපේක්ෂාව බවයි එහි සභාපති ප්‍රියන්ත ප්‍රනාන්දු සඳහන් කළේ.

පසුගිය වසරේදී සංචාරකයින් ලක්ෂ 15 ක් ගෙන්වා ගැනීමට සැලසුම් කර තිබූ අතර එම වසරේදී සංචාරකයින් 1,487,303 ක් පැමිණ තිබුණා.

මහා පරිමාණ ව්‍යාපාරිකයින්, ධන කුවේරයින් බදු දැලට හසු කර ගැනීම සඳහා දේශීය ආදායම් දෙපාර්තමේන්තුවේ වෙනම ඒකකයක් මෑතක දී ස්ථාපිත කළ බව මුදල් අමාත්‍යංශ ලේකම් මහින්ද සිරිවර්ධන පවසනවා.

Large tax Payer Unit ලෙස දැනටමත් දේශීය ආදායම් දෙපාර්තමේන්තු ඒකකයක් ඇති බවත්, මෑතකදී High Net-worth Costumers Unit ලෙස නව ඒකකයක් ස්ථාපිත කළ බවයි මුදල් අමාත්‍යංශ ලේකම්වරයා සඳහන් කළේ.

එයට මහා පරිමාණ ව්‍යාපාරිකයින්, ධන කුවේරයින් ඇතුළු පිරිස් අයත් වන බවත් ඔවුන්ගෙන් ලැබිය යුතු බද්ද, රටට ඒ ආකාරයෙන් ලැබෙනවාද යන්න තහවුරු කර ගැනීම සඳහා ක්‍රියාමාර්ග ගනිමින් ඇති බවයි භාණ්ඩාගාර ලේකම් මහින්ද සිරිවර්ධන වැඩිදුරටත් සඳහන් කළේ.

ජපාන ගුවන් සේවයට අයත් ගුවන් යානයක් ටෝකියෝ හි හනෙඩා ගුවන් තොටුපළේ ධාවන පථයකට ගොඩබස්වන විට ගිනිගෙන ඇති බව විදෙස් මාධ්‍ය වාර්තා කරනවා.
ඒ අනුව යානයේ සිටි මගීන් සහ කාර්ය මණ්ඩලය 379 දෙනා ඉවත් කර ඇති බවයි ගුවන් සේවය උපුටා දක්වමින් ජපාන මාධ්‍ය වාර්තා කරන්නේ.
මේ වන විට ගින්න මැඩ පැවැත්වීම සඳහා කටයුතු කරමින් ඇති බවට විදෙස් මාධ්‍ය වාර්තා වැඩිදුරටත් සඳහන් කරනවා.

2024 වසරේ ජනතාවට සහන ලබාදීමට හැකි පසුබිමක් ගොඩනැගෙමින් පවතින බව පාර්ලිමේන්තු මන්ත්‍රී එස්.එම්. චන්ද්‍රසේන පවසනවා.

ඒ අනුව 2024 වසර සුබ වසරක් වනු ඇති පැහැදිළි බවයි මාධ්‍ය හමුවකට එක්වෙමින් මන්ත්‍රීවරයා සඳහන් කළේ.

ඉන්ධන සහ වැට් බද්ද වැඩිවීම නිසා ජනතාව අපහසුතාවට පත්ව ඇති බවත්, මෙය සදාකාලිකවම පවතින දෙයක් නොවන බවයි පාර්ලිමේන්තු මන්ත්‍රීවරයා වැඩිදුරටත් සඳහන් කළේ.