Author: Supun

මහජනතාව අපහසුතාවට පත්වන අයුරින් ක්ෂණික වෘත්තිය ක්‍රියාමාර්ග ක්‍රියාත්මක කිරීමට දුම්රිය ස්ථානාධිපතිවරුන් ක්‍රියාකර ඇතැයි ප්‍රවාහන, මහාමාර්ග වරාය සහ සිවිල් ගුවන් සේවා අමාත්‍යාංශය නිවේදනය කරනවා.

ප්‍රවාහන අමාත්‍යාංශය මට්ටමින් ක්‍රියාමාර්ග ගෙන තිබියදී, දෙපාර්තමේන්තුවේ අකාර්යක්ෂමතාව හා ගැටලු සාකච්ඡා මාර්ගයෙන් විසඳා ගැනීම පසෙක දමා, ජනතාව අපහසුතාවට පත්වන අයුරින් ක්ෂණික වෘත්තිය ක්‍රියාමාර්ග ගැනීම පිළිබඳ දැඩි අප්‍රසාදය පළ කරන බවයි ප්‍රවාහන අමාත්‍යාංශය සඳහන් කරන්නේ.

ජනතාව අපහසුතාවට පත් කරන මෙම වැඩ වර්ජනය පිටුපස වෙනත් උවමනාවක් තිබේද යන සැකය මතුවන බවත්, ආණ්ඩුව අපහසුතාවට පත්කිරීම හා ජනතාව පීඩාවට පත් කිරීම උත්සාහය බවයි ප්‍රවාහන අමාත්‍යාංශය වැඩිදුරටත් කියා සිටින්නේ.

දුම්රිය ස්ථානාධිපතිවරුන් 106 දෙනෙකු බඳවා ගැනීමට මාස කිහිපයකට පෙර අනුමැතිය ලබාදී තිබුණ ද, දෙපාර්තමේන්තුවේ යම් උප දෙපාර්තමේන්තු අතර ඇති අකාර්යක්ෂමතාව හේතුවෙන් මේ වනතෙක් නව බඳවා ගැනීම් කිසිවක් සිදුකිරීමට නොහැකි වී ඇති බවද එම අමාත්‍යාංශය පෙන්වා දෙනවා.

දුම්රිය ස්ථානාධිපතිවරුන්ගේ ගැටලු විසඳීමට ක්‍රියාමාර්ග ගෙන තිබියදීත් මෙසේ කටයුතු කර ඇති බවයි ප්‍රවාහන අමාත්‍යාංශය සඳහන් කරන්නේ.

කොටහේන, සුමිත්‍රාරාම පාරේ නිවසක් ඉදිරිපිට ඊයේ (16) සවස වෙඩි තැබීමක් සිදුවී තිබෙනවා.

යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් අදාළ නිවස ඉදිරිපිට රැඳී සිටි පුරුෂයෙකුට සහ කාන්තාවකට මෙලෙස වෙඩි තබා පලාගොස් ඇති බවත්, වෙඩි වැදීමෙන් ඔවුන් දෙදෙනා තුවාල ලබා කොළඹ ජාතික රෝහලට ඇතුළත් කර ඇති බවයි සඳහන් වන්නේ.

තුවාලකරු වයස අවුරුදු 42 ක් වන අතර තුවාලකාරිය වයස අවුරුදු 70 ක් වන බවත්, ඔවුන් කොටහේන ප්‍රදේශයේ පදිංචිකරුවන් වන බවත් සඳහන්.

පිස්තෝල අවියකින් වෙඩි තැබීම සිදුකර ඇති බවත්, වෙඩි තැබීමට හේතුව මෙතෙක් අනාවරණය වී නොමැති බවයි පැවසෙන්නේ.

අපරාධයට සම්බන්ධ සැකකරුවන් අත්අඩංගුවට ගැනීම සඳහා කොටහේන පොලීසිය වැඩිදුර විමර්ශන සිදුකරනවා.

නව ත්‍රස්ත විරෝධි පනතක් කෙටුම්පත් කිරීම සඳහා මහජන අදහස් ලබා ගැනීමට තීරණය කර ඇති බව අධිකරණ සහ ජාතික ඒකාබද්ධතා අමාත්‍යාංශය පවසනවා.

ඒ අනුව මහජන අදහස්, නිර්දේශ සහ යෝජනා ඇත්නම් 2025 මැයි මස 16 වන දින සිට දින 14 ක් ඇතුළත, ලියුම් කවරයේ වම් කෙළවරේ “ත්‍රස්ත විරෝධී පනත් කෙටුම්පත සඳහා යෝජනා” යනුවෙන් සඳහන් කර, ලේකම්, අධිකරණ සහ ජාතික ඒකාබද්ධතා අමාත්‍යාංශය, නො: 19, ශ්‍රී සංඝරාජ මාවත, කොළඹ 10 යන ලිපිනයට හෝ legal@moj.gov.lk විද්‍යුත් ලිපිනයට යොමු කරන ලෙසයි එම අමාත්‍යංශය ඉල්ලා සිටින්නේ.

නව ත්‍රස්ත විරෝධි පනතක් හඳුන්වාදීම තුලින් නූතන ගෝලීය ත්‍රස්තවාදී අභියෝගයන්ට මුහුණ දීම, දේශීය සහ විදේශිය වශයෙන් පුද්ගලයන්ගේ මානව හිමිකම් සහ අන්තර්ජාතිකව පිළිගත් ප්‍රමිතීන්ට අනුගතවීමට අදහස් කරන බවයි අධිකරණ අමාත්‍යංශය වැඩිදුරටත් සඳහන් කරන්නේ.

මේ සම්බන්ධයෙන් නිකුත් කළ නිවේදනය පහතින්.

රුසියාව සහ යුක්රේනය අතර මුහුණට මුහුණ සාකච්ඡා මේ වන විට ඉස්තාන්බුල් හිදී ආරම්භ වී ඇති බව විදෙස් මාධ්‍ය වාර්තා කර තිබෙනවා.

ඒ අනුව 2022 වසරෙන් පසු දෙරටේ නියෝජිතයින් මුහුණට මුහුණ හමුවන පළමු අවස්ථාව මෙය ලෙසයි වාර්තා වෙන්නේ.

කෙසේ වෙතත්, සාකච්ඡා ආරම්භ වන විට, දෙපාර්ශවය අතර අතට අතදීමක් සිදු නොවූ බවයි පැවසෙන්නේ.

මේ අතර, තමන්ට හැකි ඉක්මනින් රුසියානු ජනපති පුටින් හමුවට අවශ්‍ය බවට අමෙරිකානු ජනාධිපතිවරයා ප්‍රකාශ කර තිබෙන බවයි වැඩිදුරටත් සඳහන් වන්නේ.