Author: Supun

සූර්ය විදුලිබල උත්පාදකයන් 17 දෙනෙකු විසින් ගොනුකර තිබූ රිට් පෙත්සමක්, කරුණු තහවුරු කිරීම සඳහා අගෝස්තු 04 වැනිදා කැඳවන ලෙස අභියාචනාධිකරණය අද (25) නියෝග කර තිබෙනවා.

සූර්ය විදුලිබල උත්පාදකයන්ට එම විදුලිය මිලදී ගැනීම වෙනුවෙන් ගෙවනු ලැබූ ගාස්තු අඩු කිරීමට රජය විසින් ගෙන තිබෙන තීරණය බලරහිත කිරීමේ නියෝගයක් නිකුත් කරන ලෙස ඉල්ලා මෙම පෙත්සම ඉදිරිපත් කර තිබුණා.

මෙම පෙත්සම අද අභියාචනාධිකරණ විනිසුරු ප්‍රියන්ත ප්‍රනාන්දු ඉදිරියේ කැඳවනු ලැබූ අවස්ථාවේදී පෙත්සම්කාර පාර්ශ්වය වෙනුවෙන් පෙනී සිටි නීතිඥ මනෝහර ද සිල්වා ඉදිරිපත් කළ කරුණු සලකා බැලූ විනිසුරු මඬුල්ල විසින් මෙම පෙත්සම කරුණු තහවුරු කිරීම සඳහා අදාළ නියෝගය නිකුත් කර තිබෙනවා.

වහලවල් මත සවිකර තිබෙන සූර්යබල උත්පාදන කෝෂ හරහා නිෂ්පාදනය කරනු ලබන විදුලිය මිලදී ගැනීම සඳහා විදුලිබල මණ්ඩලය මෙන්ම LECO සමාගම විසින් ගෙවනු ලබන ගාස්තු පසුගිය ජූලි 01 වැනිදා සිට අත්තනෝමතික ලෙස අඩු කිරීමට අමාත්‍ය මණ්ඩලය තීරණය කර ඇති බවත්, විදුලිබල පනතට අනුව මෙවැනි මිල අඩු කිරීමක් සිදුකිරීම සඳහා මහජන උපයෝගිතා කොමිෂන් සභාවේ අනුමැතිය ලබාගත යුතු බවත්, එහෙත් මෙම අඩු කිරීම සඳහා එම කොමිෂන් සභාවේ අනුමැතිය ලබාගෙන නොමැති බවයි ඔවුන් චෝදනා කරන්නේ.

අමාත්‍ය මණ්ඩල තීරණයක් මත පමණක් මෙලෙස ගාස්තු අඩු කිරීමට රජය විසින් ගෙන තිබෙන තීරණය සම්පූර්ණයෙන්ම නීතියට පටහැනි බවත්, එබැවින් එම තීරණය බල රහිත කිරීමේ නියෝගයක් නිකුත් කරන ලෙසත් පෙත්සම්කරුවෝ වැඩිදුරටත් ඉල්ලා තිබෙනවා.

අර්ජුන් ඇලෝසියස්ට එරෙහි නඩුවක් එළඹෙන ජූලි මස 23 වැනිදා කැඳවීමට අධිකරණය විසින් නියෝග කර තිබෙනවා.

නොච්චියාගම පී.ඩී.ජී. ඇග්‍රි බිස්නස් සමාගමෙන්, කැබලි කරන ලද බඩඉරිඟු කිලෝ විශාල ප්‍රමාණයක් ලබාගෙන, ඊට අදාළ මුදල් නොගෙවා, රුපියල් පන් කෝටි විසි නව ලක්ෂයක (52,900,000) මුදලක් වංචා කර, සාපරාධී විශ්වාසය කඩ කිරීම සම්බන්ධයෙන් ඔහුට එරෙහිව චෝදනා එල්ල වී ඇති බවයි සඳහන් වෙන්නේ.

ඊට අදාළ විමර්ශනයන්හි ප්‍රගතිය දන්වන ලෙස අනුරාධපුර ප්‍රධාන මහේස්ත්‍රාත් සහ අතිරේක දිසා විනිසුරු නාලක සංජීව ජයසූරිය විසින් අපරාධ පරීක්ෂණ දෙපාර්තමේන්තුවට නියෝගයක්ද නිකුත් කර ඇති බවයි සඳහන් වෙන්නේ.

එසේම අදාළ නඩුව කැඳවීමට නියමිත ලබන ජූලි 23 දින සැකකාර අර්ජුන් ඇලෝසියස් හට යළිත් අනුරාධපුර ප්‍රධාන මහේස්ත්‍රාත් අධිකරණය හමුවේ පෙනී සිටින ලෙසද නියෝග කර ඇති බවයි වැඩිදුරටත් සඳහන් වෙන්නේ.