ශ්රී ලංකා නාවික හමුදාවේ බුද්ධි අංශයට ලද තොරතුරකට අනුව පසුගියදා මහා මුහුදේදි සිය භාරයට ගත් ආයුධ සහ මත්ද්රව්ය තොගය අද දික්ඕවිට ධීවර වරායෙන් ගොඩබිමට රැගෙන ආවේය.
එම ආයුධ තොගය සැලකෙන්නේ නාවික හමුදාව විසින් මෙතෙක් මහ මුහුදේදී සිය භාරයට ගත් වැඩිම ආයුධ තොගය ලෙසටය.
එමෙන්ම කිලෝග්රෑම් 600කට අධික අයිස් හා හෙරොයින් අඩංගු මත්ද්රව්ය උර 48ක්ද නාවික හමුදාව සිය භාරයට ගෙන තිබුණි.
ලංකා නාවික හමුදාවේ බුද්ධි අංශයට පසුගිය 8 වැනිදා ලද විශ්වසනීය තොරතුරකට අනුව දිවයිනට දකුණු දෙසින් වූ ජාත්යන්තර මුහුදේදි දිගු දුර මෙහෙයුම් නෞකා යොදාගනිමින් විශේෂ මෙහෙයුමක් දියත් කෙරුණි.
මෙහෙයුම අතරතුරදී සැකකටයුතු බහුදින ධීවර යාත්රා දෙකක් හා සැකකරුවන් 10 දෙනෙකු සිය භාරයට ගැනීමට නාවික හමුදා නිලධාරීන්ට හැකිවුණි.
ඉන් එක් බහුදින ධීවර යාත්රාවක තිබි මත්ද්රව්ය අඩංගු බවට සැක කෙරෙන උර විශාල ප්රමාණයක් හා ගිනිඅවි මෙන්ම මැගසින්ද හමුව තිබුණි.
අදාළ බහුදින යාත්රා දෙක සැකකරුවන්ද සමඟ අද පෙරවරුවේ දික්ඕවිට වරායෙන් ගොඩබිමට රැගෙන ආවේය.
පොලිස් මත්ද්රව්ය නාශක කාර්යංශයේ නිලධාරීන් සිදුකළ මූලික විමර්ශනයේදි අනාවරණ වුණේ යාත්රාවෙහි වූ උර 48ක කිලෝග්රෑම් 600කට අධික බරකින් යුත් අයිස් හා හෙරොයින් ඇති බවය.
එම තොගයේ වටිනාකම රුපියල් බිලියන 10කට අධිකය.
වැඩිදුරටත් අනාවරණ වී ඇත්තේ මෙම මත්ද්රව්ය තොගය මෙරට සිටින මත්ද්රව්ය ජාවාරම්කරුවන් කිහිපදෙනෙකු අතර බෙදාහැරීම සඳහා රැගෙන එමින් තිබූ බවය.
එමෙන්ම පිස්තෝල වර්ගයේ ගිනි අවි 8ක්, ඒවාට යොදන මැගසින්, T56 වර්ගයේ ගිනි අවි 2ක් සහ M16 වර්ගයේ ගිනි අවියක් ද යාත්රාවේ තිබී ඇති අතර ඒවා බෙල්ජියම, චීනය, එක්සත් රාජධානිය ඇතුළු රටවල් 4ක නිෂ්පාදිත නවීනතම ගිනි අවි බවට මේ වනවිට හඳුනාගෙන තිබේ.
M16 වර්ගයේ ගිනි අවිය මෙරට ආරක්ෂක අංශවල විශේෂ රාජකාරිවල නිරත වන සෙබළුන් පමණක් භාවිත කරන අවියක් බව වාර්තා වෙයි.
නාවික හමුදාව සඳහන් කළේ තමන් මහ මුහුදේදි සිය භාරයට ගත් වැඩිම ගිනි අවි තොගය මෙය බවය.
මෙම ගිනි අවි කුලී පදනම මත අපරාධකරුවන්ට ලබාදීමට සැලසුම් කර තිබූ ඒවා බවද මූලික විමර්ශනවලදි අනාවරණ වි තිබේ.
අදාළ ආයුධ සහ මත්ද්රව්ය තොගය අරාබි මුහුදේදි ඉරාන නෞකාවකින් ධීවර යාත්රාවට ලබාදී ඇති බවට නාවික හමුදාව සැක පළ කරයි.
මත්ද්රව්ය හා ආයුධ තිබූ යාත්රාවේ සිටි ධීවරයින් 5දෙනාගෙන් සිදුකළ ප්රශ්න කිරීම්වලදී අනාවරණ වී ඇත්තේ ඔවුන් මීට මාස දෙකහමාරකට පමණ පෙර ධීවර රැකියාවට යන මුවාවෙන් හලාවතින් දියඹට ගොස් ඇති අතර එලෙස දියඹට ගොස් ඇත්තේ පළමු වරට බවය.
මෙහි ධීවරයින් නාවික හමුදාව විසින් අත්ඩංගුවට ගන්නා අවස්ථාවේදි දැඩි කුසගින්නකින් සිට ඇති අතර ඔවුන් පවසා ඇත්තේ මාසයක කාලයකට පමණක් අවශ්ය ආහාර රැගෙන ආවද මාස 2කට අධික කාලයක් මුහුදේ රැඳී සිටීමට සිදුවු නිසා ආහාර අවසන් වූ බවය.
මෙහිදි අත්අඩංගුවට ගත් ධීවරයින් අතරින් දෙදෙනෙකු හෙරොයින්වලට ඇබ්බැහි වුවන් වන අතර ඔවුන් උරවල තිබූ හෙරොයින් භාවිත කළ බවත් නාවික හමුදා නිලධාරීන් හමුවේ පවසා තිබේ.
නාවික හමුදාව විසින් මෙම බහුදින යාත්රාව සිය භාරයට ගැනීමෙන් පසු තවත් බහුදින යාත්රාවක් සැකකටයුතු ලෙස තමන් දෙසටම පැමිණෙන ආකාරය නිරීක්ෂණය කර තිබුණි.
පසුව එම යාත්රාව පරික්ෂා කිරීමේදී මත්ස්ය අස්වැන්නක් හෝ නොමැතිවූ එම යාත්රාවේ තිබී සැටලයිට් දුරකථනයක්ද සොයාගෙන තිබුණි.
පසුව නාවික හමුදාව ඔවුන්ගෙන් සිදුකළ ප්රශ්න කිරීම්වලදි පවසා ඇත්තේ තමන් මීට මාසයකට පෙර ගාල්ලෙන් ධීවර රැකියාවට යන බව පවසමින් පිටත්ව පැමිණ, ආයුධ තිබූ යාත්රාවේ සහායට ඔත්තු බැලීම පමණක් සිදුකළ බවය.
එමෙන්ම ආයුධ හා හෙරොයින් ප්රවාහනය කළ යාත්රාවේ ස්කිපර්වරයාට රුපියල් ලක්ෂ 30ක මුදලක්ද, ඔත්තු බැලූ යාත්රාවේ ස්කිපර්වරයාට රුපියල් ලක්ෂ 25ක මුදලක්ද ලබාදී ඇති බව නාවික හමුදා නිලධාරීන් අනාවරණ කර ගෙන තිබේ.
මේ අතර මෙම යාත්රා දෙක සමඟ ගොඩබිම සිට සම්බන්ධීකරණ කටයුතු සිදුකළ පුද්ගලයෙකු හා ආයුධ ප්රවාහනය කළ යාත්රාවේ හිමිකරු පොලිස් අත්අඩංගුවට ගැනුණි.
ප්රශ්න කිරීම්වලදි යාත්රාවේ හිමිකරු පවසාඇත්තේ තමන්ට ධීවර යාත්රා 6ක් ඇති බවත් පසුගියදා සීෂෙල්ස්හිදි ගිනි තැබීමට ලක්වූයේද තමන්ට අයත් යාත්රා දෙකක් බවය.
යාත්රා සම්බන්ධීකරණය කළ පුද්ගලයාගෙන් ප්රශ්න කිරීමේදී, ඔහු මීට පෙරද කිලෝග්රෑම් 370කට අධික හෙරොයින් තොගයක් ගොඩබිමට රැගෙන විත් බෙදාහැරි බව හෙළිවී තිබේ.
මෙම මත්ද්රව්ය සහ ආයුධ තොගය විදෙස්ගතව සැඟව සිටින අපරාධකරුවන් වන පරෙවි සුදා සහ අංගොඩ ප්රියංකර නමැත්තන්ට අයත් බවට සැකකරේ.
පොලිස්පතිවරයාගේ උපදෙස් මත ත්රස්ත මර්දන කොට්ඨාසය හා පොලිස් මත්ද්රව්ය නාශක කාර්යාංශය ඒකාබද්ධව වැඩිදුර විමර්ශන ක්රියාත්මකය.
