මෙම වසර තුළ විදුලි ගාස්තු සංශෝධනයක් සිදු වන්නේ නැහැ – මහජන උපයෝගීතා කොමිසම

මෙම වසර තුළ විදුලි ගාස්තු සංශෝධනයක් සිදු නොවනු ඇති බව මහජන උපයෝගීතා කොමිසම පවසනවා.

ඒ අනුව ගාස්තු සංශෝධනයට අදාළ යෝජනා ලංකා විදුලිබල මණ්ඩලය විසින් ඉදිරිපත් කිරීම ප්‍රමාදවීම මෙම තත්ත්වයට හේතුව බවයි එම ආයතනික සන්නිවේදන අංශය සඳහන් කළේ.

විදුලි ගාස්තු සංශෝධනයට අදාළ යෝජනා පසුගිය සැප්තැම්බර් අවසානයේදී මහජන උපයෝගීතා කොමිසමට ඉදිරිපත් කර තිබූ අතර පසුව එම කොමිසම දැනුම් දී තිබුණේ එම ගාස්තු අඩුවීම් ප්‍රමාණවත් නොවන හෙයින් යළි යෝජනාවක් ඉදිරිපත් කරන ලෙසයි.

අදාළ යෝජනා නොවැම්බර් 08 වනදාට පෙර භාරදෙන ලෙස දැනුම්දී තිබුණද යළි නොවැම්බර් 22 දක්වා කල් ඉල්ලා සිටියත්, ඔවුන් තවත් සති දෙකක කාලයක් ලබාදෙන ලෙස ඉල්ලා ඇති බවයි මහජන උපයෝගීතා කොමිසම සඳහන් කළේ.

නව යෝජනාව ඉදිරිපත් කළ ද එය අධ්‍යනය කිරීම සඳහා සති 06 ත් 08 ත් අතර කාලයක් ගතවන බවයි මහජන උපයෝගීතා කොමිසම වැඩිදුරටත් ප්‍රකාශ කළේ.